HEBREOS 13 - Xochapa Mixteco

Yo ndíkun Iva yo Ndioxi ta xíniñuꞌu yo xaa súvi yo ya kúni mií ra

¹ Ta ndóꞌo̱, kuꞌvi ni ini ndo kuni taꞌan ndo, chi ndiꞌi ndóꞌo̱ ndíkun Tata yo Jesucristo, ta tá íyo ñani mií ndo án kuꞌva mií ndo, saa íyo ndo xiꞌin taꞌan ndo.

² Ta ndïndoso ini ndo ya ndikuiso vií ndo naꞌa, na xáa veꞌe ndo. Chi saa ndo̱ꞌo sava naꞌa xinaꞌa xiꞌin naꞌa, na ndi̱xaa veꞌe na, ta köo ndi̱kundaa ini na ya ndi̱kuiso na tatun Ndioxi veꞌe na.

³ Ta ndikaꞌán ini ndo xaꞌa na ñúꞌu veꞌe kàà, nda tá íin mií vi ndo, saa íin ndo ñúꞌu veꞌe kàà xiꞌin na, kukaꞌán ndo. Ta saa kuñuꞌu ini ndo xaꞌa na ndóꞌo ni ini íkan inka naꞌa, nda tá xiꞌin mií vi ndo kua íkan na saa, kukaꞌán ndo.

⁴ Ndóꞌo̱ taa nda xa ti̱ndaꞌa, án ná síꞌi xa ti̱ndaꞌa ta xíniñuꞌu ndo kañuꞌu ndo yá síꞌi ndo án i̱í ndo. Ta käka ndo xiꞌin inka ñaꞌa án inka taa, saa chi Ndioxi ta ndee ni xaa nduvaꞌa ra xiꞌin ndiꞌi na íkan saa.

⁵ Kütoo ni ndo koo kuaꞌa ni xuꞌun ndo, án koo kuaꞌa ni ñaꞌa ndo. Vaꞌa kusini ni ndo xiꞌin ndisaa ñaꞌa ya xa kúu mií ndo, saa chi Ndioxi, káchi ra saa: “Nda iin ichí sïndoo ndaꞌa i ndóꞌo̱, ta ni sïndoo mií i ndóꞌo̱”, káchi ra.

⁶ Xaꞌa ya yóꞌó kua vaꞌa kaꞌan yo xiꞌin ndinuꞌu nima yo, kachi yo saa: “Mií Iva i Ndioxi ku ra chíndee yeꞌe, yakan kua köo xíniñuꞌu i ku íꞌvi i, xaꞌa ya íkan ndá ka na ñuu ivi yóꞌó xiꞌin i”.

⁷ Kuñuꞌu ini ndo xaꞌa naꞌa, na xi̱ndiso chiñu xiꞌin ndo, na ndi̱kaꞌan ndoso tuꞌun Ndioxi xiꞌin ndo. Koto ndo ndá kuꞌva vaꞌa ni i̱kan na tá kivi xi̱taku na ñuu ivi yóꞌó, ta ndá kuꞌva vaꞌa ni xi̱ndaa ini na xi̱ni na Ndioxi. Ta kuꞌva saa ikán ndóꞌo̱, tá i̱kan na ikán, saa ikan ndo.

⁸ Chi Jesucristo, ta köo ndísama ra, tá ndi̱xiyo ra xinaꞌa saa íyo ra vitin, ta saa koo ra ndiꞌi saa kivi ya vaxi.

⁹ Täxi ndo sindaꞌvi naꞌa ndóꞌo̱ xaꞌa inka tuꞌun ya köo íyo yuꞌu xiꞌin tuꞌun ya si̱naꞌa Tata yo Jesucristo ndóꞌo̱. Ya vaꞌa ni ka va kua ná ndundee ka nima ndo xiꞌin ya vaꞌa ndi̱niꞌi uun ndo nuu Iva yo Ndioxi. Sundi na ikán ta ndisaa xaꞌa ley yata káꞌan na, ndá ñaꞌa kua vaꞌa kuxi yo ta ndá ñaꞌa kua küvi kuxi yo, káchi na, ta ya sínaꞌa na ikán ta nda loꞌo köo chíndee taꞌan ya xiꞌin nda iin naꞌa.

¹⁰ Saa chi yoo ta vaꞌa kuyati yo nuu Ndioxi xaꞌa ya i̱kan Tata yo Jesucristo ndi̱xiꞌi ra xaꞌa yo. Sundi nda sutu, nda xáa súvi ka ya káꞌan ley Ndioxi ini veꞌe ñuꞌu manta, ta küvi kuyati nda nuu Ndioxi.

¹¹ Tá yachi ta kuakiꞌvi iin sutu ra chee, ra kaꞌnu nuu ndiꞌi nda, kuakiꞌvi ra ini Cuarto ya ndee ni I̱í, saa níꞌi ra nií kiti kuaꞌan xiꞌin ra sóko ra nuu Ndioxi ya ná xaa kaꞌnu ini Ndioxi xaꞌa kuachi na ñuu. Ta mií kuñu kiti ikán ta köo xáꞌmi na ya nuu ndóo na, ndíso na ya kuaꞌan xiꞌin na xáꞌmi na ya nda nuu ñuu.

¹² Ta saa ndo̱ꞌo tu Jesús va, ta̱va na ra nda nuu ñuu Jerusalén ta ikán xa̱ꞌni na ra xaꞌa yo, ta xiꞌin nií mií ra ku rá nda̱sa i̱í ra yoo, nda̱sa vaꞌa ra yo, si̱ndiꞌi xaꞌa ra kuachi yo nuu Ndioxi.

