Lukas 23 - Kaa n Kəzə̀ n fəghə mə

Ghə ney ndow Yeso n səə Pilato

¹ Sey, ngəd tə inaʼ, ghə fɔɔngili a nii ghə nsə ghə̂ a nii ghey n dzəŋi kə dzûmə tə Klisto n dzəŋi nuu kɔʼ, ney ndòw Yeso n səə Pilato.

² Ghə n kaʼ ni bàŋ dzuu i wi dza, “A kwu wù wən tə tsə̀ə bəəbənə ghə̂ a naʼ i Təjuu ghə nə kə ghə nə̀ tsownə màʼlə kə tə̀ Kaysa, tə tɔŋŋə soʼo wû u wi nə̀ i loʼ wù wən Zə̀ kə â dza naŋa nə̀ i tûm bənu, dii tsu nə tə loʼ Kədə̀ŋ.”

³ Sey, Pilato n bəb ndòw tə̀ wi nə̀, “I sey dii nə̀ wə loʼ də̀ŋ kə ghə̂ a Təjuu ə?” Yeso n beeli ndòw wi nə̀, “I loʼ tə̀ wə dzanə.”

⁴ Sey, Pilato n dza ndòw tə̀ ghə fɔɔngili a nii ghey nsə nɔ̀ɔ kə aghə̂ key nə̀, “N ka kòʼ dzə ghə i bəbə i loʼ zə wù wən ghəŋŋə tə n loʼ ni saʼ wi.”

⁵ Ghə n mgbay kənu dza, “Tə dii kaabənə aghəə, ghəə a tii ghə a teyyə naŋa kɔʼ naʼ i Judeya zə idzəm nə ifuu. Tə â kaʼ n Galili, dii sa bə kûm bə fa.”

Pilato tûm ndow Yeso n səə Herɔd

⁶ Nghee tə̀ Pilato zow tsu nə sey, tə n bəb tsu nə̀, “Wù wən loʼ wù Galili ə?”

⁷ Ambə tə Keeli tsunə nə̀ Yeso shi bə n mbùʼ zey Herɔd saʼanə, tə n tûm ndòw wi n səə Helɔd. A n suumə loʼ soʼo nə Helɔd loʼ n Yerosalem

⁸ Helɔd â ngii duʼlənu ni koʼ Yeso təŋkey tə mâ zow ghəə ghey Yeso â ghəŋənə, sey, tə n ləghə ni koʼ wi, moʼlə kə nə̀ Yeso î ghəŋənu faalə n loʼ mə̀.

⁹ Sey, Helɔd n bəb Yeso n ndəmə tə aghəə tə, Yeso n ka beeli dzə wi.

¹⁰ Ghə fɔɔngili a nii ghə nsə ghə̂ ghə ulaŋ ghə n loʼ fu bàŋa dzuu i Yeso.

¹¹ Herɔd nsə sawgoʼ tə wi tə tsɔɔmə kow tsu Yeso, lab tsu wi n saŋ i dzuŋu zə, tûm dzəŋŋə ndow wi n səə Pilato.

¹² N tsuʼ fə tii fə kə, Helɔd ghi Pilato n doʼo bə afə̂, loʼ sey nə̀ ghə â buʼu baa tsə iwû.

Ghə tsəʼlə saʼ n tow kə Yeso

¹³ Ambə ghə bə dzəŋŋənə, Pilato n tɔŋɔ naŋa bə ghə fɔɔngili a nii ghə, ngəd tə inaʼ, nsə ghə̂ ghə adzəm.

¹⁴ Tə n dza tə̀ ghə nə̀, “Ghaa ney bə wù wən fa n səə mə̀, dza tə̂ tsə̀ə bəəbə aghə̂ nə inaʼ, nya, mə n ghəə a wi ghə saʼ n sə kə ghaa, mə n koʼ tsunə nə̀ tə̂ kà ghə i loʼ i ghəŋə bəəbə dzə n ghəə ghən ghaa taŋŋə kɔʼ bənə.

¹⁵ Herɔd kà kòʼ soʼo ghə i bəbə i loʼ zə tə ghəŋə nə̀, a wən loʼ ghə i tii zə tə̂ tûm dzəŋŋə bənə wi. Sey, wù wən kà ghəŋə dzə ghə i bəbə i loʼ zə tə a loʼ ni wey wi.

¹⁶ Mə i fuu tsu kə wi n fən mə, n zəghə maʼa wi, tə ndòw nuu.”

¹⁷ [Zə n loʼ tsə nə̀ Pilato khə ni zəghə maʼa shi bə wù ndaw tsaʼ umɔʼ tə ghə̂ ghə Izree n nəŋə i Kəzə̀ i Paska.]

¹⁸ Nɔɔ kə aghə̂ key n fəd buʼ shi kɔʼ kəbɔ̂ŋ dza, “Wey na wi ghaa kee fu bə Barabas tə ghey.”

