Tùm i dzuŋu zə kuum Yeso Klisto tə Jɔn â tɔɔnə 4 - Kaa n Kəzə̀ n fəghə mə

Yeso ghi zən ə Samaria u loʼ wə

¹ Nghee tə̀ Yeso keeli tsunə nə̀ ghə̂ a tə Falasi ghə n zow nə̀ tə keeli kɔʼɔ ndòw tədzûmə n ndəm, fuu ghə n mmuu n Kəzə̀ mə tsəghəshi Jɔn.

² Â way dzə Yeso n wû u wi wə tə â fuunə mmuu n Kəzə̀ mə, â loʼ ngəd tə wi.

³ Tə sey zəghə tsunu Judeya, ndòw dzəŋŋə n Galili.

⁴ Tə n khə ni tsəghə tɔɔlə n mboʼo Samaria.

⁵ Nghee tə tsəghənə n Samaria, tə n ndòw bə n naʼa fə loʼ fə ghə â tɔŋŋənə nə̀ a loʼ Sika, i loʼnə n səə luʼu key Yakɔb â fuunə tə̀ waa wi, tɔŋŋə Yosef.

⁶ Buʼ kə mmuu kə Yakɔb kə n loʼ fu. Ambə nyi i kɔʼɔ təmi bənə, Yeso n bə doʼo tsu fu n səə buʼ kə mmuu key nə̀ tə n buu n bwey i wi.

⁷ Weyzən ə Samaria u loʼ wə n ndòw bə fu ni bə sìi mmuu, Yeso n dza tə̀ wi nə̀, “Fuu bə mə n mmuu mə tə̀ n mə̂.”

⁸ À n loʼ nə̀ ngəd tə wi tə mâ nuu nyi ndow n fə̀ŋ inaʼ ni ndow zuu ufəzəə.

⁹ Weyzən ə Samaria wey n dza tə wi nə̀, “Wə loʼ wu Juu, n lo zən ə Samaria, wə sə loʼ ngee ni nɔɔ mə n mmuu mə ə? Tə â dza sey boʼnə ghə̂ a Təjuu ghə â shiə dzɔbə way ghi ghə̂ a Samaria ghə.”

¹⁰ Yeso n beeli ndow wi dza nə̀, “Abə wə mə khənə ndzoʼo naamə key Zə̀ kə fuunə nsə ndzoʼo wù wey tə nɔɔnə wɔ n mmuu mə, wə mə fəd buʼ wi n wɔɔ kə nə̀ tə fu wɔ n mmuu mey n fuunə muu zə.”

¹¹ Weyzən wey n dza tə wi nə̀, “Mûkəbii, wə khə way fə kə ni sìi mmuu tii, buʼ kə n mmuu kə fɔŋŋə nyi tsunu, wə i kee ney bə ghee mmuu mən n fuunə muu zə ə?

¹² Wə tsəghəshinu ghə bày a ghey ghə tə a loʼ Yakɔb wən tə â funə ghey n buʼ kə n mmuu kən ə? Bày ghey Yakɔb â mə̂ mmuu n buʼ kən, waa a wi ghə mə̂ mmuu n buʼ kən, nyam tə wi tədzəm tə n mə̂ soʼo mmuu n buʼ kən.”

¹³ Yeso n beeli ndow wi nə̀, “Wù wey tə mə̂nə mmuu mən, fə̀ŋ ə mmuu i nam zuʼlə kənu wi.

¹⁴ Wù wey tə kee mə̂nə mmuu mey n fuunə tə̀ ghə, fə̀ŋ ə mmuu nə kəm zuʼlə koʼ way wi. N kuum dza bə tə̀ wɔ nə̀ mmuu mey mə i fuunə tə wi, mə i fəd doʼo tə̀ a loʼ sə̂ i dzuu zən i kuŋunə n kow ghə, fuu ghə n muu zə itsali zə.”

¹⁵ Weyzən wey n dza ndow tə̀ wi nə̀, “Mûkəbii, fuu bə mə n mmuu mey wə dzanə tə̀ n mə̂, kə̂ fə̀ŋ ə mmuu nə kəm zuʼlənə mə, mə i kəm bəghə way fa ni bə sìi mmuu.”

¹⁶ Yeso n dza ndow tə wi nə̀, “Ndow tɔŋɔ bə num wə, wə bə fa ghi wi.”

¹⁷ Weyzən wey n beeli ndow wi nə̀, “N khə way num.” Yeso n dza tə wi nə̀, “Wə dza isəŋə nghee wə dza tsunə nə̀ ‘N khə way num.’

¹⁸ Wə n ney shi num ghə ataa, wù wey wə muunə ghi wi nya, a way dzə num wə. Wə sey ndzəmə dza isəŋə.”

¹⁹ Weyzən wey n dza, “Mûkəbii, n koʼo tə̀ wə loʼ Wù Tûm Kəzə̀.

