Kolose 3 - Kaa n Kəzə̀ n fəghə mə

Muu i fəghə zə ghi Klisto

¹ Nya wən Zə̀ kə zhəm dzəŋŋə bə dzənə ghaa nə ivə ghi Klisto, gaʼ na fə̀ŋ tə ghaa tə n fə̂ wən u loʼ idəŋ, n luʼu key Klisto doʼnə tii n kpii u Kəzə̀ u təmə wə.

² Ghaa khə ni moʼlə tənə kə ghəə ghən a loʼ idəŋ, a way dzə ghəə ghən a loʼnə fa mbi,

³ bòʼ nə̀, ghaa mâ kpuu dzəŋi ghi Klisto, sey, a ghaa nya tsəd naŋa Klisto tə loʼnə nə kəfə kəmɔʼ ghi Zə̀ kə.

⁴ Abə Zə̀ kə i dii bənə Klisto wən tə baa khənə muu i ghaa zə tə mbi, ghaa i loʼ dzəŋi ghi wi n ghaʼ i wi.

⁵ Sey, ghaa khə ni teeli tuu maʼa ghəə a bəbə ghən gow uwû ləghənə, tə a loʼ; ilaŋŋə, ghəə a dzəə ghə, ni mbuŋŋə ni nyəŋi ghi wù, moʼlə tə bəbə tə, nsə mə̂ wə, n təŋkey, mə̂ u loʼ ighələ tə̀ wù nə̀ ngɔɔmənə muʼu mə.

⁶ À loʼ bòʼ ghəə ghən Zə̀ kə i zàa maʼanə mbow fə wi fə n kow ghə̂ ghən ghə zow way tə wi.

⁷ À wən loʼ nghee ghaa â muu tsə soʼo nə tii n nəŋə zey ghaa â nam muunə muu i mbi zə.

⁸ Nya, ghaa khə ni teeli tuu maʼa soʼo fəmbow, mbwu kə fə̀ŋ, ngaamə tə aghəə, təfəghəm, nsə dzə dzə kə ighɔɔmə kə.

⁹ Kə ghaa nə badlanə ghəə ghə n wû i ghaa n təŋkey ghaa n tuu maʼa ghəə a wey ghən nsə mwam u bəbə wən ghaa â buʼ loʼ tsənə tii.

¹⁰ Kaʼ ndow na ni muu muu i fəghə zən Zə̀ kə fuunə tə ghaa, ghaa tɔʼ zoʼlə keeli kɔʼ soʼo wù wey tə loʼnə ghii wə, ghaa doʼo bə tə a loʼ wi.

¹¹ N muu i fəghə zən, kweyyə kə loʼ kə kəm way dzə a dza wə loʼ wù Juu nkee wə way wù Juu, nə ghə səghə tyi kə nkee ghə ka səghə ə, wə loʼ kəkɔd nkee wə way kəkɔd ə. Nə wə loʼ wù kətûm, nə wə loʼ wù mbvən, kweyyə kə loʼ kə way dzə. Isəŋə loʼ kə nə̀ Klisto loʼ kətow nə aghəə adzəm nə təjìi tədzəm.

¹² Zə̀ kə n sày ghaa nə ghaa doʼo ghə̂ a wi a zow ghən tə ngii ləghənə, sey, ghaa khə teeli khə sî i kwɔɔlə zə, fə̀ŋ i dzuŋu zə, zuŋ kə umwam, ni buulə nsə ni kow fə̀ŋ.

¹³ I kə ghaa nə kwɔɔ naŋŋənə ghəə a bəbə ghey ghə̂ a loʼ a ghəŋŋənə tə ghaa n fə̀ŋ. Ghaa khə ni neyzəə ghəə a bəbə ghey ghə̂ a ghəŋŋənə tə ghaa. Abə wù ghəŋənə ghaa n ghəə i bəbə zə, ghaa khə ni neyzəə wi ighələ tə Mûkəbii n ndzuŋ ə wi â neyzəənə bəb i ghaa zə.

