اِنجیلِ مَتّی 1 - کتاب مقدس به زبان مازندرانی - گویش غربی

عیسی مَسیحی شَجَرِه نامِه

¹ عیسی مَسیحی شَجَرِه نامِه داوودِ پادشاهی نَسلی جا، ابراهیمِ پیغمبری نَسلی جا:

² ابراهیم، اِسحاقی پیر وِه، اِسحاق، یعقوبی پیر و یعقوب، یَهودا و وی بِرارِنی پیر وِه.

³ یَهودا، فِرِص و زِراحی پیر و وِشونی مار تامار وِه. فِرِص، حِصرونی پیر و حِصرون، رامی پیر وِه.

⁴ رام، عَمینادابی پیر و عَمیناداب، نَحشونی پیر و نَحشون، سَلمونی پیر وِه.

⁵ سَلمون، بوعَزی پیر، و وی مار راحاب وِه، بوعَز، عوبیدی پیر و وی مار روت وِه. عوبید، یَسایی پیر

⁶ و یَسا، داوودِ پادشاهی پیر وِه. داوود، سِلِیمونی پیر اوریایی زَنایی جا وِه.

⁷ سِلِیمون، رِحُبعامی پیر و رِحُبعام، اَبیّایی پیر و اَبیّا، آسافی پیر وِه.

⁸ آساف، یَهوشافاطی پیر و یَهوشافاط، یورامی پیر و یورام، عُزّیایی پیر وِه.

⁹ عُزّیا، یوتامی پیر و یوتام، آحازی پیر و آحاز، حِزِقیایی پیر وِه.

¹⁰ حِزِقیا، مَنَسِه ای پیر و مَنَسِه، آمونی پیر و آمون، یوشیایی پیر وِه.

¹¹ یوشیا، یِکُنیا و وی بِرارِنی پیر وِه. هَین دورِه یَهودیِن بابِلی سِه تَبعید بَوِنِه.

¹² بعد از هینگِه یَهودیِن بابِلی سِه تَبعید بَوِنِه: یِكُنیا، شِئَلتیئیلی پیر وِه و شِئَلتیئیل، زِروبابِلی پیر وِه.

¹³ زِروبابِل، اَبیهودی پیر و اَبیهود، اِلیاقیمی پیر و اِلیاقیم، عازوری پیر وِه.

¹⁴ عازور، صادوقی پیر و صادوق، اَخیمی پیر و اَخیم، اِلیودی پیر وِه.

¹⁵ اِلیود، اِلعازاری پیر و اِلعازار، مَتّانی پیر و مَتّان، یَعقوبی پیر وِه.

¹⁶ یَعقوب، یوسِفی پیر و یوسِف، مَریمی شی وِه، مریم عیسای مِلَقَّب به مَسیحِ دِنیا بیاردِه.

¹⁷ پس دِشتِه نَسلیشون، ابراهیمی جا تا داوود چاردَه نَسل و داوودی جا تا یَهودیِنی تَبعید بابِلی سِه چاردَه نَسل و تَبعیدی دورِه تا عیسی مَسیح چاردَه نَسل وِه.

عیسایی دِنیا بیموئَن

¹⁸ عیسی مَسیحی دِنیا بیموئَن اَتی وِه: وی مار مریم گه یوسِفی نِشون دَر بیمو وِه، پِش از هونگه شی ای خِنِه بورِه، روح القُدُسی جا حامِلِه بَوِه.

¹⁹ از اوجِه گه یوسِف صالِح مَردی وِه و نَخوایسِه مریمِ مَردِنی پِش رِسوا هاکِنِه، بَنا بَیتِه یَواشَک ویجا سیوا بَوو.

²⁰ یوسِف حَلا هَین فِکری دِلِه دَوِه گه خِداوندی یَتِه از فِرِشتگون خُویی دِلِه وِرِه ظاهِر بَوِه و بُتِه: «اِی یوسِف داوودی ریکا، هَینی جا نَترس گه مریمِ شی زَنا هاکِنی، چون اونچی وی اِشکَمی دِلِه دَرِه روح القُدُسی جا هَسِّه، هَمون خِدایی روح.

²¹ وی یَتِه ریکا دِنیا اُرنِه و تو وی اِسمِ عیسی اِلنی، چون وی شی قومِ وِشونی گِناهِنی جا نِجات دِنِه.»

²² دِشتِه هَینِن اِتِّفاق دَکِتِه تا اونچی گه خِداوند اشعیای پِیغَمبِری زِوونی جا بُت وِه اَنجام بَرِسِه گه:

²³ «یَتِه اَذَب کیجا حامِلِه وونِه، یَتِه ریکا زِینِه گه وِرِه عِمانوئیل گِنِنِه،» گه وی مَعنی خِدا اَمِه هَمرا هَسِّه.

²⁴ یوسِف خُویی جا ویشار بَوِه و هَمونجور گه خِداوندی فِرِشتِه وِرِه دَستور هادا وِه هاکِردِه و مریمِ به زَنی بَیتِه.

²⁵ ولی تا وختی مریم شی ریکارِه دِنیا نیاردِه، وی هَمرا وَرفِس نَوِه و وَچِه ای اِسمِ عیسی بِشتِه.