Kəfwaʼ 12 - Kaa n Kəzə̀ n fəghə mə

Ghə wey Jems, kwu fii naŋa soʼo Pita n ndaw tsaʼ

¹ Herɔd wən tə â loʼnə də̀ŋ kə n zey ndow ni chɔd ghə̂ a dzəŋi kə dzûmə tə Klisto a loʼ ghə n tsuʼu mey Banabas ghi Sɔl â diinə ghə̂ ghə n Antyɔk.

² Tə n dza nə̀ ghə wey tsu Jems waazə ə Jɔn, sawgoʼ tə n wey tsu wi n kɔb.

³ Ambə tə koʼ tsunə nə̀ ghə̂ a Təjuu a duʼlənu n ghə i tii zə, tə n tsəghə ndow n sə kə, kwu kɔʼ soʼo Pita. Ghəə ghən â ney kəbənə n tsuʼu mey ghə zə̂ənə baa key ghə kuu way mbvuŋ tii.

⁴ Ambə tə kwu kɔʼnə Pita, tə n fii naŋa nyi ndow wi n ndaw tsaʼ. Tə n fuu naŋa ndow saʼ u təsawgoʼ ukaykə, nə kəsaʼ kəmɔʼ kə khə təsawgoʼ təkaykə nə ghə i keyyə wi. Herɔd â khə nə̀ abə Zə̂ kə taa zaʼa kə tsəghə tsunə, tə i naŋa shi bə wi n sə kə aghə̂ tə saʼ wi.

⁵ Nghee Pita loʼnə n ndaw tsaʼ, dzûmə tə Klisto tə n kee loʼ kə ni gɔŋŋə tə Zə̀ kə n tow kə wi.

Tsəndəghə ə Kəzə̀ bəghəshi Pita n ndaw tsaʼ

⁶ Ambə n tsuʼu tey Herɔd â khə ni bəd saʼ Pita tii, Pita n nyə̀ŋ n fəŋŋə kə təsawgoʼ təbəghə, nə̀ ghə n wi kùm naŋa nə tətsaʼ təbəghə. Sawgoʼ tə loʼ tə n tey n fuʼ u ndaw tsaʼ tə keyyənə.

⁷ Tsəndəghə ə Mûkəbii n gbələ bən shi kɔʼ n sə kə Pita, tsə i loʼ zə n bàŋ tsəghə bə fu tii n ndaw tsaʼ. Tsəndəghə zey n noʼlə tsu Pita n mboʼ, zhəm nuu kɔʼ wi, dza tə wi nə̀, “Zaŋŋə nuu kɔʼ!” Sey, tsaʼ tey n daŋŋə tsɔʼi nuu shi tsu n wɔɔ a wi.

⁸ Tsəndəghə zey n dza tə Pita nə̀, “Dzəŋə kɔʼ ndzə tə tə̀, wə dzəŋə kɔʼ gow tə.” Tə n ghəŋŋə soʼo sey. Tsəndəghə zey n nam dza kpiʼi ndow tə wi nə̀, “Wab kɔʼ saŋ zə, wə dzûmə bə mə.”

⁹ Pita n dzûmə ndow wi, shi nuu bə n ndaw tsaʼ. Tə n khə way nə̀ ghəə zey tsəndəghə zey ghəŋŋənə ndzəmə neynu bənə kə, kee moʼlə kə nə̀ à maŋ loʼ ujim tə koʼonə.

¹⁰ Ghə n tsəghə kɔʼ luʼu kə keyyə kə sə isə kə, bə tsəghə kɔʼ kə loʼ key, ndow bə n fuʼ u mbàa wey ghə faalənə nə uvuʼ u shiə ndownə n fə̀ŋ inaʼ, fuʼ u mbàa u tii wə n chi tsu n nəŋə ghii wə, ghə n nuu ndow, bwey shiə tsu ndow n jii. Ghab kə n ka shi, tsəndəghə zey n zəghə tsu Pita, nuu i ndow.

¹¹ Tɔb u Pita wə n daŋŋə fən nyi dzəŋŋə bə, tə n dza nə̀, “Mə n ndzəm keeli nya nə a loʼ isəŋə nə̀ Mûkəbii â tûm bə tsəndəghə ə wi nə̀ tə bə bəghəshi mə n wɔɔ kə Herɔd, tə bəghəshi soʼo mə n wɔ ghəə ghən adzəm ghə̂ Təjuu ghə â bayyə naŋa ni ghəŋə n kow mə.”

¹² Nghee ghəə ghən nyi bənə n tow kə wi, tə n nuu ndow n ndaw Maria, này Jɔn wən ghə â tɔŋŋə soʼonə wi nə̀ a loʼ Mak. À n loʼnə ndəmə aghə̂ n zuŋŋə doʼo fu ghə gɔŋŋənə.