¹⁴ Ghə i səŋi zə n ghəə ghən adzəm loʼ nə̀ ghaa khə ni ləghə wû i ghaa zə, n təŋkey, a loʼ iləghə i ghəŋŋə nə̀ ghaa doʼo may bə nə kəfə kəmɔʼ.

¹⁵ Buulə zən Klisto fuunə tə ghaa, i bəghə doʼo n fə̀ŋ tə ghaa, n təŋkey, Zə̀ kə n ndzəm sày ghaa nə̀ ghaa doʼo nə kəfə kəmɔʼ, sey nə̀ ghaa loʼ ni keeli ndzoʼo buulə zən. Ghaa i fuu zɔŋŋə kə tə̀ Zə̀ kə nəŋə tədzəm.

¹⁶ Ghaa ghəŋə nə̀ ghɔɔmə i Klisto i bəghə doʼo n fə̀ŋ tə ghaa naʼ idzəm. Ghaa i dii nduŋŋə ndow ghəə a tii ghə n wû i ghaa, dəŋŋə kɔʼɔ bə wû i ghaa nə utɔb. Zhim dzaŋa tən tə fuu kɔʼləmə tə Zə̀ kə, zhim dzaŋa tə Zay kə Zow kə nsə dzaŋa tən ghaa bəghə kɔʼɔ bənə n fə̀ŋ tə ghaa, zhim ndow ndzaŋa tə Kəzə̀ n fə̀ŋ idzəm.

¹⁷ Ghəə zey ghaa ghəŋŋənə nkee ghaa dzanə, i khə ni loʼ n zəd i Mûkəbii Yeso, fuu ndow kəzɔŋŋə tə Zə̀ kə tə loʼnə Bày n zəd i Mûkəbii Yeso.

Jìi zey ghə̂ ghən ghə khənə muu i fəghə zə khə ni muu tii

¹⁸ Ghaa gheyzən ghən ghaa khənə num ghə, ghaa khə ni zow tə num a ghaa ghə, n təŋkey, à wən loʼ jìi zey ghə̂ ghey ghə bəghəmnə tə Mûkəbii khə ni muu tii.

¹⁹ Abə ghaa gheynum ghən ghaa khənə ghey ghə, ghaa khə ni ləghə ghey a ghaa ghə, i kə ghaa nə tɔɔbənə n kow ghə.

²⁰ Ghaa ghiinətəghə ghə, i zow na tə ghə bày a ghaa ghə nə aghəə adzəm, n təŋkey, a wən loʼ ghəə ghən a dzɔbənə n sə kə Mûkəbii.

²¹ Abə ghaa ghə bày, kə ghaa nə ghəŋŋə nə̀ waa a ghaa a fəələ unəghə, ghə loʼ ni nyi doʼo n ngwɔɔ.

²² Ghaa ghə̂ a kəfwaʼ ghə, i zow na tə ghə mûkəbii a ghaa ghə fa n mbi nə aghəə adzəm. I fwaʼa na n jìi zey ghə ləghənə nəŋə tədzəm, a way kə n nəŋə zey ghə tɔʼɔ laalə bənə ghaa. Ghaa khə ni fwaʼa tə ghə n fə̀ŋ tə ghaa tə tədzəm bòʼ ngɔɔmə zən ghaa khənə n kow Mûkəbii Yeso.

²³ Fwaʼ key ghaa fwaʼanə ghii kə, i fwaʼa ndow n fə̀ŋ zə idzəm. Fwaʼa ndow tə ghaa fwaʼa tə Mûkəbii Yeso, a way dzə tə ghaa fwaʼa tə wù sɔŋtsuʼ.

²⁴ Abə ghaa fwaʼanə sey, keeli tsu na nə̀ ghaa i keelinu naamə key Mûkəbii â təb naŋanə tə̀ ghə̂ a wi ghə, n təŋkey à loʼ Klisto tə baa loʼnə Mûkəbii ə ghaa.

²⁵ Abə wù wey tə ghəŋŋənə bəb zə, Zə̀ kə i tsəə dzəŋŋə soʼo wi n ndzoʼo bəb zey tə ghəŋənə, n təŋkey, Zə̀ kə saʼa aghə̂ nə tə nyaŋŋə way tûm usə u wù wə.