Tùm i dzuŋu zə kuum Yeso Klisto tə Jɔn â tɔɔnə 12 - Kaa n Kəzə̀ n fəghə mə

Maria tsoʼlə Yeso nə mmbvə n Betani

¹ Ambə tsuʼu n doʼo səə tsunə ntuubə tə Zə̂ kə taa zaʼa kə ni bə, Yeso n ndow bə n naʼ i Betani, ndow n ndaw Lazarɔs wən tə â zhəm dzəŋŋə bənə nə ivə.

² Nghee ghə tsu doʼo tsu n nəŋə i fənə tə, fə a Yeso ghə n khəələ bə wi n fəzəə wə, Mata n dzawwə bə ufəzəə, Lazarɔs n kee doʼ dzəŋi ni zə̂ ghi Yeso.

³ Maria n ney kɔʼ sɔʼ mbvə n ləmmə dzɔbə mə nə̀ a loʼ tən kə mbvə n nad nə̀ wən i tii i ngii tawnu, feeli tsu n fuu i Yeso, ney kɔʼ nyuŋ tə kətow tə wi, zəd tsu fuu i wi tii. Zuʼ kə tii kə n dzoʼlə tsəghə kaabə ndow n ndaw idzəm.

⁴ Ngəd ə wi u loʼ wə tɔŋŋə Judas Iskariɔt, tə wən tə â khə ni fìi fuu Yeso n kee sənnə dza nə̀,

⁵ “Ghə mə way ni fìi mbvə mən n ndəmə ukhəə, ghə fu khəə u tii wə tə̀ ghə̂ a laa ghə ə? Wən zə mmbvə i tii zə â loʼ tə a loʼ khəə wey ghə loʼ ni tsə wù kəfwaʼ tii nə kənum.”

⁶ Tə â ka ghəə ghən dza dzə bòʼ nə̀ tə ngii ləghə ghə̂ a laa ghə, tə â sey dza bòʼ nə̀ tə â loʼ wù tsɔŋɔ. Â kwɔɔ keeli tsə wi mbəghə kə ukhəə kə, tə n tsəmə nyaʼi ney shiə tsə soʼo ukhəə tii ni zow ghəə a wi.

⁷ Yeso n kee dza nə̀, “Zəghə na weyzən wən! Zəghə na wi, tə sey tsoʼlə tən bə dzə mə n mbvə mey tə mə khə ni tsoʼlə mə tii n tsuʼ fey ghə i tsəllənə mə tii.

⁸ Ghaa nə̂ laʼ koʼ way ghə̂ a laa ghə n fəŋŋə kə ghaa, abə mə, n nə kee way dzə ghi ghaa nəŋə tədzəm.”

⁹ Ambə nɔɔ kə ghə̂ a Təjuu kə zow tsu nə̀ Yeso loʼ n Betani, ghə n ndow i bə ni bə koʼ Yeso nsə ni koʼ soʼo Lazarɔs wən Yeso â zhəm dzəŋŋə bənə nə ivə.

¹⁰ Sey, ghə fɔɔngili a nii ghə n kad tsu tsə̀m nə̀ ghə khə ni wey soʼo Lazarɔs tii.

¹¹ Ghə â kad tsəm ni wey soʼo Lazarɔs n təŋkey ndəmə ghə̂ a Təjuu ghə â nya zəghə maʼa dow ghə fɔɔngili a nii ghey, bəghəm fuu ndow tə Yeso bòʼ fwaʼ key Yeso â fwaʼnə n kow Lazarɔs.

Yeso nyi n Yerosalem tə̀ a loʼ kədə̀ŋ

¹² Tsətsə wey, nɔɔ kə aghə̂ key kə â bənə nə kəzə̂ n zow tsu nə̀ Yeso loʼ n jii tə bəghənə n Yerosalem.

¹³ Sey, ghə n ney kɔʼ utsəghə ndow ni kpii ney wi, fuu ukali n dzə̂ tə taw tə dza nə̀, “Kali u Kəzə̀! Zə̀ kə buulə wù wey tə bəghənə n zəd i Mûkəbii. Zə̀ kə buulə də̀ŋ kə naʼ zə Izree!”

¹⁴ Yeso n ney kɔʼ waa fə fənjakas, kɔʼ doʼo kɔʼ tii. Ghəə ghən n bɔɔmə bə shi kə ighələ tə̀ i tɔ̀ɔ doʼonə n màʼlə K-a-zə̀ nə̀,

¹⁵ “Ka na tsəŋ dzə a ghə̂ a Zayɔn ghə, Koʼo də̀ŋ kə ghaa kə key kə bəghənə, Nə̀ tə n kɔʼ doʼo n tow kə waa fə fənjakas.”

¹⁶ Ngəd tə wi tə n ka zowkeeli ghəə ghən n nəŋə i tii zə. Â loʼ kə nghee Yeso bə kpu tsunə, Zə̀ kə n zhəm nuu kɔʼ ndow wi idəŋ, ghə n daŋŋə taa mòʼlə bə ghəə ghən ghə â tɔ̀ɔ naŋŋə kuum wi. Ghə n moʼlə bə soʼo ghəə ghey ghə â ghəŋənə tə wi.

