2 Corintios 12 - Xochapa Mixteco

Káꞌan ra Pablo xaꞌa ya vaꞌa si̱tuvi Ndioxi nuu ra

¹ Ta ya ndaa kua nda iin ñaꞌa köo níꞌi naꞌa, na chínuu vaꞌa ni mií tuꞌun. Ta saa ni xíniñuꞌu i ndituꞌun i xiꞌin ndo xaꞌa ñaꞌa ya ta̱xi Ndioxi ndaꞌa i, chi mií ra ku ra si̱tuvi ya nuu i.

² Ta xa íyo uxi kumi kuiya ku ya ndi̱xaꞌan i nuu ndivi, nda nuu ndivi ya uni kua ndi̱xaꞌan i. Ta köo xíni i ndá kuꞌva kua ndi̱xaꞌan i, án xiꞌin ikin kuñu i kua ndi̱xaꞌan i, án xiꞌin nima i kua ndi̱xaꞌan i, köo xíni i, iindaa mií Ndioxi ku ra xíni.

³ Ta ya káꞌan i xiꞌin ndo yóꞌó ta ya ndixa ni kua vani köo xíni i ndá kuꞌva kua ndi̱xaꞌan i, án xiꞌin ikin kuñu i kua ndi̱xaꞌan i, án xiꞌin nima i kua ndi̱xaꞌan i, köo xíni i ndá kuꞌva kua ndi̱xaꞌan i, iindaa mií Ndioxi ku ra xíni.

⁴ Chi ndi̱xaꞌan i nuu ndivi mí nuu índuꞌu Ndioxi, ta ikán kua xi̱ni soꞌo i tuꞌun ya íyo sěꞌe, ta nda iin naꞌa köo ichí ndaꞌa ya kuchiñu na kaꞌan na tuꞌun ikán.

⁵ Ta xaꞌa ya i̱kan Ndioxi saa xiꞌin i, ta vaꞌa ni chinuu vaꞌa i tuꞌun i nuu ndo, ndikuu, sundi yeꞌe, ta küvi chinuu vaꞌa ni i tuꞌun i, ya vaꞌa ni kaꞌan i xaꞌa kua vita ni ini va i.

⁶ Ta saa ni ná kaꞌan vaꞌa ni i xaꞌa mií i, ndikuu, ta süvi ra kíꞌvi ku i ya káꞌan i saa, chi ya ndaa ni va kua káꞌan i xiꞌin ndo. Sundi yeꞌe, ta köo kúni i xaa kaꞌnu xiꞌin mií i nuu ndo, chi köo kúni i ya ndikani ini ndo xaꞌa i ya ndee ni ndáa yaꞌvi i nuu ndo xaꞌa kuꞌva íyo i án xaꞌa ya káꞌan i xiꞌin ndo.

⁷ Ta ya ná chïnuu vaꞌa ni i tuꞌun i, xiꞌin ya xi̱ni i tá nda̱a i nuu ndivi, xaꞌa ya ikán kua ta̱xi Ndioxi ichí ndaꞌa tachi nduvaꞌa ya sítixuꞌvi ni ya yeꞌe, ta ndee ni kúꞌvi kuñu i, tá káa iñu saa káa ya kuakiꞌvi ikin kuñu i, saa ndóꞌo i ya ná chïnuu vaꞌa ni i tuꞌun mií i.

⁸ Ta xa uni ichí ndi̱xikan ni i ya mani nuu Tata yo Jesucristo ya ná sindaꞌa ra yeꞌe xiꞌin kueꞌe ndóꞌo i.

⁹ Saa ndi̱kaꞌan ra xiꞌin i, káchi ra saa: “Vaꞌa ná kusini ni un, chi köo xíniñuꞌu un ya ñaa, ya kúꞌvi ni ini i xíni yóꞌo̱ kua xíniñuꞌu ni un, saa chi tá ndóꞌo un saa, ta saa kua ndúndee ka un xiꞌin ndee i ya ta̱xi i ndaꞌa un íyo xiꞌin un”, káchi ra xiꞌin i. Yakan vitin ta kúsini ni va i tá kúvita ni ini i, chi saa kua xíni i ya íyo ndee Tata yo Jesucristo xiꞌin i.

¹⁰ Yakan vitin ta kúsini ni va i tá kúvita ini i, saa tu tá káꞌan kini naꞌa xiꞌin i xaꞌa Cristo, saa tu tá kúmani ndá ka ñaꞌa nuu i ya xíniñuꞌu i, án tá xáa nduvaꞌa na xiꞌin i. Saa chi tá kúvita ni ini i ta saa kua ndúndaku vaꞌa ka ini i, ndúu ndee ka i.

¹¹ Tá kuꞌva káꞌan iin ra kiꞌvi va saa káꞌan i, chi mií ndo ku ndo i̱kan saa xiꞌin i, ya káꞌan i saa xiꞌin ndo. Chi ndóꞌo̱ ku ndo xíniñuꞌu kaꞌan vaꞌa xaꞌa i, ndikuu. Sundi ndóꞌo̱, ta ni köo ndáa yaꞌvi vi i nuu ndo. Ta saa ni köo ni̱nu̱ kúni vi i nuu nda chínuu vaꞌa ni tuꞌun ñaa, ya ndee ni naꞌnu ka nda ñaa nuu yeꞌe, túvi ndo.

