El Apocalipsis 10 - Xochapa Mixteco

Iin tatun Ndioxi ya níꞌi iin tutu loꞌo ya ndi̱tuvi

¹ Sindiꞌi saa xi̱ni i inka tatun Ndioxi ya kúu mií chiñu ndee ni, ke̱ta ya nuu ndivi ta iin súvi níí viko sata ya. Ta iin ndi̱kava nduu ndiꞌi kiti tilanchi xi̱ní ya. Ta nuu ya tá yéꞌe̱ ñu̱ꞌù, saa yéꞌe̱ ya. Ta xaꞌa ya, tá íin ñu̱ꞌu̱ ya ndee ni ndíkuita yáa xíxi ya, saa íin xaꞌa ya.

² Ta iin numi ku tutu loꞌo, núna nuu ya ínuu ya nuu ndaꞌa ya. Saa ínuu xaꞌa kuáꞌá ya nuu nduta ñûꞌu, ta inka xaꞌa ítin ya ndíchi nuu ñuꞌú.

³ Saa ndi̱ndaꞌi koꞌo ya, ndee ka vi ndi̱ndaꞌi ya, tá ndáꞌi kiti lión, saa ndi̱ndaꞌi ya. Xaꞌa ya ndee ni ndi̱ndaꞌi ya yakan nda nduta savi ndee ni ndi̱ndaꞌi rá, uxa nuu ku tachí rá ndi̱ndaꞌi ni.

⁴ Xa íyo tuꞌva i taa i tuꞌun ya xi̱ni soꞌo i tá ndee ni ndi̱ndaꞌi savi, ñaa xi̱ni soꞌo i ke̱ta tachi na nuu ndivi ndi̱kaꞌan ya xiꞌin i, káchi ya saa: “Ini mií un ná ndi̱kaa sěꞌe tuꞌun ya xi̱ni soꞌo un tá ndi̱ndaꞌi uxa nuu savi, ta nda iin ya xi̱ni soꞌo un täa un”, káchi tachi na ke̱ta nuu ndivi xiꞌin i.

⁵ Saa xi̱ni i tatun Ndioxi ikán, ya ínuu xaꞌa ya nuu nduta ñûꞌu, ta inka xaꞌa ya ndíchi nuu ñuꞌú, ñaa nda̱niꞌi ya ndaꞌa kuáꞌá ya nuu ndivi,

⁶ saa chi̱naꞌa ya Ndioxi, ra táku ndiꞌi saa kivi, ra si̱kuaꞌa ndivi xiꞌin ñuꞌú, saa si̱kuaꞌa ra nduta ñûꞌu xiꞌin ndiꞌi kiti íyo ini rá, ta ndi̱kaꞌan ya, káchi ya saa: ―Köo ka kivi ya kundatun Ndioxi ya sixinu ra ya ndi̱kaꞌan ra.

⁷ Tá ná tindaa kivi ya tivi tatun ra ya uxa itun trompeta ya, saa kua sixinu ndiꞌi Ndioxi ya xa chi̱tuni ra xaa súvi ra, ta köo ndi̱kundaa ini naꞌa xaꞌa ya ndi̱kaꞌan ra xiꞌin nda profeta, nda ndi̱kaꞌan tuꞌun yuꞌu ra xinaꞌa ―káchi tatun ikán xi̱ni soꞌo i.

⁸ Saa xi̱ni soꞌo tuku i tachi na, ke̱ta ya nuu ndivi ndi̱kaꞌan ya xiꞌin i, káchi ya saa: ―Kuyati kuáꞌan kiꞌin un iin numi tutu loꞌo ya núna ínuu nuu ndaꞌa tatun ya ndíkaa iin xaꞌa ini nduta ñûꞌu tin inka xaꞌa ya ndíchi nuu ñuꞌú ―káchi tuꞌun na xiꞌin i.

⁹ Saa ke̱e i ndi̱xaꞌan i ndi̱kaꞌan i xiꞌin tatun ikán ya taxi ya tutu loꞌo ikán ndaꞌa i. Saa ndi̱kuiin ya ndi̱kaꞌan ya xiꞌin i, káchi ya saa: ―Vaꞌa ndikiꞌin un ya, ta kaxi un ya. Vi̱xi̱ ni ya, tá vixi ñuñu saa vixi kuu yuꞌu un xiꞌin ya, sundi tá ná xaa ya tixin un ta ndasa uva ndiꞌi ya tixin un ―káchi ya xiꞌin i.

¹⁰ Saa ndi̱kiꞌin i ya ndaꞌa tatun ikán ya̱xi i. Tá íyo ya ndi̱kaꞌan ya xiꞌin i, saa ndo̱ꞌo i. Vi̱xi̱ ni ya yuꞌu i, tá káa ñuñu saa káa ndixa ya, sundi tá ndi̱xinu ya tixin i, ta nda̱sa uva ni ya tixin i.

¹¹ Saa ndi̱kaꞌan tuku tatun Ndioxi xiꞌin i, káchi ya saa: ―Xíniñuꞌu un kaꞌan ndoso un tuꞌun ya káꞌan Ndioxi xaꞌa ya kundoꞌo kuaꞌa ni ñuu xiꞌin ndiꞌi ni kúu na ñuu ivi nuu káꞌan na ndiꞌi ni kúu nuu tuꞌun xiꞌin nuu xáꞌnda chiñu nda rey nuu na ―káchi tatun Ndioxi ikán xiꞌin i.