Tùm i dzuŋu zə kuum Yeso Klisto tə Jɔn â tɔɔnə 8 - Kaa n Kəzə̀ n fəghə mə

Weyzən wey ghə â kwunə nə̀ tə nyə̀ŋ ghi weynum u loʼ wə

¹ Ambə ghə̂ a sali nuu ndow n ndaw tə ghə, Yeso n kee nuu kɔʼ ndòw n kaʼ u Oliv.

² Tsətsə wey n zòw kə utsuʼ, Yeso n nuu tsu dzəŋŋə ndòw n Ndaw Kəzə̀ i nii zə n Yerosalem. Ghə̂ adzəm n zuŋŋə bə n səə wi, tə n doʼo tsu, kaʼ ndòw ni dii ghə n ghəə ghə.

³ Ghə̂ a dii a Kəlaŋ ghə nsə ghə̂ a tə Falasi ghə n ney bə weyzən u loʼ wə ghə kwunə wi nə̀ tə nyəŋi ghi weynum nə̀ a way num wi. Ghə n ney teyyə naŋa bə wi n sə̂ kə aghə̂.

⁴ Ghə n dza ndòw tə̀ Yeso nə̀, “Wù dii wə, ghey kwu nyi ndòw weyzən wən tə nyəŋi dzəŋinə ghi weynum u loʼ wə nə̀ a way dzə num wi.

⁵ Laŋ kə Mushi kə dii nə̀ a khə ni təmmə wey ndzoʼo weyzən wən nə atay. Wə dza nə̀ ngee tii?”

⁶ Ghə â sey dza ni mɔm koʼ Yeso, tə ghə i loʼ ni kuu saʼ n tow kə wi n ghɔɔmə i wi. Yeso n fəd gham tsu, kaʼ ndòw ni tɔ̀ɔ aghəə aghəd n waa kəwɔɔ.

⁷ Nghee tə̀ ghə teynə fu, bəbə wi n ghəə ghə, tə n təmi kɔʼ, dza ndòw tə̀ ghə nə̀, “Wù wey tə loʼnə fa nə̀ tə ka kam ghəŋə koʼ ghə i bəbə zə, tə doʼo tsu wù kəsə̂ ni təm ndow weyzən wən nə itay.”

⁸ Tə n kəm gham dzəŋŋə i tsu, tɔ̀ɔ ndòw kə aghəə aghəd.

⁹ Ambə ghə zow tsunə sey, ghə n zey ni nuu fəmɔʼ fəmɔʼ, ni ney nuu tsu ghi gheynyim ghə isə, nuu may tsu adzəm. À n bə doʼo səə tsu kə Yeso n nəŋə wi ghi weyzən wey tə teynə.

¹⁰ Yeso n nuu təmi kɔʼ, bəb ndòw tə̀ weyzən wey nə̀, “A weyzən, ghə̂ ghey ghee? Wù loʼ ka doʼo səə ni dza nə̀ wə khə ni kpu ə?”

¹¹ Weyzən wey n beeli ndòw wi nə̀, “Ngaŋ! Mûkəbii, wù loʼ ka doʼo səə dzə.” Yeso n dza ndòw tə̀ wi nə̀, “Mə soʼo n way ni dza sey. Nuu ndòw i zə zə̀, kə wə nə̂ kee kəm ghəŋŋə ghəə a bəbə ghə.”]

Yeso loʼ kədaa tə̀ mbi

¹² Yeso n ghɔɔmə kpiʼi ndòw aghəə tə̀ nɔɔ kə aghə̂ key nə̀, “N loʼ kədaa tə̀ ghə̂ a mbi ghə adzəm. Wù wey tə dzûmənə mə, î bwey koʼ way nə kələm, tə i fədlə keeli daa key kə fuunə muu zə.”

¹³ Ghə̂ a tə Falasi ghə n dza ndòw tə̀ wi nə̀, “Wə nya tiilə dza aghəə bòʼ wû wə n nəŋə wɔ, ghey way ni bəghəm dzə nə̀ ghəə zey wə dzanə loʼ isəŋə.”

¹⁴ Yeso n beeli ndòw ghə nə̀, “Abə n tsəmə tiilə dza kə wû wuŋ wə n nəŋə mə, ghəə ghey n dzanə loʼ isəŋə, n təŋkey, n khənu luʼu key n nuu bənə tii nsə luʼu key n ndòwnə tii. Abə ghaa, ghaa kee khə dzə way luʼu key n nuu bənə tii nkee luʼu key n ndòwnə tii.

