Lukas 11 - Kaa n Kəzə̀ n fəghə mə

Yeso dii tsətəndəghə tə wi nghee ghə i khənə ni gɔŋŋə tii

¹ Ambə n tsuʼ fə loʼ fə, Yeso n gɔŋŋə n luʼu kə loʼ kə, ambə tə mayyə tsunə, dzûmə ə wi u loʼ wə n dza tə wi nə̀, “Bày dii bə tə̀ ghey nghee ghey khənə ni gɔŋŋə tii tə̀ Jɔn â dii soʼonə tə̀ dzûmə tə wi tə.”

² Yeso n dza tə̀ ghə nə̀, “Abə ghaa dza i gɔŋŋə, ghaa n dza tsu nə̀, Bày, ghə̂ a khə ni ngɔɔmə zəd zə zə̀, ghə zə ufɔɔ zə zə̀ i bwey fa n mbi.

³ Fu ghey n fəzəə wey u kpiinə tə̀ ghey tsuʼ ndzəm.

⁴ Neyzəə bəb i ghey zə, tə ghey neyzəə soʼo bəb zey ghə̂ a loʼ a ghəŋənə tə̀ ghey. Ka bəghəm nə̀ ghey bwu n buʼ kə Satan.”

⁵ Yeso n dza tə̀ ghə nə̀, “Ney kɔʼ na nya nə̀ wù ghaa u loʼ u khə fə̂ ə wi, tə u ndòwnə n ndaw wi n fə̀ŋ ə tsuʼu tə, dza tə̀ wi nə̀, ‘N fə̂ fùu fu bə mə n baa wə utəghə,

⁶ fə̂ wùŋ u loʼ u bənu, fə kə zəə kə a way ni fu tə̀ wi.’

⁷ Fə̂ wə wey u fəd beeli shi bənə wɔ nə̀, ‘Ka mə fəmədzə baʼ kə n fìi doʼo, mə ghi waa ghuŋ ghə n nyəŋi, n way dzə ni nuu kɔʼ nya ni bə fu wɔ n fə kə loʼ kə.’

⁸ Abə tə mə ləghə kə way ni nuu fu wɔ n fə kə loʼ kə nə wə loʼ fə̂ ə wi, tə i tsəmə nuu funu, n təŋkey, wə ghoʼlə buʼu kə kəbaʼ

⁹ Sey N dza bə tə̀ ghaa nə̀, bəb na fə key ghaa ləghənə, ghaa i keeli, kəŋ na, ghaa i koʼ, buʼ na baʼ kə, ghə i chi tsu kəbaʼ tə̀ ghaa.

¹⁰ Təŋkey wù wey tə bəbnə fə kə, tə i keelinu, tə wey tə kəŋnə, tə i koʼonu, tə wey tə buʼnə fuʼ u ndaw wə, ghə i chiənu tə wi.

¹¹ Tə ghaa, bày waa loʼnu ni fəd fu waa wi n zuu abə tə bəbnə wi n tsəghə zə ə?

¹² Nkee wù loʼnu ni fuu waa wi n nàŋ abə tə bəbnə wi n ghumzə ə?

¹³ Abə ghaa ghə̂ a bəbə ghə, ghaa khənə ni fu fə u dzuŋu wə tə̀ waa a ghaa ghə, Bày idəŋ i boʼo fu ngee Zay kə Zow kə tə̀ ghə̂ ghey ghə bəb bənə tə wi!”

Yeso ghɔɔmə bòʼ Belzebul

¹⁴ N tsuʼ fə loʼ fə, Yeso n dzùm shiə zay kə bwu kə n kow wù loʼ tə â ghɔɔmə way. Ambə zay kə bwu kə tii kə nuu shi ndownə, wù wey n kaʼ ni ghɔɔmə. Dzuu zə n ngii zum nɔɔ kə aghə̂ key kə â teynə fu.

¹⁵ Ghə̂ a loʼ ghə n kee dza, “À loʼ Belzebul də̀ŋ kə zay u bwu wə kə fuunə wi n daʼa kə nə̀ tə i dzum shiə zay u bwu wə.”

