Ko̍lo̍ni̍kō Di̍i̍ŋ Ndɔ̄ɔ̍ 1 - Yāu̍ Mɛ̄lɛ̄ka̍a̍

Māsā Bɛ̄ndōo̍ Sɔ̍lɔ̍mɔ̄ŋ Nyu̍na̍ Mɛ̄lɛ̄ka̍ Dīōm le̍ tāāsi̍o̍o̍

¹ Mɛ̄ɛ̍ Māsā Bɛ̍ndōo̍ Dēēve̍ vi᷅, mi̍ Sɔ̍lɔ̍mɔ̄ŋ po̍ ndɔ̄ mi̍i̍ŋgū māsāa̍ o̍ fōōfo̍ ndɔ̄ɔ̍. Ndu̍yɛ̍ mi̍ Sɔ̍lɔ̍mɔ̄ŋ to̍sā mi̍ māsāle̍ ndɔ̄le̍ŋ lē wā māsāle̍ kpāāyā bɛ̍ndū I̍sɔ̄lūɛ̄ī. Ndu̍yɛ̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ ndɔ̄ɔ̍ ō wa̍ ndu̍ kɔ̄ɔ̄lī, mbo̍ sīīŋgūū ndu̍ māsa̍ kpāāyā bɛ̍ndū.

² O̍ ko̍ŋ, mi̍ Māsā Bɛ̍ndōo̍ Sɔ̍lɔ̍mɔ̄ŋ o̍ ve̍e̍lū I̍sɔ̄lūɛ̍i̍ya̍ nāa̍ pi᷅lɛ̍, nda̍ yɔ̍nūŋ ni̍ māā, so̍vɛ̄i̍ya̍a̍ a̍ cho̍ wāa̍la̍ŋ a̍ kɛ̄mɛ̄la̍ŋ bōlle̍ wa̍, a̍ chɔ̍ɔ̍chi̍a̍a̍, a̍ wānāa̍ cho̍ wāŋnda̍ chīla̍ŋ nda̍, a̍ bōlīī lāyu̍ŋgu̍e̍i̍.

³ O̍ ko̍ŋ kɔ̍ɔ̍lī mbo̍ dīmūl nda̍ ma̍ kūā nāa̍ lāsōōlu̍u̍ wa̍ Ki̍bīɔ̄ŋ, nāa̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nda̍ lātūlu̍ wo̍ ō wa̍ wa̍, ō Mūu̍sē bu̍ɛ̍ī Mɛ̄lɛ̄ka̍ Ya̍a̍wɛ̄ɛ̄ wo̍, ō tōōsi̍a̍a̍ o̍ po̍llo̍ ni᷄ŋ ndo̍.

⁴ (Kɛ̍ ndu̍yɛ̍ a̍ te̍le̍ŋ ko̍ŋ, Māsā Bɛ̍ndōo̍ Dēēve̍ ndu̍ o̍o̍ chu̍a̍ ni᷅ŋ kɔ̍fū kpe̍ma̍ Mɛ̄lɛ̄ka̍ wa̍ Kīlīāātī Chi̍a̍a̍lūīm ndo̍, mbo̍ kūā a̍ ndu̍ Chūlu̍sɛ̄lɛ̄m, mbo̍ kɔ̍ lu̍e̍ī ndu̍ o̍ tɛ̍ndīi̍ ndu̍ Dēēve̍ ō tāŋgu̍l le̍ kɔ̍fū kōŋ ndo̍ ni᷄ŋ.)

