Lukas 13 - Kaa n Kəzə̀ n fəghə mə

Ghaa buu naŋa ibəb kə və zə i ney ghaa

¹ N nəŋə i tii zə, ghə̂ a loʼ ghə n bə dza bə tə̀ Yeso nə̀ Pilato n wey ghə̂ a Galili a loʼ ghə nə ghə fəələ umaʼlə tə Zə̀ kə n ndaw Kəzə̀ i nii zə n Yerosalem.

² Yeso n beeli ndòw ghə nə̀, “Ghaa moʼlə nə̀ ghə̂ a Galili ghən ghə â weynə ghə, ghə a bəb tsəghəshinu ghə̂ a loʼ ghən ghə loʼnə utaw nya fu tii inaʼ ə?

³ Ngaŋ! N dza n dza bə tə̀ ghaa nə̀, abə ghaa ka kwey fə̀ŋ tə ghaa, ghaa dzûmə Kəzə̀, ghaa i kpuu soʼo sey.

⁴ Nkee ghaa moʼonə ghə̂ ghey ighəm n ghə̂ ghə ifam n ndaw zey i kuulə doʼonə n tow kə ndaw â beeli wey maʼanə n Siloam, ghə â bəb tsəghəshinu ghə̂ ghey ghə â loʼnə n Yerosalem n nəŋə i tii zə ə?

⁵ Ngaŋ! N dza n dza bə tə̀ ghaa nə abə, ghaa ka kwey fə̀ŋ tə ghaa, ghaa dzûmə Kəzə̀, ghaa i kpuu soʼo tə̀ a loʼ ghə.”

Zəzəə fə fənkəfən bòʼ kaʼ fən fə məə way tam wə

⁶ Sey, Yeso n dza ndòw zəzəə fə fənkəfən tə̀ ghə nə̀, “Wù loʼ â zəghə naŋa fəkaʼ n sùm u wi, ambə tə ndòwnə ni ndòw kɔy utam tii, tə n ndòw koʼ nə̀ fə ka mə̀ dzə.

⁷ Sey tə n dza ndòw tə̀ wù kəfwaʼ wey tə â laalənə sûm wey nə̀, ‘À nya loʼ tə a loʼ tənûm tətəghə n bəghənə fa ni bə kɔy utam, mə n ka koʼ dzə fə kə loʼ kə. N dzanə wə̀ fuŋ maʼa kaʼ fə tii fə, n təŋkey, fə maŋa zəə saŋŋə maʼa zub tə dzuŋu tə kənunu.’

⁸ Wù kəfwaʼ wey n fəd dza ndòw tə̀ wi nə̀, ‘Mûkəbii, naŋa kpiʼi tsu nûm kə kəmɔ̀ʼ, mə i bòw tsəghə ndòw key i tii zə, n bow bə zub tə kəduŋ, n kuu tsəghə ndow n key i tii zə.

⁹ Abə fə mə̂nə nə kənum, a i loʼ ghə i dzuŋu zə, nə fə ka mə, a i fuŋ maʼa.’”

Yeso baŋŋə weyzən u loʼ wə n tsuʼ inaʼ u Təjuu

¹⁰ N tsuʼ inaʼ u ghə u loʼ wə, Yeso n dii n ndaw kədzəŋi ghə̂ a Təjuu i loʼ zə.

¹¹ Weyzən u loʼ wə n loʼ fu nə a loʼ kəkə̀ŋŋə̀ ntəŋkey zay kə bwu kə ma wi khə̂mə naŋa nə tənum ighəm n num tə ifam. Tə n loʼ nə tə n ngəmə doʼo, way ni təmi kɔʼ tsətsəghə.

¹² Ambə Yeso kòʼ ndòwnə wi, tə n tɔŋŋə tsu wi dza tə̀ wi nə̀, “n dza nə̀ dzaŋ zə i may.”

¹³ Yeso n gaʼ ndòw awɔɔ nkow weyzən wey, tə n daŋŋə naalə shi ndòw uwû, təmi i kɔʼ tsətsəghə, kaʼ ndòw ni fu nkɔʼlə tə̀ Zə̀ kə.

¹⁴ Wù nii wey tə â laalənə ndaw Kədzəŋi ghə, n kaʼ ni fəələ unəghə, sənnə ghɔɔmə ndòw tə̀ ghə̂ ghə nə̀, “Tsuʼu n loʼ ntuubə ni fwaʼ, i bəghə na n tsuʼu n tii mə ni bə baŋŋə iwû, à way dzə n tsuʼ inaʼ u saa.”

¹⁵ Mûkəbii n beeli ndòw wi dza, “Ghə nəb ityim! N dza ghaa bəghə ghaa n ney kɔʼ nyam tə ghaa, ndow fu ghə n fəzəə wə, ndòw fu soʼo ghə n mmuu mə n tsuʼ inaʼ a?

¹⁶ À wən loʼ waa sali ndaw zə Abraham nə̀ tə n fəghə n wɔ Satan, nə tənum ighəm nsə num tə ifam, a bəbə kee tii ni bəghəshi wi n chɔd u wi abə a loʼ kə n tsuʼ inaʼ a?”

¹⁷ Ambə Yeso dza tsu nə sey, tow kə n dəd ghə̂ ghey ghə bàanə wi, nɔɔ kə aghə̂ key kə â loʼ nə fu n kee ngii duʼlə bòʼ faalə mey tə ghəŋənə.