¹⁶ À loʼ ghə n mɔɔmə koʼo wi, dza tə̀ wi nə̀ tə ghəŋə tsu tsəə i loʼ zə ni dii tsu nə̀ ghəə a tii a loʼ ghəə a bikighow.

¹⁷ Yeso n khə ghə zey ghə moʼlənə n fə̀ŋ tə ghə. Sey tə n dza tə ghə nə̀, “naʼ zey i dzawwə doʼonə, zuulə n wû i ghə nə saʼanu. Sali i ndaw zey i dzawwə doʼonə î sàŋŋə naynu.

¹⁸ Sey, abə Satan dzawwə doʼonə n wû u wi, tə i kee təmi ngee? N ghəə ghən sa dza təŋkey ghaa dza nə̀ n dzùm shiə zay u bwu wə n daʼa kə Belzebul.

¹⁹ Bə à loʼ nə n dzum shiə zay u bwu wə n daʼa kə Belzebul, dzûmə tə ghaa tə kee dzum shiə zay u bwu wə n daʼa kə ghaa kə? Dzûmə tə ghaa tə i sey saʼanu ghaa.

²⁰ Abə i kee loʼnə nə̀ N dzùm shiə zay u bwu wə n daʼa K-a-zə̀, i sey dii nə̀ fɔɔ u Kəzə̀ wə n bə tə̀ ghaa.

²¹ Abə wù kədaʼa, n fə u tsam u wi, keyyənə ndaw wi, fə kə wi kə loʼ kə way ni nay.

²² A gɔʼɔ kə nə wù loʼ ndòw bənu, nə tə n wi taw tsəghəshi, bə kwu tsu wi nə kəngəd, təm zə̂ kɔʼ wi, ney nuu kɔʼ fə u tsam u wi wey tə tawnə tii, ney dzawwə tsu fə u wi udzəm ghi ghə̂ a nu ghə.

²³ Sey, wù wey tə fwaʼa way ghi mə sey way ghi mə. Wù wey tə gaamə way mə ni zuŋŋə naŋa, sey kee saŋŋə maʼanu.

²⁴ Abə zay kə bwu kə nûshi tsunə n kow wù, kə n laʼa bwey ndòw n mvə̀nə̀ ntsaŋ, kəŋə ndòw luʼu key kə loʼ ni nyi zayyə tii, abə tə kəŋ kìi tsu nə̀, kə n dza tə wû u wi wə nə̀, ‘Mə i dzəŋŋə ndownu n ndaw zey mə nushi bənə tii.’

²⁵ Ambə kə dzəŋŋə bənə, tə n bə koʼ tsu ndaw nə ghə n zəd bayyə naŋa dzɔb tsu fə u ndaw wə.

²⁶ Tə n dzəŋŋə ndòw ney bə vəətsəə a loʼ ghə asəghəmbəghə a bəbə tsəghəshinə wi, ghə n ndòw mû nyi ndòw fu. Sey ghəə a wù tii ghə n bəb tsəghəshi tsu n nghee ghə â buʼ loʼ nə tii.”

Ndzəm ndzəm kə iduʼlə

²⁷ Nghee Yeso khəənə ghəə ghən, weyzən u loʼ wə n fəŋŋə kə aghə̂ n dza shi kɔʼ nə̀, “Buulə i loʼ ghi weyzən wey tə a jii nə wɔ, lalə kɔʼ bə wɔ!”

²⁸ Yeso n beeli ndòw wi dza, “buulə i fəd loʼ tə̀ ghə̂ ghey ghə zownə ghɔɔmə i Kəzə̀ zə naŋŋə.”

Ghə dza nə̀ Yeso ghəŋə tsu nfaalə

²⁹ Ambə nɔɔ kə aghə̂ key zuʼu bənə nsə Yeso, tə n dza nə̀, “Ghə̂ ghən n numtən ngii bəbə n mwam wə. Ghə dzanə n dii bə ghə n tsəə, tsəə i loʼ zə i kəm way dzə tə ghə tsəghəshiə way tsəə Jona.

