Kəfwaʼ 5 - Kaa n Kəzə̀ n fəghə mə

Ananyas ghi Safira bad aghəə tə Zay kə Zow kə

¹ Wù loʼ zəd i wi zə â loʼ nə a loʼ Ananyas ghi wey wi Safira n kee fii tsu soʼo luʼu kə ghə kə loʼ kə.

² Tə n saalə tsu ghi wey wi, naŋa sə tsu kəm kə ukhəə n wû u wi, ney kɔʼ kəm kə loʼ key bə fuu bə tə ngəd tə Yeso tə.

³ Pita n bəb tə wi nə̀, “Ananyas, a loʼ kee wə bəghəmnə nə Satan nyi bəghə doʼo n fə̀ŋ zə, tə ghəŋə wɔ nə wə bad aghəə tə Zay kə Zow kə ə? À loʼ kee wə khəə naŋa ndownə kəm kə ukhəə key wə fiinə luʼu kə tii tə̀ wû wə wə̀ ə?

⁴ Tə wɔ ni tsəm ni bə fii luʼu kə tii kə, a loʼ nə â way luʼu kə ə? Ambə wə fii tsunə, khəə u tii wə â way khəə wə? À wɔ chimmə kee nə wə keeli ndzoʼo moʼlə zey n fə̀ŋ zə ə? Wə ka ghəə a bad dzə tə ghey, wə fəd bad tə Zə̀ kə.”

⁵ Ambə Ananyas zow tsu ghəə zən, tə n bwu bə aghəd, kpu i ndow. Tsəŋ zə n kwu ghə̂ ghey adzəm ghə â zownə ghə zey i shinə ghi Ananyas.

⁶ Ghaŋ fə num fey fə â loʼnə fu n daŋŋə bə, bàŋ kɔʼ vən i wi nə təndzə, boʼo nuu shi ndow wi a bii, ndow tsələ i ndow.

⁷ Nəŋə tə izow tə n tsəghə tsu tə a loʼ tətəghə, wey wi n ndow bə, khə way ghəə zey i mə shinə ghi num.

⁸ Pita n bəb ndow tə wi nə̀, “Nə wə dza nə̀ a wən may khəə wən wɔ ghi num wə fiinə luʼu kə tii ə?” Safira n beeli ndow wi nə̀, “Ow, a wey loʼ khəə u tii wə.”

⁹ Pita n dza ndow tə wi nə̀, “À loʼ kee wə dzəŋi saalə kɔʼ ghi num wə ni mɔm koʼ Zay kə Mûkəbii ə? Koʼo, ghə̂ ghey ghə ndow tsələnə num wə, ghə ghey ghə teynə n fuʼ u ndaw, ghə boʼlə kɔʼɔ soʼo wɔ, ghə ndow tsələ.”

¹⁰ Safira sey daŋŋə bwu kpu bə soʼonu n tənə wi. Waa a num ghey n nyi bə, bə koʼ bə nə tə n kpu, ghə n boʼo shi ndow wi, ndow tsələ ndow n səə say i num.

¹¹ Tsəŋ zə ngii kwu ghə̂ ghən adzəm ghə bəghəmnə tə Yeso nsə ghə̂ ghən adzəm ghə â zow ghəə a tii ghə.

Ngəd tə Yeso tə baŋŋə ndəm aghə̂

¹² Ngəd tə Yeso tə â ghəŋŋə ndəmə ghəə a faalə ghə nsə ghəə a zum ghə idzuu ghə n fəŋŋə kə aghə̂. Dzûmə tə Yeso tədzəm tə n təmə dzəŋi tsə n zeeli kə Solomun.

¹³ Wù umɔʼ n fəŋŋə kə ghə̂ ghey ghə â way dzəŋi ghi dzûmə tə Klisto tə n khə way fə̀ŋ ni təmdzəŋi ghə, loʼ sey nə̀ ghə̂ ghə â mgbaŋ khə ghə nə a loʼ ghə̂ a səŋi ghə.

¹⁴ Taŋ a ghə̂ ghey ghə â bəghəmnə tə Mûkəbii n kuu kpiʼi kɔʼɔ ndow, gheyzən ghə n loʼ tii nsə gheynum ghə.

¹⁵ Ghəə ghey tsətəndəghə tə Klisto tə â ghəŋŋənə n ghəŋə nə̀ ghə̂ i boʼlə bə ghə̂ a dzaŋa ghə n khəə u təjii, nə ngham nsə nə nkay, sey nə̀, abə Pita tsəghənə, zəŋŋə kə wi kə n loʼ ni mɔm daŋŋə tsə ghə̂ a loʼ ghə, ghən taw i kɔʼ.