¹⁷ Nɔɔ kə aghə̂ key kə â loʼnə ghi Yeso n nəŋə zey tə â zhəm nuu shi bənə lazarɔs n say i wi, n ndòw naʼa nduŋŋə ndow ghəə a tii ghə.

¹⁸ À wən loʼ zuŋ kə ighəə key ndəmə aghə̂ â təŋŋə ndòwnə ni ndòw koʼ Yeso, n təŋkey, ghə mâ zow nə̀ tə ghəŋə ndzoʼo faalə kə ighəə kən.

¹⁹ Sey, ghə̂ a tə Falasi ghə n ghɔɔmə n wû i ghə dza nə̀, “Ghəə zən n saa tsəghəshi! Koʼo na, Ghə̂ adzəm a nya təŋŋə ndòw kə n baa wi!”

Ghə̂ ghən ghə way ghə̂ a Təjuu a kəŋə Yeso

²⁰ Ghə̂ ghən ghə way ghə̂ a Təjuu ghə n bə soʼo ni bə ngɔɔmə Kəzə̀ n Zə̂ kə taa zaʼa kə n Yerosalem

²¹ Ghə n bə koʼ bə Filip wən tə â nuu bənə n Bedsayda n mboʼo Galili, dza tə̀ wi nə̀, “Mûkəbii, ghey ləghə ni kò Yeso.”

²² Filip ndòw dza ndòw tə̀ Andria, ghə n dzəŋi ndòw dza ndòw tə̀ Yeso.

²³ Yeso n beeli ndòw nə̀, “Nəŋə zə n bə tə̀ waa wù sɔŋtsuʼ ni keeli kɔʼlə n nii mə.

²⁴ N dza bə isəŋə tə ghaa nə̀, abə sə̂ i səb i ka nyi tsu nə təzub, i kpu tsu, zə doʼlə kə sə̂ i səb. Abə i kee kpu tsunə, zə i fòw kɔʼ, i nyim kɔʼ, i bɔŋ bə ndəmə sə̂ asəb.

²⁵ Wù wey tə ləghənə muu i wi zə, tə i guŋŋənu muu i wi zə, wù wey tə fədlə baanə muu i wi zə fa n mbi, i fəd keeli muu zə itsali.

²⁶ Wù wey tə ləghənə ni doʼo wù kəfwaʼ wuŋ, khə ni dzûmə mə, nə luʼu key n loʼnə tii, wù kəfwaʼ wuŋ i loʼ sòʼo fu. Abə wù fwaʼanə tə̀ mə, Bày wuŋ n ngɔɔmə wù tii.”

Yeso dza zey və i wi

²⁷ Yeso n ndow n sə kə ni dza nə̀, “Fə̀ŋ nya ngii bàŋa mə. N kəm loʼ ni dza nə̀ ngee? N sə loʼ ni dza nə̀, ‘Bày, bəghəshi mə n nəŋə zən ə?’ Ngaŋ! N way ni dza sey, n təŋkey, a wey loʼ zuŋ key mə â bənə fa n mbi, nə̀ n bə fəghə n nəŋə i zən.

²⁸ Bày, dìi daʼa key zəd zə i khənə tə̀ ghə̂ a fuu nkɔʼlə tə wɔ.” Dzə̀ i loʼ zə n daŋŋə shi tsu bə idəŋ, dza nə̀, “Mə n dìi daʼa kuŋ kə, mə i nam dìi kpiʼinu.”

²⁹ Nɔɔ kə aghə̂ key kə â teynə fu n zow dzə̀ ə tii, dza nə̀ a kəmə ighow, a loʼ ghə n dza, “Tsəndəghə ə Kəzə̀ n ghɔɔmə tə wi.”

³⁰ Yeso n beeli ndow ghə nə̀, “Dzə̀ zən ka shi tsu bə dzə bòʼ mə, i shi tsu bə bòʼ ghaa.

³¹ Nəŋə zə n kpii tə̀ Zə̀ kə ni saʼ ghə̂ a mbi. À loʼ nya ghə i dzum maʼa shiənə Satan, tə loʼnə də̀ŋ kə mbi kə.

³² Abə ghə̂ ghə i ney nuu kɔʼnə mə fa aghəd, kɔʼlə naŋa kɔʼ mə n zat kə fəkaʼ, mə i zuŋŋə bə aghə̂ adzəm n tənə mə.”

³³ Tə â dza sey ni dii ndzoʼo jìi zey tə i kpuunə tii.

³⁴ Nɔɔ kə aghə̂ key n beeli ndow wi nə̀, “Laŋ kə ghey kə dza nə̀, Klisto nə kpu koʼ way tə̀ mbi nə bə may. A kee loʼ kee wə sə dzanə tə̀ ghey nə̀ ghə khə ni kɔʼlə kɔʼ dzə Waa wù sɔŋtsuʼ n zat kə fəkaʼ ə? Waa wù sɔŋtsuʼ wən wə baa dzanə fa, loʼ u ghaa wə ə?”