¹² Xiꞌin ndiꞌi ni kúu ya vaꞌa xiꞌin yatuꞌun ya i̱kan i xi̱ni ndo ya ñaa kua káꞌan xaꞌa i ya kúu i iin ra apóstol, ra xíka chiñu nuu Tata yo Jesucristo. Saa chi kaꞌnu ni ndi̱xiyo ini i xiꞌin ndo.

¹³ Ta ¿án ndá ya i̱kan i xiꞌin ndo? Chi iin kachi va xa̱a súvi i xiꞌin ndo tá kuꞌva i̱kan i xiꞌin inka na veꞌe ñuꞌu, túvi i. Iindaa kua köo ndi̱kaꞌan i xiꞌin ndo ya chindee ndo yeꞌe xiꞌin xuꞌun tá kuꞌva chi̱ndee inka na veꞌe ñuꞌu yeꞌe xiꞌin xuꞌun. ¡Xaa kaꞌnu ni ini ndo chi köo ndi̱chindee ndo yeꞌe!

¹⁴ Ta vitin ta xa íyo ndúvi tuku i xaa i koto i ndóꞌo̱ ichí uni. Ta köo kúni i sindiꞌi i ini ndo ya chindee taꞌan ndo xiꞌin i. Chi yeꞌe, ta köo ndúku i ñaꞌa ya kúu mií ndo nuu ndo, mií va ndo ku ndo ndíꞌi ini i xaꞌa. Chi na iva siꞌí va ku na xíniñuꞌu nduku xuꞌun ya kuniñuꞌu na vali seꞌe na, ta süvi seꞌe vali na ku na xíniñuꞌu nduku xuꞌun xaꞌa iva siꞌí na.

¹⁵ Vaꞌa ni kúni i ya tíin ndiꞌi i xuꞌun ya kúu mií i xiꞌin ndo, ta nda mií i ta taxi i mií i xaꞌa ya chindee i ndóꞌo̱. Ndee ni va kúꞌvi ka ini i xíni i ndóꞌo̱, sundi ndóꞌo̱ ta loꞌo ni va kúꞌvi ini ndo xíni ndo yeꞌe.

¹⁶ Ndóꞌo̱, ta xa kúndaa vaꞌa va ini ndo ya köo ndi̱nduku i xuꞌun nuu ndo, ta saa ni káꞌan sava ndo xaꞌa i ya maña ni i, ta síndaꞌvi i sava ndo, káchi ndo xaꞌa i.

¹⁷ Ta ¿án sana si̱ndaꞌvi i ndóꞌo̱ tixin sava nda ti̱ꞌvi i ndi̱xaa nuu ndo, káꞌán ndo? Sundi süvi saa íyo ya.

¹⁸ Ra Tito, ñani yo ku ra ti̱ꞌvi i ndi̱xaa ra nuu ndo xiꞌin inka ra ñani yo, ra veꞌe ñuꞌu. Ta köo ndi̱sindaꞌvi ra ikán ndóꞌo̱ chi tá kuꞌva xáa chiñu yeꞌe saa xáa chiñu tu ra ikán va, iin káchi xáa chiñu uvi saa va nde.

¹⁹ Ta ¿án sana ndíkani ini ndo xaꞌa nde ya ndíkuiin nde xaꞌa nde ndiꞌi saa tiempo nuu ndo, káꞌán ndo, ta yakan kua táa nde tutu yóꞌó xaa ya nuu ndo, túvi ndo? Ta süvi saa íyo ya. Chi ndeꞌe ndíkun Ndioxi ku nde, ta nuu mií ra kua káꞌan nde xiꞌin ndo, chi ñani nde ku ndóꞌo̱, ta ndiꞌi ya íkan nde xiꞌin ndo ta xaꞌa ya kúni nde chindee taꞌan nde xiꞌin ndo va kua.

²⁰ Ta yeꞌe, ta ndíꞌi ni va ini i tá ná xaa i koto i ndóꞌo̱, chi sana ndïtaꞌan i ndóꞌo̱ tá kuꞌva ndíkani ini i nditaꞌan i ndóꞌo̱, án sana ndïtaꞌan tu ndóꞌo̱ va yeꞌe tá kuꞌva ndíkani ini ndo nditaꞌan ndo yeꞌe. Saa ndíꞌi ni ini i xiꞌin ndo chi sava ndo ta án sana kánitaꞌan va ndo, ta sava tu ndo án sana kûní tu ini ndo xíni taꞌan va ndo, ta sava tu ndo án sana sáa ini ndo xíni taꞌan va ndo, ta sava tu ndo án sana ta̱ꞌvi taꞌan va ndo, saa tu sava ndo án káꞌan kini ndo xiꞌin taꞌan va ndo, sava tu ndo án sana kánaꞌa ndo xaꞌa taꞌan va ndo, ta sava tu ndo án ndee ni kútai ini ndo nuu taꞌan va ndo, saa tu sava ndo án sana ndu̱u iku ni ini va ndo xiꞌin taꞌan ndo.

²¹ Yakan ndíꞌi ka vi ini i tá ná xaa i koto i ndóꞌo̱, chi ndee ni ìyo si̱kaꞌán Ndioxi nuu i chi sana täꞌan ndiko koo ini ndo xaꞌa kuachi ndo ya íkan ndo yachi. Ta xaꞌa ya íkan ndo saa, ta án sana nda kuaku suchi ni ini i xaꞌa sava ndo, chi täꞌan sindoo ndo ñaꞌa väꞌa íkan ndo, xíka sií yaa va ndo xiꞌin taꞌan ndo, ta saa íkan ndo ñaꞌa ya kaꞌa̱n ni nuu.