¹⁵ Ghaa saʼa aghəə n jìi zey wù sɔŋtsuʼ saʼanə tii, abə mə, n saʼa dzə way wù.

¹⁶ Abə n tsəmə saʼa kənə wù, saʼ zuŋ i loʼ tsətsəghə, n təŋkey, n saʼa dzə way n nəŋə mə, Bày wuŋ wən tə tûmnə mə loʼ ghi mə ni saʼa ghə̂ ghə.

¹⁷ Ghə tɔ̀ɔ naŋa n laŋ kə ghaa nə̀, abə dzuu a ghə̂ abəghə bəghəm dzəŋinə nə ighəə, i sey dii nə̀ ghəə zey ghə dzanə, loʼ isəŋə.

¹⁸ Sey, n tiilə dza wû wuŋ, Bày wey tə tûmnə mə, tə u təmi tiilə soʼonə bòʼ mə̀.”

¹⁹ Ghə n bəb ndòw tə̀ wi nə̀, “Bày wə loʼ ghee?” Yeso n dza ndòw tə̀ ghə nə̀, “Ghaa khə way mə, khə soʼo way Bày wuŋ. Abə ghaa mə̂ khənə Bày wuŋ, ghaa mə̂ khə soʼo mə̀.”

²⁰ Yeso â ghɔɔmə ghəə ghən nə̀ tə dii aghəə n Ndaw Kəzə̀ n Yerosalem, n səə luʼu key ghə naŋŋənə khə̀ə wə tii. Wù umɔʼ n way ni kwu wi n təŋkey nəŋə zey ghə â khə ni kwu wi â ka kam bə.

Ghaa way ni ndow n luʼu key n ndownə tii

²¹ Yeso n kəm dza ndòw tə̀ ghə̂ ghey nə̀, “Mə i nuulənu, ghaa i kəŋə mə, kəŋə kìi. Luʼu key n ndòwnə tii, ghaa way ni bə fu. Abə ghaa, ghaa î kee kpu kə n ghəə a ghaa a bəbə ghə.”

²² Ngəd tə Təjuu tə n bəbə n wû i ghə nə̀, “Tə dza nə̀, ‘Luʼu key n ndownə tii, ghaa way ni bə fu.’ Tə dza i wey wû u wi ə?”

²³ Yeso n beeli ndow ghə nə̀, “Ghaa shi fa n mbi, mə n kee nuu shi tsu bə idəŋ. Ghaa loʼ ghə̂ a mbi, n kee way dzə wù mbi zən.

²⁴ À wey loʼ ghə i tii zə n mə dza bənə tə̀ ghaa nə̀ ghaa î kpuu kə n ghəə a ghaa a bəbə ghə. Abə ghaa ka bəghəm nə̀ n loʼ wù wey n loʼ nə ghii wə, ghaa i ndzəmə kpuu kənu n ghəə a ghaa a bəbə ghə.”

²⁵ Ghə n bəb ndòw tə̀ wi nə̀, “Wə baa loʼ ndee?” Yeso n dza, “N loʼ wù wey n mə buʼ dza dzənə tə̀ ghaa nə̀ n loʼ wi.

²⁶ N khə ndəmə aghəə ni dza bòʼ ghaa, mə n khə soʼonə ndəmə aghəə ni tsəʼlə saʼ tii n kow ghaa, a kee loʼ nə̀ ghɔɔmə i wù wey tə tûmnə mə, loʼ tsə kə isəŋə, sey ghəə zey n zownə n wɔ wi, à loʼ i ghii n bɔɔmə dza ndownə tə̀ ghə̂ a mbi.”

²⁷ Ghə n ka zowkeeli nə̀ tə sey ghɔɔmə kuum Bày wi.

²⁸ Sey, Yeso n dza ndòw tə̀ ghə nə̀, “Abə ghə î kɔʼlə naŋa kɔʼnə Waa wù sɔŋtsuʼ n zat kə fəkaʼ, ghaa i daŋŋə keeli tsu nə̀ n loʼ wù wey N loʼnə ghii wə. Ghaa i keeli tsu soʼo nə̀ n ghəŋŋə dzə̀ way ghə i loʼ zə n daʼa kuŋ, n kee ghɔɔmə kə ghəə zey Bày wuŋ dza bənə tə̀ mə nə̀ n dza.

