Kəfwaʼ 11 - Kaa n Kəzə̀ n fəghə mə

Pita tiilə dza ghəə zey zə â shinə

¹ Ngəd tə Yeso, nsə dzûmə tə Klisto tə loʼ tən tə a loʼ kaabənə n Judeya, n zow tsu nə̀ ghə̂ ghən ghə way ghə̂ a Təjuu ghə n bəghəm soʼo ghɔɔmə i Kəzə̀ zə.

² Ambə Pita ndownə n Yerosalem, dzûmə tə Klisto tən tə â taʼanə n ghəə a səghə a kətyi ghə, n kee khə̂mə wi dza nə̀,

³ “Wə â ndow nyi n ndaw tə aghə̂ nə ghə ka kam səghə tyi u ghə wə, zə̂ dzəŋi soʼo ghi ghə.”

⁴ Pita n tiilə kɔʼ ndow ghəə a tii ghə adzəm tə ghə nghee ghə â kaʼ tsunə tii, dza tə ghə nə̀,

⁵ “Nghee mə a gɔŋŋənə n naʼ i Jopa, jim wə n bə mə, n jim u tii wə mə n koʼ ndow fə kə loʼ kə tə a loʼ igham i shiə tsu bənə n bikighow.

⁶ Nghee n laalə nyi ndownə gham i tii zə, mə n koʼ ndow lii tə tənyam tədzəm, tə tən tə bweynə, tə tən tə ghaŋŋənə nsə nən mən n zəʼlə idəŋ.

⁷ Mə n daŋŋə zow ndow dzə̂ i loʼ zə i ghɔɔmə bənə tə mə nə̀, ‘Pita, nuu kɔʼ, wə weyyə fə tə loʼ tə.’

⁸ Mə n beeli ndow wi nə̀, ‘Ngaŋ a Mûkəbii, n ka kam zə̂ koʼ tsə fə kə loʼ kə nə kə dzəənu nkee kə key laŋ kə ghə̂ Təjuu kə tuunə ghə ka zə̂.’

⁹ Dzə̀ ə tii n ghɔɔmə kpiʼi tsu bə tə̀ mə idəŋ nə̀, ‘Fə key Zə̀ kə sòw naŋa tsunə, ka tɔŋɔ dzə nə a loʼ fə kə dzəə kə.’

¹⁰ Ghəə zən n shi kuulə kɔʼ tənəŋŋə tətəghə, ghə n kəm sìi dzəŋŋə nyi kɔʼ ndow gham i tii zə ibam n bikighow.

¹¹ N nəŋŋə i tii zə kə, aghə̂ atəghə nə̀ ghə nuu bə n naʼ i Kayserya, ghə tûm bənə ghə n nyi bə n ndaw zey mə â muunə tii.

¹² Zay kə Zow kə n dza bə tə mə nə̀ kə n nə səmənə ni ndow ghi ghə. Waazə a saa ghən a tuubə n bə dzəŋi ghi mə, ghey n ndow nyi ndow n ndaw wù tii.

¹³ Tə n dza bə tə ghey nghee tə â koʼnə tsəndəghə Kəzə̀ i teynə n ndaw wi. Tsəndəghə zey n dza tə wi nə̀, ‘Tûm ndow wù loʼ n naʼ i Jopa, tə ndow tɔŋɔ bə Shimun wən ghə tɔŋŋə nə̀ a loʼ Pita.

¹⁴ Tə i fuu bə wɔ n ghɔɔmə zey zə i bəghəshiənə wɔ nsə tyim a ndaw ghə ghə̀ adzəm.’

¹⁵ Ambə n kaʼ ni ghɔɔmə, Zay kə Zow kə n bɔɔmə tsu bə n kow ghə ighələ tə kə â tsu bənə n kow ghey nə nzeyyə.

¹⁶ Mə n daŋŋə moʼlə bə nghee Mûkəbii â dzanə nə̀, ‘Jɔn fuu mmuu n Kəzə̀ nə mmuu, a kee bə ghaa, Zə̀ kə i fuu n Zay kə Zow kə.’

¹⁷ Abə Zə̀ kə â loʼ ni fuu soʼo ghə̂ ghən ghə way ghə̂ a Təjuu ghə n naamə kə mɔʼɔ kən tə â fuunə tə saa ghən â bəghəmnə tə Mûkəbii Yeso Klisto, n laa loʼ ndee ni buu naŋa Kəzə̀ nə ka fwaʼ fwaʼ kə wi kə?”

