2 Pedro 3 - Xochapa Mixteco

Soꞌva kuu ñuu ivi tá ná ndiko koo Jesús

¹ Ñani yo xiꞌin kuꞌva yo, ya yóꞌó ku tutu ya uvi táa i xaa ndaꞌa ndo. Ta̱a i uvi saa ya xaa ya ndaꞌa ndo ya ndíkani i nuu ndo ya ná koo vaꞌa ni ya xínituni ndo saa ndikani ndaku ni ini ndo.

² Chi yeꞌe ta kúni i ná ndïndoso ini ndo xaꞌa tuꞌun ya ndi̱kaꞌan ndoso nda i̱í, nda ndi̱kaꞌan tuꞌun yuꞌu Ndioxi xinaꞌa. Ta saa ndïndoso tu ini ndo xaꞌa tuꞌun ya xa̱ꞌnda chiñu Tata yo Jesucristo ra síkaku yoo, ya ta̱xi ra ndaꞌa ndeꞌe ndi̱xika chiñu nuu ra si̱naꞌa nde.

³ Ya núnu̱ú xíniñuꞌu ni ndo kuñuꞌu ini ndo ku ya yóꞌó, ndá kuꞌva koo tá xa ku̱yati vaxi kivi sindiꞌi, chi kivi ikán kua koo kuaꞌa ni naꞌa, na ndikani ini ndisaa xaꞌa ya väꞌa, ya kútoo ni mií ikin kuñu na ikan na, ta na ikán ta kuaku ndaa na ndóꞌo̱.

⁴ Saa kaꞌan na, kachi na saa: “Ndi̱kaꞌan Jesús ndiko koo ra, ta ¿ndachu köo ra ndíko koo? Nda kivi ndi̱xiꞌi xii sikua yo iin saa nda vitin ta nda iin ñaꞌa köo kúu, tá káa tá xa̱á xi̱koo ñuu ivi yóꞌó saa káa nda vitin, ta köo ra ndíko koo”, kachi na.

⁵ Chi na ñaa ta köo xíin a kiꞌin na kuenta ya si̱kuaꞌa Ndioxi ndivi xiꞌin ñuꞌú tiempo xinaꞌa, ta iin kuiti tuꞌun ndi̱kaꞌan ra, xa̱ꞌnda ra chiñu ta saa ndi̱kuaꞌa ndivi xiꞌin ñuꞌú, ta ñuꞌú ra ini tikuií ndi̱kuaꞌa ya ndíkaa ya nda vitin.

⁶ Sundi suvi xiꞌin tikuií kua ndi̱xiꞌi ndiꞌi na ñuu ivi xi̱ndoo xinaꞌa, ndi̱kaꞌan ndaa na xiꞌin rá ta ndi̱xiꞌi ndiꞌi na.

⁷ Ta suvi xiꞌin mií tuꞌun Ndioxi kua ndíso níi xiꞌin ndiꞌi mií ndivi tin ñuu ivi nuu ndóo yo vitin, ta vaxi kivi ndiꞌi xaꞌa yaa ya xiꞌin ñu̱ꞌu̱. Tá ná tindaa kivi ya xaa nani Ndioxi kuachi na ñuu ivi yóꞌó, ta saa kua sindiꞌi xaꞌa yaa ra naꞌa, na köo xíin kandixa Ndioxi, na íkan ya väꞌa.

⁸ Ñani mani, ndïndoso ini ndo ya káꞌan i xiꞌin ndo: Chi nuu Iva yo Ndioxi ta iin kivi ra tá íyo mil kuiya saa íyo ya, án iin mil kuiya ta tá íyo iin kivi va, saa íyo ya nuu ra.

⁹ Köo kuáchi vi Iva yo Ndioxi ya sixinu ra ya ki̱ndoo ra xaa súvi ra xiꞌin yo. Süvi tá kuꞌva ndíkani ini naꞌa, kuekuee ni kúu íkan ra, káchi na. Chi xaꞌa ya kaꞌnu ni ini ra xiꞌin yo kua íkan ra saa xiꞌin yo, saa chi köo kúni ra ndiꞌi xaꞌa nda iin naꞌa. Kúni ra ná ndiko koo ini na xaꞌa ya väꞌa íkan na, ta ná ndinama na kuꞌva íyo na.