²⁰ Ghə bày a ghey ghə â ngɔɔmə tsə Kəzə̀ n kaʼ wən, ghaa ghə̂ a Təjuu, ghaa kee dzanə a may kə n Yerosalem a khənə ni ngɔɔmə Zə̀ kə.”

²¹ Yeso n dza ndow tə wi nə̀, “Iwaa, bəghəm ghəə zey n dzanə, nəŋə i bəghənu, ghə nə ngɔɔmə tənnə way Zə̀ kə fa n kaʼ wən nkee n Yerosalem.

²² Ghaa ghə̂ Samaria, ghaa ngɔɔmə Kəzə̀ nə̀ ghaa khə way wi, abə ghey ghə̂ a Təjuu, ghey ngɔɔmə Zə̀ key ghey khənə n təŋkey, bəghəshi i bəghə fa n mbi n bam i Təjuu.

²³ Nəŋə i kee bəghənu, zə n buʼ kpii, ghə̂ ghey ghə ndzəmə ngɔɔmənə Bày, zay K-a-zə̀ kə ghəŋŋə ghə nə̀ ghə i ngɔɔmə wi n jìi zey i loʼnə isəŋə, kuum nə̀, à wən loʼ ndzoʼo ghə̂ ghey Bày ləghənə nə̀ ghə i ngɔɔmə wi.

²⁴ Zə̀ kə loʼ kəzày, sey ghə̂ ghey ghə ngɔɔmənə wi, ghə khə ni teeli ngɔɔmə wi nə kəzay nsə n jìi zey i loʼnə isəŋə.”

²⁵ Weyzən wey n dza ndow tə̀ wi nə̀, “N khənu nə̀ bəghəshi i bəghənu. Abə wù wey Zə̀ kə â dza naŋa nə̀ i tûm bənu i bənə, tə i tiillə dza may bə aghəə adzəm tə̀ saa.”

²⁶ Yeso n beeli ndow wi dza nə̀, “Mə wən n ghɔɔmə bənə ghi wɔ, n loʼ wi.”

²⁷ Ngəd tə Yeso tə n ndow bə nə̀ Yeso n nam ghɔɔmə ghi weyzən wey, dzuu zə n ngii zum ghə ni koʼ nə̀ Yeso ghɔɔmə ghi weyzən wey. Wù ghə u loʼ wə n ka kee bəb kìi dzə wi n ghəə zə nə̀, “À loʼ kee fa a? À loʼ kee wə ghɔɔmənə ghi weyzən wən ə?”

²⁸ Sey, weyzən wey n naŋa sə tsu fə kə mmuu kə wi fu, nuu nyi ndow inaʼ, ndow dza tə ghə̂ ghə nə̀,

²⁹ “Bə koʼo na wù loʼ tə tiilə dza bənə mə n ghəə ghey n ghəŋə koʼ tsənə adzəm ə. I loʼ ni doʼo nə̀ a loʼ wù wey Zə̀ kə â dza naŋa nə̀ i tûm bənu ə?”

³⁰ Sey, ghə̂ ghən n zəghə tsu inaʼ, nuu ndow ni ndow koʼ Yeso.

³¹ Nghee tə weyzən wey loʼnə inaʼ, ngəd tə Yeso tə n kee loʼ n səə Yeso, buʼu kəwɔɔ tə̀ wi nə̀, “Wù dii wə, labi baʼ ndow tə̀ghə̀ mə?”

³² Tə n fəd beeli ndòw ghə nə̀, “N khə ufəzəə nə̀ ghaa khə way ghə i loʼ zə boʼ fəzəə u tii wə.”

³³ Ngəd tə wi tə n kaʼ ni ghɔɔmə n wû i ghə dza nə̀, “Wù loʼ mə kpaʼi bə fuunu wi n fəzəə wə ə?”

³⁴ Yeso n dza ndòw tə̀ ghə nə̀, “Fəzəə wuŋ u loʼ ni fwaʼ fwaʼ key wù wey tə tûm bənə mə, ləghənə nə̀ n fwaʼ, nsə ni mayyə fwaʼ key tə fuunə tə̀ mə nə̀ n fwaʼ.

³⁵ Ghaa mgbaŋa dza tsənu nə̀, ‘Abə ghə zəghə tsunə fəzəə wə, u doʼlə tsuu kə təndzɔŋɔ təkaykə ghə n kpey fən.’ N kee dza bə tə̀ ghaa nə̀, laalə tsəghə ndòw na sum zə, fəzəə wə n beyyə kpi ni kpey fən.

³⁶ Ghə tsəə dzɔbənu wù wey tə kpey fənənə fəzəə wə, fəzəə wey ghə ney fənə bənə loʼ aghə̂ ghə ney bənə n muu zə itsali. Sey nə̀, wù wey tə zəghə naŋanə nsə wù wey tə kpey fənənə, ghə i duʼlə dzəŋi.