¹⁸ Ambə ghə zow tsunə sey, ghə kəm khə way ghəə zə ni khə̂mə wi tii, ghə n zey ndow ni fuu ukali tə Zə̀ kə dza nə̀, “I sey dii nə̀ Zə̀ kə n mbɔŋ fuu soʼo ghə̂ ghən ghə way ghə̂ a Təjuu ghə n bùʼ kə nə̀ ghə kweyyə nuu bə fə̀ŋ tə ghə n ghəə a bəbə ghə, ghə keeli soʼo imuu.”

Dzûmə tə Klisto tey n Antyɔk

¹⁹ Dzûmə tə loʼ tən tə â saŋŋə doʼo kaabənə bòʼ chɔd mən ghə â keelinə nghee ghə â wey tsunə Sitifən, ghə n lɔʼlə bwey ndow shi nay ndow n naʼa tə Foenishia, Sayprus nsə n Antyɔk, naʼlə ndow tûm i dzuŋu zə tə ghə̂ a Təjuu ghə kələ.

²⁰ Dzûmə tə loʼ tən tə â shinə n Sayprus nsə Sirin, n ndow n Antyɔk, zey ndow ni naʼa tûm i dzuŋu zə bòʼ Mûkəbii Yeso tə ghə̂ ghən ghə way ghə̂ a Təjuu ghə.

²¹ Daʼa kə Mûkəbii kə n loʼ n kow ghə, ndəm ə aghə̂ n bəghəm tə Klisto, fəd doʼo bə dzûmə tə Mûkəbii.

²² Zɔŋ u tii wə n fuŋ ndow nyi ndow n wɔ dzûmə tə Klisto tey n Yerosalem. Dzûmə tə Klisto tən n Yerosalem n tûm ndow Banabas nə tə ndow n Antyɔk.

²³ Ambə tə ndow nyi ndow nə̀, koʼ tsu ghəə a dzuŋu ghən Zə̀ kə ghəŋənə tə ghə, tə n duʼlə naʼ idzəm, kuu ndow fə̀ŋ tə ghə nə ghə təmi taw tsu kə ghi Mûkəbii n fə̀ŋ tə ghə tə tədzəm.

²⁴ Banabas â loʼ wù dzuŋu, Zay kə Zow kə n loʼ ghi wi naʼ idzəm, tə n ngii khə soʼo bəghəm i fə̀ŋ. Sey, tə n loʼ ni naʼa tûm i dzuŋu zə n jìi zey i ghəŋŋənə nə̀ ndəmə aghə̂ a kweyyə nuu bə n ghəə a bəbə ghə, ghə bəghəm tə Mûkəbii.

²⁵ Banabas n nuu ndow n Tasus ni ndow kəŋ Sɔl.

²⁶ Ambə tə koʼ tsunə wi, tə n ney bə wi n Antyɔk. Sey, Banabas ghi Sɔl n doʼo kəŋə ndow kənum ghi dzûmə tə Klisto tey n Antyɔk. Ghə n dii kəŋə ndow ndəmə aghə̂ fu n dzəŋi kə dzûmə tə Klisto. Â loʼ soʼo fuu n Antyɔk ghə â ziʼi tɔŋɔ shi bənə ghə̂ ghən ghə bəghəmnə tə Zə̀ kə nə a loʼ dzûmə tə Klisto.

²⁷ À wən loʼ nəŋə zən ghə̂ a tətûm a Kəzə̀ a loʼ ghə â zəghə tsunə Yerosalem ndow n Antyɔk.

²⁸ Zay kə Zow kə n ghəŋŋə nə̀ wù ghə umɔʼ ghə â tɔŋŋə nə̀ a loʼ Agabus tə nuu təmi kɔʼ, tə dza naŋa zey ndow nə̀ dzəŋ i faalə zə i nyiə bənu n naʼ i Roma nsə n naʼa tey tə loʼnə n tənə ghə. Dzəŋ i faalə zə n bɔɔmə ndow bə n num key Klodius a loʼnə də̀ŋ kə.

²⁹ Sey, dzûmə tey n saalə tsu ni fuu igaamə tə wɔɔ a ghə ghə â kɔʼ kuumnə tə dzûmə tey tə loʼ nə n Judeya.

³⁰ Ghə n ghəŋŋə tsu sey, kuu tsu khəə u tii wə n wɔɔ kə Banabas nsə Sɔl, tûm ndow tə ngəd tə dzûmə tə Klisto tey n Yerosalem.