2 Pedro 1 - Xochapa Mixteco

Káꞌan ndioxi ra Pedro xiꞌin na kándixa Tata yo Jesucristo

¹ Yeꞌe, Simón Pedro ra xáa chiñu nuu Tata yo Jesucristo ku i táa tutu ya tíꞌvi i xaa ndaꞌa ndóꞌo̱ ñani yo, na xa iin káchi luvi ni kándixa ra tá kuꞌva kándixa mií nde ra. Saa chi mií Tata yo Jesucristo ra síkaku yoo, ra kúu Iva yo Ndioxi ku iin taa ra ndee ni ndaa ini.

² Ta mií Iva yo Ndioxi, ná taxi kuaꞌa ni ya vaꞌa koo xiꞌin ndo, saa ná koo vaꞌa ni ndo xaꞌa ya xíni taꞌan vaꞌa ni ndo xiꞌin Iva yo Ndioxi tin mií Tata yo Jesucristo, ra chee ni nuu yo.

Mií Ndioxi ku ra chíndee yoo ya xaa súvi yo ya kúni mií ra

³ Ta xiꞌin ndee Ndioxi kua xa ta̱xi ra ndiꞌi ya xíniñuꞌu ndo ndaꞌa ndo ya vaꞌa kutaku yo nuu ra tá kuꞌva kúni mií ra. Xa ndi̱kiꞌin yo ndiꞌi ya yóꞌó chi vitin ta ndinuꞌu ni ini yo xíni yo Jesucristo, ra ka̱na yoo ya ndu̱u yo naꞌa, na kúu mií ya vaꞌa, ya luvi kaꞌnu ni kúu mií ra.

⁴ Tixin ya yóꞌó kua ndi̱niꞌi yo ya luvi ni, ya yáꞌa ni chee ndi̱kaꞌan ra taxi ra ndaꞌa yo, nuu xinu yo koo yo tá kuꞌva káa mií ra, i̱í ni ra. Saa kua kuchiñu yo kunu yo nuu kaku yo nuu ndiꞌi ya väꞌa íyo ñuu ivi yóꞌó, chi ndisaa ya väꞌa kútoo ni mií ikin kuñu na kua íkan na.

⁵ Ta xaꞌa ya xa ndi̱kiꞌin ndo ndiꞌi ya vaꞌa káꞌan i xiꞌin ndo, xaꞌa ya ikán kua kundiꞌi ni ini ndo nduu vaꞌa ka ndo, ta saa kundaa ni ini ndo kuni ndo Ndioxi ta vívií koo ndo nuu ra, saa chikaa ni ndo ndee ya kundaa vaꞌa ka ini ndo xaꞌa ra.

⁶ Tá kúndaa vaꞌa ini ndo xaꞌa ra, ta ndixita ndo mií ndo nuu ya väꞌa, ta xaꞌa ndee ni ini ndo xiꞌin ndiꞌi ñaꞌa, saa xaa toꞌo ni ndo Ndioxi.

⁷ Ta xíniñuꞌu ndo kuꞌvi ni ini ndo kuni ndo na taꞌan yo, na ndíkun Tata yo Jesucristo xiꞌin ndiꞌi ka naꞌa.

⁸ Tá tu íkan ndo ndiꞌi ya káꞌan i xaꞌa xiꞌin ndo yóꞌó iin iin kivi, saa kua nduu ndo naꞌa, na íkan chiñu ya ndee ni ndáa yaꞌvi, ta ya ñaa kua káꞌan vaꞌa ni xaꞌa ndo, ya xíni ni ndo Tata yo Jesucristo.

⁹ Tá ndá naꞌa köo íkan taꞌan ya yóꞌó, ta tá íin na kuáa̱ va saa íin na, küvi koto xíka ni va na, loꞌo ni va xíto na, ta xa ndi̱ndoso ini na ya xa̱a kaꞌnu ini Ndioxi xaꞌa kuachi na.

¹⁰ Yakan ndóꞌo̱, ta xíniñuꞌu ndo tuun ni kundikun ndo ichí Tata yo Jesucristo nuu ndínaꞌa ndo mií ndo, ya ka̱na ra ndóꞌo̱ saa ndi̱kaxin ra ndóꞌo̱ ya kundikun ndo ra. Tá ná ikan ndo saa ta nda iin kivi köyo ndo nuu kuachi ya ikan ndo ya väꞌa.

