Kəfwaʼ 2 - Kaa n Kəzə̀ n fəghə mə

Tsuʼ fey Zay kə Zow kə â tsu bənə dzûmə tə Klisto tə

¹ Ambə tsuʼ fə Pentikɔs fə bənə, dzûmə tə Klisto tədzəm tə n dzəŋi loʼ nə kəluʼu kəmɔʼ.

² Ghə n gbələ zow fə kə loʼ kə fuŋu tsuu bə nə n bikighow tə a loʼ zəŋ i taw zə i kwɔ̀ɔ tsuu bənə, bə luu ngəə tsəghə bə n ndaw zey ghə â doʼnə tii.

³ Ghə n koʼ ndow fə kə loʼ kə tə a loʼ nyim kə uvələ, kə n dzawwə nyaʼa doʼo ndow n tow kə kay wù.

⁴ Zay kə Zow kə n nyi bə n kow ghə adzəm, ghə n zey ndow ni ghɔɔmə n ghɔɔmə tə naʼa tə nuu tə. Kay wù n ghɔɔmə kə ghɔɔmə zey Zay kə Zow kə ghəŋənə nə tə ghɔɔmə.

⁵ Ghəə ghən â shi nə̀ ghə̂ a Təjuu ghən ghə ngɔɔmənə Zə̀ kə n fə̀ŋ ə ghə idzəm loʼ n Yerosalem. Ghə â nuu bə n naʼa tə mbi tədzəm.

⁶ Ambə ghə̂ ghən adzəm zow tsu dəm kən, nɔɔ kə aghə̂ kə n nyəŋ zuŋŋə bə fu, dzuu zə n zum ghə boʼnə kay wù â zowkeeli ndow kə ghɔɔmə i wi ghə ghɔɔmənə.

⁷ Ghəə zən n tsəghəshi ghə, ghə kəŋə kii kətow tii, zey ndow ni bəb n wû i ghə nə̀, “N dza ghə̂ ghən mgbaŋ loʼ ghə̂ a Galili ə?

⁸ Ghə kaʼ bə ngee ni ghɔɔmə ghɔɔmə tə naʼa tə saa tə ə?

⁹ Saa a loʼ a nuu bə n Patya, a loʼ ghə n Midya nsə n Elam. Saa a loʼ ghə a nuu bə nə n bad u Mesopotemya, a loʼ ghə n Judeya, a loʼ ghə n Kapadoshya, a loʼ ghə Pontus nsə n Eshya.

¹⁰ Ghə̂ a loʼ ghə a nuu bə n naʼ i Frigya, a loʼ ghə n Pamfilya, a loʼ ghə nə Ijip nsə n bad u Libya u loʼnə n səə Sirin. Saa a loʼ ghə u nuu bənə n naʼ i Roma.

¹¹ Saa a loʼ a nuu bə n Krit nsə nə Arebya, saa a loʼ ghə u loʼ ghə̂ a Təjuu ghə nsə ghə̂ a tətùm ghən ghə bəghəmnə tə ghəə a Kəzə̀ a Təjuu ghə. Saa adzəm, saa u loʼ ni zow ghə ghɔɔmənə n ghɔɔmə tə saa tə, tiilə dza bə ghəə a səŋi ghey Zə̀ kə ghəŋənə.”

¹² Dzuu zə n ngii zum ghə, ghə n kəŋə kìi kətow, bəbə kuulə kə n wû i ghə nə̀, “À wən loʼ ndzoʼo ghə i ghaa zə ə?”

¹³ Nghee ghə bəbə sey n wû i ghə, ghə̂ a loʼ ghə n kee tsoʼ maʼa ghə dza, “Ghə̂ ghən khəə nlə.”

Ghɔɔmə i Pita tə nɔɔ kə aghə̂ key

¹⁴ Sey Pita n nuu təmi kɔʼ idəŋ ghi tsətəndəghə tə loʼ tey ighəm nsə ghii zə imɔʼ, dza shi kɔʼ n dzə i taw zə tə nɔɔ kə aghə̂ key nə̀, “Waazə ghuŋ ghə, ghə̂ Təjuu ghə nsə ghaa ghən adzəm ghaa muunə n Yerosalem, tɔʼɔ chi kɔʼ na tuŋŋə u ghaa wə ghaa zəllə ghɔɔmə zuŋ.

¹⁵ Ghə̂ ghən khəə dzə way nlə mə tə ghaa moʼlənə, a nya nam loʼ tənəŋə tətaandzuu n bələbələ tə.