¹⁶ Nɔɔ wə aghə̂ wə n nuu bə n naʼa tey tə â kuʼlə loʼnə n səə naʼ i Jeroslem, luu nyi bə n Yerosalem. Ghə n boʼlə bə ghə̂ a ghə a dzaŋa ghə nsə ghə̂ ghey zay u bəbə wə â loʼnə n kow ghə. Ngəd tə Yeso tə n baŋŋə ghə adzəm.

Ghə chɔdlɔ ngəd tə Yeso

¹⁷ Fɔɔngili u nii nii wə nsə ghə̂ a wi ghə, ghə â loʼnə n zəghə u tə Sadusi, n khə kəghoʼ, ghə daŋŋə dza nə̀ ghə khə ni chɔd ngəd tə Yeso.

¹⁸ Ghə n kwu kɔʼ ngəd tə Yeso, fii naŋa ndow ghə n ndaw tsaʼ.

¹⁹ A n kee bə n tsuʼu tə, tsəndəghə ə Mûkəbii n bə chi tsu fuʼu ndaw u ndaw tsaʼ, ney nuu shi bə ghə, dza tsu tə ghə nə̀,

²⁰ “Ndow təmi tsu na n bii kə ndaw Kəzə̀, ghaa dza ndow tə ghə̂ a tii ghə, ghəə ghey adzəm a ghəŋŋənə nə̀ ghə keeli muu zə itsali.”

²¹ Ghə n nuu kɔʼ n bələbələ tə, bɔɔmə dzûmə ndow kə ghəə zey tsəndəghə ə Mûkəbii wey mə dzanə, nuu nyi ndow n bii kə ndaw Kəzə̀, zey ndow ni dii aghə̂ fu. Ambə fɔɔngili u nii nii wə ghi ghə̂ a wi ghə ndow bənə, ghə n tɔŋɔ naŋa bə ghə̂ a tsə nsə ngəd tə Izree tə tədzəm, tûm ndow tûm n ndaw tsaʼ nə ghə ney bə ngəd tə Yeso tey fu.

²² Ghə̂ a keyyə ghey n ndow fu n ndaw tsaʼ, ka kee koʼ ghə. Sey, ghə n nuu dzəŋŋə bə, bə dza tə ghə nə̀,

²³ “Ghey ndow koʼ fuʼ u ndaw u ndaw tsaʼ nə u bɔɔmə fii doʼo dzɔbnu, ghə̂ a keyyə ghə a bɔɔmə tey soʼo fu n fuʼ u ndaw. Ghey u chi nyi ndownə ka kee koʼ wù fu ti n fəŋ.”

²⁴ Ambə ghə fɔɔngili a nii ghə nsə tow kə ghə̂ a keyyə ghey n ndaw Kəzə̀, zow tsunə ghəə zən, dzuu zə n zum ghə, ghə n məʼlə ghəə zey i shinə.

²⁵ Sey, wù loʼ n daŋŋə ndow tsəghə nyi bə, dza tə ghə nə̀, “Koʼo na! Ghə̂ ghey ghaa â fii naŋanə, ghə ghey fey n bii kə ndaw Kəzə̀, dii aghə̂ n ghəə ghə.”

²⁶ Tə ghə daŋŋə zow tsunə sey, tow kə ghə̂ a keyyə ghə nsə ghə̂ a wi ghə n ndow ney bə ghə. Ghə n ka kee ney dzə ghə nə̀ kədaʼa, n təŋkey, ghə â tsəŋə nə̀ kə̂ ghə̂ a nə̂ təmmə weynə ghə nə atay.

²⁷ Ghə n ney nyi bə ngəd tə Yeso tey, doʼlə naŋa bə ghə n sə̂ kə ghə̂ ə ndaw tsə. Fɔɔngili u nii nii wə n bəbə ghə n ghəə ghə.

²⁸ Ghey mâ tɔʼ kii naŋa ghaa nə̀ kə̂ ghaa nə̂ kəm dii ghə̂ ghə n ghəə ghə n zəd i wù wən, ghaa u nam ndow kə n sə̂ kə ni dii ghəə ghə kuum wi n naʼ i Yerosalem idzəm. Ghaa ləghə ni ghəŋə nə̀ i doʼo tsu nə̀ ghey khə kəwɔɔ n və i wi.

²⁹ Pita nsə ngəd tə Yeso tə loʼ tey n beeli ndow ghə nə̀, “Ghey teeli zow kə tə̀ Zə̀ kə, à way dzə tə̀ wù sɔŋtsuʼ!

