1Mgh 12 - Hdi

Dgatá ga mgham

¹ Ka lagha Rəhavgham da Səkem, kabga ma Səkem tskavata inda la Israʼila ŋa famta ka mgham.

² Ta ma Masar Yaruvgham, zwaŋa Nəvat karaku, ma tsa vli ɗifaghu tsi ka hwaya mgham Salumuŋ ya, ka snaŋtá tsi ta tsa tska vgha ya, ka nzaghutá tsi ma Masar.

³ Ka ghunaftá lu ta mndu da hgaktá Yaruvgham. Ka sliʼaftá Yaruvgham nda inda guyatá ghəŋa la Israʼila, ka lagha slanaghatá Rəhavgham, ka həŋ nda tsi mantsa:

⁴ « Nanaf na da gha ɗuk ta ndəgakwa zuk ŋni, kagha ndanana, htaŋnaghu hta ta ndəgakwa tsa slna da gha, nda ɗukwata ndəgakwa tsa zuk faŋnagha tsi ya, dzaʼa maga gha maga ŋni ta slna, » ka həŋ.

⁵ Ka Rəhavgham zlghanaftá wi ta həŋ mantsa: « Laghuwa la, ŋa vragaghata kuni slaɗighata ma fitik hkən, » kaʼa. Ka laghu tsa mnduha ya.

⁶ Ka ɗawaŋtá mgham Rəhavgham ta hiɗaku da la galata mndu si ta maganatá slna ta da ni Salumuŋ ma nzakwa ni nda hafu, kaʼa nda həŋ mantsa: « Kinawu ká yu dzaʼa zlghanaftá wi ta tsa mnduha ya, ka kaghuni na? » kaʼa.

⁷ Ka həŋ nda tsi mantsa: « Ka nza nza ka gita ka kwalva na mnduha na, ka tsuʼaf tsuʼa ka ta skwi ɗawaŋ həŋ, ka nda zɗaku dzaʼa zlgha ka ta wi ŋa taŋ katsi, dzaʼa gɗava gɗa həŋ ka kwalvaha gha ŋa ɗekɗek, » ka həŋ.

⁸ Ama kulaf a Rəhavgham ta tsa hiɗaku vlaŋ tsa la galata mnduha ya wa. Ka laghu tsi da gwaɗganatá kamtaghuha ni galagaf həŋ kawadaga ta maganatá slna.

⁹ Ka ɗawaŋtá tsi da həŋ, kaʼa mantsa: « Kinawu ká yu dzaʼa zlghanaftá wi ta tsa mnduha ya, ka kaghuni na? “Htaŋnaghu hta ta na ɗukwata zuk faŋnagha da gha ka mbraku na,” ka həŋ na na? » kaʼa.

¹⁰ Ka tsa kamtaghuha ni galagaf həŋ kawadaga ya nda tsi mantsa: « Tsa mnduha ta taw kazlay na: Htaŋnaghu hta ta na ɗukwata zuk faŋnagha da gha ka mbraku na kəʼa, ta ɗaw həŋ ya ná, wya ká ka zlghanaftá wi ta həŋ: “Mal zwaŋa ndəfiŋa ɗa glakwa ni ka hulsisha da ɗa.

¹¹ Mantsa nzakwa ni, faghunagha fa da ɗa ta ɗukwata zuk ta ndəgaku, ama iʼi, dzaʼa sgəglaghunagha sga yu ɗuk katakata ta ndəgakwa ni. Nda krupi si ta zlaha tsatsi ta kaghuni, ama iʼi, nda krupi nda kfur ta wa ni dzaʼa zlaha yu ta kaghuni!” » kaʼa.

¹² Ka lagha Yaruvgham nda inda mnduha slanaghatá Rəhavgham baɗ mahkəna fitik, manda va tsa si mna mgham kazlay na: « Vragaghawa vra slaɗighata baɗ mahkəna fitik, » kəʼa ya.

¹³ Ka zlghanaftá mgham ta wi ta tsa mnduha ya nda sidi nda sidi. Ka zlanavatá tsi ta tsa hiɗaku si vlaŋ galata mnduha ya,

¹⁴ ka zlghanaftá tsi ta wi ta mnduha nda hiɗaku ya vlaŋ duhwalha, kaʼa nda həŋ mantsa. « Faghunagha fa da ɗa ta ɗukwata zuk ta ndəgaku, ama iʼi, dzaʼa sgəglaghunagha sga yu ɗuk katakata ta ndəgakwa ni. Nda krupi si ta zlaha tsatsi ta kaghuni, ama iʼi, nda krupi nda kfur ta wa ni dzaʼa zlaha yu ta kaghuni! » kaʼa nda həŋ.

¹⁵ Mantsa tama, fana a mgham ta sləməŋ ta mnduha ka sna skwi ta ɗaw həŋ da tsi wu, kabga Yawe ta mbəɗanaftá tsa skwi ta magaku ya, ŋa hɗamtá gwaɗa ya mnana tsi ta Yaruvgham, zwaŋa Nəvat, nda ma wa Ahiya mnda la Silu.

