Kəfwaʼ 8 - Kaa n Kəzə̀ n fəghə mə1 Sɔl â bəghəmnu n fə̀ŋ ə wi idzəm nə ghə wey Sətifən. Ni ney nuu tsu n tsuʼ fey ghə â weynə Sətifən tii, ghə n zey ni ngii chɔd ghə̂ a dzəŋi kə dzûmə tə Klisto n Yerosalem. Dzûmə tə Yeso tən tədzəm n saŋŋə nyi nuu ndow n naʼa tey n mboʼo Judeya nsə n Samaria. À n doʼo səə tsu kə ngəd tə Yeso fu tii n Yerosalem. Sɔl chɔd dzûmə tə Klisto, saŋŋə maʼa soʼo ghə 2 Ghə̂ a loʼ ghə, ghə â ngii bəghəmnə tə Zə̀ kə, n ngii dey nghee ghə wey tsunə Sitifən. Ghə n boʼo vən i wi ndow tsələ ndow. 3 Sɔl n kee zey ndow ni saʼ maʼa ghə̂ a dzəŋi kə dzûmə tə Klisto. Tə n bwey kaabə ndow ndaw təndaw, sii nu shiə bə dzûmə tə Klisto, agheynum nsə gheyzən ghə, ndow fìi naŋŋə ghə n ndaw tsaʼ. Filip naʼa tûm i dzuŋu zə n naʼ Samaria 4 Sey, dzûmə tə Klisto tən ghə â saŋŋə maʼanə, n bwey kaabə ndow luʼu tədzəm, naʼlə ndow tûm i dzuŋu zə. 5 Filip n nuu tsu ndow n naʼ i loʼ zə n mboʼo Samaria, naʼlə ndow tûm i dzuŋu zə bòʼ wù wən Zə̀ kə â dza naŋa nə̀ i tûm bənu. 6 Nghee tə̀ nɔɔ wə aghə̂ u koʼnə faalə mey Filip ghəŋŋənə, zow soʼo ghɔɔmə i wi, ghə n tɔʼ fuu ndow utuŋŋə ni zəllə ghəə ghey tə dzanə. 7 Zay u bəbə wə n dey, tyi shiə bə n kow ndəmə aghə̂. Ndəmə ghə̂ ghey ghə â loʼnə nə ghə n kpu doʼo bad kəmɔʼ nsə kəŋŋə wə n taw doʼo bə. 8 Ghəə ghən n ghəŋŋə nə̀ ghə̂ ghə inaʼ a tii a ngii keeli iduʼlə. Shimun, wù fənnə wə 9 Wù loʼ n loʼ fu tii n naʼ i Samaria ghə â tɔŋŋə nə̀ a loʼ Shimun, tə n ghəŋŋə nə̀ ghə̂ dzuu zə i zum ghə̂ ghə n fənnə zey tə â ghəŋŋənə. Tə n kɔʼlə uwû nə i loʼ wù səŋi. 10 Aghə̂ adzəm fu tii n fə̀ŋ inaʼ, ghə̂ atəghə ghə, nsə ghə̂ nii ghə â zow tsə tə wi. Ghə n dza tsə nə̀, tə loʼ daʼa key kə nuu bə nə n wɔ̀ Zə̀ kə tɔŋɔ, “Daʼa kə səŋi kə.” 11 Ghə â bəghəm tə wi boʼnə tə mâ dii kɔʼ bə ghəə a fənnə ghən tə ghə n ndəmə tənum. 12 Ambə ghə̂ a kee bəghəm kɔʼnə tûm zən Filip a naʼlənə kuum fɔɔ u Kəzə̀ nsə bòʼ Yeso Klisto, agheyzən nsə gheynum ghə n ney mmuu n Kəzə̀. 13 Shimun n wû u wi wə n bəghəm soʼo tûm tii, ney daŋŋə soʼo mmuu n Kəzə̀. Ambə tə ney kɔʼnə mmuu n Kəzə̀ mə, tə n bwey kaabə tsə ghi Filip n luʼu tey tədzəm tə â ndownə tii. Dzuu zə n ngii zum wi bòʼ faalə mey nsə ghəə a zum ghə idzuu ghey tə â koʼ Filip ghəŋŋənə. 