³⁵ Yeso n dza ndow tə ghə nə̀, “Daa kə i nam doʼlə kəŋŋə ndownu ghi ghaa n tɔŋɔ fə inəŋə. Bwey na nya ghaa khənə daa kə, nə̀ a way sey ləm kə i bwu kwɔɔlə ghaa. Wù wey tə bwey nə kələm khə way luʼu key tə ndownə tii.

³⁶ Nya wən ghaa nam khənə daa kə, bəghəm fu na tə wi, sey nə̀ ghaa loʼ ni doʼo bə waa a kədaa.” Ambə Yeso ghɔɔmə may tsu ghəə ghən, tə n zəghə tsu ghə, ndow nyì doʼo ndow nə̀ kə ghə nə koʼonə wi.

Ghə̂ a Təjuu a nam tuu kə ni bəghəm tə̀ Yeso

³⁷ Nghee tə Yeso â tsəm dii kə ndəmə ghəə a faalə ghə n sə kə ghə̂ a Təjuu, ghə n nam tuu ni bəghəm fuu tə̀ wi.

³⁸ Zə â loʼ sey ni luulə ghɔɔmə i Kəzə̀ zey wù tûm Kəzə̀ Ayzaya â tɔ̀ɔ naŋa nə̀, “Mûkəbii, a loʼ wù ghaa wə tə â bəghəm naŋanə ghɔɔmə i ghey zə ə? Â loʼ n wɔ wù ghaa wə Zə̀ kə â diinə daʼa kə wi kə n wɔ wi ə?”

³⁹ À wey loʼ ghə i tii zə ghə â way ni bəghəm fuu ghɔɔmə i tii zə kùm nə̀ wù tûm Kəzə̀ Ayzaya mâ dza naŋa soʼo nə̀,

⁴⁰ “Zə̀ kə n fəb naŋa sə̂ a ghə ghə̀, Tawwə naŋa fə̀ŋ tə ghə Nə kə ghə nə koʼo luʼu tə, Kə ghə nə zowkeeli soʼonə ghə i loʼ zə, Sey nə̀ kə ghə nə kweyyə nuu dzəŋŋə bənə n ghəə a ghə a bəbə ghə, ghə bə n səə mə, Tə n baŋŋə ghə.”

⁴¹ Ayzaya â dza sey kùm nə̀ tə mâ koʼ zey ghaʼ i Yeso zə, tə n dza naŋa bə aghəə bòʼ wi.

⁴² Nghee ghə̂ a Təjuu ghə â tuu kənə ni bəghəm fuu tə̀ Yeso, ndəmə ngəd tə ghə tə loʼ tə n nam bəghəm fu ndow tə̀ wi, ghə n kee tsəŋə ghaʼa ni dii shi ndow iwû nə̀ kə̂ ghə̂ a tə Falasi a nə dzum shiənə ghə n ndaw kədzəŋi ə ghə̂ a Təjuu.

⁴³ Ghə â tsəŋə bòʼ nə̀ ghə â ləghə ni keeli kɔʼlə mey ghə̂ a mbi ghə â fuunə, tsəghəshi kɔʼlə mey Zə̀ kə fuunə.

Zə̀ kə i saʼa ghə̂ ghey ghə ka bəghəm ghɔɔmə i Yeso

⁴⁴ Yeso n dza shi kɔʼ n dzə̀ i taw zə nə̀, “Wù wey tə bəghəm fu tə mə, tə ka kad bəghəm dzə tə̀ mə, tə bəghəm fuu soʼo tə̀ wù wey tə tûmnə mə.

⁴⁵ Wù wey tə koʼnə mə, tə n sey koʼ soʼo wù wey tə tûmnə mə.

⁴⁶ N bə fa n mbi tə̀ a loʼ kədaa, sey nə̀, wù wey tə bəghəm fuu dzə tə̀ mə, tə ka doʼo tən dzə nə kələm.

⁴⁷ Wù wey tə zow ghɔɔmə zuŋ zə, tuu ni ney naŋa, N way ni saʼ wi, n təŋkey, N ka bə dzə fa n mbi ni bə saʼ aghə̂, mə â bə ni bə bəghəshi ghə̂ a mbi.

⁴⁸ Wù loʼnu tə i saʼanə ghə̂ ghey ghə tuu maʼanə mə, tuu soʼo ni ney naŋa ghɔɔmə zuŋ, n təŋkey, a i loʼ ghɔɔmə zən i shi bənə n dzuu zuŋ, zə i saʼanə ghə n tsuʼ fey mbi i maynə tii.

⁴⁹ N ka ghəə ghən ghɔɔmə shi bə dzə n daʼa kuŋ, a loʼ Bày wuŋ wən tə tûm shi bənə mə, tə fuunə mə n laŋ kə n ghəə zey n khənə ni dza nsə jìi zey n khənə ni ghɔɔmə tii.

⁵⁰ N khənu nə̀ laŋ kə wi kə ghəŋŋə aghə̂ nə̀ ghə i khə muu zə itsali zə. Ghəə ghey n ghɔɔmənə, N bɔɔmə ghɔɔmə kə nghee tə Bày â dza bənə tə̀ mə.”