¹⁹ (Barabas â loʼ wù loʼ ghə â fii naŋanə n ndaw tsaʼ kûm nə tə â khə kəwɔɔ n zùù zey zə â shinə inaʼ, nsə nə tə â wey wù).

²⁰ Pilato n kəm ghɔɔmə̀ ndòw tə̀ ghə n təŋkey, tə â ndzəmə ləghənu ni zəghə maʼa Yeso.

²¹ Ghə n fəd buʼu shiə kɔʼɔ nbɔŋ dza, “Baa na wi n zat kə fəkaʼ! Baa na wi n zat kə fəkaʼ!”

²² Pilato n kəm ghɔɔmə ndòw tə̀ ghə ni ghəŋə tənəŋə tətəghə dza nə̀, “Ghaa dza nə̀ n wey wi nə à loʼ kee? À loʼ ghə i bəbə i ghaa zə tə ghəŋənə ə? N kà koʼ dzə ghə i bəbə i loʼ zə tə ghəŋənə tə̀ a loʼ ni wey wi. Sey, n chɔdlɔ tsu wi, n zəghə maʼa wi.”

²³ Ghə n nam buʼu nay shiə kɔʼɔ kə n mbɔŋ dza nə̀ ghə baa wi n zat kə fəkaʼ. Sey ghə n saʼ zə i kɔʼ n mbɔ̀ŋ n ghə mey.

²⁴ Pilato n saʼ fu ndòw tə ghə.

²⁵ Sey, tə n chi zəghə maʼa tsu wù wey ghə â ləghənə. Tə n zəghə maʼa shi bə Barabas wey ghə a fii naŋanə n ndaw tsaʼ kùm nə tə̂ â khə kəwɔɔ n zuu zey zə â shinə inaʼ nsə nə tə̂ â wey wù. Tə n fuu ndow Yeso tə ghə nə ghə ghəŋə ghə zey ghə ləghənə ni ghəŋə ghi wi.

Ghə baa Yeso n zat kə fəkaʼ

²⁶ Nghee tə̀ ghə ney nuulə ndòw nə Yeso, ghə n kpi tsu ghi Shimun, wû naʼ i Sirin tə nyiə bənə n Yerosalem. Ghə n kwu tsu wi nə̀ tə boʼo zat kə fəkaʼ kə Yeso, tə i ndow n baa wi.

²⁷ Nɔɔ kə aghə̂ kə â loʼ n baa wi, gheyzən a loʼ ghə n loʼ tii ghə a mow bə nə deyyə bə bòʼ wi.

²⁸ Yeso n khə̀mə dza ndòw tə̀ ghə nə̀, “Zən a Yerosalem ghə, ghaa khə way ni dey bòʼ mə̀, ghaa khə ni dey tə wû i ghaa zə nsə tə waa a ghaa ghə,

²⁹ təŋkey, nəŋə i bəghənu ghaa i dza nə̀, ‘Buulə i loʼ tə̀ weyzən wən tə loʼnə kàakə, weyzən wən tə ka bɔŋ koʼ waa nkee weyzən wən tə ka nyɔŋŋə koʼ waa.’

³⁰ A wey loʼ nəŋə zey ghə̂ a nə dza tə̀ kaʼa tə nə̀, ‘Bwù bə n kow ghey’, nsə tə̀ nguʼu wə nə ‘Tsəd naŋa bə ghey.’

³¹ Kuum nə̀ abə ghə̂ a ghəŋŋənə ndzoʼo ghəə ghən nə kaʼ fə zòw nu, ghə i sə̀ jiə ngee abə fə zum tsu nə.”

³² Ghə n ney ndòw soʼo ghə̂ a tsɔŋɔ a loʼ ghə abəghə, nə ghə ndòw wey dzəŋi ndòw ghə ghi wi.

³³ Ambə ghə kɔʼ nyinə n luʼu key ghə â tɔŋŋənə nə̀ a loʼ “Kaŋ k-a-tow”, ghə n baa kɔʼ Yeso fu n zat kə fəkaʼ ghi ghə a tsɔŋɔ ghey abəghə. Umɔʼ n kpii u wi u təmə wə, u loʼ wey n kpii u wi u kwɔɔ wə.

³⁴ Yeso n gɔŋŋə dza, “Bày neyzəə ghə̂ ghən təŋkey ghə khə way ghə zey ghə ghəŋənə.” Sawgoʼ tey n təm mboʼ ni keeli nghee tə ghə loʼnə ni dzaw ndzə tə wi tə n wû i ghə.

³⁵ Ghə̂ ghə n tey fu n ndəm, laalə ghəə ghey a tsəghənə. Ngəd tə inaʼ tə n kpaalə daŋŋə wi dza, “Tə â bəghəshiə aghə̂, tə bəghəshi tsu soʼo wû u wi nya bə a loʼ nə tə ndzəm loʼ Klisto, tə wən Zə̀ kə â sày naŋanə.”

