Pītɛ̍ Di̍i̍ŋ Ndɔ̄ɔ̍ 1 - Yāu̍ Mɛ̄lɛ̄ka̍a̍

¹ Ya̍ bu̍ɛ̍i̍ Chi̍i̍sū Ki̍li̍tīo̍o̍ Sa̍i̍mɔ̄ŋ Pītɛ̍, ya̍ o̍ ve᷅m māā hɔ̄ltē ndɔ̄ wo̍, ya̍ cho̍ yāu̍wo̍ ho̍ō pōōnyīa̍a̍ ni̍. I̍ cho̍ yāu̍wo̍ ho̍ō pōōnyīa̍a̍ nāa̍ nya̍ chūā kpo̍u̍, nya̍ sɔ̍la̍ tīīnda᷄ŋ sɔ᷅vɛ̍ pīlɔ̍ɔ̍ ō na̍a̍ ŋ̄ sɔ̄la̍ o̍ Mɛ̄lɛ̄ka̍ ni᷄ŋ ndo̍ wa̍. Sa̍bū i̍ yɔ̍nu̍ŋ le̍nde̍ wo̍ cho̍ ni̍, māā Chi̍i̍sū Ki̍li̍tī o̍ cho̍ Mɛ̄lɛ̄ka̍ nāa̍, ndu̍yɛ̍ mbo̍ wā wānā na̍a̍ pīŋīa̍a̍ wo̍, ō chō sa̍kpō.

² Mɛ̄ɛ̍ nya̍ chō hīōūwɔ̄ɔ̍ lāchī a̍ Mɛ̄lɛ̄ka̍ sīnāa̍ nda̍ Māsānɔ̍ nāa̍ Chi̍i̍sū, wānāā nda̍ chō kpe̍e̍kpe̍i̍ ya̍ yɛ̍, I̍ cho̍ pīɛ̄īle̍ŋ māā ndu̍ Mɛ̍lɛ̄ka̍ ō hīo̍u̍ la̍chi̍ a̍ nya̍ yīya᷄ŋndo̍ chōo̍, ndu̍yɛ̍ mbō hīōū lāchī a̍ nya̍ kɔ̄l nyūlōo̍ kīo̍o̍ ta̍u̍ ta̍u̍.

Ka̍ālā nyāla̍ŋ lā wa̍ māā wānāā Mɛ̄lɛ̄ka̍ vēēlu̍

³ Ki̍li̍tī ve̍e̍lu̍ na̍a̍ le̍ na̍a̍ bɛ̍ɛ̍ mī ŋ̄ sɔ̄la̍ nāŋɔ̄ɔ̄ ndɔ̄ɔ̍, a̍ dɛ̍nɛ̍ ndɔ̄ kɛ̍ndɔ̄ɔ̍. Mɛ̄ɛ̍ na̍a̍ ŋ̄ sīna̍ ni᷅ŋ wānā kpe̍e̍kpe̍i̍ o̍ cho̍ wo̍ yɛ̍, nyɛ̄ o̍ nyɛ̄ na̍a̍ ŋ̄ nɔ̄ le̍ sɔ̄lāa̍ le̍ wāa̍ yōōmū māā wānāa̍ cho̍ le̍ Mɛ̄lɛ̄ka̍, kpāāya̍ īMɛ̄lɛ̄ka̍ya̍ o̍ nɔ̍ wo̍, ō chīi̍ na̍a̍ mu̍ŋ kē.

⁴ Le̍ he̍ī, ō ke̍ na̍a̍ mākīāā nyɛ̄m kɛ̄ndɛ̄ŋ bɛ̄ndūŋ o̍ chu̍e̍l na̍a̍ mu̍ŋ būŋgɛ̄i̍ yo̍ŋ, le̍ nya̍ māndāa̍ yɔ̄ŋi̍ sɔ̄ɔ̍ŋ wɔ̍ɔ̍ŋūŋ chi̍e̍ēŋndo̍ŋ ŋ̍ cha᷅ŋ o̍ yēēma̍ŋ wɔ̍ɔ̍ŋ ŋ̄wāŋndā chīe̍e̍ wo̍ŋ ni᷄ŋ ndo̍ŋ, ŋ̄ tɛ̄ɛ̄mbu̍u̍ yo̍o̍mūlā nyāla̍ŋ. Ndu̍yɛ̍ o̍ ko̍ŋ kɔ̍ɔ̍lī, mī lā sɔ̄la̍ Mɛ̄lɛ̄ka̍yɛ̍i̍ ndūɛ̍i̍.