14 Nghee ngəd tə Yeso tey n Yerosalem zow tsunə nə̀ ghə̂ a Samaria ghə n bəghəm tə tûm Kəzə̀, ghə n tûm ndow Pita ghi Jɔn n səə ghə. 15 Ambə ghə ndow nyi ndownə fu, ghə n gɔŋŋə n tow u ghə̂ ghey ghə â bəghəmnə tûm i dzuŋu zə, nə̀ ghə mbɔŋ keeli Zay kə Zow kə. 16 Zay kə Zow kə â ka kam nyi dzə n kow ghə, n təŋkey, ghə â ney kə mmuu n Kəzə̀ n zəd i Mûkəbii Yeso. 17 Sey, Pita ghi Jɔn n gaʼ ndow awɔɔ n tow u ghə, Zay kə Zow kə n daŋŋə nyi ndow n kow ghə. 18 Nghee Shimun koʼ tsunə nə̀ ngəd tə Yeso tən gaʼa ndow awɔɔ n tow wə aghə̂, ghə n keeli Zay kə Zow kə, tə n ləghə ni zuulə ghə nə ukhəə. 19 Tə n dza tə ghə nə̀, “Fuu bə soʼo n na mə n daʼa kən, sey nə̀, bə n gaʼ ndow wɔɔ kə n tow kə wù, wù tii n keeli Zay kə Zow kə.” 20 Pita n beeli ndow wi nə̀, “Wə i ləŋi dzəŋi ghi khəə wə wə̀ nghee tə wə moʼlənə nə̀ wə loʼ ni zuu naamə K-a-zə̀ nə ukhəə! 21 Wə ka kɔʼ kpi dzə ni fwaʼ fwaʼ kən, n təŋkey, fə̀ŋ zə zow way n sə̂ K-a-zə̀. 22 Kwey nuu bə fə̀ŋ zə n moʼlə i bəbə zən wə khənə, wə gɔŋŋə tə Mûkəbii nə tə loʼ ni neyzəə wɔ n ndzoʼo moʼlə i bəbə zən wə khənə n fə̀ŋ zə. 23 Mə n koʼ nə̀ wə ngii khə kəghoʼ n fə̀ŋ zə, wə loʼ soʼo kəkɔd tə ghəə a bəbə ghə.” 24 Sey, Shimun n dza ndow tə Pita nsə Jɔn nə̀, “N buʼu kəwɔɔ nə̀ ghaa gɔŋŋə ndow tə Mûkəbii n tow kuŋ nə̀ kə ghə i loʼ zə n ghəə ghən ghaa dzanə fa nə shiənə n kow mə.” 25 Nghee Pita nsə Jɔn tiilə dza may tsunə ghəə ghey ghə â khənə boʼ Yeso, naʼa may tsu soʼo tûm i dzuŋu zə bòʼ Mûkəbii, ghə n nuu dzəŋŋə ndow n Yerosalem, bwey naʼlə ndow tûm i dzuŋu zə n naʼa tə mboʼo Samaria. Filip naʼa tûm i dzuŋu zə tə wù Itopia 26 Tsəndəghə ə Mûkəbii n ndow bə dza tə Filip nə̀, “Bayyə kɔʼ wû wə, wə nuu tsu ndow n bad kə itən kə, n jìi zey i nuu tsunə n Yerosalem, tsəghə tɔɔlə ndow n mbvən ə ntsaŋ ni ndow n Gaza.” 27 Sey, Filip n bayyə kɔʼ uwû nuu ndow. Ambə tə ndownə, tə n kpiilə ndow ghi wù nə ghə n kâa wi. Wù wən â loʼ wù nii nə Itopia tə â naŋŋənə khəə u Kandake, tɔŋŋə naʼtum ə Itopia wə. Tə â ndow ngɔɔmə Kəzə̀ n Yerosalem. 