Kəfwaʼ 13 - Kaa n Kəzə̀ n fəghə mə

Ghə sày kɔʼ Banabas ghi Sɔl, tûm shi ndow ghə

¹ N fəŋŋə kə dzûmə tə Klisto tey tə â loʼnə n Antyɔk, ghə̂ a tətûm a Kəzə̀ nsə ghə̂ a dii ghə n loʼ tii. Ghə â loʼ Banabas, Shimiɔŋ ghə a tɔŋŋə nə̀ a loʼ wù ləŋə, Lusiɔs wù Sirin, Manen tə â nyim shi kɔʼ bənə n wɔɔ kə Herɔd tə a loʼnə gɔvənɔ nsə Sɔl.

² Nghee ghə ngɔɔmənə Mûkəbii, bam idzuu, Zay kə Zow kə n dza tə ghə nə̀, “Sày naŋa kɔʼ n na Banabas nsə Sɔl tə mə, nə̀ ghə i fwaʼa fwaʼ kən n tɔŋɔnə ghə tii nə ghə bə fwa.”

³ Ambə ghə bam may tsunə dzuu zə, gɔŋŋə may tsu soʼo, ghə n gaʼ ndow awɔɔ n tow u ghə, tûm nuu shi ndow ghə.

Banabas ghi Sɔl naʼlə tûm i dzuŋu zə n Sayprus

⁴ Zay kə Zow kə n tûm tsu ndow Banabas ghi Sɔl n Selushya. Ghə n nyi kɔʼ nə kəfən fu n nguŋ ə nali kə dzùu kə Selushya, nuu ndow n naʼ zey dzuu dzəŋŋə naŋa kɔʼnə n fə̀ŋ, ghə tɔŋŋə nə̀ a loʼ Sayprus.

⁵ Ambə ghə bə kuum tsunə n Salamis, ghə n naʼlə tûm Kəzə̀ n ndaw tə udzəŋi tə ghə̂ a Təjuu. Jɔn Mak n loʼ ghi ghə ni gaamə ghə n fwaʼ kə ghə.

⁶ Ghə n bwey tsəghə ndow mbuʼ zey dzuu dzəŋŋə naŋa kɔʼnə idzəm, bə kuum bə n naʼ i Pafos. Ghə n kpiilə bə fu ghi wù loʼ tə â ghəŋŋənə ghəə a fənnə ghə, ghə â tɔŋŋə nə̀ a loʼ Ba-Yeso, ghi wù Juu u loʼ wə tə â ghaŋŋənə wû wə nə̀ i loʼ wù tûm Kəzə̀.

⁷ Tə n loʼ wù kəfwaʼ tə gɔvənɔ wey fu inaʼ ghə â tɔŋŋə nə̀ a loʼ Sejus Pɔlus. Gɔvənɔ wən n khə utɔb, sey, tə n tûm tɔŋɔ bə Banabas ghi Sɔl n təŋkey tə â ləghə ni zow tûm Kəzə̀.

⁸ Wù fənnə wən ghə â tɔŋŋə n ghɔɔmə i Grik nə a loʼ Elimas n kee khə̂mə ghə, ləghə soʼo ni təʼlə maʼa nə̀ kə gɔvənɔ wən nə bəghəm tûm Kəzə̀ zən.

⁹ Zay kə Zow kə n loʼ n kow Sɔl wən ghə â tɔŋɔ soʼonə nə a loʼ Pɔl naʼ idzəm. Tə n sɔʼ laalə ndow Elimas dza tə wi nə̀,

¹⁰ “Waa avəətsəə wən! Wə loʼ wù təngəmmə tə ghəə ghən a loʼnə tsətsəghə adzəm. Wə khə jii tə tsɔŋɔ tə tədzəm ni ghəŋŋə ghəə a bəbə ghə. Wə dəmə tənə tsə kə ni bwɔd fəd bə isəŋə zən i loʼnə bòʼ Mûkəbii n ghəə a badla ghə.

