Chɔ᷄ŋ Di̍i̍ŋ Ndɔ̄ɔ̍ 1 - Yāu̍ Mɛ̄lɛ̄ka̍a̍

¹ Ya̍ cho̍ ho̍ō māā lāŋu̍nɔ̄ ka̍lā o̍ ku̍ndā wānāā lāāla᷄ŋnda̍ chōo̍ wo̍, ya̍ cho̍ yāu̍wo̍ ho̍ō pōōnyīa̍a̍ ni̍. I̍ cho̍ ndu̍ pōōnyīa̍a̍ nāa̍ nūm wānā la̍nɔ̍ Mɛ̄lɛ̄ka̍ hɛ̄li̍ ho̍ō wo̍ chūā, nya̍ chūāūwāā nūmnda̍, nya̍ ya̍ I̍ ka̍a̍la̍ a̍ kɔ̄l nūu̍ kpo̍u̍ wa̍. Kɛ̍ ndu̍yɛ̍, ō cho̍ ko̍ ya̍ le̍ ka̍a̍la̍ nya̍ le̍. Wānāa̍ si̍nā to᷅nya̍ cho̍ a̍ Mɛ̄lɛ̄ka̍ o̍kɔ̄ɔ̄ wa̍ bɛ̍ɛ̍, ā kāāla̍ nya̍.

² Kāni̍ fo̍ndōle̍, tōnya̍a̍ ho̍ō chō o̍ kɔ̄ltā nāāla̍ŋ ni᷄ŋ, ndu̍yɛ̍ ō chō wā lo̍ŋ le̍ fɛ̍ɛ̍ŋ a̍ fɛ̍ɛ̍ŋ.

³ I̍ cho̍ Mɛ̄lɛ̄ka̍ Fi̍nyā nāa̍ pīɛ̄īyo̍, a̍ po̍ ndɔ̄ɔ̍ Chi̍i̍sū Ki̍li̍tī, māā mɛ̄ɛ̍ na̍a̍ ŋ̄ chō tōnya̍a̍ ho̍ō tōlɔ̄ɔ̍ kɔ̄ɔ̄lī, ndu̍yɛ̍ mi̍ ŋ̄ wā kāāli̍āŋndo̍ vēllāa̍ vēllē yɛ̍, māā ā yīya̍ŋ na̍a̍ chōo̍ mā tūīīnu̍ŋ na̍a̍ īnyīɛ̍ɛ̍, ndu̍yɛ̍ mā ke̍ na̍a̍ kɔ̄l nyūlōo̍ lēni᷄ŋ fɔ̍.

Sīlāa̍ a̍ kāāli̍āŋndo̍ o̍kɔ̄ɔ̄

⁴ Mɛ̄ɛ̍ ya̍ I̍ tu̍e̍ī māā chūāā nūmnda̍ ā pūm, ā chō o̍ nɛ̄i̍ tōnya̍a̍ chōo̍ mɛ̄ɛ̍ Fi̍nyā nāa̍ chōo̍ cho̍o̍ o̍ di̍mu̍l na̍a̍ yɛ̍, mi̍ na᷅ŋ kɔ̄l ta̍u̍ ta̍u̍.

⁵ O̍ he̍ī ni᷄ŋ wɛ̄ɛ̄ŋndo̍, I̍ cho̍ nu̍m nyɔ̄ɔ̄lōo̍ yāndi̍i̍ lā kāāli̍āŋ ve̍llāa̍ vēllē. Ō cho̍ sa̍wā sɛ̍nɛ̄ī le̍ ya̍ I̍ cho̍ nya̍ ho̍ō pōōnyīāl te̍. Sāwāa̍ ho̍ō chō na̍a̍ ni᷅ŋ pāāndū ō kēna᷄ŋ, chɔ̍ŋ a̍ bōōndi̍i̍ na̍a̍ ŋ̄ sīmnu᷄ŋ wa̍nāā lāāla᷄ŋ o̍ Chi̍i̍sū ni᷄ŋ nde̍.

⁶ Kāālā ya̍ I̍ cho̍ sūɛ̍i̍ a̍ ndu̍ o̍kɔ̄ɔ̄ wo̍, ndu̍ cho̍ ho̍ō ni̍ māā ŋ̄ chūānu᷅ŋ sāwāla̍ Mɛ̄lɛ̄ka̍la̍ŋ. Sāwa̍ nya̍ tūēī ko̍ŋ pa̍a̍ndū bōōndi̍i̍ nya̍ sīmnu᷄ŋ wa̍nāā lāāla᷄ŋ o̍ Chi̍i̍sū ni̍ŋ nde̍, ndu̍ cho̍ ho̍ō ni̍ āā, “Nya̍ kpo̍u̍, lā nɔ̍ ka̍a̍lāa̍ le̍ chāāŋāā nyāā wa᷅ŋndā chīe̍e̍ya̍ lɔ̍ɔ̍ lɔ̍ɔ̍.”