¹⁶ I loʼ nə̀, a wən loʼ ghəə ghən wù tûm Kəzə̀ Juwel â naʼa naŋa zey dzənə nə̀,

¹⁷ ‘Zə̀ kə dza nə̀, n tsuʼu n guŋŋə mən, à wən loʼ ghəə ghən mə i ghəŋŋənə Mə i fuu Zay kuŋ tə ghə̂ ghə adzəm. Waa a ghaa a num ghə nsə a zən ghə i naʼlə ghɔɔmə zuŋ zə. Ghaŋ fə num fə i koʼo zey ghəə ghə, Ghə̂ a dənə ghə i keeli jim mə.

¹⁸ N tsuʼu n tii mə, mə i fuu soʼo zay kuŋ tə ghə̂ a kəfwaʼ ghuŋ a num ghə nsə a zən ghə, Ghə nə naʼlə ndow ghɔɔmə zuŋ zə.

¹⁹ Mə i dii tətsəə n bikighow N dii ghəə a faalə ghə n ghəlikətsə, Ghaa i koʼ təkaŋ inaʼ, naʼ zə i fəə, nyoʼ kə i dzəə təluʼu.

²⁰ Ləm kə i nuu bwu tsu inaʼ, tsə i kəm taw way, Ndzɔŋ i nuu bàŋ doʼo tsu tə a loʼ təkaŋ. Tə tsuʼ fə nii nii fey Mûkəbii i saʼanə mbi tii ni bə, a i loʼ nə̀ ghəə ghən adzəm n ney dzə bənə kə.

²¹ Wù wey tə i tɔŋɔnə zəd i Mûkəbii zə nə̀ tə gaamə wi, Zə̀ kə i bəghəshi wi.’”

²² Pita n daŋŋə dza tə ghə nə “Ghə̂ ghə Izree ghə, ghaa zow! Yeso wù Nazaled wən Zə̀ kə â sàynə, tə n dii bə wi tə ghaa n faalə mən tə â ghəŋənə, tsəə tən tə â diinə nsə ghəə a səŋi ghən tə â ghəŋənə n fəŋŋə kə ghaa. Wû i ghaa, ghaa mgbaŋ khənu ghəə a tii ghə.

²³ Zə̀ kə mâ khə bayyə naŋa zey nə̀ ghə i fuu tsəʼlə bə Yeso n wɔ ghaa, zə n bɔɔmə bə shi kɔʼ sey. Ghaa n ney kɔʼ wi, fuu ndow tə ghə̂ a bəbə ghə nə ghə wey wi nə ghə baa n zat kə fəkaʼ.

²⁴ Zə̀ kə n kee zhəm dzəŋŋə bə wi nə ivə, bəghəshi bə wi n wɔɔ kə ivə, n təŋkey, və zə â ndɔm way ni kwu naŋa wi.

²⁵ Fɔ̀ɔ Devid mâ ghɔɔmə bòʼ wi nə̀, ‘N koʼonu Mûkəbii, tə loʼ ghi mə nəŋə tədzəm, Fə kə loʼ kə way ni mɔm mə n təŋkey tə loʼ tən n səə mə.

²⁶ À wey loʼ ghə i tii zə n ngii khənə duʼlə zə n fə̀ŋ. Mə u fuu kɔʼlə n Kəzə̀ mə nə iduʼlə, Vən fə uwû fuŋ fə u bɔɔmə gaʼ kə fə̀ŋ n fə key Zə̀ kə â dza naŋa tə i ghəŋŋənu.

²⁷ N təŋkey wə i tûmmə naŋa way vən fə uwû fuŋ fə n naʼ zə ivə, Wə i bəghəm soʼo way nə vən i waa wə u dzuŋu wə i fway nə isay.

²⁸ Wə n dii mə n jìi zey n khə ni tsəghə tii ni keeli imuu. Wə ghəŋŋə nə̀ mə i duʼlə n təŋkey wə loʼ ghi mə nəŋə tədzəm.’”

²⁹ “Waazə ghə, n ndzəmə dza bənu tə ghaa nə̀ bày bày saa, fɔ̀ɔ Devid mâ kpu, ghə n tsəllə tsu wi, say i wi i nam loʼ kənu fa ghi saa ni bə kuum bə na.

³⁰ À kee loʼ nə tə â loʼ wù tûm Kəzə̀, tə khə nə̀ Zə̀ kə mâ təb naŋa ghəə ghə tə wi, zə̂ nkaa nə i naŋŋə waa waa Devid u loʼ wə, tə i saʼa dzɔbənə ghə̂ a wi ghə tə a loʼ Devid.

³¹ Fɔ̀ɔ Devid mâ koʼ nə̀ ghə i tii i khə ni bə shi, tə n dza zey bə nə wù wey Zə̀ kə â dza naŋa nə̀ i tûm bənu, i zhəm dzəŋŋənu nə ivə. Tə n dza soʼo nə̀, ‘Zə̀ kə i tûmmə naŋa dzə way vən i wi zə n naʼ zə ivə, Tə i bəghəm soʼo way nə vən i wi i fway nə isay.’

