Tùm i dzuŋu zə kuum Yeso Klisto tə Jɔn â tɔɔnə 9 - Kaa n Kəzə̀ n fəghə mə

Yeso baŋŋə wù ghə â jinə wi nə̀ tə fəb doʼonu

¹ Nghee tə̀ Yeso bwey ndownə, tə n koʼ tsu wù loʼ ghə â jinə wi nə̀ tə fəb doʼonu.

² Ngəd tə wi tə n bəb ndòw tə̀ wi nə̀, “Wù dii wə, â ghəŋə bəb i ndee nə̀ ghə ji wù wən nə̀ tə fəb doʼonu ə? Â loʼ bəb i wi nkee bəb i ghə bày a wi ə?”

³ Yeso n beeli kɔʼ nə̀, “Fəb i wi i khə dzə way ghə i loʼ zə ni ghəŋə ghi bəb i wi zə nkee bəb i ghə bày a wi. Ghə wi ji sey nə̀, Zə̀ kə i tsəghə n kow wi ni dii daʼa kə wi.

⁴ Saa khə ni teeli fwaʼ fwaʼ kə wù wey tə tûmnə mə nya nə̀ luʼu tə nam zownu, n təŋkey, abə tsuʼ u dzə̂ bənə, wù kəm way ni fwaʼ.

⁵ N loʼ kədaa tə ghə̂ a mbi ghə n nəŋə zən idzəm mə i doʼlənə fa n mbi.”

⁶ Ambə Yeso dza may tsunə ghəə ghən, tə n tsə tsu ntəghə aghəd, nyuʼ kɔʼ kətsaʼ n tə̀ghə̀ n tii mə, ney nɔm ndòw n sə̂ a wù wey.

⁷ Tə n dza ndòw tə̀ wù tii nə̀, “Ndòw sow maʼa tûm usə wə wə̀ n tsəm kə Silowam.” (Silowam dii tsuu nə̀, “Wù tûm.”) Sey, wù wey n nuu i ndòw, ndòw sow tsu tûm usə u wi, dzəŋŋə bə nə̀ tə nya koʼo təluʼu.

⁸ Ghə̂ ghə ukɔli u wi nsə ghə̂ ghey ghə â koʼnə wi n nəŋə zey tə â nɔɔ kaabə tsənə n bəbə n wû i ghə nə̀, “À wən way wù wey tə â doʼlə tsənə, nɔɔ ufə n wɔ ghə̂ ghə ə?”

⁹ Ghə̂ a loʼ ghə n dza, “À loʼ wi.” A loʼ ghə n kee dza, “Ngaŋ! À way dzə wi, tə maŋa fiilənu.” Wù tii n beeli dza kɔʼ nə̀, “À loʼ mə.”

¹⁰ Ghə n bəb nə̀, “Wə kaʼ bə ngee ni koʼo luʼu tə ə?”

¹¹ Tə n beeli kɔʼ nə̀, “Wù wən ghə tɔŋŋənə wi nə̀ a loʼ Yeso, mə nyuʼ kɔʼ kətsaʼ, nɔm tsu n sə̂ ghuŋ, dza tsu tə̀ mə nə̀, ‘Ndòw sow maʼa tûm usə wə wə̀ n tsəm kə Silowam.’ Mə n ndòw sow maʼa kɔʼ soʼo tə̀ tə dzanə, n sey zeynu ni koʼ təluʼu.”

¹² Ghə n bəb tə̀ wi nə̀, “Tə loʼ ghee?” Wù tii n dza, “N khə way.”

¹³ Ghə n ney ndòw wù wey tə â fəb doʼonə n səə ghə̂ a tə Falasi ghə.

¹⁴ À n loʼ sey nə̀ tsuʼ fey Yeso â nyuʼ kɔʼnə tsaʼ key, nɔm tsu n sə̂ a wù fəbə wey, â loʼ n tsuʼ inaʼ u ghə̂ a Təjuu.