²⁹ Wù wey tə tûmnə mə loʼ ghi mə, tə ka mə naŋa taʼa dzə n nəŋə mə, n təŋkey, n ghəŋŋə ndòw kə ghəə zey i ghəŋŋənə wi nə̀ tə i duʼlə.”

³⁰ Nghee tə̀ Yeso ghɔɔmənə ghəə ghən, ndəmə aghə̂ n bəghəm fu tə̀ wi.

À loʼ isəŋə i bəghəshiənə wù

³¹ Sey, Yeso n dza ndòw tə̀ ghə̂ a Təjuu ghey ghə â bəghəmnə tə̀ wi nə̀, “Abə ghaa bɔɔmə bwey ndòwnə n jii zən n diinə, ghaa î ndzəm loʼ ngəd tuŋ tə.

³² Ghaa i keeli isəŋə, isəŋə i tii zə i bəghəshi ghaa.”

³³ Ghə n dza ndòw tə̀ wi nə̀, “Ghey loʼ waa a waa ghə Abraham, ghey ka kam doʼo koʼ tsə kɔd kə wù loʼ kə, wə loʼ ngee ni dzaa tə̀ ghey nə̀, ‘Ghaa i keeli ibəghəshi ə?’”

³⁴ Yeso n dza ndòw tə̀ ghə nə̀, “N ndzəmə dza bə tə̀ ghaa nə̀, wù wey tə ghəŋŋənə ghəə a bəbə ghə, loʼ kəkɔd tə bəb zə.

³⁵ Kɔd kə way dzə ni doʼo tən dzə n ndaw Mûkəbii ə wi tə̀ a loʼ waa kəbii fu, a loʼ kə waa kəbii fu tə doʼlə tənənə fu nə kəbii.

³⁶ Sey, abə Waa wù sɔŋtsuʼ chi zəghə tsunə wɔ, wə sey nya ndzəm loʼ n ngəŋ.

³⁷ N khənu nə̀ ghaa loʼ waa a waa ghə Abraham, a kee loʼ nə̀, ghaa kəŋənə jìi ni wey mə, n təŋkey, ghaa ləghə way ni bəghəm ghɔɔmə zuŋ.

³⁸ N ghɔɔmə bə ghəə ghey n koʼ neynə n wɔ Bày wuŋ, abə ghaa, ghaa ghəŋŋə ndòw ghəə ghey bày ghaa dzanə tə̀ ghaa.”

³⁹ Ghə n beeli dza ndòw tə̀ wi nə̀, “Bày bày ghey loʼ Abraham.” Yeso n dza ndòw tə̀ ghə nə̀, “Abə ghaa mə ndzəm loʼnə waa a waa ghə Abraham ghə, tə̂ ghaa mə bɔɔmə ghəŋŋə ndòw kə ghəə ghey tə â ghəŋŋə tsənə.

⁴⁰ N ghɔɔmə tsə kə isəŋə zey n zow ney bənə n wɔ Zə̀ kə, ghaa u kee kəŋənə jìi ni wey mə. Ghəə ghən ghaa ghəŋŋənə, Abraham â ghəŋŋə tsə way sey.

⁴¹ Ghaa bɔɔmə ghəŋŋə kə ghəə ghey bày ghaa â ghəŋŋənə.” Ghə n dza ndòw tə̀ wi nə̀, “Zə̀ kə loʼ bày ghey wey ghey khənə, ghey u loʼnə waa a wi ghə, ghey way dzə waa a kəmbay.”

⁴² Yeso n dza ndòw tə̀ ghə nə̀, “Abə Zə̀ kə mə ndzəm loʼnə bày ghaa, ghaa mə ləghə mə, n təŋkey, n nuu bə n səə Zə̀ kə, n ka bə dzə n ngəŋ zuŋ, a mə tûm bə Kəzə̀.

⁴³ A loʼ kee ghaa zowkeeli way ghəə ghey n dzanə ə? A loʼ n təŋkey, ghaa ləghə way ni zow ghɔɔmə zuŋ.

⁴⁴ Ghaa loʼ kə tə̀ a loʼ bày ghaa, tɔŋŋə Satan, moʼlə tə ghaa tə loʼ kə ni ghəŋŋə ghəə ghey bày ghaa ləghənə. Ni ney nuu bə tə̀ mbi a nə kaʼnə, tə weyyə aghə̂, tə ka kam təmi koʼ tsə nə isəŋə, n təŋkey, tə khə dzə way isəŋə i loʼ zə n kow wi. Abə tə badlanə ghəə ghə, tə sey ghɔɔmə shiə bə kə ghəə ghey a loʼnə n fə̀ŋ ə wi, n təŋkey, tə loʼ wù badla wə aghəə wə, a loʼ də̀ŋ kə ghəə a badla ghə.