⁵ Bɛ̍sa̍lɛ̄ɛ̄ po̍ Yu̍lūī wo̍, ndu̍ yɔ̍nūŋ māā po̍ ma̍mā Hɔ̍ɔ̄ wo̍ ni̍, ma̍āŋ ndu̍ o̍o̍ ta̍ŋgu̍l a̍ būlɔ᷄ŋsīi̍ye̍ wo̍, ō wa̍ Ki̍bīɔ̄ŋ o̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ lātūlu̍ a̍ nda̍ wo̍ lāchī. O̍ ko̍ŋ, Māsā Bɛ̍ndōo̍ Sɔ̍lɔ̍mɔ̄ŋ nda̍ wānāā nda̍ kūɛ̄ wa̍ lātūlu̍ kpo̍u̍, ma̍ sōōlūū Mɛ̄lɛ̄ka̍ Ya̍a̍wɛ̄ɛ̄ o̍ ma̍āŋ kōŋ.

⁶ O̍ ko̍ŋ, mi̍ Sɔ̍lɔ̍mɔ̄ŋ ku̍ā mbo̍ kɔ̍ si᷅m Mɛ̄lɛ̄ka̍ Ya̍a̍wɛ̄ɛ̄ lāchī, o̍ ma̍āŋ wa̍ ko̍ŋ a̍ būlɔ᷄ŋsīi̍ye̍ mbo̍ wā o̍ tɛ̍ndīi̍ ko̍ŋ lāchī wo̍, mbo̍ kɔ̍ so̍lī sa̍lāla̍ lūāmāā la̍ŋ wāa̍ ō pīlɛ̍.

⁷ Īchɔ̄l ko̍ŋ, mi̍ Mɛ̄lɛ̄ka̍ chɔ̄mnu᷄ŋ Sɔ̍lɔ̍mɔ̄ŋ, mbo̍ nyūnā ndu̍ āā, “Sɔ̍lɔ̍mɔ̄ŋ, ō yɛ̄ɛ̍nɛ̍ ŋ̄ yēēma̍ yɛ̄ ya̍ o̍ bā?”

⁸ O̍ ko̍ŋ, mi̍ Sɔ̍lɔ̍mɔ̄ŋ di̍mūl Mɛ̄lɛ̄ka̍ āā, “I̍ si̍nā mɛ̄ɛ̄ kpɛ̍ nūm o̍o̍ ka̍a̍la̍ Dēēve̍ fi̍nyā nī, ma̍ tōsāl ndu̍ dɛ̍nɛ̍la̍ fa̍ŋgā fa̍ŋgā yɛ̍. Ndu̍yɛ̍ ma̍ hīāū lāchī a̍ ndu̍ kāālā ko̍ŋ chɔ̄mndo̍ ma̍ sīīŋgūū ya̍ hāū ma̍sā o̍ fōōfo̍ ndɔ̄ɔ̍.

⁹ O̍o̍ Mɛ̄lɛ̄ka̍ Ya̍a̍wɛ̄ɛ̄, būŋgɛ̄ī ŋ̄ chūe̍l fi̍nyā nūu̍ Dēēve̍ ve̍, mbɔ̄ māā ī yɔ̄nu̍ŋ le̍nde̍ fɔ̍. Nūm pi̍la̍ hɛ̍li̍ ya̍ ni̍, ma̍ sīīŋgūū ya̍ māsā bɛ̍ndōo̍ wānāā bɔ̄ɔ̍ bɔ̄ɔ̍ cho̍o̍, a̍ cho̍ ha̍ā sɛ̍lɛ̍ mɛ̄ɛ̍ chu̍ndo̍o̍ ō chō nu̍a̍ā ō chu̍ū chɔ᷅m te̍ yɛ̍ wa̍.

¹⁰ Le̍la̍ŋ ke̍ ya̍ kɔ̄l kālo̍o̍ a̍ tāāsi̍o̍o̍, le̍ mɛ̄ɛ̍ ya̍ I̍ bi̍ī wānāā nūmnda̍ o̍ nɛ̄i̍ sa̍kpōo̍ chōo̍ yɛ̍. Tē ō chō ko̍ŋ te̍, I̍ nɔ̍lā mī wa̍ māsāa̍ wānāā nūmnda̍ ha̍ā chōo̍ le̍, kāni̍ fo̍ndōle̍ ā chō bɔ̍ɔ̍ sɛ̍lɛ̍.”

