Tùm i dzuŋu zə kuum Yeso Klisto tə Jɔn â tɔɔnə 5 - Kaa n Kəzə̀ n fəghə mə

Yeso baŋŋə wù n tsəm kə mmuu kə Bezada

¹ Ambə ghəə ghən a tsəghə tsunə, zə̂ kə ghə̂ a Təjuu kə loʼ kə n loʼ n Yerosalem, sey, Yeso n kɔʼ ndòw fu.

² Tsəm kə mmuu kə loʼ kə n loʼ fu n Yerosalem n səə fuʼ u mbàa wey ghə tɔŋɔnə nə̀ a loʼ fuʼ u mbàa u tənjì. Ghə â tɔŋŋə tsəm kə tii kə n ghɔɔmə i Hibru nə̀ a loʼ Bezada. Tsəm kə tii kə khə uzeeli utaa.

³ Ndəmə ghə̂ a dzaŋa ghə n nyə̀ŋ fu nə uzeeli, tɔŋŋə ghə̂ a fəbə ghə, ukə̀ŋŋə, nsə ghə̂ ghey wû i ghə i kpuu doʼonə. [Ghə â ləmmə nə̀ muu n fə̀n kɔʼ,

⁴ boʼnə tsəndəghə ə Kəzə̀ â bəghə zə n bə fə̀nnə kɔʼ tsəm key. Wù dzaŋa wey tə nyi tsunə fu n tsəm key isə abə kə fə̀nnə kɔʼ nə̀, dzaŋ i wi zə n daŋŋə may abə tə mə dzaŋa kənə kee kə.]

⁵ Wù loʼ n loʼ fu nə̀ tə n dzaŋ nə tənum nghəm ntəghə nsə num tə ifam.

⁶ Nghee tə̀ Yeso koʼ tsunə wi, tə n koʼ keeli tsu nə̀ tə n dzaŋ n ndəmə tənum, tə n bəb ndòw tə̀ wi nə̀, “Wə ləghənu ni taw ə?”

⁷ Wù dzaŋa wey n beeli ndòw wi nə̀, “Mûkəbii, n khə way wù tə loʼnə ni ney nyi ndòw mə nə kətsəm abə tsətəndəghə tə Kəzə̀ tə fə̀n kɔʼnə tsəm kə. Abə n nam ndownə, wù loʼ n bə nyi tsu isə n kow mə.”

⁸ Yeso n dza ndòw tə̀ wi nə̀, “Nuu kɔʼ, wə ney kɔʼ gham fə, wə bwey ndòw.”

⁹ Wù tii n daŋŋə taw kɔʼ, tsu ney kɔʼ gham fə wi, bwey nuu i ndòw. Tsuʼ fey ghəə ghən â shinə tii â loʼ tsuʼ inaʼ u Təjuu.

¹⁰ Sey, ngəd tə Təjuu tə nii tə n dza tə̀ wù wey Yeso â baŋŋənə nə̀, “À na loʼ tsuʼ inaʼ u saa, laŋ kə ka bəghəm dzə nə̀ wə i boʼlə bwey ghi gham fə.”

¹¹ Tə n fəd dza ndow tə ghə nə̀, “Wù wey tə mə baŋŋənə mə mə̀ dza tə̀ mə̀ nə̀ n ney kɔʼ gham fuŋ n bwey ndòw.”

¹² Ghə n bəb tə̀ wi nə̀, “À loʼ wù ghaa wə tə mə dzanə tə̀ wɔ nə̀, wə ney kɔʼ gham fə wə bwey ndòw ə?”

¹³ Wù wey Yeso â baŋŋənə wi n buʼ khə daŋŋə soʼo way wù wey tə mə baŋŋənə wi, n təŋkey, Yeso mâ nii nuu nyi ndow n fəŋŋə kə aghə̂ key kə â loʼnə fu.

¹⁴ Yeso n kəm koʼ tsu wù tii n Ndaw Kəzə̀ i nii zey n Yerosalem, dza ndòw tə̀ wi nə̀, “Koʼo, nya wən wə taw doʼo bənə, kə wə nə̀ kəm ghəŋŋənə ghəə a bəbə ghə, kə̂ ghəə i loʼ zə i bəb tsəghəshinə i zən i nə̂ shiənə n kow wɔ.”

¹⁵ Wù tii sey koʼ keeli ndownu Yeso, daŋŋə nuu ndòw, ndòw dza ndòw tə̀ ghə̂ a Təjuu ghə nə̀ a loʼ Yeso tə mə baŋŋənə wi.

¹⁶ À wən loʼ i ghi ghə̂ a Təjuu ghə â kaʼ ni fuu kaabə Yeso n chɔd wə, bòʼ nə̀, tə â baŋŋə wù n tsuʼ inaʼ.

