Tùm i dzuŋu zə kuum Yeso Klisto tə Jɔn â tɔɔnə 11 - Kaa n Kəzə̀ n fəghə mə

Yeso zhəm dzəŋŋə bə Lazarɔs nə ivə

¹ Wù loʼ â loʼnu ghə â tɔŋŋənə nə̀ a loʼ Lazarɔs, tə n bə bwu tsu idzaŋ. Lazarɔs â loʼ n Betani, tə n muu fu ghi waazə a wi ghə abəghə Maria nsə Mata.

² Maria wən loʼ weyzən wey tə â tsoʼlənə fuu i Mûkəbii Yeso zə n mbvə n ləmmə mə, zəd maʼa tsu fuu i wi n nyuŋ tə kətow tə wi. Â loʼ waazə ə wi Lazarɔs tə â dzaŋanə.

³ Sey waazə a Lazarɔs a zən ghey n tûm tsu tûm tə̀ Yeso nə̀, “Mûkəbii, wù fə wə wey wə ngii ləghənə, tə dzaŋanu.”

⁴ Ambə Yeso zow tsunə sey, tə n dza nə̀, “Dzaŋ zən i ghəŋə dzə way nə̀ Lazarɔs kpu. Dzaŋ i tii i loʼ ni dii daʼa K-a-zə̀ nsə ni ghəŋə nə̀ ghə̂ a loʼ ni fuu nkɔʼlə tə Waa Kəzə̀.”

⁵ Yeso â ngii ləghənu Mata, waazə ə wi Maria nsə Lazarɔs.

⁶ Nghee tə̀ tə zow tsunə nə̀ Lazarɔs dzaŋanu, tə n fəd doʼo kpiʼi tsu ntsuʼu n bəghə n luʼu key tə â loʼnə tii.

⁷ Ambə tsuʼu n tsəghə tsunə nbəghə, tə n dza tə̀ ngəd tə wi tə nə̀, “Bə̀ na a ndòw dzəŋŋə n Judeya.”

⁸ Ngəd tə wi tə n dza tə̀ wi nə̀, “Wù dii wə, ghab kə ka kam shi nghee tə ghə̂ a Təjuu ghə â dza i təmmə wey wɔ nə atay, wə u nam ləghənə ni ndòw dzəŋŋə fu ə?”

⁹ Yeso n dza ndòw tə̀ ghə nə̀, “Luʼu tə zow tə khə nəŋə tə izow ighəm n ghii tə təbəghə nə fətsuʼ. Abə wù bweynə n tsə̀, tə way dzə ni tàŋŋə bwu, n təŋkey, tə koʼo təluʼu n daa kən fa n mbi.

¹⁰ Abə wù kee bweynə n tsuʼu tə, tə loʼ ni taŋŋə bwu, n təŋkey, daa kə way.”

¹¹ Ambə Yeso dza tsunə ghəə ghən, tə n kəm dza tsu nə̀, “Fə ə sa Lazarɔs bweelinu, n kee ndòw zhəm nuu kɔʼɔnu wi.”

¹² Ngəd tə wi tə n beeli ndòw wi nə̀, “Mûkəbii, abə a loʼ nə̀ tə bweelinu, tə i nuulə kɔʼɔnu.”

¹³ Yeso â sey dza nə̀ Lazarɔs n kpu, ngəd tə wi tə n kee dza kə nə̀ tə ndzəmə bweelinu.

¹⁴ Sey, Yeso n baa shi bə tsətsəghə, dza dzî ndòw tə̀ ghə nə̀, “Lazarɔs n kpu.

¹⁵ N duʼlə fuunu tə̀ ghaa nghee n mə way fu, sey nə̀, ghaa i bəghəm fu tə̀ mə. Kee bə na tə̀ a nuu.”

¹⁶ Tɔmɔs, ghə â tɔŋŋə nə̀ à loʼ Ngɔŋmbaa n dza tə̀ ngəd tə loʼ tey nə̀, “Bə̀ na a ndòw ghi wù dìi, nə̀ a loʼ kə ivə, saa i dzəŋŋə kpu ndòw ghi wi.”

Yeso kuu fə̀ŋ ə waazə a Lazarɔs

¹⁷ Ambə Yeso ndòw kùm tsunə n Betani, tə n kəŋ keeli shi kɔʼ nə̀ Lazarɔs n doʼo tsuʼu mə nkaykə nə isay tə̀ ghə â tsələnə wi.