⁵ Le̍ sa̍bū kōŋ, vɛ̄lɛ̄ a̍ tīīnda᷄ŋ nya̍ nɔ̄ o̍ Ki̍li̍tī ni̍ŋ ndo̍, lā kīndi̍ vɛ̍lɛ̄ kpo᷅ke̍ mī lā wa̍ o̍ nīīlū dīāndāā ni᷄ŋ. Ō fūla̍ o̍ nīīlū dīāndāa̍ kɔ̄ɔ̄lī, lā kīndi̍ vɛ̍lɛ̄ kpo᷅ke̍ mī lā sīna̍ nyɛ̄ Mɛ̄lɛ̄ka̍ hɛ̄na̍ŋ nya̍ le̍ mī lā tōsa̍ wo̍.

⁶ Ō fūla̍ o̍ nyɛ̄ Mɛ̄lɛ̄ka̍ hɛ̄na̍ŋ ndo̍ sīnāa̍ kɔ̄ɔ̄lī, lā tīu̍ kɔ̄ltā nyāla̍ŋ bā. Ō fūla̍ o̍ kɔ̄ltā nyāla̍ŋ bāa̍ tīūwo̍ kɔ̄ɔ̄lī, lā si᷄m nyɛ̄ kɛ̄ndɛ̄ yi̍ o̍ tīīnda᷄ŋ nya̍ nɔ̄ o̍ Mɛ̄lɛ̄ka̍ ni᷄ŋ ndo̍ chōo̍. Ō fūla̍ o̍ sīsi̍la̍ŋ kɔ̄ɔ̄lī nyɛ̄ kɛ̄ndɛ̄ yi̍ o̍ tīīnda᷄ŋndo̍ ni᷄ŋ, lā wa̍ yōōmū māā wānāa̍ cho̍ le̍ Mɛ̄lɛ̄ka̍.

⁷ Ō fūla̍ o̍ wāa̍ yōōmū māā wānāa̍ cho̍ le̍ Mɛ̄lɛ̄ka̍, lā bīya᷅ŋ ve᷅llāa̍ vēllē māā pɔ̄mbɔ̄ɔ̍ a̍ bɛ̄ndū. Ō fūla̍ o̍ bīya᷅ŋndo̍ kɔ̄ɔ̄lī māā pɔ̄mbɔ̄ɔ̍ a̍ bɛ̄ndōo̍, lā kāāla̍ wa̍nā o̍ wānā.

⁸ Ka̍āla̍ŋ nda᷅ŋ ki̍nɛ̍i̍, tē lā nɔ̄ la̍ŋ pɛ̍, ndu̍yɛ̍ mī ka̍ālā kālāla̍ŋ lā hīōū lāchī a̍ hīndɔ̄ɔ̍ o̍ yōōmūlā nyāla̍ŋ ni᷄ŋ pɛ̍, mɛ̄ɛ̍ sīnā nya̍ sīna̍ wāna̍ Māsānɔ̍ nāa̍ Chi̍i̍sū Ki̍li̍tī cho̍ wo̍ wo̍, mɛ̄ɛ̍ sīnā kōŋ ō ve᷅ su̍ɛ̍i̍ fo̍ndō fu̍u̍ le̍, tɔ̄nɔ̄ɔ̍ wa᷅ le̍ni̍ŋ ni̍.

⁹ Wānā la̍a̍la᷄ŋndo̍ o̍ nɔ̍ ka̍āla̍ŋ nda᷅ŋ te̍, mɛ̄ɛ̍ ō chō māchūāā mɛ̄ɛ̍ wāna̍ chi᷅ la̍pi̍ le̍ wo̍, kɛ̄lɛ̄ŋgāā mɛ̄ɛ̍ wāna̍ chi᷅ kpo̍so̍ŋ te̍ wo̍ ō chō yɛ̍. Wānā la̍a̍la᷄ŋ wa̍ā le̍nde̍ mɛ̄ɛ̍ ō chīi̍ pūɛ̄ɛ̄nɔ᷄ŋ a̍ yīŋ o̍ sɔ̍la̍ le̍ yɔ̄ŋndā ndɔ̄la̍ wɔ̍ɔ̍ŋnda̍ŋ ndo̍.

¹⁰ Le̍la̍ŋ chāāŋāā nīāā wa̍nāā lāāla᷄ŋnda̍, lā kīndi̍ o̍ ka̍lā kpo᷅ke̍ māā, vēēlū Mɛ̄lɛ̄ka̍ vēēlu̍ nya̍ mbo̍ chūā nya̍ le̍ wāa̍ wānāā ndɔ̄ wo̍, mī lā chɔ᷄m māā wānāā wāā le̍nde̍ nya̍ chō ni̍. Tē lā tōsa̍ ke̍ŋ pɛ̍, mɛ̄ɛ̍ lā fe̍ŋāŋ o̍ nɛ̄i̍ Mɛ̄lɛ̄ka̍a̍ chōo̍ le̍.