¹⁵ Ghə̂ a tə Falasi ghey n dza tə̀ wi nə̀ tə tiilə dza kpiʼi bə jìi zey tə mə kaʼnə tii ni koʼ təluʼu. Tə n dza ndòw tə̀ ghə nə̀, “Tə mə nɔm tsu kətsaʼ n sə̂ ghuŋ, mə n ndòw sow tsunə, daŋŋə zey ndow ni koʼ təluʼu.”

¹⁶ Ghə̂ a tə Falasi a loʼ ghə n dza nə̀, “Wù wən tə ghəŋənə ghəə ghən way dzə wù Kəzə̀, n təŋkey, tə naŋŋə way tsuʼ inaʼ wə.” À loʼ ghə n kee dza nə̀, “Abə a loʼ nə̀ wù tii loʼ wù bəbə, tə kaʼ ngee ni ghəŋə ndzoʼo faalə mən ə?” Sey, ghə n dzawwə doʼo tsu n moʼlə tə ghə.

¹⁷ Ghə̂ a tə Falasi ghey n kəm bəb ndòw tə̀ wù wey nə̀, “Abə wɔ, wə dza nə̀ ngee kuum wù wey tə mə ghəŋənə nə wə̀ kaʼ ni koʼ təluʼu ə?” Wù tii n beeli kɔʼ nə̀, “N khə nə̀ tə loʼ wù tûm Kəzə̀.”

¹⁸ Ghə̂ a Təjuu ghey n nam ləghə way ni bəghəm nə̀ wù wey â loʼ tsə wù fəbə wə, tə nya koʼo təluʼu. Ghə n baa tûm tɔŋɔ bə ghə bày a wi.

¹⁹ Ambə ghə bənə, ghə̂ a Təjuu ghey n bəb tə̀ ghə nə̀, “À wən loʼnu waa ghaa ə? Ghaa dza nə̀ ghə â ji wi nə̀ tə fəb doʼonu, tə nya kaʼ ngee ni koʼo luʼu tə ə?”

²⁰ Ghə n beeli kɔʼ nə̀, “Ghey khənu nə̀ tə loʼ waa ghey, ghey khə soʼonu nə̀ ghə â ji wi nə̀ tə fəb doʼonu.

²¹ Ghey kee khə dzə way nghee tə kaʼnə tii ni koʼo luʼu tə nya, ghey khə soʼo way wù wey tə ghəŋənə nə̀ tə i koʼo luʼu tə. Bəb ndòw na tə̀ wi, tə n nyim, tə loʼnu ni ghɔɔmə n nəŋə wi.”

²² Ghə bày a wi ghə â dza sey, n təŋkey, ghə â tsəŋə ngəd tə Təjuu tey, kuum nə̀, ngəd tey mâ bəghəm naŋa nə̀ abə wù loʼ dza tsunə nə̀ Yeso loʼ wù wey Zə̀ kə â dza naŋa nə̀ i tûm bənu, ghə i dzum nuu shi wi n Ndaw kədzəŋi ə ghə.

²³ À wey loʼ ghə i tii zə ghə bày a wi ghə â dzanə nə̀, “Tə n nyim, bəb ndòw na tə̀ wi.”

²⁴ Ghə n kəm tɔŋɔ kpiʼi tsu wù wey ghə â jinə wi nə̀ tə fəb doʼonu, dza tə̀ wi nə̀, “Dza bə isəŋə zə, n zəd i Kəzə̀, ghey khə nə̀ wù wən tə ghəŋənə nə̀ wə i koʼo luʼu tə, loʼ wù bəbə wə.”

²⁵ Wù tii n beeli ndòw ghə nə̀, “N khə dzə way nə̀ wù tii loʼ wù bəbə mɔ wù dzuŋu. N khə kə ighəə imɔʼ. N khə nə̀ mə â fəb doʼonu, n nya koʼo təluʼu.”

²⁶ Ghə n bəb tə̀ wi nə̀, “Tə mə ji tsu ngee ghi wɔ ə? Tə mə kaʼ ngee ni chi sə̂ ghə ə?”