¹⁸ Ni nuu tsu n Yerosalem ndòw kùm n Betani, a loʼ ni doʼo tə̀ a loʼ tam tə jii tətəghə.

¹⁹ Ndəmə ghə̂ a Təjuu a mâ bə ni bə kuu fə̀ŋ ə Mata nsə Maria n və i waazə ə ghə.

²⁰ Ambə Mata zow tsunə nə̀ Yeso nya bəghənu, tə n nuu ndòw ni ndòw kpii ney wi, Maria n kee doʼo səə tsu kə n ndaw.

²¹ Nghee tə̀ Mata kpiilə ndòwnə ghi Yeso, tə n dza tə̀ wi nə̀, “Mûkəbii, abə wə̀ â loʼnə fa, waazə wuŋ mə ka kpu.

²² N kee khənu nə̀ Zə̀ kə loʼ ni nam fu wɔ n fə key wə bəbnə, abə wə bəb kə kee kə.”

²³ Yeso n dza tə̀ wi nə̀, “Waazə wə î kəm zhəm dzəŋŋə bənu nə ivə.”

²⁴ Mata n dza, “N khənu nə̀ tə î zhəm dzəŋŋə bənu n tsuʼ fey mbi î maynə tii.”

²⁵ Yeso n dza ndòw tə̀ wi nə̀, “À loʼ mə n zhəm dzəŋŋə nə ghə̂ ghə nə ivə, a loʼ mə n fuu soʼonə muu zə. Wù wey tə bəghəmnə tə̀ mə, abə tə kpu kənu, tə î keeli imuu.

²⁶ Ghə̂ ghey adzəm ghə bəghəm nə tə̀ mə, nə kpu koʼ way. Wə bəghəmnu ghəə ghən ə?”

²⁷ Mata n bəghəm dza nə̀, “Ow a Mûkəbii! N bəghəmnu nə̀ wə loʼ wù wey Zə̀ kə â dza naŋa nə̀ i tûm bənu, Waa Kəzə̀ wən tə â khənə ni bə fa n mbi.”

²⁸ Ambə Mata ghɔɔmə may tsunə sey, tə n nuu dzəŋŋə i ndòw, ndòw koʼ tsu waazə ə wi, tɔŋŋə Maria, tsɔŋ dza tsu tə̀ wi nə̀, “Wù dii loʼ fa, tə ləghə ni koʼ wɔ.”

²⁹ Nghee tə̀ Maria zow tsunə sey, tə n daŋŋə ghaʼ nuu kɔʼ, nuu shi ndòw ni ndòw koʼ wi.

³⁰ À n loʼ nə̀ Yeso ka kam bə nyi dzə inaʼ, tə â nam loʼ n luʼu key Mata â kpiilə tii ghi wi.

³¹ Ambə ghə̂ a Təjuu ghey ghə â loʼnə n ndaw, kuu fə̀ŋ ə Maria, koʼ tsunə nghee tə ghaʼ nuu kɔʼnə tii, tsəghə shi ndòw bii, ghə n dza kə nə̀ tə dza i sey ndòw n dzuu zə isay ni ndòw dey. Sey ghə n dzûmə ndòw wi.

³² Nghee tə̀ Maria bə kùm tsunə n luʼu key Yeso loʼnə tii, koʼ ndòw wi, tə n təm ndòw tənguʼ n tənə Yeso dza tə̀ wi nə̀, “Mûkəbii, abə wə â loʼnə fa, waazə wuŋ â ka kpu dzə.”

³³ Nghee tə̀ Yeso koʼ ndòwnə wi tə̀ deynə, koʼ ndow soʼo ghə̂ a Təjuu ghey ghə â loʼnə ghi wi ghə deynə, ghə i tii zə n mɔm nay ndòw wi, tə n khə kəfəmmə n fə̀ŋ.

³⁴ Tə n bəb tsu nə̀, “Ghaa â tsələ ghee wi ə?” Ghə n beeli dza, “Mûkəbii! Bə koʼo!”

³⁵ Yeso n dey.

³⁶ Nghee tə̀ ghə̂ a Təjuu ghey koʼ tsunə Yeso tə deynə, ghə n dza nə̀, “tə â baa ləghənu Lazarɔs!”