³² Zə̀ kə mâ ndzəm zhəm dzəŋŋə bə Yeso nə ivə, ghey ghən adzəm fa loʼ mâ koʼ ghə i tii zə.

³³ Zə̀ kən kə loʼnə Bày wi n kɔʼlə naŋa wi n kpii u wi u təmə wə, fuu wi n Zay kə Zow kə tə̀ tə â təb naŋanə. Ghəə ghən ghaa koʼonə fa nsə ghəə ghən ghaa zownə à loʼ Zay kə Zow kən Yeso fuu bənə tə ghey naʼ idzəm.

³⁴ Fɔ̀ɔ Devid a ka kɔʼ dzə idəŋ tə a loʼ Yeso, wû u wi, tə mâ kee dza nə̀, ‘Mûkəbii â dza tə Mûkəbii wuŋ nə̀, Doʼo bə fa n kpi wuŋ u təmə wə,

³⁵ Wə ləmə tsu tə n ney naŋa bə ghə̂ a təngəmə ghə, a doʼo bə fə kə kə̀ gaʼa kə aghow kə.’”

³⁶ “Sey, ghə̂ ghə Izree adzəm a khə ni teeli keeli tsu nə̀ Zə̀ kə n ndzəm kɔʼlə naŋa Yeso wən ghaa â baanə n zat kə fəkaʼ tə a loʼ Mûkəbii ə saa, tə a loʼ soʼo wù wey Zə̀ kə â dza naŋa nə̀ i tûm bənu.”

³⁷ Ambə ghə zow tsunə ghəə ghən, ghəə a tii ghə n ngii mɔm ghə n fə̀ŋ, ghə n bəb tə Pita nsə ngəd tə loʼ tey nə̀, “Waazə ghə, ghey i nya jiə tsu ngee?”

³⁸ Pita n dza tə ghə nə̀, “Kwey nuu bə na fə̀ŋ tə ghaa tə n ghəə a bəbə ghə, ghaa ney mmuu n Kəzə̀ n zəd i Yeso Klisto, tə Zə̀ kə neyzəə ghəə a ghaa a bəbə ghə. Sey, Zə̀ kə i fuu ghaa n naamə kə nə̀ a loʼ Zay kə Zow kə.

³⁹ Təb kən Zə̀ kə â təb naŋanə, loʼ tə ghaa nsə waa a ghaa ghə nsə tə ghə̂ ghən ghə lɔʼlə loʼnə, tɔŋŋə ghə̂ ghən adzəm Mûkəbii, Zə̀ kə saa, i tɔŋŋə bənə n səə wi.”

⁴⁰ Pita n tsə̀ ghə n ndəmə təghɔɔmə, buʼ ghə n wɔɔ kə nə̀, “Bəghəshi na wû i ghaa zə n mbi i bəbə zən.”

⁴¹ Ndəmə aghə̂ n bəghəm ghɔɔmə i wi, ney mmuu n Kəzə̀. Taŋ a ghə̂ ghey ghə â bəghəmnə tə Yeso n tsuʼ fə tii fə n loʼ tə a loʼ aghə̂ təkam tətəghə.

⁴² Ghə n fuu nyi ndow wû i ghə ni zoʼlə ghəə ghey ngəd tə Yeso tə diinə, təmə dzəŋi ghi ghə, gɔŋŋə, zəə dzəŋi soʼo baa K-a-zə̀ ghi ghə.

Muu i ghə̂ ghey ghə bəghəmnə tə Yeso

⁴³ Ngəd tə Yeso tə n ghəŋŋə ndəmə ghəə a faalə ghə nsə ghəə a zum ghə idzuu ghə, sey, aghə̂ adzəm ghə n khə tsəŋ i Kəzə̀ n fə̀ŋ tə ghə.

⁴⁴ Ghə̂ ghey adzəm ghə a bəghəm nə tə Yeso n loʼ n fə kəmɔ̀ʼ, ghə n dzəŋi dzawwə fə wey udzəm ghə̂ khənə n wû i ghə.

⁴⁵ Ghə n fiilə fə wey ghə â khənə, ney khəə u tii wə dzaw fu ndow tə ghə̂ ghey ghə laʼanə fə kə.

⁴⁶ Ghə n təmə dzəŋi tsuʼu n dzəm n ndaw Kəzə̀ i nii zə, ghə n bweyyə kaabə ndaw tə ndaw, zəə dzəŋi nə iduʼlə nsə n fə̀ŋ tə dzuŋu tə, zəə soʼo baa K-a-zə̀.

⁴⁷ Ghə n fuu nkɔʼlə tə Zə̀ kə, aghə̂ adzəm n ngii ləghə ghə. Tsuʼu n dzəm, Mûkəbii n bəghəshiə aghə̂, kuu kpiʼi kɔʼɔ ndow taŋ ə ghə̂ ghey ghə bəghəmnə tə wi.