¹¹ O̍ ko̍ŋ, Māsānɔ̍ nāa̍ Chi̍i̍sū Ki̍li̍tī, o̍ cho̍ wānā na̍a̍ pīŋīa̍a̍ wo̍, mī Mɛ̄lɛ̄ka̍ ke̍ na̍a̍ di̍o̍o̍ ō fūūlāā mɛ̍ɛ̄, le̍ lūɛ̄īyɔ̄ɔ̍ o̍ māsāle̍ ndɔ̄le̍ fɛ̍ɛ̍ŋ a̍ fɛ̍ɛ̍ŋnde̍ŋ ni᷄ŋ.

¹² Mi̍ chē bɛ̍ɛ̍ mi̍ lā sīnā ni᷅ŋ sɔ̄ɔ̍ŋ mu᷅ŋ, ndu̍yɛ̍ mi̍ lā wā īsīsi̍ o̍ tōnya̍ nda̍ pɛ̄ɛ̄ku̍ nya̍ wo̍ chōo̍ nyɛ̍ kɛ̄ndɛ̄ yi̍ ni̍, kɛ̍ I̍ hɛ̍na̍ŋ mī wa̍ nya̍ yīyāla᷄ŋndo̍ a̍ mu̍ŋ o̍kɔ̄ɔ̄ te̍le̍ŋ o̍ te̍le̍ŋ.

^13-14 I̍ si̍nā māā te̍le̍ŋ ya̍ I̍ nɔ̍ le̍ wāa̍ yōōmū wo̍ ō bēndu̍ lɛ̍ le̍, kāni̍ fo̍ndōle̍, Māsānɔ̄ɔ̍ Chi̍i̍sū Ki̍li̍tī chɔ᷄m ya̍ ndi̍ le̍nde̍. Kɛ̍ ndu̍yɛ̍, bōōndi̍i̍ ya̍ I̍ cho̍ wɔ̄ he̍ī yōōmū ve̍, I̍ chu̍a̍ ndi̍ māā wa̍li̍ nī, le̍ nya̍ wāa̍ yīyāla᷄ŋndo̍ a̍ sɔ̄ɔ̍ŋ mu᷅ŋ o̍kɔ̄ɔ̄, le̍ nya̍ kɔ̄lta̍ŋ kpēēŋīa̍a̍ le̍ mī lā wa̍ mu̍ŋ tōsāa̍.

¹⁵ Le̍la̍ŋ, I̍ cho̍ kīndī kpo᷅ke̍ mī I̍ chɔ̍m nya̍ nɛ̄i̍ nya̍ nɔ̄lā mī lā lōōnu̍ŋ a̍ sɔ̄ɔ̍ŋ mu᷅ŋ ndo̍.

Lā ya᷄ŋ nyɛ᷅ wānāa̍ su̍a̍ā le̍ Mɛ̄lɛ̄ka̍ wa̍ ā dīmi̍ a̍ Chi̍i̍sū o̍kɔ̄ɔ̄ wo̍ lānī

¹⁶ Pɛ̄ɛ̄kū na̍a̍ ŋ̄ wa̍ nya̍ a̍ Māsānɔ̍ nāa̍ Chi̍i̍sū Ki̍li̍tī hūnɔ̄ɔ̄ ndɔ̄ɔ̍ o̍ ko̍ŋ kɔ̍ɔ̍lī a̍ kpāāya̍ ndɔ̄ɔ̍ o̍kɔ̄ɔ̄ wo̍, ō cho̍ su̍ɛ̍i̍ na̍a̍ pi̍la̍ ŋ̍ cha̍l mi̍ ŋ̄ kɛ̄ɛ̄sīāā mɛ̄ɛ̍ wāŋnda̍ kɛ̄ɛ̄sīāā bu̍ndɔ᷄ŋ yɛ̍ le̍. Kāni̍ fo̍ndōle̍, na̍a̍ ŋ̄ chē Chi̍i̍sū o̍ kpāāya̍ ndɔ̍ īMɛ̄lɛ̄ka̍ya̍a̍ ni᷄ŋ a̍ lēhɔ̄l pɛ̍ɛ̍ŋ.