⁷ Wānāa̍ hu̍ī wa᷅ŋnda̍ wa̍ ā chō ā tīūwāā o̍ chi̍e̍ēŋndo̍ chōo̍. Wāŋnda̍ ha̍ā ā lāāla̍ŋ māā, mi̍ Chi̍i̍sū Ki̍li̍tī hu᷅ŋ chi̍e̍ēŋ na̍nu᷄ŋ o̍ ŋ̄wāna̍ chi̍e̍ēya̍ le̍. Wānā o̍ wāna̍ cho̍ wānā wa̍ā le̍nde̍, wāna̍ hu̍ī wa᷅ŋnda̍ wo̍ o̍ cho̍ ni̍, ndu̍yɛ̍ ya̍a̍mɔ̍ɔ̍ Ki̍li̍tīo̍o̍ o̍ cho̍ ni̍.

⁸ Le̍la̍ŋ lā mānda̍ŋ, yɔ̍ŋi̍ wa̍li̍ o̍ wa̍li̍ nya̍ tōsa̍ ō kɔ̄nu̍ŋ fo̍ndō fu̍u̍. Lā tōsa̍ mī fāndā Mɛ̄lɛ̄ka̍ bɛ̄ɛ̄ndi̍a̍a̍ le̍ nya̍ wo̍, mbō hu᷄ŋ ke᷅ nya̍ ndu̍ kpo̍u̍.

⁹ Nyɛ̄ Ki̍li̍tī pɛ̍ɛ̍ku̍ na̍a̍ wo̍, wānā o̍ wāna̍ lo̍ o̍ pɛ̄ɛ̄kū kōŋ chōo̍ le̍, ndu̍yɛ̍ o̍ ko̍ŋ kɔ̍ɔ̍lī, mbō hāndu̍ pɛ̄ɛ̄kū ndɔ̄ che᷅le̍ŋ lēchōo̍ pɛ̍, mɛ̄ɛ̍ wānā wa̍ā nu̍a̍ā ō cho̍ o̍ dīōm pīlɛ̍ ni᷄ŋ a̍ Mɛ̄lɛ̄ka̍ le̍. Kɛ̍ wānā o̍ wāna̍ lo̍ o̍ pɛ̄ɛ̄ku̍ Ki̍li̍tīo̍o̍ chōo̍ pɛ̍, mɛ̄ɛ̍ nda̍ Mɛ̄lɛ̄ka̍ Fi̍nyāa̍ a̍ Po̍ ndɔ̄ɔ̍ ā chō dīōm pīlɛ̍.

¹⁰ Wānā o̍ wāna̍ ko̍ma̍l nya̍ pɛ̍ mbō si᷄m o̍ pɛ̄ɛ̄kōo̍ ho̍ō chōo̍ le̍, lā yi̍yā ndu̍ o̍ lā nya̍ lo̍ chi̍ɛ̍ī ni̍ŋ te̍. Lā yi᷅l ndu̍ bɛ̍ɛ̍ a̍ bā le̍.

¹¹ Wānā o̍ wāna̍ yi̍l ndu̍ pɛ̍, mɛ̄ɛ̍ nya̍ ndu̍ cho̍ o̍ yɔ̄ŋ wɔ̄ɔ̍ŋ kōŋ ni᷄ŋ ni̍.

Dīōmndā Mɛ̄ɛ̄lāāla̍ŋ

¹² I̍ nɔ̍ sɔ̄ɔ̍ŋ ta̍u̍ le̍ nya̍ dīmūl, kɛ̍ ndu̍yɛ̍ I̍ hɛ̍na̍ŋ mī dɔ̍ū mu̍ŋ mu̍ŋ o̍ yāu̍ ni̍ŋ te̍. Kāni̍ fo̍ndōle̍, I̍ nɔ̍ o̍ kɔ̄l le̍ kɔ̄la̍ŋ nya̍ yīlɔ̄ɔ̍, mī I̍ su̍u̍ki̍āŋ a̍ nya̍ a̍ mu̍ŋ o̍kɔ̄ɔ̄. O̍ ko̍ŋ, na̍a̍ nya̍ā mī ŋ̄ na᷄ŋ kɔ̄l ta̍u̍ ta̍u̍.

¹³ Pɔ̄mbɔ̄ nu᷄m Mɛ̄lɛ̄ka̍ hɛ̄li̍ wo̍, chūāā ndūa̍a̍ yi᷄l nu̍m.