Chɔ᷄ŋ Tāso̍o̍ 1 - Yāu̍ Mɛ̄lɛ̄ka̍a̍

A̍ dīōmnda̍ ke᷅ wa᷅ŋnda̍ yōōmū kpe̍e̍kpe̍i̍yo̍ la̍ŋ o̍kɔ̄ɔ̄

¹ Ŋ̄ chō nya̍ yāu̍wo̍ ho̍ō pōōnyīāllo̍ a̍ Dīōmndo̍ ho̍ō o̍kɔ̄ɔ̄, o̍ ke᷅ wa᷅ŋnda̍ yōōmū kpe̍e̍kpe̍i̍yo̍ wo̍. Dīōmndo̍ ho̍ō ō wa̍ ni᷅ŋ chɔ̍ŋ bɛ̍ɛ̍ ha̍a̍a̍ a̍ chi̍e̍ēŋndo̍ kāndɔ᷄ŋndo̍. Mi̍ ŋ̄ tūɛ̄ī ndu̍ o̍ sūɛ̍i̍, ndu̍yɛ̍ mi̍ ŋ̄ chā ndu̍ pɛ̍ɛ̍ŋ a̍ lēhɔ̄l. Ŋ̄ chē ndu̍ kɛ̍sɛ̍ kɛ̍sɛ̍, ndu̍yɛ̍ mi̍ ŋ̄ pīla᷄ŋ ndu̍ a̍ bā.

² Mi̍ yōōmōo̍ ho̍ō chɔ̄mnu̍ŋ kpe̍nde̍ke̍le̍ mi̍ ŋ̄ chā ndu̍. A̍ ndu̍ o̍kɔ̄ɔ̄ na̍a̍ ŋ̄ chō wāŋnda̍ dīmūllo̍ ni̍. Ndu̍yɛ̍, ŋ̄ chō nya̍ dīmūllo̍ a̍ yōōmū kpe̍e̍kpe̍i̍yo̍ ho̍ō o̍kɔ̄ɔ̄, o̍ nɔ̍ la̍mɛ̍ɛ̍lu̍ le̍ wo̍. Ō wa̍ lātūlu̍ nda̍ Mɛ̄lɛ̄ka̍ Fi̍nyā nāa̍, ndu̍yɛ̍ mbo̍ chɔ̄mnu᷄ŋ na̍a̍.

³ Nyɛ̄ na̍a̍ ŋ̄ chē, ndu̍yɛ̍ mi̍ ŋ̄ tūɛ̄ī yo̍, ndu̍ na̍a̍ ŋ̄ chō nya̍ dīmūllo̍ ni̍. Ŋ̄ chō nya̍ ndu̍ dīmūllo̍ le̍ mī lā sɔ̄ɔ̄ŋgu̍u̍ na̍a̍ chōo̍, mī ŋ̄ wa̍ o̍ dīōm pīlɔ̍ɔ̍ ni᷄ŋ na̍a̍ nya̍ā, dīōm pīlɛ̍ na̍a̍ ŋ̄ chō ho̍ō lēni᷄ŋ na̍a̍ Fi̍nyāa̍ nda̍ Po̍ ndɔ̄ɔ̍, Chi̍i̍sū Ki̍li̍tī wo̍.

⁴ Le̍la̍ŋ, ŋ̄ chō yāu̍wo̍ ho̍ō pōōnyīa̍a̍ nāa̍ nya̍ chūā, le̍ mī ŋ̄ wa̍ a̍ kɔ̄l kɛ̄ndɛ̄ ta̍u̍.

Ŋ̄ tōsa᷅ŋ sɔ̄ɔ̍ŋ nyɛ̄ wa̍wo̍ŋndo̍ŋ

⁵ Dīōmndā na̍a̍ ŋ̄ tūēī mi̍ Chi̍i̍sū di̍mī la̍ŋ, la̍ŋ la̍ cho̍ la̍ŋ ni̍, ndu̍yɛ̍ la̍ŋ na̍a̍ ŋ̄ chō nya̍ dīmūllo̍ ni̍ māā, mɛ̄ɛ̍ nyɛ̄ wa̍wo̍ŋndo̍ chō yɛ̍, le̍nde̍ Mɛ̄lɛ̄ka̍ chō ni̍. Nyūmmā cho̍ o̍ ndu̍ ni̍ŋ kpo̍so̍ŋ te̍.