¹⁷ Ŋ̄ wa̍ lo̍ŋ mi̍ Mɛ̄lɛ̄ka̍ Fi̍nyā ndɔ̄ ke᷅ ndu̍ bɛ̄ɛ̄le̍ŋ, ndu̍yɛ̍ mbo̍ chɔ̄m a̍ mɛ̄ɛ̍ Chi̍i̍sū cho̍ wāna̍ kɔ̄ndɔ̄fi̍li̍ yɛ̍. Mi̍ Māsānɔ̄ɔ̍ Mɛ̄lɛ̄ka̍ bɛ̄ndōo̍, o̍ cho̍ o̍ nāŋɔ̄ɔ̍ ni᷄ŋ ndo̍ dīmī a̍ ndu̍ o̍kɔ̄ɔ̄ āā, “Po̍ nī ka̍a̍lāa̍ cho̍ ho̍ō ni̍. I̍ hi̍ni̍ kɔ̄l a̍ ndu̍ ta̍u̍.”

¹⁸ Bōōndi̍i̍ Mɛ̄lɛ̄ka̍ sōō mi̍ dīōmndo̍ fūlā o̍ ha̍la̍a̍ ni᷄ŋ nde̍, na̍a̍ pi̍la̍ kpe̍e̍kpe̍i̍ mi̍ ŋ̄ tūɛ̄ī nyɛ̄ o̍ di̍mi̍ wo̍, kāni̍ fu̍u̍le̍, na̍a̍ Chi̍i̍sū wa̍ā ŋ̍ wa̍ o̍ pēmbīī Mɛ̄lɛ̄kɛ̍i̍ kēŋ chōo̍ ni̍.

¹⁹ O̍ ko̍ŋ, mi̍ ŋ̄ chɔ̄ɔ̄lū lāāla᷄ŋ nyɛ̍ kɛ̄ndɛ̄ kɛ̍ndɛ̍ī, a̍ nyɛ̄ wānāa̍ su̍a̍ā le̍ Mɛ̄lɛ̄ka̍ wa̍ ā dīmi̍ a̍ ndu̍ o̍kɔ̄ɔ̄ wo̍. Ō wā su̍ɛ̍i̍ kɛ̍ndɛ̄ nya̍ bɛ̍ɛ̍ mī lā ya᷄ŋ nīla̍ŋ o̍ nyɛ̄ nda̍ dīmi̍ wo̍. Kāni̍ fu̍u̍le̍, sūɛ̍i̍ he̍ī chō māchūāā mɛ̄ɛ̍ nyūmnda̍ŋ mā wā nu̍a̍ā mā tūālāā, kɛ̍ mī la̍mbūi̍yo̍ wa̍ ō mɛ̄ndūlāā le̍ mbō lo̍ o̍ ko̍ŋ ha̍a̍a̍, mī pāa̍le̍ŋ lē sɛ̄ yɛ̍. Lā ya᷄ŋ ni᷅la̍ŋ o̍ nyɛ̄ nda̍ dīmi̍ wo̍ le̍, mbō lo̍ o̍ ko̍ŋ, mī nyɛ̄ wa̍wo̍ŋ Ki̍li̍tīo̍o̍ ō dēndū nya̍ o̍ lākɔ̄l, mɛ̄ɛ̍ lūe̍i̍ īdīi̍ye̍ ī dīāndū nu̍a̍ā yɛ̍.

²⁰ Lā ya᷄ŋ ni᷅la̍ŋ nyɛ̄ kɛ̄ndɛ̍ī o̍ nyɛ̄ ya̍ I̍ cho̍ ho̍ō nya̍ dīmūllo̍ wo̍. I̍ hɛ̍na̍ŋ nya̍ mī lā sīna̍ pɛ̄ŋgu̍ māā, sɔ̄ɔ̍ŋ wānāa̍ su̍a̍ā le̍ Mɛ̄lɛ̄ka̍ wa̍ ā sōō, ndu̍yɛ̍ ma̍ pōōnyīāā o̍ Yāu̍ Mɛ̄lɛ̄ka̍a̍ ni᷄ŋ ndo̍ŋ, ō ve̍ nda̍ pi̍la̍ le̍ cha̍l ma̍ kɛ̄ɛ̄sīāā mu̍ŋ te̍.

²¹ Kāni̍ fu̍u̍le̍, ō cho̍ wa᷅na̍ chi̍e̍e̍ le̍ kɛ̍ɛ̍sīāā yo̍ōŋgu̍ cha᷅ŋ o̍ Mɛ̄lɛ̄ka̍ lo̍ wo̍ le̍. Nyi̍na̍ Kāsīo̍o̍ ndu̍ tu̍āl wa᷅ŋnda̍ kɔ̄ɔ̄lī ni̍, mbō chɔ̄m nda̍ yōōŋgūla̍ cha᷅ŋ o̍ Mɛ̄lɛ̄ka̍ lo̍ la̍ŋ.