³⁰ Təŋkey ghəə zey zə a shinə ghi Jona, zə a loʼ tsəə tə̀ ghə̂ a Ninive, ighələ tə̀ ghəə zey zə i shiənə ghi Waa wù sɔŋtsuʼ zə i doʼlə tsəə tə̀ ghə̂ ghən n num tə tən.

³¹ Naʼtum ə Sheba î təmi tiillə aghə̂ kûm ghaa n tsuʼ fey Zə̀ kə i saʼanə mbi tii, n təŋkey tə a lɔʼlə nuu bənu n naʼ i wi ni bə zəllə ghɔɔmə i səŋi i Solomun, ghaa u khənə wù nya nə tə n tsəghəshi Solomun, ghaa u ləghə way ni zow ghəə ghey tə dzanə.

³² Ghə̂ a Ninive ghə i təmi tiilə aghəə kûm ghə̂ ghən n num tən n tsuʼ fey Zə̀ kə saʼanə mbi tii, boʼnə ghə a zow ghɔɔmə i Jona, ghə n kweyyə fə̀ŋ tə ghə, ghaa u khənə wù tə tsəghəshinə Jona, ləghə way ni kweyyə fə̀ŋ tə ghaa.

³³ Ghə daa way daa kə ghə n kəm ney nyì naŋa i ndòw nkee ni tsət naŋa nə ifuʼ, ghə fədlə ney khəə naŋŋə kɔʼɔ nə kənyəllə nə abə wù nyi bənə n ndaw, tə n koʼo sə̂ a zow ghə.

³⁴ Sə̂ a wù à loʼ tə̀ a loʼ kədaa n wû u wi, abə sə̂ ghə à loʼ dzɔb nə̀, i sey dii wə muu nə utsə̂, abə sə̂əghə a bəbə nə̀, wə sey loʼ nə kələm.

³⁵ Sey, i ghəəmətsu na nə kə̂ i nə loʼnə nə̀ tsə̂ wey ghaa moʼonə nə̀ ghaa khənu nə fəd loʼnə ləm kə.

³⁶ Abə wû wə udzəm u zownə nə ləm kə way n bad kə loʼ kə, wə n zow dzɔbə tə̀ ghə nə daa naŋŋənə daa kə n luʼu key ləm kə loʼnə.”

Yeso khəə aghəə ghi Falasi tə nsə ghə̂ a dii ghə ulaŋ ghə

³⁷ Nghee tə Yeso ghɔɔmənə, wù Falasi u loʼ wə n tɔŋɔ tsu wi nə̀ tə bə zə̂ n ndaw wi, tə nyi doʼo tsu zey ndòw nə u zəə wə.

³⁸ Dzuu zə n zum wù Falasi wey, nə Yeso zəə nə̀ tə ka sow wû wə tə̀ Laŋ kə ghə kə â diinə.

³⁹ Mûkəbii n dza ndòw tə̀ wi nə̀, “Ghaa ghə̂ a tə Falasi abə ghaa ney kɔʼnə kaŋ wə nsə wɔɔ tə, ghaa sòw kə kəbii, loʼ sey nə̀ n fə̀ŋ tə ghaa a luu doʼo umə̂ nsə bəb zə.

⁴⁰ Dzəŋsə ufə wən, ghaa khə way nə wù wey tə bɔmnə fəŋ a nam loʼ kə wi tə bɔmnə bii kə?

⁴¹ I dzaw fuu ndòw fə u ghaa wə tə ghə̂ ghey ghə khə way tə̀ ghəə a ghaa ghə i zow.