³⁶ Sawgoʼ tey n tsayyə soʼo wi, bə fu bə wi n tsali kə nlə kə,

³⁷ dza, “abə wə̀ loʼnə Də̀ŋ kə ghə̂ a Təjuu ghə, bəghəshi tsu wû wə wə̀.”

³⁸ Ghə n tɔ̀ɔ naŋa kɔʼ n zat kə fəkaʼ fə wi nə̀, “À wən loʼ də̀ŋ kə ghə̂ a Təjuu.”

³⁹ Wù umɔ̀ʼ n ghə̂ a tsɔŋɔ ghey abəghə n kpaalə wi dza, “Abə wə khənə nə̀ wə̀ loʼ Klisto, bəghəshi tsu wû wə wə̀, wə̀ bəghəshi soʼo ghey.”

⁴⁰ Wù loʼ wey n kpaa ndòw wi dza, “Wə̀ tsəŋə way Zə̀ kə, n dza saa fa dzəŋi fəʼlənu n saʼ zey ghə â tsəʼlənə n kow saa a?

⁴¹ Sa fəʼlə bòʼ ghəə a saa a bəbə ghə, sey, naamə kə saa kə kpiinu. Abə wù wən, tə ka ghə i bəbə i loʼ i ghəŋə dzə.”

⁴² Tə n dza ndòw tə̀ Yeso nə̀, “Yeso, moʼlə mə, bə wə i loʼnə n fɔɔ wə.”

⁴³ Yeso n dza ndòw tə̀ wi nə̀, “N dza bə isəŋə tə̀ wɔ nə tsuʼ fə na fən wə i loʼ ghi mə idəŋ.”

Yeso kpuu n zat kə fəkaʼ

⁴⁴ Ambə nyi i kɔʼ təmi kɔʼ nə̀, ləm kə n bwùtsu nə inaʼ idzəm kùm ndòw n nəŋə zey nyi i bəŋənə tii.

⁴⁵ Nghee ləm kə bwù tsu nə sey, ndzə tey tə â kəŋ naŋanə luʼu kə zow kə n Ndaw Kəzə̀ i nii zə n Yerosalem n bàalə tsu bə nə ubad ubəghə.

⁴⁶ Yeso n dey shi kɔʼ n dzə̀ i taw zə dza, “Bày, zay kuŋ wɔɔ ghə.” Ambə tə dza tsunə sey, tə n tsəmə i tsu.

⁴⁷ Ambə wù nii ə təsawgoʼ koʼ tsunə ghəə ghən a shinə, tə n fu nkɔʼlə tə̀ Zə̀ kə dza, “Wù wən â kûm loʼ wù dzuŋu wə.”

⁴⁸ Ambə nɔɔ kə aghə̂ key kə â bənə fu ni bə laalə ghəə ghey a neynə bənə kə, koʼ tsu nə sey, ghə n mow, nuu dzəŋŋə ndòw n ndaw tə ghə.

⁴⁹ Fə̂ a Yeso nsə gheyzən ghey ghə â nuu bənə n Galili dzûmə bə wi n kee tey nə kədaa fwɔdlɔ bə ghəə ghey a neynə bənə kə.

Ghə tsəllə Yeso

⁵⁰ Wù loʼ â loʼnu ghə â tɔŋŋənə wi nə a loʼ Yosef, tə â shi n Alimatia n naʼ i Judeya. Tə â loʼ wù u dzuŋu wə, loʼ tsətsəghə n muu i wi, tə â loʼ soʼo n ndaw tsə a Təjuu

⁵¹ tə â kee khə way wɔɔ kə n tsəm zey ghə̂ a Təjuu ghə â sətnə kûm Yeso, tə n ləmmə fɔɔ u Kəzə̀.

⁵² Tə n ndòw kòʼ ndòw Pilato nə̀ i ney vən i Yeso.

⁵³ Pilato n bəghəm kɔʼ nə̀ tə ney, sey tə n ney tsu bə vən i Yeso, bàŋ kɔʼ nə ukə̂ŋ, naŋa nyi ndòw wi nə isay ghə â dzə nyi ndòwnə nə̀ kənaa. Say i tii zə n loʼ nə ghə ka kam tsəllə koʼ tsə wù tii.

⁵⁴ Â loʼ n tsuʼu kpəghə ghə â bayyənə ghəə ghə kûm tsuʼ inaʼ.

⁵⁵ Gheyzən ghey ghə â nuu bənə n Galili dzûmə bə Yeso n ndòw ghi Yosef, ndòw koʼ naŋa tsu luʼu key ghə tsəllə vən i Yeso zə nsə nghee ghə â bayyə naŋanə vən i wi zə tii

⁵⁶ Ghə n nuu dzəŋŋə ndòw n ndaw, ndòw bayyə naŋa tsu mmvə n ləmmə mən ghə tsoʼlə vən zə tii. Ambə n tsuʼ inaʼ, ghə n doʼo zayyə tsu tə̀ laŋ kə inaʼ kə â diinə.