Kəfwaʼ 1 - Kaa n Kəzə̀ n fəghə mə

Zə̀ kə ney nuu kɔʼ ndow Yeso idəŋ

¹ Mûkəbii Tiofilos, n màʼlə kuŋ kə sə̂ isə kən mə â tɔɔnə tə wɔ, mə â tɔ̀ɔ ghəə ghey Yeso â ghəŋənə dii soʼonə ni ney nuu tsu nghee tə̀ tə â kaʼnə fwaʼ kə wi kə,

² ndow kuum ndow n tsuʼ fey Zə̀ kə â ney kɔʼnə wi tii idəŋ. Tə̀ Zə̀ kə ni ney kɔʼ wi idəŋ, à n loʼ nə tə n tsəghə n kow Zay kə Zow kə ni fuu naŋa ulaŋ tə̀ ngəd tə wi tən tə â sày naŋanə.

³ Ambə chɔd u wi u may tsunə, tə n dii ndow wû u wi tə ngəd tə wi tey n ndəmə tətsəə nə̀ ghə keeli tsu nə̀ tə nam loʼ utaw. Tə n dii ndow uwû, ghɔɔmə dzəŋi ndow ghi ghə bòʼ ghə i fɔɔ u Kəzə̀ ni kuum kɔʼ ndow ntsuʼu nghəm nkaykə.

⁴ Ambə n nəŋə i loʼ zə ghə doʼo dzəŋi tsu nə̀, tə n tsəʼlə tsu kəlaŋ tə ghə nə̀, “Kə ghaa nə nuu shiənə n Yerosalem, ləmə tsu dzə n na naamə kən mə â dzanə ghaa, naamə kən Bày wuŋ a naʼa naŋanə.

⁵ Jɔn a fuu mmuu n Kəzə̀ nə mmuu, a kee loʼ nə, a loʼ kə ghə zə ntsuʼu, Zə̀ kə i fuu ghaa n Zay kə Zow kə.”

⁶ Sey, ambə Yeso ghi ngəd tə wi tə kəm təmdzəŋi bənə, ghə n bəb ndow tə wi nə̀, “Mûkəbii, a wən loʼ nəŋə zən wə i ney nuulənə fɔɔ wə n wɔɔ ghə̂ a Rom ghə, wə fuu dzəŋŋənə tə ghə̂ ghə Izree ghə ə?”

⁷ Yeso n beeli ndow ghə nə̀, “À way dzə buʼ kə ghaa ni keeli nəŋə i tii zə nkee tsuʼ fey bày wuŋ bayyə naŋanə n daʼa kə wi.

⁸ À kee loʼ nə̀, abə Zay kə Zow kə i nyi bənə n kow ghaa, ghaa i keeli tsu kədaʼa, ghaa i loʼ soʼo ni təmi tiilə bòʼ mə n Yerosalem, n mboʼo Judeya, Samaria nsə n badla tə mbi tədzəm.”

⁹ Ambə tə ghɔɔmə may tsunə ghəə ghən, Zə̀ kə n ney nuu kɔʼ ndow wi idəŋ, ghə n tey fu laalə nghee tə kɔʼɔ ndownə tii. Tə n kɔʼ kə sa, saŋ nuu nyi ndow nə təmbaʼ.

¹⁰ Nghee ghə tey fu, sɔʼɔ laalə nyiə kɔʼɔ ndow nghee tə saŋa ndow idəŋ, ghə n taa fəmi kɔʼ ghə̂ a loʼ ghə a bəghə ghə teynə n sə kə ghə nə ghə n dzəŋə keeli ndzə tə fəmə tə.

¹¹ Ghə̂ a tii ghə n bəb ndow tə tsətəndəghə tey nə̀, “Ghə̂ a Galili ghə, a loʼ kee ghaa tey sɔʼɔ laalə kɔʼɔ ndow bikighow? Yeso wən Zə̀ kə ney nuu kɔʼ ndow idəŋ n wɔ ghaa, a loʼ soʼo ighələ tə i bəghə dzəŋŋənə tə̀ ghaa â koʼ ndownə nghee tə nuulə ndownə tii.”

Matyas zə̂ tow kə Judas

¹² Ngəd tə Yeso tə n zəghə tsu kaʼ u Oliv, ndow dzəŋŋə ibam n Yerosalem. Kaʼ u Oliv wə â lɔʼlə way dzə ni nuu tsu n Yerosalem, â loʼ kə tə a loʼ tsuʼ inaʼ u bwey wə umɔʼ.