¹⁷ Yeso n fəd beeli ndòw ghə nə̀, “Bày wuŋ fwaʼa nəŋə tədzəm, n khə ni teeli fwaʼ soʼo nəŋə tədzəm.”

¹⁸ À wən loʼ ghɔɔmə zən zə â faalə ghəŋə may soʼonə ghə̂ a Təjuu ghə nə̀ ghə nuu təmi kɔʼ nə̀ ghə khə ni wey wi, kuum nə̀, tə â ka kad zaʼ kə laŋ kə tsuʼ inaʼ u ghə wə, tə â dza soʼo nə̀ Zə̀ kə loʼ Bày wi, dii tsunə wi ghi Zə̀ kə ghə loʼ ighələ.

Daʼa key Waa Kəzə̀ khənə

¹⁹ Yeso n dza ndòw tə̀ ngəd tə Təjuu tey nə̀, “N kûm dza bə isəŋə tə̀ ghaa nə̀, Waa way dzə ni ghəŋə dzə ghə i loʼ zə n daʼa kə wi. Tə ghəŋŋə ndòw kə ghəə zey tə koʼ neynə n wɔ Bày. N təŋkey, ghəə zey Bày ghəŋŋənə, Waa bɔɔmə ghəŋŋə ndòw kə i ghi.

²⁰ I loʼ sey bòʼ nə̀, Bày ləghə Waa, tə u diinə ghəə ghey adzəm tə ghəŋŋənə tə̀ wi. Tə î buʼu dii wi n ghəə ghə nə̀ a tsəghəshi a ghən, dzuu zə i zum ghaa tii.

²¹ Bày zhəm dzəŋŋə bə aghə̂ nə̀ ivə, fuu ghə n muu zə, a loʼ ighələ, Waa fuu soʼonə muu zə tə̀ wù wey tə ləghənə ni fu tə̀ wi.

²² Bày saʼa dzə way wù n wû u wi wə, tə fuu n naŋa daʼa kə saʼa kə kədzəm tə̀ Waa.

²³ Tə ghəŋə sey nə̀ ghə̂ adzəm ghə i ngɔɔmə Waa, ighələ tə̀ ghə ngɔɔmənə Bày. Wù wey tə ngɔɔmə way Waa sey ngɔɔmə soʼo way Bày wey tə tûmnə wi.

²⁴ N dza bə isəŋə tə̀ ghaa nə̀, wù wey tə zownə ghɔɔmə zuŋ zə, bəghəm fu bə tə wù wey tə tûmnə mə, î keeli muu zə itsali. Zə̀ kə kəm way ni saʼ ghə boʼnə ghə n nuu shi bə nə ivə, ghə nya khə muu i fəghə zə.

²⁵ N dza bə isəŋə tə̀ ghaa nə̀ nəŋə i bəghənu, nəŋə i tii zə n buʼ kpi. Ghə̂ a kpuu a nə̂ zow dzə̂ ə Waa Kəzə̀, a ghey ghə nə zownə, bəghəm ghə i tii zə, ghə nə keeli bə imuu.

²⁶ Nghee tə̀ Bày n wû u wi wə, fuunə muu zə tə̀ ghə̂ ghə, tə n ghəŋə nə̀ Waa i loʼ soʼo ni fuu imuu tə ghə̂ ghə.

²⁷ Tə n fu daʼa kə saʼa kə tə̀ Waa, n təŋkey, tə loʼ Waa wù sɔŋtsuʼ.

²⁸ Kə̂ dzuu i nə zumnə ghaa n ghɔɔmə zən, n təŋkey, nəŋə i bəghənu ghə̂ a kpuu ghey nə təsay a nə̂ zownə dzə̂ ə Waa Kəzə̀.

²⁹ Abə ghə nə zownə dzə̂ ə Waa Kəzə̀ zən, ghə i zhəm dzəŋŋə bə. Ghə̂ ghey ghə â ghəŋŋənə ndzuŋ, ghə i keeli imuu, abə ghə̂ ghey ghə â ghəŋŋənə ghəə a bəbə ghə, ghə i saʼ ghə, ghə tûm ndow ghə n luʼu key ghə chɔdlɔnə ghə̂ ghə a fu.”

Ghə̂ ghey ghə tiilə dzanə ghəə ghə kuum Yeso

³⁰ Yeso n dza kpiʼi ndow tə ngəd tə Təjuu tey nə̀, “N way ni ghəŋə dzə ghə i loʼ zə n daʼa kuŋ. N saʼa kə saʼ nghee tə̀ Zə̀ kə dza bənə tə̀ mə, a wən loʼ ghə i tii zə n saʼanə n jìi zey i loʼnə tsətsəghə, boʼ nə̀ n ghəŋŋə dzə way ghəə zey i kpiilənə tə̀ mə, n kee ghəŋŋə kə ghəə zey i kpiilənə tə̀ wù wey tə tûmnə mə.

