Kolose 2 - Kaa n Kəzə̀ n fəghə mə

¹ N ləghə nə̀ ghaa keeli tsu nə n ngii dəmənu bòʼ ghaa nsə ghə̂ ghey ghə loʼnə n dzəŋi kə dzûmə tə Klisto n naʼ i Lodishya, buʼu dəmə soʼo tə ghə̂ ghey ghə loʼ nə ghə ka kam koʼ koʼ tsə mə n wû wuŋ wə.

² N sa dəmə ni kuu fə̀ŋ tə ghə nə̀ ghə i loʼ nə kəfə kəmɔʼ bòʼ ləghə zən ghə khənə n wû i ghə, sey nə̀, ghə i loʼ ni ndzəm zowkeeli nə̀ ghəə zey Zə̀ kə â nyì naŋanə, loʼ Klisto.

³ Ghəə ghən adzəm saa loʼ ni keeli kùm Kəzə̀, nyì doʼo n kow Klisto. À may kə wi tə loʼ ni chi dii ghəə a tii ghə.

⁴ N ghəə ghən dza bə nə ghaa tɔʼ təmi tsu, nə̀ kə wù loʼ nə nəbə fuunə ghaa n ghəə a badla ghən a fiilənə isəŋə.

⁵ Nghee n buʼ lɔʼlə loʼ kə fa, moʼlə tuŋ tədzəm tə loʼ fey ghi ghaa, fə̀ŋ zuŋ u duʼlənə ni koʼ nə̀ ghaa muunu muu i dzuŋu zə, taw soʼo n bəghəm i fə̀ŋ i ghaa ghi Klisto.

Muu i fəghə zən Klisto fuunə

⁶ Nghee ghaa bəghəm dzənə Yeso Klisto tə a loʼ Mûkəbii, ghaa khə ni muu nə kəfə kəmɔʼ ghi wi.

⁷ Ghaŋ tə ghaa tə khə ni nyi taw tsu n kow wi, ghaa bəghə kɔʼ bə muu i ghaa n kow wi, sey, bəghəm i fə̀ŋ i ghaa zə i nyîmmə nə isəŋə zən ghə â diinə tə ghaa, ghaa i fuu soʼo zɔŋŋə kə tə Zə̀ kə naʼ idzəm.

⁸ Ney na ghə̂mə zə kə wù loʼ nə ndow bəghənə n tɔb u wù sɔŋtsuʼ wə, ni ghəŋə nə̀ ghaa doʼo ukɔd tə wi. Ndzoʼo tɔb wən nuu bə n wɔ wù sɔŋtsuʼ nsə zày wən u saʼanə mbi zən, u ka nuu bə dzə n wɔ Klisto.

⁹ N təŋkey a may tsu kə n muu i Klisto tə a loʼ wù sɔŋtsuʼ a koʼonə muu i Kəzə̀ zə idzəm.

¹⁰ Zə̀ kə n fuu ghaa n muu i tii zə idzəm nghee ghaa loʼnə ghi Klisto nə kəfə kəmɔʼ. À loʼ Klisto tə khənə daʼa kə tsəghəshi zày wən udzəm u saʼanə mbi.

¹¹ Nghee tə ghaa loʼnə nə kəfə kəmɔʼ ghi Klisto, ghaa nya loʼ tə ghə n səghə tyi u ghaa wə. À kee loʼ nə̀ ghə ka tyi u ghaa u səghə dzə nghee ghə ndzəmə səghənə tyi u ghə wə a tii. Klisto â səghə tyi u ghaa nghee tə â ney nuu shi bənə ghaa n daʼa wən u ghəŋŋənə ghaa nə ghaa i ghəŋŋə ghəə a bəbə ghə.

¹² N sey dza n təŋkey, ghə mâ tsələ dzəŋi ghaa ghi Klisto n mmuu n Kəzə̀ mən ghə â fuunə tə ghaa. Ghaa n zhəm dzəŋŋə bə soʼo ghi wi, keeli kɔʼ muu i fəghə zə, tənkey ghaa gaʼ fə̀ŋ n daʼa K-a-zə̀, tə â zhəm dzəŋŋə bənə Klisto nə ivə.