¹⁰ Sundi tá xa ná ndiko koo Tata yo Jesucristo, ta iin kuu soꞌva va ndiko koo ra, tá kuꞌva íkan ra kuiꞌna kuakiꞌvi veꞌe na, saa koo ná ndiko koo ra, chi nda iin na kündaa ini ndá kivi kua ndiko koo ra, yáꞌa ni ìyo niꞌi, saa ndiꞌi xaꞌa ndivi xiꞌin ñu̱ꞌu̱ koko ndiꞌi ya. Saa tu ñuu ivi yóꞌó xiꞌin ndiꞌi ñaꞌa kúu mií ya, iin kuꞌva saa ndiꞌi xaꞌa yaa ya.

¹¹ Iin ndiꞌi xaꞌa yaa ya, yakan ndóꞌo̱ ta ndikani vaꞌa ini ndo ndá kuꞌva xíniñuꞌu ndo koo ndo, vívií koo ndo, i̱í koo ndo tá kuꞌva kúni mií Iva yo Ndioxi saa koo ndo.

¹² Ta ná kundatun ni yo nda ná tindaa kivi ya kixi Tata yo, saa ná chikaa ni ka yo ndee ya kama ni ná kuu saa. Chi kivi ikán ta ndiꞌi xaꞌa ndivi koko ya xiꞌin ñu̱ꞌu̱, ndiꞌi ni kúu ñaꞌa ndiꞌi xaꞌa, ta iin nduta ndiꞌi ya xiꞌin ñu̱ꞌu̱.

¹³ Sundi yoo ta ndátun yo koo yo nuu ndivi xa̱á tin ñuꞌú xa̱á, ya ndi̱kaꞌan Ndioxi taxi ra ndaꞌa yo, ta nina chiñu vaꞌa ya kúni mií Ndioxi ku ya kuu ikán.

¹⁴ Xaꞌa ya ñaa kua, nani ndátun yo kuu saa, ñani mani, ta yáꞌa ni vi kuenta koo ndo xiꞌin mií ndo, täxi ndo kuyakua ndo xiꞌin kuachi, vií ni koo ndo xiꞌin Ndioxi.

¹⁵ Ta kuñuꞌu ini ndo xaꞌa ya kaꞌnu ni ini Tata yo Jesucristo kua ndátun ra yoo, chi kúni ra sikaku ra ndiꞌi naꞌa. Ta suvi taꞌan ya káꞌan i xiꞌin ndo yóꞌó kua ndi̱kaꞌan tu ra Pablo ñani va yo xiꞌin ndo. Tá ta̱a ra nuu ndo xiꞌin ya ndíchi vaxi nuu Ndioxi kua ta̱a ra.

¹⁶ Ta soꞌva íyo ndiꞌi ya ndi̱kaꞌan ra nuu ndiꞌi tutu ya ta̱a ra. Ta íyo sava ya ndee ni ndíchi kundaa ini yo xiꞌin, yakan káva sava naꞌa ya, na köo xíni, na köo kúndaa vaꞌa ini xiꞌin ya, na täꞌan kuaꞌnu vaꞌa xiꞌin tuꞌun ra. Na ñaa ku na káva ya, ndísama na tuꞌun ya ndaa ni si̱naꞌa ra ñani yo Pablo xaꞌa tuꞌun Iva yo Ndioxi. Ta xaꞌa ya íkan na saa, ta síndiꞌi na xaꞌa mií va na.

¹⁷ Ñani mani, ndóꞌo̱ ta xa kúndaa va ini ndo xaꞌa ya kuu, yakan kuenta ni koo ndo täxi ndo sindaꞌvi nda väꞌa ñaa ndóꞌo̱ ya kuꞌun ndo ichí väꞌa nuu nduvita ini ndo, ta kündikun tuun ka ndo Tata yo Jesucristo.

¹⁸ Ta ndóꞌo̱ xíniñuꞌu ndo kunitaꞌan vaꞌa ka ndo xiꞌin Tata yo Jesucristo, ra síkaku yoo, ra kúꞌvi ni ini xíni yoo. Ta ná xaa kaꞌnu ni yo ra ndiꞌi saa kivi xiꞌin ndiꞌi kivi ya vaxi. Saa ná koo.