²⁷ Tə n beeli ndow ghə nə̀, “Mə n tə̀ ghaa dza, ghaa u ləghə way ni zow. Ghaa nya dza n dza kpiʼi bə nə̀ a loʼ kee. Ghaa ləghə soʼo ni doʼo dzûmə tə wi ə?”

²⁸ Ghə n zey ndòw ni kpaalə wi dza nə̀, “Wə loʼ dzûmə ə wi, ghey kee loʼ dzûmə tə Mushi.

²⁹ Ghey khə nə̀ Zə̀ kə â ghɔɔmə tə̀ Mushi, abə wù wən, ghey buʼ khə way luʼu key tə nuu bənə tii.”

³⁰ Wù wey n dza tə̀ ghə nə̀, “À wən ndzəm loʼ tsəghəshi kə ighəə! Ghaa dza nə̀ ghaa khə way luʼu key tə nuu bənə tii, tə u kee chinə sə̂ ghuŋ ghə nə̀ mə i koʼo luʼu tə.

³¹ Ghey khənu nə̀ Zə̀ kə zow way gɔŋŋə i ghə̂ a bəbə ghə. Tə kee zownu gɔŋŋə i ghə̂ ghey ghə ngɔɔmənə wi, ghəŋŋə ndòw ghəə ghey a kpiilənə tə̀ wi.

³² Tə̀ mbi â nə kaʼnə, saa ka kam zow koʼ tsə nə̀ wù loʼ mə ghəŋə wù nə̀ tə kaʼ ni koʼ təluʼu nə̀ a loʼ wù ghə jinə nə̀ wi tə fəb doʼonu.

³³ Abə wù wən mə way wù Kəzə̀, tə mə way ni ghəŋə ighəə tə̀ a loʼ i zən.”

³⁴ Ghə n dza, “Ghə â ji wɔ n ghəə a bəbə ghə, wə u nyim shi kɔʼ bənə n ghəə a bəbə ghə, wə moʼlənə nə̀ wə loʼ ni dii ghey n ghəə ghə?” Sey, ghə n dzum nuu shi wi n Ndaw kədzəŋi ə ghə.

³⁵ Yeso n zow tsu nə̀ ghə n dzum shi wù wey n Ndaw kədzəŋi. Ambə Yeso ndòw koʼ tsunə wi, tə n bəb ndòw tə̀ wi nə̀, “Wə̀ bəghəm fuunu tə̀ Waa wù sɔŋtsuʼ ə?”

³⁶ Wù tii n beeli kɔʼ nə̀, “Mûkəbii, wù tii loʼ ndee? Tiilə dza bə tə̀ mə, tə n bəghəm fuu tə̀ wi.”

³⁷ Yeso n dza ndòw tə̀ wi nə̀, “Wə n wi koʼ, à loʼ wi tə ghɔɔmənə ghi wɔ.”

³⁸ Wù wey n dza, “Mûkəbii, n bəghəmnu.” Tə n təm ndòw tənguʼ n tənə Yeso, ngɔɔmə wi.

³⁹ Yeso n dza, “N bə fa n mbi ni bə saʼ aghə̂, sey nə̀, ghə̂ ghey ghə fəb doʼonə ghə i loʼ ni koʼ təluʼu, ghə̂ ghey ghə koʼonə luʼu tə ghə fəb doʼo bə.”

⁴⁰ Ghə̂ a tə Falasi a loʼ ghə ghə â loʼnə fu n zow tsu nghee Yeso dzanə ghəə ghən, ghə n bəb tə̀ wi nə̀, “I sey diinə ghey fəb doʼo soʼonu ə?”

⁴¹ Yeso n beeli kɔʼ nə̀, “Abə ghaa bəghəmnə nə̀ ghaa fəb doʼonu, i sey dii nə̀ wɔɔ a ghaa a zownu n ghəə a bəbə ghə. Abə ghaa kee moʼlənə nə̀ ghaa tɔʼɔ koʼonu luʼu tə, i sey diinə wɔ ghə a dzəənu n ghəə a bəbə ghə.”