⁴⁵ N kee ghɔɔmə kə isəŋə, a wey loʼ ghə i tii zə ghaa ləghə way ni bəghəm tə̀ mə.

⁴⁶ À loʼ ndee n fəŋŋə kə ghaa tə loʼnə ni dza bə ghəə zey n ghəŋə bəəbənə. Abə i loʼ nə̀ n ghɔɔmə isəŋə, a kee loʼ kee, ghaa ləghə way ni bəghəm tə̀ mə ə?

⁴⁷ Wù wey tə loʼnə wù Kəzə̀, zownu ghəə zey Zə̀ kə dzanə. Zuŋ key ghaa kee zow way ghɔɔmə i Kəzə̀ zə loʼ nə̀ ghaa way dzə ghə̂ a Kəzə̀.”

Yeso tsəghəshi Abraham

⁴⁸ Ghə̂ a Təjuu ghey n dza tə̀ Yeso nə̀, “I sey dii nə̀, ghey mə ka nɔʼ dzə ni dza nə̀ wə̀ loʼ wù Samaria, nsə nə̀ zay kə bəbə kə loʼ n kow wɔ.”

⁴⁹ Yeso n beeli ndòw ghə nə̀, “Zay kə bəbə kə way dzə n kow mə. N fuu nkɔʼlə tə̀ Bày wuŋ, ghaa u kee ngɔɔmə way mə.

⁵⁰ N kəŋə dzə way jìi nə̀ ghə̂ ghə i fuu bə mə n kɔʼlə mə. Wù loʼnu tə kee ləghənə nə̀ ghə̂ ghə i fuu bə mə n kɔʼlə mə, à loʼ wi, tə i saʼa fuunə tə̀ mə.

⁵¹ N dza bə isəŋə tə̀ ghaa nə̀, wù wey tə ney naŋanə ghɔɔmə zuŋ zə, nə kpu koʼ way.”

⁵² Ghə̂ a Təjuu ghey n dza tə̀ wi nə̀ “Ghey n ndzəm keeli nya nə̀ zay kə bəbə kə loʼ n kow wɔ. Abraham mâ khə kpu, tûm tə Kəzə̀ tə n bə kpu soʼo, wə u kee dzanə nə̀ abə wù naŋŋənə ghɔɔmə zə zə̀ tə nə kpu koʼ way.

⁵³ Naʼa bày bày ghey Abraham mâ kpu, wə dza i dza nə̀ wə̀ tsəghəshinu Abraham ə? Kasə tûm tə Kəzə̀ tə ma kpu, wə kee boʼo loʼ ndee?”

⁵⁴ Yeso n beeli ndòw ghə nə̀, “Abə a mə loʼ nə̀ n kɔʼlə wû wuŋ, kɔʼlə n tii n mə loʼ kənunu. Wù wey tə fuunə mə n kɔʼlə mə loʼ Bày wuŋ, tə wey ghaa dzanə nə̀ a loʼ Zə̀ kə ghaa.

⁵⁵ Ghaa khə dzə way wi, abə mə, n kee khənu wi. Abə n dza bənə nə̀ n khə way wi, i sey dii nə̀ n badla soʼo aghəə tə̀ a loʼ ghaa. N kee khənu wi, mə u naŋŋənə ghɔɔmə i wi zə.

⁵⁶ Wû wə a nyûmə tənə bày bày ghaa Abraham nə i mə mbɔŋ koʼ tsuʼ fey n nə bəghənə tii. Ambə tə koʼ tsunə, tə n duʼlə nay ndòw.”

⁵⁷ Ghə̂ a Təjuu ghey n dza tə̀ wi nə̀, “Wə ka kam buʼ kɔʼ kùm num tə nghəm ntaa, wə u dzanə nə̀ wə â koʼ Abraham ə?”

⁵⁸ Yeso n dza ndòw tə̀ ghə nə̀, “N dza bə isəŋə tə̀ ghaa nə̀, tə̀ ghə ni bə ji Abraham â loʼ nə̀ n loʼnu.”

⁵⁹ Nghee ghə zow tsu sey, ghə n kuumə kɔʼ atay ni təmmə wi tii, Yeso n kee nyì doʼo tsu, nyaʼi nii nuu tsu fu n Ndaw Kəzə̀.