¹³ Ambə ghə bə nyi bənə n Yerosalem, ghə n kɔʼ daŋŋə ndow n dzuu i ndaw zey ghə â muunə tii, i doʼo kuulə kɔʼ idəŋ. Ghə̂ ghey ghə â loʼnə fu â loʼ Pita, Jɔn, Jems, Andria, Filip, Tɔmas, Batolomio, Matyo, Jems waa Afus, Shimun, wù wey tə â ngii ləghənə naʼ i wi zə, nsə Judas waa Jems.

¹⁴ Ghə n təmə dzəŋi nəŋə tədzəm ni gɔŋŋə ghi gheyzən a loʼ ghə nsə Maria nay Yeso ghi waazə a wi ghə.

¹⁵ N tsuʼ fə loʼ fə n tsuʼu mən ghə â dzəŋi doʼonə, ghə̂ ghən ghə bəghəm nə tə Yeso n loʼ fu tə a loʼ aghə̂ fəbɔm nsə ghə̂ ghə nghəm n bəghə. Pita n nuu təmi kɔʼ n fəŋŋə kə ghə, ghɔɔmə ndow tə ghə.

¹⁶ Tə n dza tə ghə nə̀, “Waazə ghə, ghəə ghən a tɔ̀ɔ doʼonə n màʼlə K-a-zə̀ a khə ni teeli bə shi, tɔŋɔ ghəə ghən Zay kə Zow kə â ghəŋə nə̀ fɔ̀ɔ Devid dza zey kuum Judas wən tə â diinə jii nə ghə bə kwu Yeso.

¹⁷ Judas â loʼ dzəŋi ghi ghey fwaʼa soʼo fwaʼ kən ghey fwaʼanə tə Yeso.”

¹⁸ Judas â ney kɔʼ khəə wey ghə â tsənə wi tii n bəb zey tə â ghəŋənə, zuu kɔʼ kəluʼu tii. Tə n ndow bwu sɔʼ ndow kətow fu, nəghə u wi wə n bən buʼu i kɔʼ, ndzɔ̀ɔ tə n shi doʼo may bə a bii.

¹⁹ Aghə̂ adzəm n Yerosalem n zow tsəghə kpi tsu ghə i tii zə, sey ghə n tsə tsu zəd i luʼu kə tii kə n ghɔɔmə i ghə nə a loʼ Akeedama, i dii tsu nə̀ a loʼ, “Luʼu kə Təkaŋ.”

²⁰ Pita n ndow n sə kə dza nə̀, “I tɔ̀ɔ doʼo n màʼlə kə təndzaŋa nə̀, ‘Tə muu kə wi kə mə doʼo tən kə kə zum kə. Kə wù loʼ nə tsəmə muulənə n ndaw wi.’ I tɔ̀ɔ doʼo soʼo nə̀, ‘Tə wù nuu mə ney bùʼ kə wi.’

²¹ Sey, i loʼ nə wù umɔʼ n ghə̂ ghən ghə â loʼ dzəŋi ghi saa n nəŋə zey Yeso a nam loʼnə n fəŋŋə kə saa, khə ni teeli təmdzəŋi bə saa ni ney bùʼ kə Judas.

²² À khə ni loʼ wù tə â loʼ dzəŋi ghi saa ni ney nuu tsu n nəŋə zey Jɔn â fuunə mmuu n Kəzə̀ mə ndow kuum ndow n nəŋə zey Zə̀ kə â ney kɔʼ ndownə Yeso tii idəŋ. À khə ni loʼ wù tə i təmi tiilə soʼonə ghi saa nghee Yeso â zhəm dzəŋŋənə tii nə ivə.”

²³ Sey, ghə n fuu shi kɔʼ azəd abəghə, umɔʼ n loʼ Yosef ghə â tɔŋŋə wi nə a loʼ Basabas, tɔŋŋə soʼo nə̀ a loʼ Justus, u loʼ wey n loʼ Matyas.

²⁴ Ambə ghə sày kɔʼnə ghə̂ ghən, ghə n gɔŋŋə tsu nə̀, “Mûkəbii, wə khənu fə̀ŋ tə ghə̂ tə tədzəm, dii bə wu wən wə sày nə n ghə̂ ghən abəghə,

²⁵ nə̀ tə ney bùʼ kə Judas ni fwaʼ tə a loʼ ngəd, n təŋkey Judas n ndow n luʼu key kə kpiinə tə wi.”

²⁶ Sey, ghə n təm mboʼ n tow u ghə, zə n bwu ndow n tow kə Matyas, sey tə n təmdzəŋi ndow ngəd tey ighəm nsə ghii zə imɔʼ.