2 Juan 1 - Xochapa Mixteco

Káꞌan Ndioxi ra Juan xiꞌin na veꞌe ñuꞌu

¹ Yeꞌe Juan, ra xikuaꞌa nuu na veꞌe ñuꞌu ku ra táa tutu yóꞌó xaa ya ndaꞌa ndóꞌo̱ na veꞌe ñuꞌu, na ndi̱kaxin Iva yo Ndioxi. Saa xaa tu ya ndaꞌa na xa ndi̱kaꞌan ndo xiꞌin xaꞌa tuꞌun ra ya ndaa, chi ndóꞌo̱ ku ndo kúꞌvi ni ini i xíni i. Ta süvi ndisaa yeꞌe ku ra kúꞌvi ini xíni ndóꞌo̱, ndiꞌi na xa ku̱ndaa ini xaꞌa ya ndaa ku na kúꞌvi ini xíni ndóꞌo̱.

² Ta saa ndeꞌe kúꞌvi ni ini nde xíni nde ndóꞌo̱, saa chi íyo ya ndaa ini yo vitin, ta saa koo ya xiꞌin yo ndiꞌi saa tiempo ya vaxi.

³ Ta mií Ndioxi xiꞌin Seꞌe ra, ra kúu Jesucristo, ná chikaa ya vaꞌa ndóꞌo̱. Ta ná kundaꞌvi ini ra kuni ra ndóꞌo̱, saa ná taxi ra koo vaꞌa ini ndo. Chi vitin ta xa íyo ndiꞌi ya vaꞌa yóꞌó xiꞌin yo xaꞌa ya kándixa yo ya ndaa ta kúꞌvi ini yo xíni taꞌan yo.

⁴ Kúsini ni i ya ndi̱kitaꞌan i xiꞌin sava ndo xíka ndo ichí ya ndaa tá kuꞌva íyo ya ta̱xi Iva yo Ndioxi xa̱ꞌnda chiñu ra nuu yo, saa íyo ya íkan ndo.

⁵ Ta vitin xíkan ni i ya mani nuu ndo, síndikaꞌan i ndóꞌo̱ xaꞌa tuꞌun ya xa xi̱ni soꞌo ndo yachi, saa chi ya ikán kua xáꞌnda chiñu nuu yo ya ná kuꞌvi ni ini yo kuni taꞌan yo ta xa xíni ndo ya yóꞌó, süvi ya xa̱á kua xáꞌnda chiñu i nuu ndo.

⁶ Tá tu ndixa kúꞌvi ini ndo xíni taꞌan ndo ta xíniñuꞌu ndo kandixa ndo ya xáꞌnda chiñu Ndioxi. Saa chi ya yóꞌó ta xa yachi vi xi̱ni soꞌo ndo: ya xíniñuꞌu yo kuꞌvi ini yo kuni taꞌan yo.

⁷ Kuenta ni koo ndo chi xa kuaꞌa ni na vata íyo ñuu ivi yóꞌó, ta na ñaa ta köo xíin na ndikuni na Jesucristo ya ki̱xi ra ñuu ivi yóꞌó ta ndu̱u ra ra ivi taꞌan mií yo ivi yóꞌó. Ndiꞌi na köo xíin ndi̱kuni ñaꞌa ta na ñaa ku na vata, na sáa ini xíni Jesucristo.

⁸ Ta ndóꞌo̱, kuenta ni koo ndo saa chi süvi ka vi ya mani uun xa̱a chiñu ndo. Sundi ndikundikun ni ndo Jesucristo, ta saa ndikiꞌin ndo ndiꞌi ya vaꞌa chi̱tuni Ndioxi taxi ra ndaꞌa ndo.

⁹ Ndiꞌi na síndoo ichí ya si̱naꞌa Jesucristo ta ndíkiꞌin na inka ichí kuaꞌan na, ta köo Ndioxi íyo xiꞌin na, sundi na tuun ni ndíkun ichí ya si̱naꞌa ra ta kúu mií na Iva yo Ndioxi xiꞌin Seꞌe ra.

¹⁰ Tá ndá na xáa nuu ndo, ta köo sínaꞌa na ndóꞌo̱ tá kuꞌva si̱naꞌa nde ndóꞌo̱ xaꞌa Tata yo Jesucristo, ta ndïkuiso ndo na koo na veꞌe ndo xaꞌa ya köo vaꞌa sínaꞌa na, ta ni käꞌan ndo xiꞌin na yaꞌa na koo na xiꞌin ndo.

¹¹ Saa chi tá ndá na xáa vata xiꞌin na, ta ndíkiꞌin vaꞌa ñaꞌa na, ta ya ñaa kúni kachi ya íyo yuꞌu na xiꞌin taꞌan na xaꞌa ya väꞌa sínaꞌa na.

Kúni ra Juan kuꞌun ra koto ra na veꞌe ñuꞌu

¹² Íyo kuaꞌa ni ka ya kúni i kaꞌan i xiꞌin ndo ta köo kúni i taa i ya nuu tutu yóꞌó. Vaꞌa ka kaꞌan yuꞌu i xiꞌin ndo nda ná xaa i koto i ndóꞌo̱, saa chi kúni i xaa i koto i ndóꞌo̱. Ta saa kua kusini ni ndiꞌi yo.

¹³ Ta tíꞌvi ni tu na ñani yo, na veꞌe ñuꞌu, na ndi̱kaxin Ndioxi tuꞌun mani xaa nuu ndo ñani. Saa ná koo.