¹³ Saa tu yoo va, ná kundikun yo Jesucristo, ta ná kana koo yo kuꞌun yo xiꞌin ra nuu ñuu, ná kükaꞌán nuu yo ndoꞌo yo xaꞌa ra, tá kuꞌva ndo̱ꞌo ni mií ra.

¹⁴ Saa chi ñuu ivi nuu ndóo yo vitin, ta köo ñuu nuu kuchiñu kundoo yo ndiꞌi saa tiempo, yakan ndátun yo koo yo ñuu xa̱á vaxi kivi, nuu ndïꞌi xaꞌa yo nda iin ichí.

¹⁵ Ta vitin, xaꞌa ya íyo Jesucristo nima yo kua ná xaa kaꞌnu ni yo Ndioxi ndiꞌi saa kivi, chi tá íkan yo saa ta tá íin ñaꞌa ya sóko yo nuu Ndioxi saa íin ya vaꞌa kána koo yuꞌu yo káꞌan yo, yakan kua ná xaa kaꞌnu yo Iva yo Ndioxi.

¹⁶ Ta ndïndoso ini ndo ya ikan ndo ya vaꞌa xiꞌin taꞌan ndo. Saa chindee ndo na taꞌan ndo xiꞌin ya kúu mií ndo, saa chi tá íkan ndo saa ta tá íin ya sóko ndo nuu Ndioxi saa íin ya íkan ndo, ta kúvaꞌa ni ini Ndioxi xiꞌin ya íkan ndo.

¹⁷ Xaa súvi ndo chiñu káꞌan na xáꞌnda chiñu nuu ndo veꞌe ñuꞌu xiꞌin ndo, saa chi na ikán, ta ndíꞌi ni ini na xaꞌa ndo, köo ndíkundee na, chi xíni na vaxi kivi ta taxi na kuenta ndaꞌa Ndioxi xaꞌa ndo. Yakan kuni soꞌo ni ndo ya káꞌan na xiꞌin ndo, ta saa kusini ni na xaa súvi na chiñu ya íkan na, chi tá ná xaa soꞌo ndo nuu na, ta ni köo ñaꞌa niꞌi vi ndo.

¹⁸ Ta kaꞌan ni ndo xaꞌa ndeꞌe xiꞌin Ndioxi, saa chi xíni nde ya íyo vaꞌa ya xínituni nde nuu ra, ta ndisaa ya vaꞌa kúni nde ikan nde nuu ra.

¹⁹ Ta xíkan ni i ya mani nuu ndo, kaꞌan ni ndo xaꞌa i xiꞌin Ndioxi ya ná taxi ra kama ni ndiko koo tuku i kuꞌun i koto i ndóꞌo̱.

Tuꞌun ya si̱ndiꞌi nuu ndái ra na

²⁰ Ta mií Iva yo ku ra táxi koo vaꞌa ni ini yo, mií ra ku ra si̱taku Tata yo Jesucristo tañu na ndíi, ta mií ra ku ra ndáa ni ndóꞌo̱ tá kuꞌva íkan iin ra ndee ni vaꞌa ndáa levo sana ra, saa íkan ra xiꞌin ndo. Ta ki̱ndoo ra xiꞌin ndo ya ikan ra ya xa̱á xiꞌin ndo xaꞌa nií ra nduta ndi̱xita nuu cruzin. Ta nda iin ichí ndïsama ini ra xaꞌa ya ki̱ndoo ra xiꞌin ndo.

²¹ Xaꞌa ya ikán kua káꞌan ni i xiꞌin ra ya ná chindee taꞌan ni ra xiꞌin ndo ya kuchiñu ndo xaa súvi ndo ndiꞌi ya vaꞌa kúni mií ra. Ta saa xáku ndaꞌvi ni i nuu ra ya ná chindee ra ndeꞌe ikan nde ndisaa ya kúni mií ra tixin Tata yo Jesucristo. Saa ná kunuu sukun ni ya toꞌo Tata yo Jesucristo ndiꞌi saa ichí, ndiꞌi saa kivi. Saa ná koo ya.

²² Na taꞌan yo, xíkan ni i ya mani nuu ndo, kaꞌnu ni koo ini ndo xaꞌa ya loꞌo ni kua táa i nuu tutu yóꞌó xaa ndaꞌa ndo. Ta taa ni soꞌo ndo ya káꞌan i xiꞌin ndo, ya xáꞌa ni i ndee xiꞌin ndo.

²³ Ta saa káꞌan i xiꞌin ndo ya ná kundaa ini ndo xaꞌa ra ñani yo ra Timoteo, xa ke̱ta ra veꞌe kàà. Tá tu kama ná xaa ra, ta kundaka i ra xaa ra xiꞌin i koto i ndóꞌo̱.

²⁴ Ta kaꞌan ndioxi ndo xiꞌin ndiꞌi na xáꞌnda chiñu nuu ndo veꞌe ñuꞌu, xiꞌin ndiꞌi ka na ñani yo, na ndíkun Cristo. Saa tu na ñani yo na estado Italia, tíꞌvi ni na tuꞌun mani xaa nuu ndo.

²⁵ Ta mií Ndioxi ná chikaa ni ka ya vaꞌa ndóꞌo̱. Saa ná koo ya.