¹¹ Wə n ghəŋŋə, Zə̀ kə n fəələ nəghə wə ghi wɔ, wə i fəbə doʼlə kəŋŋə ndownu n tsuʼu n loʼ mə, wə i way ni buʼ koʼ luʼu tə zow tə.” Nghee tə dza tsunə sey, kədzəd nsə ləm kə n daŋŋə bwu bə n sə̂ a Elimas. Tə n zey ni laʼ mɔmmə kaabə tsə ufə n wɔɔ, kəŋə wù tə loʼ ni tali ndow wi.

¹² Ambə gɔvənɔ wən koʼ tsu ghəə ghən a shinə, tə n daŋŋə doʼo bə dzûmə ə Klisto. Dzuu zə zum wi n ghəə ghən tə â diinə bòʼ Mûkəbii.

Banabas ghi Pɔl ndow n Antyɔk n mboʼo Pisidya

¹³ Pɔl nsə ghə̂ ghey tə â loʼ dzəŋinə ghi ghə n zəghə tsu Pafos, nyi kɔʼ nə kəfən, daŋ shi ndow n naʼ i Pega n mboʼo Pamfilya. À loʼ fu Jɔn Mak a zəghə tsunə ghə, nuu dzəŋŋə ndow n Yerosalem.

¹⁴ Ghə n kee zəghə tsu Pega, nyi ndow n naʼ i Antyɔk, zə a loʼnə n mboʼo Pisidya. Ambə n tsuʼ inaʼ, ghə n nyi ndow doʼo tsu n ndaw kədzəŋi ə ghə̂ Təjuu.

¹⁵ Nghee ghə n tɔŋɔ may kɔʼnə laŋ u Mushi wə nsə ghəə ghey ghə̂ a tûm tə Kəzə̀ tə â tɔ̀ɔ naŋanə, ghə̂ a nii ghey n ndaw kədzəŋi ə ghə̂ a Təjuu n tûm ndow wù nə̀ tə dza ndow tə ghə nə̀, “Waazə ghə, abə ghaa kpaʼi khənə ghɔɔmə zə ni təm tawwə bə aghə̂ tii, ghaa n ndow n sə kə.”

¹⁶ Pɔl n nuu təmi kɔʼ, foʼ tsu kəwɔɔ nə̀ ghə doʼo tsu mɔŋ. Tə n ghɔɔmə ndow tə ghə nə̀, “Ghə̂ ghə Izree ghə nsə ghaa ghə̂ tətùm ghən ghaa ngɔɔmənə Zə̀ kə, ghaa zow!

¹⁷ Zə̀ kə ghə̂ ghə Izree kə â sày kɔʼ ghə bày bày a saa, ghəŋŋə nə̀ ghə zaamə n tsuʼu mey ghə â muunə n naʼ zə Ijip. Tə n ney nuu shi bə ghə n naʼ i tii zə n daʼa kə wi.

¹⁸ Zə̀ kə n kow kɔʼ bə fə̀ŋ ghi ghə n mwam wən ghə â khənə nə tənum nghəm nkaykə nghee ghə â loʼnə n mbvən ə ntsaŋ.

¹⁹ Zə̀ kə n ghəŋə nə̀ ghə sàʼ maʼa tsu tənaʼa tə səghəmbəghə n mboʼo Kanan, ney fu tsu ghəlitsə kə tii kə tə ghə̂ a wi ghə tɔŋɔ ghə̂ ghə Izree nə ghə keeli tə aloʼ luʼu kən Zə̀ kə â təb naŋanə tə ghə.

²⁰ Ghəə ghən â ney tənum nbɔm nkaykə nsə ghəm mə ntaa ni bə shi. Ambə ghəə i tii i tsəghə tsu nə̀, Zə̀ kə n fu ndow ghə n ghə̂ ghə ni laalə naʼ i tii zə ni ndow kuum n tsuʼu n Samwel wən tə a loʼnə wù tûm Kəzə̀.