¹¹ Ta saa kusini ni Ndioxi xiꞌin ndo saa kuna koꞌo ra yeꞌe nuu ndo kiꞌvi ndo koo ndo xiꞌin ra ndiꞌi saa tiempo nuu ndivi nuu koo Tata yo Jesucristo ra síkaku yoo kaꞌnda chiñu ra.

¹² Ta ndóꞌo̱, ta xa xíni ndiꞌi ndo ya yóꞌo̱, ta tuun ni ndíkun ndo ya ndaa ya xa si̱naꞌa na ndóꞌo̱, ni yeꞌe ta ndiꞌi saa ichí síndikaꞌán i ini ndo ya ná ndïndoso ini ndo xaꞌa ya yóꞌó.

¹³ Chi nani táku i ta xíniñuꞌu i sindikaꞌán i ini ndo xaꞌa ya yóꞌó, tá íyo i xiꞌin ndo ñuu ivi yóꞌó.

¹⁴ Saa chi xa ndi̱kaꞌan va mií Tata yo Jesucristo xiꞌin i ya kama ni ndikiꞌin ra yeꞌe kuꞌun i xiꞌin ra.

¹⁵ Ta xaꞌa ya ikán kua ndíꞌi ni ini i síndikaꞌán i ndóꞌo̱ ndiꞌi saa ichí, yachi ka tá íyo i xiꞌin ndo ya ná kuñuꞌu ni ini ndo xaꞌa ya káꞌan i xiꞌin ndo tá kivi köo ka i íyo xiꞌin ndo.

Káꞌan ra Pedro ya xi̱ni xiꞌin nuu ra ya chee luvi ni kúu mií Tata yo Jesucristo

¹⁶ Ta xa ndi̱tuꞌun nde xiꞌin ndo, si̱naꞌa nde ndóꞌo̱ xaꞌa ndee ya kúu mií Tata yo Jesucristo xiꞌin ya ndiko koo ra kixi tuku ra ñuu ivi yóꞌó, ta ya ndaa ni kua ndi̱kaꞌan nde xiꞌin ndo, süvi kuento vata kua ndi̱tuꞌun nde xiꞌin ndo. Chi ndeꞌe ta xi̱ni xiꞌin nuu mií nde ndee chee ni kúu mií ra.

¹⁷ Tá ndi̱kaꞌan Iva yo Ndioxi xiꞌin ra, saa kua ta̱xi ra ya chee ni xiꞌin ya toꞌo ni ndaꞌa ra, ke̱e ya nuu luvi ni káa nuu mií Iva yo Ndioxi, káchi ra saa: “Ra yóꞌó ku Seꞌe mani mií i, ra kúꞌvi ni ini i xíni i, kúsini ni i xiꞌin ra”, káchi Ndioxi.

¹⁸ Ta ndeꞌe xi̱ni soꞌo nde tachi Ndioxi ya ke̱e nuu ndivi ndi̱kaꞌan ya xiꞌin Tata yo Jesucristo, tá xi̱ndoo nde xiꞌin ra nuu xiki ya kúu iku i̱í ni.

¹⁹ Ta xaꞌa ya xa xi̱ni nde xiꞌin ya xi̱ni soꞌo nde kua ndinuꞌu ni kándixa nde tuꞌun ya ta̱a nda ndi̱kaꞌan ndoso tuꞌun yuꞌu Ndioxi xinaꞌa, chi ya ndaa ni ku ya. Ta vaꞌa ni íkan ndo ya ndee ni xíni soꞌo ndo ya. Chi tuꞌun ikán ta tá káa ñu̱ꞌu̱ ya síndiyeꞌe nuu naá ni saa káa ya. Chi Cristo ku ra síndiyeꞌe nuu naá ni, ta tá káa kiti kimi kéta tá túvi, saa káa ra, ta kuꞌva saa síndiyeꞌe ra nima ndo.

²⁰ Ta vaꞌa ná kundaa ini ndo xaꞌa tuꞌun ya ta̱a nda ndi̱kaꞌan ndoso tuꞌun yuꞌu Ndioxi, chi nda iin nda köo ndíkani ya tá kúꞌva kúni mií nda.

²¹ Saa chi tuꞌun ya ta̱a nda ndi̱kaꞌan ndoso tuꞌun yuꞌu Ndioxi, ta süvi xiní mií nda ndíkana ya ta̱a nda, mií Tachi I̱í Ndioxi kua si̱ndikaꞌán ini nda xiꞌin ndiꞌi ya ta̱a nda.