³¹ Abə n tiilə dzanə ghəə ghə bòʼ wû wuŋ, ghə way ni tɔʼ ney dzə ghəə zey n tiilə dzanə nə̀ à loʼ isəŋə.

³² Wù loʼ kee lòʼnu tə tiilə dzanə ghəə ghə bòʼ mə̀, N khənu nə̀ ghəə ghey tə tiilə dzanə bòʼ mə, loʼ isəŋə.

³³ Ghaa â tûm aghə̂ n səə Jɔn wù fuu u mmuu Kəzə̀ mə, tə n tiilə dza bə ghəə ghey a loʼnə isəŋə bòʼ mə.

³⁴ N ghəə ghən dza dzə way nə̀ n teeli khə ni keeli wù ni təmi tiilə bòʼ mə, n ghəə ghən dza nə̀ ghaa keeli ibəghəshi.

³⁵ Jɔn â loʼ tə̀ a loʼ kədaa kə baŋanə, ghaa n saŋŋə n ghɔɔmə i wi zən zə â loʼnə tə a loʼ kədaa tə̀ ghaa n tɔŋɔ fə inəŋə.

³⁶ N kee khə ghəə a nuu ghə a tiilə dza bənə ndzoʼo wù wey n loʼnə nə̀ a tsəghəshi a ghən Jɔn â tiilə dzanə bòʼ mə. Imɔʼ loʼ fwaʼ kən n fwaʼanə, tɔŋŋə fwaʼ kən Bày fu naŋanə tə̀ mə nə̀ n fwaʼ. Fwaʼ kən n fwaʼa nə̀, tiilə dza bə aghəə bòʼ mə nə̀ à loʼ Bày tə tûmnə mə̀.

³⁷ Bày wən tə tûmnə mə̀ təmi tiilə soʼo bòʼ mə. Ghaa ka kam koʼ koʼ tsə wi, ghaa ka kam zow koʼ soʼo dzə̂ ə wi.

³⁸ Ghaa ka ney naŋa dzə ghɔɔmə i wi zə n fə̀ŋ tə ghaa n təŋkey ghaa ka bəghəm dzə tə̀ wù wey tə tûm bənə.

³⁹ Ghaa ndəmi iwû ni tɔŋɔ màʼlə K-a-zə̀ n təŋkey, ghaa moʼlə nə̀ abə ghaa ndəŋ tɔŋɔ kɔʼnə sey ghaa i keeli ghəə zey ghaa khə ni teeli ghəŋə ni keeli muu zə itsali zə, loʼ sey nə̀ màʼlə K-a-zə̀ kən ghaa tɔŋŋənə baa tiilə dza bə aghəə bòʼ mə.

⁴⁰ Ghaa khə may ghəə ghən, nam tuu ni bəghəm tə̀ mə nə̀ ghaa keeli imuu.

⁴¹ N ləghə dzə way nə̀ ghə̂ a fuu mə n kɔʼlə mə.

⁴² N kee khənu fə key ghaa loʼnə ghii kə, n khənu nə̀ ghaa ləghə way Zə̀ kə n fə̀ŋ tə ghaa.

⁴³ Mə n bə n zəd i Bày wuŋ, ghaa ka mə kpii ney. Abə wù nuu bənə n ngəŋ ə wi, ghaa i kpii ney wi.

⁴⁴ Ghaa sə̂ loʼ ni bəghəm ngee abə ghaa ləghənə nə̀ ghə̂ ghə i fuu bə kɔʼlə mə tə̀ ghaa, kəŋə ndòw way kɔʼlə mey n nuu bənə n wɔ Zə̀ kə n nəŋə wi.

⁴⁵ Kə̂ ghaa nə̂ moʼlənə nə̀ a i loʼ mə, mə i dzanə tə̀ Bày nə̀ ghaa n bwu laŋ kə. Wù wey tə i dzanə tə̀ Bày nə̀ ghaa n bwu laŋ kə, loʼ Mushi wən ghaa â gaʼ fə̀ŋ tə ghaa tə n kow wi.

⁴⁶ Abə ghaa mə ndzəmə bəghəmnə tə̀ Mushi, ghaa mə bəghəm soʼo tə̀ mə̀, kuumnə ghəə ghey Mushi â tɔ̀ɔ naŋanə, tə â tɔ̀ɔ naŋa ghəə ghuŋ.

⁴⁷ Abə ghaa â way ni bəghəm ghəə ghey tə tɔɔ naŋanə, ghaa sə̂ loʼ ngee ni bəghəm ghɔɔmə zuŋ ə?”