²¹ Ghə n daŋŋə bəb ndow fɔ̀ɔ, Zə̀ kə n fu ndow ghə n Sɔl waa Kish tə â shinə n tyi kə Benjamin. Sɔl â saʼ kəŋə ndow naʼ zə Izree nə tənum nghəm nkaykə.

²² Ambə Zə̀ kə ney nuu kɔʼnə Sɔl tə a loʼ kədə̀ŋ, tə n ghəŋŋə nə̀ ghə tsuʼ naŋa kɔʼ Devid tə a loʼ də̀ŋ kə ghə. Zə̀ kə n ghɔɔmə ghəə a Devid dzanə, ‘Mə n koʼ nə̀ Devid, waa Jese loʼ ndzoʼo wù wən n gaʼnə fə̀ŋ n kow wi, tə i loʼnu ni fwaʼ ghəə ghən adzəm n ləghənə ni fwaʼ.’

²³ À loʼ n tyi kə Devid wən Zə̀ kə â fuu bənə Yeso nə̀ tə bə doʼo bəghəshi tə ghə̂ Izree ghə nghee tə̀ â təb naŋanə.

²⁴ Tə̀ Yeso ni kaʼ fwaʼ kə wi, à n loʼ nə̀ Jɔn wù fuu u mmuu n Kəzə̀ mə n bə naʼa tsəghə tə ghə̂ ghə Izree ghə nə ghə kwey nuu bə fə̀ŋ tə ghə n ghəə a bəbə ghə, ghə ney mmuu n Kəzə̀.

²⁵ Ambə Jɔn dza i bə mayyə fwaʼ kə wi, tə n bəb ndow tə ghə̂ ghə nə̀, ‘Ghaa moʼlə nə̀ n loʼ ndee? N way dzə wù wən ghaa ləmmənə. Wù tii kee nam bəghənu, n ka buʼ kɔʼ kpii dzə ni zii baʼ u təgow u wi.’

²⁶ Waazə ghə, tɔŋɔ ghaa ghən ghaa loʼ waa a waa ghə Abraham ghə, nsə ghaa ghən ghaa way ghə̂ a Təjuu ghə, ghaa ngɔɔmə soʼonə Zə̀ kə, à loʼ tə saa Zə̀ kə ghəŋŋənə nə̀ tûm zən bòʼ jìi zey Zə̀ kə bəghəshiənə ghə̂ ghə, i bə.

²⁷ Ghə̂ ghən ghə â muunə n Yerosalem nsə ghə̂ ghey ghə laalənə ghə, ghə â ka koʼ keeli dzə nə̀ Yeso loʼ wù wən Zə̀ kə â dza naŋa nə̀ i tûm bənu, ghə n zowkeeli soʼo way ghɔɔmə i tûm tə Kəzə̀ tən ghə â mgbaŋa tɔŋɔ dza tsənə tə̀ ghə n tsuʼu mə inaʼ n dzəm. Ghə n fəd luulə ghəə ghən tûm tə Kəzə̀ tə â tɔ̀ɔ naŋanə nghee ghə â wey tsu Yeso.

²⁸ Ghə̂ a Təjuu ghən â ka koʼ dzə ghə i bəbə i loʼ zə Yeso a ghəŋŋənə ni dza nə̀ ghə wey wi. Ghə n nam tsəghə ndow kə n sə kə ni dza nə̀ Pilato ghəŋə nə̀ ghə wey wi.

²⁹ Ambə ghə ghəŋŋə may tsunə ghəə ghən màʼlə K-a-zə̀ kə dzanə adzəm bòʼ Yeso, ghə n ney tsu bə vən i wi n zat kə fəkaʼ, ndow tsəllə ndow wi n nyə̀ŋ isay ghə kpeyyə nyi ndownə nə̀ kənaa.

