Kəfwaʼ 16 - Kaa n Kəzə̀ n fəghə mə

Pɔl ghi Silas sày Timoti nə̀ tə dzûmə ghə

¹ Pɔl n ndow bə n Debe tsəghə ndow n naʼ i Listra. Dzûmə ə Klisto u loʼ wə ghə tɔŋŋə nə̀ a loʼ Timoti n loʼ fu n naʼ i Listra. Này wi a loʼ zən ə Juu tə a bəghəm nə tə Yeso, bày wi n kee loʼ wù Gris.

² Dzûmə tə Klisto tey n Listra nsə n Ikonum â ngii kali Timoti bòʼ mwam u wi.

³ Sey, Pɔl n ləghə nə̀ tə təmdzəŋi bə wi n bwey i ghə. Tə n daŋŋə səghə tsu tyi kə Timoti bòʼ nə ghə̂ a Təjuu ghey ghə â muunə fu, ghə â khənu nə bày wi way dzə wù Juu.

⁴ Nghee ghə bwey ndownə naʼa tə naʼa, ghə n fuu ndow laŋ wey ngəd tə Yeso nsə ghə̂ a nii ghey n Yerosalem saalənə tə ghə̂ ghey ghə bəghəm nə tə Yeso. Dza ndow soʼo tə ghə nə ghə i naŋŋə laŋ u tii wə.

⁵ Ghəə ghən n ghəŋə nə̀ dzəŋi u ghə̂ ghey ghə bəghəmnə tə Klisto, təmi taw n bəghəm i fə̀ŋ i ghə. Taŋa ghə n nyîmmə kɔʼɔ ndow soʼo tsuʼu n dzəm.

Zə̀ kə tɔŋɔ Pɔl nə ujim n Trowas

⁶ Ambə Zay kə Zow kə tuu tsu nə̀ ghə ka naʼa ghɔɔmə i Kəzə̀ zə n mboʼo Eshya, ghə n tsəghə daŋŋə ndow jii n mboʼo Frigya nsə n Galeshya.

⁷ Ambə ghə bənə n tii u Mishya, ghə n dəmə ni nyi ndow n naʼ i Bitinya, Zay kə Yeso kə n ka nam bəghəm soʼo nə ghə ndow fu.

⁸ Sey, ghə n tsəghə tɔɔlə ndow n Mishya tsu daŋŋə ndow n naʼ i Trowas.

⁹ Ambə n tsuʼu tə, Pɔl n koʼ ndow wù Masedonya tə teynə nə ujim, buʼu kəwɔɔ tə wi nə̀, “Bəghə n Masedonya, wə bə gaamə ghey.”

¹⁰ Ambə Pɔl koʼ tsu jim wən, ghey sey daŋŋə dzəŋi bəghəm kɔʼnu nə̀ Zə̀ kə n ghey tɔŋɔ nə̀ ghey ndow naʼa tûm i dzuŋu zə n Masedonya. Ghey n daŋŋə kuumə kɔʼ ufə ni ndow fu.

Nghee Lidia bəghəmnə tə Klisto tii n naʼ i Filipi

¹¹ Sey, ghey n nuu tsu n Trowas nə kəfən, teyyə ndow iwû n Samotras. Ambə tsətsə wey, ghey n daŋŋə nyi ndow n Nyapolis.

¹² Ghey n zəghə tsu fu, nuu ndow n naʼ i Filipi, zə â loʼnə n tənə naʼ i Roma. Filipi â loʼ naʼ i nii zə n mboʼo Masedonya. Ghey n doʼo kəŋə ndow ntsuʼu fu.

¹³ Ambə n tsuʼ inaʼ, ghey n nuu shi ndow inaʼ, ndow n nguŋ ə dzuu, khə kə nə̀ ghey i koʼonu luʼu kə gɔŋŋə kə ghə̂ a Təjuu ghə. Ghey n gaʼ doʼo tsu fu, zey ndow ni ghɔɔmə tə gheyzən ghey ghə â zuŋŋə doʼonə fu.

¹⁴ Weyzən u loʼ wə n loʼ fu ghə â tɔŋŋə nə̀ a loʼ Lidia, tə â shinə n naʼ i Taytira. Tə n fìilə tsə ndzə̂ tə wən i taw zə, ngɔɔmə soʼo Kəzə̀. Mûkəbii n chi kɔʼ fə̀ŋ ə wi nə̀ tə bəghəm ghɔɔmə i Pɔl.