³⁷ Sey ghɔɔmə zən i loʼnu isəŋə nə̀, ‘Wù loʼ zəghə tsu ufə̂, wù loʼ n bə kpey fən.’

³⁸ N tûm ghaa nə̀ ghaa ndòw kpey ufə̂ nə usum nə̀ a ka ghaa fwaʼ naŋa dzə, ghə̂ a loʼ ghə n fwaʼ naŋa, ghaa kee nyi bə kə ni bə zə̂ fə̂ wey ghə fwaʼ naŋanə.”

³⁹ Ndəmə ghə̂ a Samaria ghey ghə loʼnə n naʼ i tii zə n bəghəm tə̀ Yeso, n təŋkey, weyzən wey â dza tə̀ ghə nə̀, “Tə â tiilə dza bə ghəə ghey n loʼ nə̀ mə n ghəŋə koʼ tsə fa n mbi adzəm.”

⁴⁰ Ambə ghə̂ a Samaria ghey bə koʼ bənə wi, ghə n buʼ wi n wɔɔ kə nə̀ tə doʼo tsu n naʼ i ghə. Sey, Yeso n doʼo kpiʼi tsu ghi ghə ntsuʼu nbəghə.

⁴¹ Nghee tə ghə zownə ghɔɔmə i Yeso zə n tsuʼu mən, ndəmə aghə̂ ghə n kəm baa bəghəm kpiʼi tə̀ wi.

⁴² Ghə n dza tə̀ weyzən wey nə̀, “Ghey ka maŋ bəghəm dzə bòʼ ghɔɔmə zə, ghey bəghəm n təŋkey, ghey n baa zow ghɔɔmə i wi zə n wû i ghey zə, ghey u koʼ tsu soʼonə nə̀ wù wən ndzəm loʼ bəghəshi ə mbi.”

Yeso baŋə waa wù nii u loʼ wə

⁴³ Ambə tsuʼu mey nbəghə tsəghə tsunə, Yeso n nuu tsu fu n Samaria ndòw n Galili.

⁴⁴ Yeso n wû u wi u mâ dza nə̀, “Ghə ngɔɔmə tsə way Wù Tûm Kəzə̀ n naʼ i wi.”

⁴⁵ Ambə tə ndòw nyi ndòwnə n Galili, ghə̂ ghə n kpii ney dzɔb wi fu, n təŋkey, ghə mâ koʼ ghəə ghey tə â ghəŋənə n Zə̂ kə taa zaʼa kə n Yerosalem, bòʼ nə̀, ghə â loʼ soʼo n zə̂ kə tii kə.

⁴⁶ Nghee tə̀ Yeso bwey kaabənə n mboʼo Galili, tə n kəm ndòw dzəŋŋə n naʼ i Kana, n luʼu key tə â fəd kɔʼnə mmuu mə nə nlə. Wù nii u loʼ wə n loʼ fu nə̀ waa wi loʼ n Kapenum tə dzaŋanə.

⁴⁷ Ambə tə zow tsunə nə̀ Yeso n nuu bə n Judeya bə n Galili, tə n ndòw n səə wi, buʼ wi n wɔɔ kə nə̀ tə bə baŋŋə waa wi u nùm wə tə loʼnə n ghəə a kpuu ghə.

⁴⁸ Yeso n dza ndòw tə̀ wi nə̀, “N khənu nə̀ wù ghaa umɔʼ way ni bəghəm tə mə nə̀ tə ka koʼ dzə tsəə tə nsə n faalə mə.”

⁴⁹ Wù wey n dza tə̀ Yeso nə̀, “Mûkəbii, bəghə tə a zaŋŋə ndow kə̂ waa wuŋ nə kpuunə.”

⁵⁰ Yeso n dza ndòw tə̀ wi nə̀, “Ndòw, waa wə i muulənu.” Wù wey n bəghəm fuu ndòw tə̀ Yeso, nuu i ndòw.

⁵¹ Nghee tə nam ndòwnə n jìi, ghə̂ a kəfwaʼ a wi a loʼ ghə n nyəŋ bə dza bə tə̀ wi nə̀, “Waa wə n taw.”

⁵² Tə n bəb tə̀ ghə nə̀, “Wû u tii wə â zey ni buulə n nəŋə i ghaa zə.” Ghə n dza, “Â loʼ azɔy n nəŋə zə izow imɔʼ n tsə̀ tə wû wey â zəghə tsunə wi.”

⁵³ Bày waa wey n daŋŋə moʼlə bə nə̀ a wey bɔɔmə loʼ soʼo nəŋə zey Yeso â dzanə tə̀ wi nə̀, “Waa wə i muulənu.” Sey, wù nii wey ghi ghə̂ a ndaw a wi ghə adzəm ghə n bəghəm tə̀ Yeso.

⁵⁴ I zən a ghəŋə ndow tənəŋə təbəghə Yeso ghəŋŋənə faalə mə n Galili nə̀ tə nuu bə n Judeya.