¹¹ Mi̍ Mɛ̄lɛ̄ka̍ mūlūl Sɔ̍lɔ̍mɔ̄ŋ āā, “Ha̍a̍a̍ mi̍ he̍ī ī wa̍ nu̍m o̍ kɔ̄l, a̍ nyu̍na̍ ya̍ le̍ nyɛ̄m kɛ̍, ɔ̄ɔ̄ le̍ sūl te̍, ɔ̄ɔ̄ le̍ nu̍m lēbɛ̄ɛ̄ kē le̍, ɔ̄ɔ̄ le̍ mī di̍u̍ ya̍a̍mɔ̍ɔ̍wa̍a̍ nu̍m nda̍ le̍, ɔ̄ɔ̄ le̍ nu̍m yōōmū vīlɛ̄ī kē le̍, kɛ̍ ma̍ nyūnā ya̍ le̍ kɔ̄l kālo̍o̍ a̍ tāāsi̍o̍o̍, le̍ mɛ̄ɛ̍ ŋ̄ lōōkū mā bīī wa̍nāā nīa̍a̍ ō kɛ̄ndɛ̄ yɛ̍, ā ya̍ si̍i̍ŋgu̍u̍ nu̍m ha̍ā māsā bɛ̍ndōo̍ chōo̍ wa̍,

¹² I̍ cho̍ nu̍m tāāsi̍o̍o̍ kē ndu̍yɛ̍ mī ke̍ nu̍m sīnā pɛ̄ŋgo̍o̍. Mī ke̍ nu̍m vɛ̄lɛ̄ sūlta̍ŋ, a̍ nyɛ̄m ki̍ɔ̍ɔ̍ŋ, a̍ bɛ̄ɛ̄le̍ŋ. Ndu̍yɛ̍ tāāsi̍ ya̍ I̍ cho̍ nu̍m kē, a̍ sīnā pɛ̄ŋgo̍o̍ wo̍, māsā bɛ̍ndu̍ o̍ māsā bɛ̍ndū ke̍e̍ku̍ nu̍m lāchī o̍ lēmāsā, a̍ a̍ cho̍ bɛ̍ɛ̍ hu̍nɔ̄ɔ̄ sīmnɔ᷄ŋ la̍ma̍sā nu̍m kɔ̄ɔ̄lī wa̍, ō pīlɛ̍ bɛ̍ɛ̍ sɔ̍lā ni̍ŋ ta̍āsi̍ kōŋ a̍ sīnā pɛ̄ŋgu̍ ko̍ŋ māā nūm te̍.”

A̍ su᷄l Māsā Bɛ̍ndōo̍ Sɔ̍lɔ̍mɔ̄ŋ ndo̍ o̍kɔ̄ɔ̄

¹³ O̍ ko̍ŋ, mi̍ Sɔ̍lɔ̍mɔ̄ŋ fa̍ŋa᷄ŋ Ki̍bīɔ̄ŋ nāa̍ nda̍ a̍a̍ so̍o̍lūū Mɛ̄lɛ̄ka̍ wa̍, o̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ lātūlu̍ a̍ nda̍ wo̍, mbo̍ mīīŋgū Chūlu̍sɛ̄lɛ̄m chi̍e̍e̍. Ndu̍yɛ̍ mbo̍ hīāū lāchī a̍ wāa̍ māsāa̍ wāŋnda̍ I̍sɔ̄lūɛ̄ī chōo̍.