⁶ Tē ŋ̄ dīmi̍ pɛ̍ māā ŋ̄ chō o̍ dīōm pīlɔ̍ɔ̍ ni᷄ŋ na̍a̍ Mɛ̄lɛ̄ka̍ wa̍ā, kɛ̍ mī ŋ̄ wa̍ wɔ̄ sɔ̄ɔ̍ŋ mānyūmndo̍ŋ tōsāa̍ pɛ̍, mɛ̄ɛ̍ chōōla̍ŋ na̍a̍ ŋ̄ chō dīmīo̍o̍ ni̍, mɛ̄ɛ̍ ŋ̄ chu̍e̍ wɔ̍ to᷅nya̍a̍ le̍.

⁷ Kɛ̍, tē ŋ̄ wa̍ sɔ̄ɔ̍ŋ nyɛ̄ wa̍wo̍ŋndo̍ŋ tōsāa̍ pɛ̍, mɛ̄ɛ̍ Mɛ̄lɛ̄ka̍ chō o̍ nyɛ̄ wa̍wo̍ŋndo̍ ni᷄ŋ yɛ̍ pɛ̍, mɛ̄ɛ̍ ŋ̄ chō o̍ dīōm pīlɔ̍ɔ̍ ni᷄ŋ ve᷅llāa̍ vēllē, ndu̍yɛ̍ mɛ̄ɛ̍ Po̍ ndɔ̄ɔ̍ Chi̍i̍sū kōo̍ma̍ ndūa̍ŋ mā dīndi̍ na̍a̍, mi̍ mā fāŋā yɔ̄ŋ o̍ yɔ̄ŋ wɔ̄ɔ̍ŋ na̍a̍ ŋ̄ tōsa̍.

⁸ Tē ŋ̄ dīmi̍ pɛ̍ māā ŋ̄ tōsa̍ yɔ᷅ŋ wɔ̄ɔ̍ŋ te̍, mɛ̄ɛ̍ ŋ̄ hūi̍ na̍a̍ pi̍la̍, mɛ̄ɛ̍ tōnya̍ Mɛ̄lɛ̄ka̍a̍ ō cho̍ na̍a̍ o̍ lākɔ̄l te̍.

⁹ Kɛ̍, tē ŋ̄ chɔ̄ɔ̄mu̍u̍ yɔ̄ŋndā nāāla̍ wɔ̍ɔ̍ŋnda̍ŋ nāa̍ Mɛ̄lɛ̄ka̍ chūā pɛ̍, mālɔ̄ɔ̍ o̍ ma᷅l na̍a̍ le̍ yɔ̄ŋndā nāāla̍ wɔ̍ɔ̍ŋnda̍ŋ ni̍, ndu̍yɛ̍ mbō dīndi̍ na̍a̍ le̍ nyɛ̄ o̍ nyɛ̄ wɔ̄ɔ̍ŋ na̍a̍ ŋ̄ tōsa̍. Kāni̍ fu̍u̍le̍, Mɛ̄lɛ̄ka̍ chō wāna̍ lo̍ o̍ lēdīōm, ndu̍yɛ̍ tōsāa̍ o̍ to̍sā nyɛ᷅ o̍ nɔ̍ le̍ tōsāa̍ wo̍ ni̍.

¹⁰ Tē ŋ̄ dīmi̍ pɛ̍ māā ŋ̄ tōsa̍ yɔ᷅ŋ wɔ̄ɔ̍ŋ te̍ mɛ̄ɛ̍ ŋ̄ chu̍a̍ ndu̍ māā wāna̍ lāchōōwā, ndu̍yɛ̍ mɛ̄ɛ̍ dīōmndā ndɔ̄la̍ŋ lā cho̍ na̍a̍ o̍ lākɔ̄l te̍.