¹⁵ Ambə tə ney kɔʼnə mmuu n Kəzə̀ mə ghi ghə ghey n ndaw wi adzəm, tə n dza tə ghey nə̀, “Abə ghaa koʼnə nə̀ n loʼ wù wey n ndzəm bəghəmnə tə Mûkəbii, ghaa n bə muu bə fa n ndaw zuŋ.” Tə n ghəŋŋə kə sey, kɔŋŋə nuu ndow ghey.

Ghə fìi naŋa Pɔl ghi Silas n ndaw tsaʼ

¹⁶ Ambə n tsuʼ fə loʼ fə ghey ndownə n luʼu kə gɔŋŋə kə, ghey n kpi tsu ghi waa u zən u loʼ wə tə â loʼnə kɔd kə, zay kə bəbə kə loʼ soʼo n kow wi. Zay kə bəbə kən n ghəŋŋə nə̀ tə i dza nyaʼ fə. Tə n fwaʼa tsə ndəmə ukhəə tə ghə mûkəbii a wi ghə n nyaʼ fən tə dzanə.

¹⁷ Waa u zən wən n dzûmə kaabə tsə ghey ghi Pɔl, bwey naʼlə bə n dzə̂ i taw zə nə̀, “Ghə̂ ghən loʼ ghə̂ a kəfwaʼ a Zə̀ kə idəŋ kə. Ghə naʼlə bə tə ghaa jìi zey ghaa i keelinə bəghəshi zə tii.”

¹⁸ Waa u zən wən n ghəŋə kəŋə ndow ghəə ghə n ndəmə ntsuʼu. Ghə zən n zey ni fəmmə Pɔl, tə khə̂mə dza ndow tə̀ zay kə bəbə key nə̀, “N zəd i Yeso Klisto, n dza nə̀ wə shi n kow wi!” Zay kə tii kə daŋŋə nuu shi bə n kow wi.

¹⁹ Nghee ghə̂ ghey kɔd kən kə â fwaʼanə n tənə ghə koʼ tsunə nə̀ ghə n guŋu jìi zey ghə a keeli tsənə khəə wə tii, ghə n kwu tsu Pɔl nsə Silas, sìi ndow ghə n səə ghə̂ a nii ghə n zeeli kə inaʼ, nə̀ ghə saʼ ghə.

²⁰ Ambə ghə ndow bə n səə ghə̂ a saʼa a təsaʼ ghə n naʼ i Roma, ghə n dza tə ghə nə̀, “Ghə̂ ghən loʼ ghə̂ a Təjuu, à loʼ soʼo ghə, ghə sòʼò kaabənə chɔd wə fa inaʼ.

²¹ Ghə dii ghəə ghə inaʼ a loʼ ghə nə̀ ghey ghə̂ a Roma a way ni bəghəm naŋa.”

²² Nɔɔ kə aghə̂ key n kuu dzəŋi ndow dzuu a ghə n ghəə zey ghə â kwɔɔnə Pɔl ghi Silas tii. Ghə̂ a saʼa a təsaʼ ghə n dza nə̀ sawgoʼ tə tsɔʼ nuu kɔʼ ndzə̂ tə Pɔl nsə Silas, ghə vəələ ghə nə təkwɔ̀ɔ.

²³ Ambə ghə bwɔd dzɔb tsunə ghə, ghə n ney fii naŋa ndow ghə n ndaw tsaʼ, dza ndow tə̀ wù wey tə laalənə ghə̂ a ndaw tsaʼ ghə nə̀ tə tɔʼ naŋa tsu isə n kow ghə.

²⁴ Nghee tə wù wey tə laalənə ghə̂ a ndaw tsaʼ ghə zow tsunə ghəə ghey ghə dzanə, tə n ney naŋa nay nyi ndow ghə n dzuu i ndaw i fə̀ŋ zə, kùm naŋa tsu fuu i ghə nə tətsaʼ.

²⁵ Ambə n fə̀ŋ ə tsuʼu tə, Pɔl ghi Silas n gɔŋŋə, zhim aghəə tə̀ Zə̀ kə. Ghə̂ a ndaw tsaʼ a loʼ ghey n maŋa zəllə.

²⁶ Sey, ghəlitsə kə vuŋŋə kaʼ ni ngii noʼlə. Tsə kə ndaw kə ndaw tsaʼ kə tii kə kədzəm kə n noʼlə tsəghə ndow. Fuʼu n təndaw ndzəm mə n chi kɔʼ, tsaʼ tey ghə â kùm naŋanə ghə̂ a ndaw tsaʼ ghə tii n tiilə tsu tədzəm.