Zəzəə fə fənkəfən bòʼ sam i Mostad

¹⁸ Yeso n dza, “Saʼ i Kəzə̀ n kow ghə̂ a wi baa loʼ tə aloʼ kee? N loʼ ni foʼlə ngee?

¹⁹ U loʼ tə à loʼ sam i kaʼ fə loʼ fə ghə tɔŋŋə nə̀ a loʼ Mustard wù loʼ â ney kɔʼnə, zəghə tsu n sûm u wi, fə n nyim i kɔʼ doʼo bə fəkaʼ, nnən mən n zəʼlə idəŋ n bə bəghə naŋa bə ndaw tə ghə tii n kpî tə tii tə.”

²⁰ Tə n kəm bəb tsu nə̀, “N baa loʼ ni foʼlə saʼ i Kəzə̀ ghi kee?

²¹ U loʼ tə a loʼ mbvuŋ weyzən u loʼ wə â ney kɔʼ nə̀, kuu ndow n tɔ̀ɔ nfuŋ mən ghə ghəŋŋə baa kə nkala kə a tii, fuŋ n tii mə n kɔʼ kɔʼ naʼ idzəm.”

Yeso dii nə̀ saa i tsəghə n fuʼ u ndaw u təbə wə

²² Yeso n tsəghə ndow kə isə tə ndownə n Yerosalem, bwey dii ndow aghəə tə ghə̂ ghə naʼa tə naʼa.

²³ Wù loʼ n bəb ndow tə̀ wi nə̀, “Mûkəbii, i sey dii nə̀ bəghəshi i loʼ kə tə̀ sə̂ fə aghə̂ fə ə?” Tə n dza a ghə nə;

²⁴ “Dəmə tsu na ni nyi ndow n fuʼ u ndwaw u təbə wə, n təŋkey, ndəmə aghə̂ ghə î ləghənu ni tsəghə nyi fu, jii i way tə ghə.

²⁵ Abə mû ndaw i nu fii kɔʼ dzənə fuʼ u ndwa wə, nə ghaa tey a bii, ghaa i kaʼ ni buʼ fuʼ u ndaw nə̀, ‘Mûkəbii, chi bə fuʼ u ndaw wə tə ghey.’” Tə i beeli shi bə ghaa nə̀, “Ngaŋ! N khə way ghaa, n khə soʼo way luʼu key ghaa nu bənə tii.”

²⁶ Sey, ghaa i dza nə̀, “Ghey a zəə dzəŋi tsə ghi wɔ, məə dzəŋi ghi wɔ, wə n tsəm dii soʼo ghey n naʼ i ghey.”

²⁷ Tə i nam fəd dza bə tə̀ ghaa nə̀, “Ngaŋ! N dza nə̀ khə way ghaa, N khə way luʼu key ghaa nuu bənə tii. Nu na n səə mə, ghə̂ a bəbə ghə.”

²⁸ Sey ghaa nə dey, fəə asɔŋ, bə ghaa i koʼnə Abraham, Ayzik, Yakɔb, nsə tûm tə Kəzə̀ tə, ghə loʼnə n fɔɔ u Kəzə̀, nə ghə n ghaa tuu maʼa.

²⁹ Ghə̂ ghə i nuu bə n badla tə mbi tədzəm, ghə i loʼ i ghə zə n fɔɔ u Kəzə̀, ghə zə̂ənə.

³⁰ Kuum kuum, ghə̂ ghey ghə̂ a koʼo kìi nə ghə nya, Zə̀ kə i ghəŋŋə ghə nə̀ ghə bə doʼo ghə̂ a səŋi ghə, ighələ tə ghə̂ ghey ghə̂ a koʼo nə̀ ghə loʼ ghə̂ a səŋi ghə nya, Zə̀ kə i ghəŋŋə soʼo nə ghə̂ ghə i bə koʼ kìi ghə.

Yeso mow bòʼ Yerosalem

³¹ Ghə̂ a tə Falasi a loʼ ghə n daŋŋə ndow bə n nəŋə i tii zə n səə Yeso, dza tə wi nə̀, “Tyi nuu tsu fa, wə nuu ndow n luʼu kə nuu kə, n təŋkey, Helɔd ləghə ni wey maʼa wɔ.”

³² Yeso n dza, “Ndow dza na tə̀ wù wən tə tsiilə ghəŋŋə ghəə ghə tə̀ a loʼ kəkəŋ nə̀, n nam dzùm shiə avəətsəə n kow ghə̂ ghə, baŋŋə soʼo ghə̂ a dzaŋa ghə, n nam khə ni fwaʼ na nsə tsətsə, abə təfu mə i mayyə tsu fwaʼ kuŋ.”

³³ Nsə sey, n nam khə ni bwey na, n bwey tsə tə nsə təfu, n təŋkey, luʼu key kə kpiinə ni wey tûm Kəzə̀ tii, a may kə n Yerosalem.

³⁴ Ohooo Yerosalem, Yerosalem, naʼ zey i weyyənə tûm tə Kəzə̀ tə, təmmə wey a loʼ ghə nə atay, n mâ dəm ni zuŋŋə naŋa bə waa ghə tə nay mbvə nə zuŋŋə naŋŋə waa a wi ghə n tənə ghaw tə wi, ghaa n ka bəghəm.

³⁵ Koʼo na, ndaw ghaa nya loʼ i zûm zə. N dza bə tə ghaa nə̀, ghaa i kəm koʼ way mə ni ndow kuum tsuʼ fey ghaa i dza nə̀, “Buulə i loʼ tə wù wey tə bəghənə n zəd i Mûkəbii.”