³⁰ Zə̀ kə n kee ghəŋŋə nə̀ tə zhəm dzəŋŋə bə nə ivə.

³¹ Ambə Zə̀ kə ghəŋŋə nə̀ tə zhəm dzəŋŋə bə nə ivə, tə n ghəŋə nə̀ ghə̂ ghey ghə â bwey dzəŋinə ghi wi nghee tə a nuu tsunə n Galili ni ndow n Yerosalem nə ghə koʼ wi n ndəmə tənəŋə. À nya loʼ ghə, ghə təmi tiilənə bòʼ wi tə ghə̂ ghə Izree ghə.

³² Ghey nya fa bə ni naʼa bə tûm i dzuŋu zə tə ghaa bòʼ təb kən Zə̀ kə â təb naŋanə tə ghə bày bày a saa ghə.

³³ Tə n luulə təb kə tii kə tə saa ghən saa loʼnə waa a waa a ghə ghə nghee tə zhəm dzəŋŋə bənə Yeso nə ivə. I tɔ̀ɔ doʼo n maʼlə kə təndzaŋa nə ukə̀m ubəghə nə̀, ‘Wə loʼ waa wuŋ, ni ney nuu tsu na, n nya loʼ bày wə.’

³⁴ Zə̀ kə â zhəm dzəŋŋə bə Yeso nə̀ ivə nə̀ kə tə nə̀ fway naynə nə isay, tə̀ tə â dza naŋanə nə̀, ‘Mə i teeli buulənu ghaa n buulə i zow zey mə â təb naŋanə tə̀ bày bày ghaa fɔ̀ɔ Devid.’

³⁵ I tɔ̀ɔ doʼo soʼo n maʼlə kə təndzaŋa nə̀, ‘Wə i bəghəm dzə way nə̀ vən i wù kəfwaʼ wə u zow wə, i fway nay nə isay.’

³⁶ Ghɔɔmə zən way dzə bòʼ fɔ̀ɔ Devid, n təŋkey, fɔ̀ɔ Devid mâ fwaʼ fwàʼ key Zə̀ kə a ləghə nə̀ tə fwaʼ n num tə wi. Ambə tə bə kpu tsunə, ghə tsəllə ndow wi ghi ghə bày a wi ghə, vən i wi i mâ fway nə isay.

³⁷ À kee way dzə ighələ ghi Yeso, n təŋkey, Zə̀ kə a zhəm dzəŋŋə bə wi nə ivə nə tə ka fway dzə nə isay.

³⁸ Waazə ghuŋ ghə, n ləghə nə̀ ghaa keeli tsu nə̀, tûm zey ghey naʼlə bənə tə ghaa loʼ nə̀ aloʼ n bam i Yeso Zə̀ kə neyzəənə bəb zey ghaa ghəŋŋənə.

³⁹ Sey, ghə̂ ghey adzəm ghə bəghəmnə tə wi, ghə i doʼlənu tsətsəghə n sə K-a-zə̀, loʼ sey nə̀ ghə â way ni doʼo tsətsəghə n sə kə K-a-zə̀ a dza ghə naŋŋə laŋ kə Mushi.

⁴⁰ Ney na ghə̂mə zə nə̀ kə ghəə ghən ghə̂ a tûm tə Kəzə̀ tə â naʼanə nə doʼlənə isəŋə n kôw ghaa. Ghə â naʼa naŋa nə̀,

⁴¹ ‘Koʼo na, ghaa ghən ghaa kii maʼanə Zə̀ kə, dzuu zə i zum ghaa, ghaa i kpuu kə n lə̀ŋ kə tii kə! Kuum nə̀, mə i ghəŋŋə ghə i loʼ zə n tsuʼu n ghaa, Ighəə nə ghaa nə way ni bəghəm koʼ tsə, Abə wù buʼ tiilə kənə ghə i tii zə tə ghaa, ghaa i kəŋ kii tən kətow tii.’”