¹³ Ghaa â loʼ tsə tə a loʼ ghə̂ a kpuu ghə n sə K-a-zə̀ bòʼ ghəə a ghaa a bəbə ghə nsə nə ghaa a loʼ nə ghə ka kam səghə tyi u ghaa wə. Abə nya, Zə̀ kə n ghəŋə nə̀ ghaa doʼo bə utaw ghi Klisto, n təŋkey, tə n neyzəə ghəə a ghaa a bəbə ghə n ndzuŋə wi.

¹⁴ Zə̀ kə n zəd maʼa tsu ghəə a saa a bəbə ghən a khənə tə laŋ kə diinə. Tə ghəə a tii ghə â neynu nghee tə ghə â baa n zat kə fəkaʼ ghi Klisto.

¹⁵ À wən loʼ soʼo jìi zey tə â təm zə̂nə zày wən u saʼanə mbi tii. Tə n lənnə ghə n mgbaŋ nghee tə â təm zə̂nə ghə n zat kə fəkaʼ.

Kə ghaa nə dzûmənə laŋ u wù sɔŋtsuʼ wə

¹⁶ Kə ghaa nə bəghəm nə wù loʼ saʼ ghaa n fə key ghaa khə ni zə̂ nkee ni mə̂. Kə ghaa nə bəghəm soʼo nə wù loʼ doʼo tə wey tə i saʼanə tsuʼ fey, ndzɔŋ, nkee nəŋə zey ghaa khə ni ngɔɔmə Zə̀ kə a tii.

¹⁷ Ghəə ghən maŋ loʼ tə a loʼ kəzəŋŋə tə ghəə ghən a khə ni baa bə. Ghə i səŋi tii i baa loʼ Klisto.

¹⁸ I kə ghaa nə bəghəmnə nə̀ wù wən tə ghaŋŋə wû wə n muu i Kəzə̀ i ghə, ngɔɔmə soʼo tsətəndəghə tə Kəzə̀ nə̂ nəbə sə̂ a ghə̂ ghə nə ghə ngɔɔmə Kəzə̀. Ghə ghaŋŋə uwû nə̀ Zə̀ kə dii ghə n ghəə ghə nə̀ ujim boʼ moʼlə tə ghə tə bəbə tə.

¹⁹ Ndzoʼo ghə̂ ghən kəm zow way tə Klisto, tə loʼnə tow kə n dzəŋi kə dzûmə tə Klisto, tɔŋɔ wû u wi. À loʼ wi tə kwu keelinə wû wə udzəm nə kəfə kəmɔʼ nə uzuŋ, ghəŋŋə nə̀ wə i nyîmmə n daʼa K-a-zə̀.

Saa keeli imuu abə saa kpu dzəŋi ghi Klisto

²⁰ Ghaa mâ mgbaŋ kpu ghi Klisto, tə n bəghəshi nuu bə ghaa n wɔ zày wən u saʼanə mbi. À sə loʼ kee ghaa kəm dzûmə nə laŋ u mbi wə? Kə ghaa nə kəm dzûmə nə ndzoʼo laŋ wən u dzanə nə̀,

²¹ “Kə̂ wə nə̂ kwɔnə fə wən n wɔ! Kə̂ wə nə̂ mɔm zownə kə kən nə idzuu! Kə̂ wə nə laa mɔmnə kə kən!”

²² Ndzoʼo laŋ wən maŋ loʼ laŋ wən wù sɔŋtsuʼ diinə. Laŋ wən maŋ loʼ fə wən u kəm khə way fwaʼ kə abə nəŋə i tsəghə dzənə.

²³ Laŋ wən mgbaŋa fiilə kənu laŋ u dzuŋu wə, nghee u dza nə̀ saa i khə ngɔɔmə zə, saa i ngɔɔmə ndow tsətəndəghə tə Kəzə̀ tə, kə̂ saa nə chɔdlɔnə wû i saa zə dza nə̀ saa ngɔɔmə Kəzə̀. À kee loʼ nə, laŋ wən khə dzə way daʼa kə loʼ kə ni ghəŋə nə̀ gow uwû ka ghəŋə dzə ghəə a bəbə ghey i ləghənə ni ghəŋə.