Gafta la Israʼila nda ga mazlay ta sidi

¹⁶ Nghadapta inda la Israʼila ná, fana a mgham ta sləməŋ ta həŋ ka sna skwi ta ɗaw həŋ wu, ka mnduha zlghanaftá wi ta mgham mantsa: « Nahgani ŋa ŋni nda Dawuda na? Haɗ ŋni ta zuvustá həga nda tsa zwaŋa Yisay ya wa! Ariwa la Israʼila, ka vra dər wa dzagha ni! Ndanana, nghap ngha ka həga gha a Dawuda! » ka həŋ. Ka varaghutá la Israʼila dzagha taŋ.

¹⁷ Ta ghəŋa la Israʼila ta nzakway ma luwaha la Yuda kweŋkweŋ yeya ta snaŋta kazlay na Rəhavgham mgham kəʼa.

¹⁸ Ka ghunaftá mgham Rəhavgham ta Aduram, mali ta ghəŋa gwal maga slna mbraku mbraku, ama ka zlambatá inda la Israʼila, ka mtutá tsi. Ka gi ŋlaftá mgham Rəhavgham ta mwata plisa ni ka hwayaghuta da ɗifaghuta ma Ursalima.

¹⁹ Mantsa ya ganavata la Israʼila ta sidi ta la ga Dawuda, ha gita.

²⁰ Snaŋta la Israʼila kazlay na vrak vra Yaruvgham kəʼa, ka hgadaghatá həŋ da vla guyatá ghəŋa taŋ, ka famtá həŋ ka mgham ta ghəŋa inda la Israʼila. Laghu a həŋ mista la ga Dawuda wu, ta ghəŋa mndəra la Yuda yeya.

²¹ Ɓhadaghata Rəhavgham da Ursalima, ka tskanatá tsi ta gwal ka bikwira vulu dəmbuʼ dərmək nda tghas mbsak (180.000) mataba inda la Yuda nda mndəra la Biŋyamiŋ, ŋa vulu nda la Israʼila ŋa vranaktá həŋ dista gá mghama Rəhavgham zwaŋa Salumuŋ.

²² Ama ka mnanatá Lazglafta ta gwaɗa ni ta Səmaghya mnda Lazglafta, kaʼa mantsa:

²³ « Mnana mna ta Rəhavgham, zwaŋa Salumuŋ, mghama la Yuda, mnana ka ta inda la Yuda, nda la Biŋyamiŋ, nda pɗakwa mnduha, ka ka nda həŋ na:

²⁴ “Wya ka Yawe mnata: Ma laf kuni da vulu nda zwana ma ghuni, la Israʼila! Ka vra inda kaghuni dzagha ni, kabga iʼi ta maga tsa skwi ta magaku ya,” » kaʼa. Ka snatá həŋ ta gwaɗa Yawe, ka vraghutá həŋ dzagha taŋ taɓta ya mnanaf Yawe ta həŋ.

Dmakwa Yaruvgham

²⁵ Ka ghayaftá Yaruvgham ta luwa Səkem, ma kwakwar ta ghwá Ifrayim, ka nzatá tsi hada. Tahula tsa, ka sliʼaftá tsi ka laghwi ghayaftá luwa Pənuʼel.

²⁶ Ka Yaruvgham ma ghəŋa ni mantsa: « Laviŋ lava nana ga mgham na ta vraghuta da la Dawuda.

²⁷ Ka ta gɗa gɗa na mnduha na ta lafi da vla skwa pla ghəŋha ma həga Yawe, ma Ursalima katsi, dzaʼa vraghu vra ŋuɗufa taŋ da rvera taŋ, da Rəhavgham, mghama la Yuda. Dzaʼa dziha dza həŋ ka vraghuta taŋ da Rəhavgham, » kaʼa.

²⁸ Tahula ɗaɗawaŋta ni ta hiɗaku, ka tsatsaftá mgham ta mamakwa slaha his ka dasu, kaʼa nda mnduha mantsa: « Ariwa la Israʼila! Nda kɗa fitika ghuni ta ŋlu da Ursalima, wya lazglaftaha ghuni ta hlagaghunafta ma haɗika Masar, » kaʼa.

²⁹ Ka fatá tsi ta sani ma tsa mamakwa sla ya ma Betel, ka fatá tsi ta sani guli ma Daŋ,

³⁰ tsaya ta nzakway ka dmaku. Ka pghaghatá mnduha ta sani ma tsa mamakwa sla ya ha da Daŋ.

³¹ Ka babaftá Yaruvgham guli ta həgaha ta vliha tskal tskala, ka pghatá tsi ka gwal dra skwi ŋa lazglafta, ta gwal ɗagaʼa tsi mataba hamata mnduha kul nzakway ka mndəra la Levi.

³² Baɗ maghwaŋpəɗ hutafa fitik ma matghasa tili, ka payaftá Yaruvgham ta skala rfu manda va tsa ta mag lu da la Yuda ya, ka vlə tsi ta skwa pla ghəŋ ta gwir. Manda va tsaya kəʼa magata ma Betel, ka plə mnduha ta ghəŋ ŋa tsa mamakwa slaha mamagaf tsi ya. Ka pghatá tsi ta gwal dra skwi ŋa lazglafta ta tsa vliha tskal tskala mamagaf tsi ya.

³³ Baɗ maghwaŋpəɗ hutafa fitik ma matghasa tili, tili ya zbaf tsatsi ka ghəŋa ni, ka vlatá tsi ta skwiha ŋa pla ghəŋ ta gwir magaf tsi ma Betel. Ka fanatá tsi ta skala rfu ta la Israʼila, ka laf tsi ta gwir da draftá urdiha ŋa dray nda dra.