³⁰ Zə̀ kə kən ghə bày a saa â ngɔɔmə tsənə â zhəm dzəŋŋə bə Yeso wən ghaa â weynə wi nə ghaa baa n zat kə fəkaʼ.

³¹ Zə̀ kə n wi kɔʼlə naŋa kɔʼ n kpi u wi u təmə wə tə a loʼ kətow nsə bəghəshi, nə̀ tə loʼ ni fuu ghə̂ ghə Izree n bùʼ kə tə ghə kweyyə fə̀ŋ tə ghə, nsə nə Zə̀ kə neyzəə ghəə a ghə a bəbə ghə.

³² Ghey loʼ ghə təmi tiilə n ghəə ghən, ghey nsə Zay kə Zow kə, kə loʼnə naamə K-a-zə̀ kə tə ghə̂ ghey ghə zownə tə wi.”

³³ Ambə ghə̂ a ndaw tsə ghey zow tsunə sey, fə̀ŋ tə n fə nay ndow ghə tii, ghə n ləghə ni wey ngəd tə Yeso.

³⁴ Wù Falasi u loʼ wə ghə â tɔŋŋə nə̀ aloʼ Gamaliel â loʼ fu. Tə a loʼ soʼo wù dii u kəlaŋ u nii wə, ghə̂ adzəm ghə n ngɔɔmmə wi. Tə n təmi kɔʼ, dza ndow tə ngəd tə Yeso tey nə̀ ghə khəə təmi shi ndow a bii.

³⁵ Ambə ghə shi ndownə, tə n dza ndow tə ghə̂ a tsə ghey nə̀, “Ghə̂ a Izree ghə, tɔʼɔ ney na ghə̂mə zə n ghəə zey ghaa ləghə ni ghəŋə n kow ghə̂ ghən.

³⁶ Ghaa khənu nə Tiodas â nuu kɔʼ dzə fa, dza nə̀ i loʼ wù səŋi, ghə̂ ghə n nuu kwɔɔ ndow n baa wi nyiə kɔʼɔ ndow nbɔm nkaykə. Ghə n wey tsu wi, ghə̂ ghey adzəm ghə â dzûmənə wi n tyi saŋŋə i tsu, dzəŋi kə tii kə n may tən ndow sey.

³⁷ Judas wù Galili n kɔʼ bə soʼo n tsuʼu mey ghə a taŋa ghə̂ ghə, tə n sìi nuu ndow soʼo nɔɔ kə aghə̂ n baa wi. Ghə n wey tsu soʼo wi, ghə̂ a wi ghə n tyi saŋŋə tsu soʼo.

³⁸ Abə n saʼ zən saa khənə nya fa, n tsəə bə ghaa nə̀ ghaa zəghə maʼa ghə̂ ghən. Zəghə na ghə, ghə ndow nuu, n təŋkey, abə i loʼ nə̀ ghə fwaʼa fwaʼ kən n daʼa kə wù sɔŋtsuʼ, zə i maŋa bə may soʼo kənunu.

³⁹ Abə a kee loʼ nə̀ a loʼ n daʼa K-a-zə̀, ghaa i way dzə ni buu naŋa ghə. Nə ghaa dza i buu naŋa ghə nə kədaʼa, ghaa i koʼ kə nə ghaa bənə zuulə baalə ghi Zə̀ kə.”

⁴⁰ Ghɔɔmə i wi zə n mɔm ghə n fə̀ŋ. Sey, ghə n daŋŋə tɔŋɔ nyi bə ngəd tey, vəələ dzɔb tsu ghə nə təkwɔ̀ɔ, kii naŋa ndow ghə nə̀ kə̂ ghə nə̂ kəm ghɔɔmə kpiʼinə ghəə zə n zəd i Yeso, daŋŋə zəghə tsu ghə nə̀ ghə nuu.

⁴¹ Nghee ngəd tə Yeso tey zəghə tsunə ndaw tsə, ghə n nuu ndow, fəd duʼlə nə̀ Zə̀ kə n koʼ nə̀ ghə kɔʼ kpiinu ni fəghə, ghə keeli tow kə dədlə kə bòʼ Yeso.

⁴² Ghə n ka buu doʼo koʼ ni dii aghəə nsə ni naʼlə tûm i dzuŋu zə nə̀ Yeso loʼ wù wey Zə̀ kə â dza naŋa nə̀ i tûm bənu. Ghə n dii ghəə ghən tsuʼu ndzəm n bii kə dzəŋi kə ndaw Kəzə̀ n Yerosalem nsə ndaw tə ndaw.