⁴² Ngoʼ loʼ tə̀ ghaa ghə̂ a tə Falasi ghə, n təŋkey ghaa tɔʼɔ ghəəmə tsuu sa ni dzawwə fə̂ u ghaa udzəm nə tə badla ighəm ni fu naamə K-a-zə̀ tə laŋ kə diinə, kasə̀ tow ufə̂ wey u shiənə n sûm i ghaa, kee saʼa way tsətsəghə, dii soʼo way ləghə zə tə̀ Zə̀ kə. Ghaa khə ni ghəŋə ghəə a tii ghə adzəm nə̀ ghaa naŋŋə taʼa way i loʼ zə.

⁴³ Ngoʼ loʼ tə̀ ghaa ghə̂ a tə Falasi ghə təŋkey ghaa ləghə ni doʼlə n kuu u nii wə n ndaw tə udzəŋi, ləghə soʼo nə ghə i tɔʼɔ tɔŋŋə zow dzɔbə bə ghaa n bikiwən.

⁴⁴ Ngoʼ loʼ tə̀ ghaa tənkey ghaa loʼ tə̀ a loʼ isay i loʼnə nə̀ ghə ka tsəə naŋa, ghə̂ ghə u bwey tsəghənə tii nə ghə khə way.”

⁴⁵ Wù dii u kəlaŋ u loʼ wə n beeli ndòw wi nə̀, “Wù dii, ghəə ghey wə̀ dzanə sey, wə̀ sey kpalə daŋŋə bə soʼo ghey.”

⁴⁶ Yeso n beeli ndòw wi dza, “Ngoʼ loʼ soʼo tə̀ ghaa ghə̂ a dii a kəlaŋ ghə, n təŋkey ghaa fuu laŋ u taw wə tə̀ ghə̂ ghə nə ghə naŋa, loʼ sey nə̀ ghaa ndɔm naŋŋə soʼo way.

⁴⁷ Ngoʼ loʼ tə̀ ghaa təŋkey ghaa bɔm say tə tûm tə Kəzə̀ tə, nə a loʼ sey à loʼ ghə bày a ghaa ghə â wey maʼanə ghə.

⁴⁸ Sey ghaa təmi tiillə ghəə ghey ghə bày a ghaa ghə a ghəŋənə nə a dzɔbənu, tənkey, ghə a wey maʼa tûm tə Kəzə̀, ghaa u kee bɔmnə say tə ghə tə.

⁴⁹ À wən loʼ ghə i tii zə, Zə̀ kə n tɔb u wi wə â dza nə̀, ‘Mə i tûm bə ghə n tûm tə Kəzə̀ nsə ngəd tə, ghə i wey maʼa a loʼ ghə, ghə tsɔɔmə a loʼ ghə.’

⁵⁰ Sey Zə̀ kə i saʼanu ghaa ghən n num tən bòʼ kaŋ tə tûm tə Kəzə̀ tən ghə a weynə ni ney nuu bə tə̀ mbi â kaʼnə.

⁵¹ Ni ney nuu tsu n kaŋ tə Ebel bə kùm bə n kaŋ tə Zachariah wən ghaa â weynə n fə̀ŋ ə tsə zey ghə fəələnə maʼlə wə tii nsə n luʼu key kə zow tsəghəshinə luʼu tə tədzəm. N dza bə isəŋə tə̀ ghaa nə ghə̂ ghən n num tən i fəʼlənu bòʼ ghəə a tii ghə.

⁵² Ngoʼ loʼ tə̀ ghaa ghə̂ a dii a kəlaŋ ghə, n təŋkey, ghaa ney nuulə kɔʼ chi kə ndaw utɔb tə ghə̂ ghə, wû i ghaa, ghaa n ka nyi fu, ghaa u ləghə way nə̀ ghə̂ a loʼ a nyi.”

⁵³ Nghee tə̀ Yeso nuu tsunə fu, ghə̂ a tə Falasi nsə ghə̂ a dii ghə ulaŋ ghə n zey ndòw ni ngii sənnə ghɔɔmə i wi, sɔ̀ʼlə kaabə tsə wi nə təghɔɔmə,

⁵⁴ biilə tənə wi ni kwu wi abə tə kpaʼi zə̀ dza bəəbə tsunə ghə i loʼ zə.