1 Corintios 2 - Xochapa Mixteco

Káꞌan ndoso ra Pablo xaꞌa ya ndi̱xiꞌi Jesucristo nuu cruzin

¹ Ñani yo xiꞌin kuꞌva yo, tá ndi̱xaꞌan i xi̱to i ndóꞌo̱. Tá ndi̱kaꞌan ndoso i tuꞌun xaꞌa Jesucristo xiꞌin ndo xaꞌa ñaꞌa ya ndi̱xiyo sěꞌe nuu ndo yachi. Ta köo ndi̱xiniñuꞌu i tuꞌun ndíchi ni kaꞌan i xiꞌin ndo, tuꞌun ya kuchiñu ndo kundaa ini ndo xiꞌin va ku ya ndi̱kaꞌan i xiꞌin ndo.

² Saa tá ndi̱xiyo i xiꞌin ndo, ta chi̱kaa ini i kaꞌan i xiꞌin ndo ndisaa xaꞌa Cristo, ta köo ndi̱xiin i kaꞌan i xiꞌin ndo ndá ka ñaꞌa, ndisaa xaꞌa ya ndi̱xiꞌi ra nuu cruzin kua ndi̱kaꞌan i xiꞌin ndo.

³ Yachi tá ndi̱xaꞌan i nuu ndo ta vita ni kúni i, íꞌvi ni i ndakua kísi ya yeꞌe.

⁴ Tá ndi̱kaꞌan ndoso i xiꞌin ndo xaꞌa tuꞌun ra, ta köo ndi̱xiniñuꞌu i tuꞌun ndíchi ni taꞌan ya xíniñuꞌu na ñuu ivi yóꞌó ya sixinu i ini ndo. Sundi mií Tachi I̱í Ndioxi xiꞌin ndee mií ra kua si̱xinu ra ini ndo xaꞌa tuꞌun ya ndi̱kaꞌan i xiꞌin ndo ya kúu ya ndaa ni.

⁵ I̱kan i saa xiꞌin ndo ya ná kandixa ni ndo ndee Ndioxi, ta täxi ndo si̱xinu na ñuu ivi yóꞌó ini ndo xiꞌin ya ndíchi kúu mií na.

Tixin Tachi I̱í Ndioxi táxi ra kundaa ini naꞌa xaꞌa ñaꞌa ya íyo sěꞌe

⁶ Ta saa ni, ya ndaa kua ndítuꞌun nde tuꞌun ndíchi xiꞌin naꞌa, na xa xuxa ini xiꞌin tuꞌun Ndioxi. Ta ya ndíchi ndítuꞌun nde xiꞌin na, ta süvi taꞌan ya ndíchi íyo ñuu ivi yóꞌó ku ya, ni süvi taꞌan ya ndíchi kúu mií na chiñu ñuu ivi yóꞌó ku ya, chi ya ndíchi kúu mií na chiñu yóꞌó, ta ya ndíꞌi xaꞌa va ku ya.

⁷ Ndeꞌe, ta sínaꞌa nde ya ndíchi kúu mií Ndioxi, ya ndi̱xiyo sěꞌe yachi nda kivi tá xi̱koo xaꞌa ñuu ivi yóꞌó. Nda saa vi chi̱tuni Ndioxi ya ndíchi yóꞌó ya kuchiñu niꞌi ni yo ya vaꞌa xiꞌin ya.

⁸ Ta ya ndíchi yóꞌó, ta nda iin mií na chiñu ñuu ivi yóꞌó köo ndíkundaa ini xaꞌa ya. Saa chi tá ndíkundaa ini na xaꞌa ya, ta chïnuu vi na Tata yo Jesucristo nuu cruzin, ndikuu, chi ndee ni ndee ku mií ra.