28 Nghee tə fənə dzəŋŋə ndownə n naʼ i wi, tə n tɔŋɔ ndow màʼlə kə wù tûm Kəzə̀ Azaya nə tə doʼ n kaya ə kəkhinyam. 29 Zay kə Zow kə n dza ndow tə Filip nə̀, “Ndow n səə kaya zey wə kuʼlə bwey dzəŋi ndow ghi ghii zə.” 30 Sey, Filip n nyəŋ ndow n səə kaya zey, zow ndow nə̀ wù tii tɔŋɔ màʼlə kə wù tûm Kəzə̀ Ayzaya. Filip n bəb tə wi nə̀, “Wə zowkeeli kənu ghəə ghey wə tɔŋɔnə ə?” 31 Wù nii wey n beeli ndow wi nə̀, “N loʼ ni zowkeeli ngee nə̀ wù loʼ ka tiilə dza bə tə mə ə?” Tə n daŋŋə dza nə̀ Filip kɔʼ doʼo dzəŋi kɔʼ ghi wi. 32 Dəŋŋə key tə â tɔŋɔnə n màʼlə K-a-zə̀ n nəŋə i tii zə â loʼ nə̀, “Ghə a sii ndow wi tə aloʼ njì ghə dza i ndow wey, Tə n loʼ kə mɔŋ tə waa njì nə loʼnə n səə wù wey tə kɔmnə nyuŋ tə wi tə, Tə n ka tsəm jaʼ idzuu. 33 Ghə n tsayyə wi, saʼ soʼo wi n jìi zey i way tsətsəghə. Wù loʼ i way dzə tə loʼ ni tiilə kɔʼ bə waa a waa a wi, N təŋkey, ghə n ney muu i wi zə fa n mbi.” 34 Wù wey tə kàa doʼonə n bəb ndow tə Filip nə̀, “Kələ wɔ, dza bə tə mə, wù tûm Kəzə̀ wən ghɔɔmə bòʼ ndee? Tə ghɔɔmə bòʼ wû u wi mɔɔ tə ghɔɔmə bòʼ wù nuu ə?” 35 Filip n kaʼ tsu ghɔɔmə i wi n luʼu key tə mə tɔŋɔnə n màʼlə K-a-zə̀ kə tii, naʼa ndow tûm i dzuŋu zə bòʼ Yeso tə wi. 36 Nghee ghə ndownə n jii, ghə ndow koʼ tsu mmuu, wù wey tə â loʼ nə ghə n kàa n dza nə̀, “Koʼo mmuu n mən ə, à loʼ kee wə way ni fuu mə fa n mmuu n Kəzə̀ mə ə?” 37 [Filip n dza tə wi nə̀, “N loʼnu ni fuu wɔ n mmuu n Kəzə̀ mə abə wə bəghəmnə n fə̀ŋ zə idzəm.” Wù wey n dza ndow tə wi nə̀, “N bəghəmnu, mə n bəghəm nə̀ Yeso Klisto loʼ waa Kəzə̀.”] 38 Sey, wù wey ghə â kâa naŋanə wi n dza nə̀ ghə kwu teyyə naŋa tsu kaya ə khinyam zey. Ghə n dzəŋi nyi tsu n luʼu key mmuu mey mə â loʼnə tii, Filip n fuu tsu wi fu n mmuu n Kəzə̀ mə. 39 Ambə ghə shiə kɔʼɔ bənə n mmuu n tii mə, Zay kə Zow kə n boʼo nuu ndow Filip. Wù wey tə â kâa doʼonə n ka kəm koʼ wi, tə n tsəm maŋ nuu daŋŋə ndow kə i wi zə n duʼlə zə. 40 Filip n dza i koʼ nə̀ tə ndow shi n naʼ zə Azotus. Tə n ndow kə n sə kə ni naʼa tûm i dzuŋu zə n naʼa tey tə â loʼnə fu n jii, ndow kuum ndow n Kayserya. |
© 2022 CABTAL