⁴² Nghee Pɔl nsə Banabas zəghə tsunə ndaw kədzəŋi ə ghə̂ a Təjuu, nuu ndow, ghə̂ ghə n buʼ kəwɔɔ tə ghə nə̀ ghə i kəm bə kpiʼi n tsuʼ inaʼ wən u kəŋŋə bə nə tə ghə bə dza kpiʼi bə ghə n ghəə a Kəzə̀ ghə.

⁴³ Ambə ghə sali tsunə n ndaw kədzəŋi, ndəm ə ghə̂ a Təjuu nsə ghə̂ ghən ghə way ghə̂ a Təjuu ghə, ghə ngɔɔmənə Zə̀ kə Təjuu kə n dzûmə ndow Pɔl nsə Banabas. Pɔl nsə Banabas n kuu fə̀ŋ tə ghə nə ghə təmi taw tsu n ndzuŋ ə Kəzə̀ zən ghə keeli kɔʼnə.

⁴⁴ Ambə tsuʼ inaʼ u loʼ wey bənə, ghə̂ ghə n loʼ tə ghə i shi may bə inaʼ ni bə n ndaw kədzəŋi ni bə zow ghɔɔmə i Kəzə̀.

⁴⁵ Ambə tow wə inaʼ u ghə̂ a Təjuu ghey koʼ tsunə nɔɔ kə aghə̂ kən, ghə n kaʼ ni ghoʼ, khə̂mə ghəə ghən Pɔl dzanə, kpaalə soʼo wi.

⁴⁶ Pɔl nsə Banabas n ka tsəm tsəŋ ni dza tə ghə nə̀, “Zə â ndzəm kpiinu nə ghey naʼa dzə ghɔɔmə i Kəzə̀ tə ghaa. Nya wən ghaa tuu maʼanə ghɔɔmə i tii zə, dza nə̀ ghaa ka kɔʼ kpii dzə ni keeli muu zə itsali, ghey naʼlə ndow kə tə ghə̂ ghey ghə way ghə̂ a Təjuu ghə.

⁴⁷ Kuum nə̀ a laŋ key Mûkəbii â fuunə tə ghey loʼ nə̀, ‘Mə n ghəŋŋə nə̀ ghaa doʼo kədaa tə̀ ghə̂ ghən ghə way ghə̂ a Təjuu ghə, Sey nə̀, ghaa loʼ ni ghəŋŋə nə̀ Zə̀ kə bəghəshi mbi idzəm.’”

⁴⁸ Ambə ghə̂ ghey ghə way ghə̂ a Təjuu a zow tsunə ghəə ghən, ghə n duʼlə, fuu soʼo ukali n ghɔɔmə i Mûkəbii zən. Sey, ghə̂ ghən Zə̀ kə â sàynə nə̀ ghə zə̂ itsali, ghə n keeli kɔʼ bəghəm i fə̀ŋ.

⁴⁹ Ghɔɔmə i Mûkəbii zə n zaamə tsəghə ndow fu n mboʼo tii idzəm.

⁵⁰ Ngəd tə Təjuu tə n fədlə kuu tənyɔʼ n kow gheyzən a səŋi ghə nsə gheynum a nii ghey ghə ngɔɔmənə Zə̀ kə fu inaʼ nə ghə nuu təmi kɔʼ n tow kə Pɔl nsə Banabas. Ghə n zey ndow ni chɔd Pɔl nsə Banabas, dzum shi daŋŋə ndow ghə fu n mboʼo tii.

⁵¹ Sey, Pɔl nsə Banabas n buʼ maʼa shi tsu kəvə n fuu i ghə tə a loʼ tsəə ni dii tsu nə̀ Zə̀ kə fəələ n fə̀ŋ ghi ghə. Ghə n daŋŋə nuu ndow i ghə zə nə Ikonum.

⁵² Dzûmə tey n Antyɔk n ngii khə iduʼlə, Zay kə Zow kə n loʼ soʼo ghi ghə.