2 Corintios 2 - Xochapa Mixteco

¹ Xaꞌa ya ñaa kua ndi̱kani ini i ya xäa i koto i ndóꞌo̱, chi köo kúni i xaa suchi i ini ndo.

² Saa chi tá ná xaa suchi i ini ndo ta köo naꞌa sindiko ini yeꞌe, chi tá íyo suchi ini ndo ta küvi sindiko ndo ini i.

³ Xaꞌa ya ñaa kua vaꞌa ka ta̱a i tutu xaa ya nuu ndo, ta köo ndi̱xaa mií i nuu ndo, ya ná xäa suchi i ini ndo. Chi tá ná ndi̱kitaꞌan tuku i xiꞌin ndo ta xäa suchi ndo ini i, xaa sií va ndo ini i.

⁴ Tá kivi ta̱a i tutu ikán xaa ya nuu ndo, ta ndee ni kúsuchi ini i, saa ndíꞌi ka vi ini i, xáku ka vi i, ta ya ndi̱kaꞌan i xiꞌin ndo saa, ta süvi ya xaa suchi i ini ndo kua, chi yeꞌe, ta ku̱ni i ná kundaa ini ndo ya ndee ni kúꞌvi ini i xíni i ndóꞌo̱.

Káꞌan ra Pablo ya ná xaa kaꞌnu ini na xaꞌa taa ra i̱kan ya väꞌa xiꞌin na

⁵ Ta ya káꞌan i xiꞌin ndo xaꞌa taa ra xa̱a chiꞌña ini i, ta köo yáꞌa ni yuꞌu i káꞌan i xiꞌin ndo, chi ya ndaa kua, taa ra xa̱a chiꞌña ini i, ta köo ndi̱xaa chiꞌña ra ini i tá kuꞌva ndee ni xa̱a chiꞌña ra ini ndóꞌo̱.

⁶ Ta vaꞌa va, chi xa cha̱ꞌvi va ra xaꞌa kuachi ya i̱kan ra chi xa iin káchi si̱ndoꞌo ndiꞌi va ndo ini ra.

⁷ Ta vitin xíniñuꞌu ndo xaa kaꞌnu ini ndo xaꞌa ra ya ná chindee taꞌan ndo xiꞌin ra nduvaꞌa ini ra, ya ná küsuchi ni ka ini ra.

⁸ Ta xíkan ni i ya mani nuu ndo ya xaa vií ndo xiꞌin ra ná kuni ra ya ndee ni kúꞌvi ini ndo xíni ndo ra.

⁹ Ya ta̱a i tutu xaa nuu ndo nuu káꞌan i xiꞌin ndo xaꞌa ya i̱kan ra ñaa, ta xaꞌa ya kúni i koto ndoso i ndóꞌo̱ án ya ndixa kua xáa súvi ndiꞌi ndo ya káꞌan i xiꞌin ndo, xaꞌa ya ñaa kua ta̱a i ya xaa ya nuu ndo.

¹⁰ Vaꞌa ná kundaa ini ndo, chi tá xáa kaꞌnu ini ndo xaꞌa kuachi i̱kan ra ñaa, ta saa tu yeꞌe va, xáa kaꞌnu ini i xaꞌa ra, xaꞌa ya i̱kan ra saa xiꞌin ndóꞌo̱ na veꞌe ñuꞌu. Ta nuu Cristo kua íkan i saa, xáa kaꞌnu ini i xaꞌa ra, xaꞌa ya kúꞌvi ni ini i xíni i ndóꞌo̱.

¹¹ Ta vaꞌa ná ndikiꞌin mani yo ra, ya ná täxi yo sindaꞌvi kiti nǎꞌa yo, saa chi xa ndiꞌi yo xíni ndá kuꞌva kua xáa chiñu ri.

Ndi̱ndiꞌi ni ini ra Pablo tá ndi̱xiyo ra ñuu Troas

¹² Tá ndi̱xaꞌan i ñuu Troas ya ndituꞌun i tuꞌun vaꞌa xaꞌa Jesucristo xiꞌin naꞌa, ta ndee ni vaꞌa xu̱na Tata yo ichí nuu i ya xaa chiñu i ikán.

¹³ Sundi köo ndi̱kuvi xaa chiñu i, chi si̱ndiꞌi ni ya ini i xaꞌa ya köo ndi̱taꞌan i ra Tito ñani yo, yakan vaꞌa ka ndi̱kaꞌan ndioxi i xiꞌin na ñani yo ñuu Troas, ta ndi̱kiꞌin i kuaꞌan i chí estado Macedonia.

Mií Ndioxi ku ra chíndee yo nuu ndiꞌi tindoꞌo ya vaxi nuu yo

¹⁴ Ta táxi ni i tixaꞌvi ndaꞌa Ndioxi xaꞌa Jesucristo chi ndiꞌi saa ichí chíndee taꞌan ra xiꞌin nde kúchiñu nde xáa kanaa nde nuu na sáa ini xíni ndeꞌe. Ta tixin ndeꞌe kua xíta niꞌnu ndiꞌi tuꞌun xaꞌa ra iníi kúu. Chi tá káa nduta támi ka vi xáꞌan, saa káa tuꞌun vaꞌa xaꞌa ra nuu naꞌa, na xíni soꞌo ya.

¹⁵ Ta ndeꞌe, tá íin xiko ya támi ni xáꞌan sóko mií Cristo kuandaa kuaꞌan nuu Ndioxi, saa íin nde. Ta xiko támi ni xáꞌan xíta ya kuaꞌan ya nuu ndiꞌi naꞌa, na síkaku Ndioxi, ta saa kuaꞌan tu ya nuu naꞌa, na kuaꞌan ichí nuu ndiꞌi xaꞌa va na.

¹⁶ Ta nuu naꞌa, na kuaꞌan ichí nuu ndiꞌi xaꞌa na, tá íin xi̱ko̱ na ndíi va, saa íin xi̱ko̱ nde nuu na. Ta nuu naꞌa, na kuaꞌan ichí nuu kaku na, tá íin xi̱ko̱ na táku xáꞌan támi, saa íin xi̱ko̱ nde nuu na. Ta köo naꞌa kuchiñu xaa súvi vi chiñu yóꞌó tá tu süvi Ndioxi ku ra tíꞌvi na kuaꞌan na. Chi ndee ni va chiñu ku mií ya.

¹⁷ Ndeꞌe, ta köo kíꞌin nde yaꞌvi nde xaꞌa ya ndítuꞌun nde tuꞌun Ndioxi xiꞌin naꞌa, tá kuꞌva íkan sava na, chi síndaꞌvi na ivi. Sundi ndeꞌe, ta ndaa ni ndítuꞌun nde xiꞌin na. Nuu Ndioxi káꞌan nde xiꞌin na, chi mií ra ku ra ti̱ꞌvi ndeꞌe kaꞌan ndoso nde xaꞌa ra, xaꞌa ya xa iin ndi̱kitaꞌan nde xiꞌin Jesucristo.