¹³ Pita n buʼ tsu fuʼ u mbàa, waa u zən u loʼ wə tə â fwaʼanə fu tii ghə â tɔŋŋənə nə a loʼ Roda n ndow bə ni bə chi tsu kəbaʼ.

¹⁴ Ambə tə zowkeeli tsunə dzə̀ ə Pita, tə n ka chi kəbaʼ, fəd nuu nyəŋ dzəŋŋə ndow n duʼlə zə ni ndow naʼa nə̀ Pita tey a bii.

¹⁵ Ghə n dza tə wi nə̀, “Wə zəghənu ə?” Ambə tə nam mgbay kənu nə a loʼ isəŋə, ghə n dza nə̀, “À loʼ ni loʼ tsəndəghə ə wi.”

¹⁶ Pita n buʼu kuulə kə kəbaʼ, sey, ghə n chi i tsu. Ambə ghə koʼ ndow nə̀ a loʼ wi, dzuu zə n ngii zum ghə.

¹⁷ Tə n foʼlə tsu nə awɔɔ nə ghə doʼo tsu mɔŋ. Sey, tə n tiilə dza ndow tə ghə nghee Mûkəbii ney nuu shi bənə wi tii n ndaw tsaʼ. Tə n dza tə ghə nə̀, “Dza nduŋŋə ndow na ghəə ghən tə Jems nsə dzûmə tə Klisto tə loʼ tey tədzəm.” Nghee tə dza tsunə sey tə n daŋŋə nuu ndow soʼo n luʼu kə nuu kə.

¹⁸ Nghee tə tsuʼ u zow bə nə̀, luʼu tə n nuu num tsu n kow sawgoʼ tey, ghə sə məʼlənə luʼu key Pita ndownə tii.

¹⁹ Herɔd n tsəʼlə tsu kəlaŋ nə ghə kəŋ bə Pita. Ghə n kee kəŋ kii tsu wi. Herɔd n saʼ sawgoʼ tey tə â keyyənə Pita, daŋŋə fuu ndow kəlaŋ nə̀ ghə wey ghə. Ambə ghə wey tsunə ghə. Herɔd n zəghə tsu Judeya, ndow dzə doʼo kəŋə ndow n Kayserya.

Və i Herɔd

²⁰ Herɔd â ngii fəələ unəghə n kow ghə̂ a Tayra ghə nsə ghə̂ a Sidɔn ghə. Ghə̂ a Tayra nsə ghə̂ a Sidɔn ghə n təmdzəŋi kɔʼ ni ndow koʼ wi. Ghə n bùʼ koʼ tsu dzə wù wey tə a laalənə tɔʼ ə Herɔd, ghə â tɔŋŋənə wi nə̀ à loʼ Blastus, nə̀ tə gaamə ghə, ghə koʼ ndow Herɔd. Ghə n ndow koʼ ndow Herɔd, buʼ wi wɔɔ kə nə ghə i dzəŋi muu nə ibuulə, n təŋkey, naʼ i ghə zə â keeli ufəzəə nə u nuu bə n naʼ i Herɔd.

²¹ N tsuʼ fey ghə â say naŋa kɔʼnə, Herɔd n lab kɔʼ uwû n ndzə tə ufɔɔ, kɔʼ doʼo kɔʼ n kuu kə fɔ̀ɔ kə wi, fuu ndow ighɔɔmə tə ghə̂ a tii ghə.

²² Ambə ghə zow tsu ghɔɔmə i wi zə, ghə buʼlə nbɔŋ, fuu ukali, dza nə̀, “À wən loʼ Kəzə̀ kə ghɔɔmənə, a maŋ way dzə wù sɔŋtsuʼ.”

²³ N nəŋŋə i tii zə kə, tsəndəghə ə Mûkəbii n təm Herɔd n dzaŋ zə, n təŋkey, tə â ka fuu kɔʼlə n tii mə tə Zə̀ kə. Ghaŋighaŋi wə n fə kə wi sa, tə n bə kpu i tsu.

²⁴ Taŋ a ghə̂ ghey ghə â bəghəmnə ghɔɔmə i Kəzə̀ zə n kee nyîmmə kɔʼɔ ndow, ghɔɔmə i Kəzə̀ zə n zaamə ndow soʼo nghee tə ghə â naʼlə nduŋŋə ndownə.

²⁵ Ambə Banabas nsə Sɔl mayyə kɔʼ fwaʼ kə ghə kə n Yerosalem, ghə n ney kɔʼ Jɔn wən ghə a tɔŋŋə nə̀ a loʼ Mak, nuu ndow ghi wi.