²⁷ Ambə wù wey tə laalənə ndaw tsaʼ zhəm kɔʼnə, koʼ ndow nə̀ fuʼu n təndaw n ndaw tsaʼ n loʼ təghə, tə n sɔŋ shi bə kɔb ə wi ni wey wû u wi, moʼlə kə nə̀ ghə̂ a ndaw tsaʼ ghey n tyi shi may.

²⁸ Pɔl n kee kii kəbɔŋ dza nə̀, “Kə̂ wə nə̂ nyîmmənə wû wə wə̀! Ghey loʼ maynu fa!”

²⁹ Ambə wù wey tə laalənə ndaw tsaʼ zow tsunə sey, tə n dza nə̀ ghə fu bə wi n daa kə, daŋŋə nyəŋ nyi ndow n wû u tsəŋŋə wə, ndow tyi bwu ndow n tənə Pɔl ghi Silas.

³⁰ Tə n ney shi bə ghə dza tə̀ ghə nə̀, “Ghə mûkəbii ghuŋ ghə, n loʼ ni ji ngee ni keeli ibəghəshi ə?”

³¹ Ghə n beeli ndow wi, dza nə̀, “Wə khə ni bəghəm tə̀ Mûkəbii Yeso, sey wə i keeli ibəghəshi ghi ghə̂ ghey n ndaw zə adzəm.”

³² Sey, ghə n tsəghə ndow n sə kə ni naʼa ndow tûm ə Mûkəbii tə wi nsə ghə̂ ghey n ndaw wi adzəm.

³³ Wù wey tə â laalənə ndaw tsaʼ zən n ney kɔʼ ghə n tsuʼu tə wey, ndow sow maʼa tsu fəŋ a ghə. Wi ghi ghə̂ a ndaw wi ghə adzəm n daŋŋə ney kɔʼ mmuu n Kəzə̀.

³⁴ Ambə ghə ney kɔʼnə mmuu n Kəzə̀ mə, tə n ney bə ghə n ndaw wi, fu ghə n fəzəə wə. Wi ghi ghə̂ ghey n ndaw wi n ngii duʼlə boʼnə ghə nya bəghəm tə̀ Zə̀ kə.

³⁵ Ambə tsuʼ u zow tsunə, ghə̂ a saʼa a təsaʼ ghey n tûm ndow təbwoli nə̀ ghə ndow dza tə̀ wù wey tə laalənə ndaw tsaʼ nə̀, “Zəghə maʼa ghə̂ ghey, ghə nuu.”

³⁶ Wù tii n dza ndow ghəə a tii ghə tə̀ Pɔl dza, “Ghə̂ a saʼa a təsaʼ a tûm bə tûm nə̀ n chi zəghə wɔ ghi Silas. Ghaa ndow kə kədzuŋ.”

³⁷ Pɔl n fəd dza ndòw tə̀ wi nə̀, “Ghə n ghey bwɔd n sə̂ kə aghə̂ nə̀ ghə ka ghey saʼ, loʼ sey nə̀ ghey mgbaŋ loʼ ghə̂ a Roma. Ghə u ney fii naŋa ndownə ghey n ndaw tsaʼ. Ghə u dzanə nya nə̀ ghə tsɔŋ chi zəghə ghey. Ngaŋ! Ghey shiə way, ndow dza ndow na tə̀ ghə nə̀ ghə bə n wû i ghə zə, ghə bə chi zəghə ghey.”

³⁸ Bwoli tə tii tə n ndòw dza ndow ghəə ghən tə̀ ghə̂ a saʼa a təsaʼ ghə. Nghee ghə zow tsunə nə̀ Pɔl ghi Silas loʼ ghə̂ a Roma, ghə n zey ndow ni tsəŋ.

³⁹ Sey, ghə n ndow dza tə ghə nə̀ ghə neyzəə ghə, ney nuu shi bə ghə fu n ndaw tsaʼ. Ghə n daŋŋə buʼ kəwɔɔ tə̀ ghə nə̀ ghə nuu shi ndow n naʼ i ghə.

⁴⁰ Ambə Pɔl ghi Silas nuu shi tsunə n ndaw tsaʼ, ghə n ndow n ndaw Lidia. Ghə n ndow koʼ ndow dzûmə tə Klisto fu, kuu fə̀ŋ tə ghə, daŋŋə zəghə tsu naʼ i tii zə.