¹⁴ O̍ ko̍ŋ kɔ̍ɔ̍lī, mi̍ Sɔ̍lɔ̍mɔ̄ŋ o̍ chu̍u̍ŋgīāā so̍vɛ̄i̍ya̍ a̍ sɔ̍ŋgā o̍ nyɛ̄lā nyāāna᷄ŋnda̍ su̍a̍ā ā nāŋnda̍ŋ chōo̍ wa̍, wāa̍ pīlɛ̍ a̍ kɛ̄mɔ̄ɔ̍ lē hīɔ̍ɔ̍lu̍ (1,400), a̍ pūa̍a̍ sɔ̍ŋgā o̍ su̍a̍a̍ chōo̍ wa̍ wāa̍la̍ŋ tɔ̍ a̍ lā tīɔ̍ɔ̍ŋ (12,000). Ndu̍yɛ̍ mbo̍ kɛ̄sī nda̍ o̍ fo̍ndāŋnda̍ŋ kpɛ̍ kpɛ̍, mɛ̄ɛ̍ o̍ kɛ̍si̍ ā ti᷄ŋ Chūlu̍sɛ̄lɛ̄m chi̍e̍e̍, mbo̍ kɛ̄sī ha̍ā o̍ chi̍o̍o̍ŋ bɛ̍ndo᷄ŋ ŋ̄ pīlɔ̍ŋ.

¹⁵ O̍ ko̍ŋ kɔ̍ɔ̍lī, mi̍ Māsā Bɛ̍ndōo̍ Sɔ̍lɔ̍mɔ̄ŋ o̍ to̍sā, mi̍ ka̍ni̍ŋ hu̍mbo᷄ŋ a̍ ko̍o̍līi̍yo̍ŋ ŋ̄ hɔ̄bā Chūlu̍sɛ̄lɛ̄m mi̍ ŋ̄ fūlā o̍ ba̍a̍ ni᷄ŋ, mi̍ ŋ̄ yɔ̄nu᷄ŋ mɛ̄ɛ̍ pōūtā fo̍ndōla̍ŋ lā wā nu̍a̍ā yɛ̍. Ndu̍yɛ̍, mbo̍ tōsā vɛ̄lɛ̄ mi̍ yɔ̄mīī si̍dāāve̍ ī hɔ̄bā mɛ̄ɛ̍ yɔ̄mīī si̍ka̍mɔ̄ɔ̄ ī yɔ̄ŋɛ̄i̍ ī chō nu̍a̍ā o̍ pēmbo᷄ŋ bɛ̍ŋgu̍ yɛ̍.

¹⁶ Ndu̍yɛ̍ o̍ lɛ̄ŋndē I̍chi̍pīle̍ŋ ni᷄ŋ, a̍ o̍ lɛ̄ŋndē Ku̍e̍ēle̍ŋ ni᷄ŋ Sɔ̍lɔ̍mɔ̄ŋ ndu̍ o̍o̍ cha᷅ŋ a̍ su̍a̍a̍ ni̍. O̍ lɛ̄ŋndē Ku̍ēle̍ŋ ni᷄ŋ wānāā ndūa̍a̍ lēyākūa̍a̍ nda̍ ku̍ā nda̍ pīɔ̄ndɔ̄ɔ̍ ni̍.

¹⁷ Nyɛ̄lā nyāāna᷄ŋnda̍ su̍a̍a̍ ā nāŋ nda̍ŋ ō pīlɛ̍ ba̍ā ndɔ̄ɔ̍ I̍chi̍pī, ō wa̍ ka̍ni̍ŋ hu̍mbo᷄ŋ kɛ̄mɔ̄ɔ̍ lē ŋɔ᷄mpu᷅m (600). Ndu̍yɛ̍, so̍o̍ ō pīlɛ̍ lo̍ŋ, nda̍ a̍a̍ pi̍sī ndu̍ le̍ ka̍ni̍ŋ hu̍mbo᷄ŋ kɛ̄mɛ̄ a̍ be̍le̍-ŋu̍ɛ̍ɛ̍nu̍ (150). Tē nda̍ kɔ̍ pi̍o̍ndū nyɛ̄lā nyāāna᷄ŋnda̍ su̍a̍a̍ ā nāŋ nda̍ŋ a̍ su̍a̍a̍ kāŋ lo̍ŋ pɛ̍, nda̍ hu᷄ŋ pīsī Hi̍ta̍i̍tīi̍ya̍ a̍ māsāā māSi̍i̍līāŋnda̍ o̍ bā.