⁹ Ta ndaꞌa yóo kua ta̱xi Ndioxi ya, tá káꞌan tuꞌun ra ya ta̱a na xinaꞌa, káchi ya saa: Nda iin naꞌa täꞌan ndikani ini xaꞌa ya si̱kuaꞌa Ndioxi xaꞌa yoo kúꞌvi ni ini ra xíni ra, ni täꞌan kuni xiꞌin nuu na ya, ta ni täꞌan kuni soꞌo na ya.

¹⁰ Sundi mií Ndioxi ku ra ndi̱naꞌa ya yóꞌó nuu yo tixin Tachi ra ya kuchiñu yo kundaa ini yo xaꞌa ya. Saa chi ndisaa mií Tachi ra kua xíto ndoso ndiꞌi ni kúu ñaꞌa. Nda ñaꞌa ya küvi kundaa ini yo xiꞌin, saa tu ndiꞌi ya ndíchi ni, ya íyo sěꞌe, ta ndisaa mií Tachi ra kua kúndaa ini xaꞌa ndiꞌi ya kúu mií Ndioxi.

¹¹ Xa xíni mií yo, nda iin mií na ñuu ivi yóꞌó, ta köo na kúndaa ini ndá kuꞌva ndíkani ini inka naꞌa. Ndisaa mií tachi ya kúu mií na kua kúndaa ini ndá kuꞌva ndíkani ini na. Ta kuꞌva saa kua kúndaa ini Tachi I̱í Ndioxi ndá kuꞌva ndíkani ini mií ra.

¹² Ta Ndioxi ta̱xi ra Tachi mií ra ndaꞌa yo ya kuchiñu yo kundaa ini yo xaꞌa ñaꞌa, ya vaꞌa ta̱xi ra ndaꞌa yo. Chi kúu mií yo Tachi ra, ta köo kúu mií yo tachi ya xáꞌnda chiñu nuu na ñuu ivi yóꞌó.

¹³ Sundi ndeꞌe, ta ndítuꞌun nde xaꞌa ya ndíchi xiꞌin naꞌa, ta ya sínaꞌa Tachi I̱í ra ndeꞌe kua ndítuꞌun nde xaꞌa xiꞌin na. Ta süvi taꞌan tuꞌun ndíchi ya íyo xi̱ní na ñuu ivi yóꞌó kua ndítuꞌun nde xiꞌin na. Xiꞌin tuꞌun ndíchi, ya vaꞌa ke̱e nuu ndivi kua ndíkani nde xaꞌa ñaꞌa ya vaꞌa, ya ke̱e nuu ndivi xiꞌin na.

¹⁴ Ta naꞌa, na köo íyo Tachi I̱í Ndioxi xiꞌin ta köo kúchiñu na kundaa ini na xaꞌa ya vaꞌa ke̱e nuu ndivi, chi tá káa tuꞌun ya kíꞌvi va saa káa ya nuu na. Köo kúchiñu na kundaa ini na xaꞌa ya, saa chi ndisaa naꞌa, na kúu mií Tachi I̱í Ndioxi ku na kúchiñu kúndaa ini xiꞌin ya.

¹⁵ Sundi yoo ta kúu mií yo Tachi I̱í ra, yakan vaꞌa kúndaa ini yo xaꞌa ya vaꞌa ke̱e nuu ndivi. Ta nda iin naꞌa küvi taxi kuachi xaꞌa yo.

¹⁶ Xaꞌa ya ikán kua káꞌan tuꞌun Ndioxi ya ta̱a na xinaꞌa, káchi ya saa: “Nda iin naꞌa köo kúchiñu kundaa ini xaꞌa ya ndíkani ini Iva yo Ndioxi. Ni köo tu nda iin naꞌa, na ndíchi ni ya kuchiñu na sinaꞌa na ra”, káchi tuꞌun ra. Sundi ndeꞌe, ta kúndaa va ini nde xiꞌin ya yóꞌó, saa chi ndeꞌe, ta ta̱xi Ndioxi ya xínituni nde ndaꞌa nde tá kuꞌva íyo ya xínituni mií Tata yo Jesucristo, saa íyo ya xiꞌin nde.