³⁷ À loʼ ghə n kee dza, “N dza a mgbaŋ loʼ wi tə â ghəŋənə nə̀ ghə̂ a fəbə ghə i koʼo luʼu tə ə? Tə mə way ni ghəŋə nə̀ tə ka kpu ə?”

Yeso zhəm dzəŋŋə bə Lazarɔs nə ivə

³⁸ Yeso n kəm ngii keeli ifəmmə n fə̀ŋ nghee tə bənə nə isay. Say i tii zə â loʼ kəbuʼ ghə kpeyyə nyi ndownə nə kənaa. Tay i nii zə n tsəd naŋa dzuu zə isay i tii zə.

³⁹ Tə n dza nə̀, “Bəŋŋə nuu tsu na tay zey.” Mata, waazə ə wù kpu wey n dza ndow tə wi nə̀, “Mûkəbii, a nya loʼ ntsuʼu nkaykə tə̀ ghə â tsələnə wi, tə nya i ngii lə̀mə nu.”

⁴⁰ Yeso n dza nə̀, “N ka dza tə wɔ nə̀ abə wə khənə bəghəm i fə̀ŋ zə, wə i koʼ ghaʼ i Kəzə̀ ə?”

⁴¹ Sey, ghə n bəŋŋə nuu kɔʼ tay i tii zə. Yeso n laalə kɔʼ ndow idəŋ, gɔŋŋə tsu nə̀, “Bày, n fu zɔŋŋə kə nə̀ wə n mə zow.

⁴² N khənu nə̀ wə zow tsənu gɔŋŋə zuŋ zə, n kee dza bə i zən bòʼ ghə̂ ghən ghə teynə fa, nə ghə bəghəm nə̀ a loʼ wɔ wə tûmnə mə.”

⁴³ Ambə tə dza may tsunə sey, Yeso n dza shi kɔʼ n dzə̂ i taw zə nə̀, “Lazarɔs, shi bə!”

⁴⁴ Wù kpu wey n nuu shi bə fu nə ndzə̂ tey ghə â tsələnə wi tii nam bàŋ doʼo kə n wû u wi, wɔɔ wi, fu i wi nsə tûm usə̂ u wi. Yeso n dza tə̀ ghə nə̀, “Ziilə nu na ndzə̂ tə isay tey n kow wi, ghaa zəghə wi, tə ndow nuu.”

Ghə kad tsəm ni wey Yeso

⁴⁵ Ndəmə ghə̂ a Təjuu ghey ghə â loʼnə ghi Maria n koʼ soʼo ghəə zey Yeso ghəŋənə, ghə n bəghəm fu tə̀ wi.

⁴⁶ Ghə̂ a loʼ ghə n kee ndow dza ndow ghəə zey Yeso ghəŋŋənə tə̀ ghə̂ a tə Falasi ghə.

⁴⁷ Sey, ghə fɔɔngili a nii ghə ghi ghə̂ a tə Falasi ghə n tɔŋɔ tsu dzəŋi kə ndaw tsə̀, ghə n bəbə n wû i ghə nə̀, “A i jiə tsu ngee ghi Yeso wən ə? Tə nya ngii dii ndəmə ghəə a faalə ghə!

⁴⁸ Abə saa zəghə tsunə wi nə̀ tə ndòw kə n sə kə ni ghəŋə ghəə ghən, aghə̂ adzəm ghə i bəghəm fuu tə̀ wi. Sey, ghə̂ a Roma ghə i bə saʼ maʼa dzəŋi kə dzûmə tə Klisto ə saa i nii zə, ghə saʼ maʼa soʼo naʼ i saa.”

⁴⁹ Wù ghə umɔʼ, tɔŋŋə Kayfas, tə â loʼnə fɔɔngili u nii nii wə n num kə tii kə, n ghɔɔmə shi kɔʼ nə̀, “Dzəŋsə u fə wən!

⁵⁰ Ghaa ka koʼ nə̀ zə i gaamənu ghaa abə wù umɔʼ kpu n tow kə ghə̂ adzəm tsəghəshi tə̀ naʼ i Təjuu zə idzəm ni ləŋi ə?”

⁵¹ Tə â ka dza dzə ghəə ghən n daʼa kə wi kə ngəŋ kə, â loʼ n təŋkey, tə â loʼ fɔɔngili u nii nii wə n num kə tii kə. Sey, tə n dza zey bə nə̀ Yeso khə ni kpu n tow kə naʼ i ghə̂ a Təjuu.

⁵² Tə n dza zey soʼo nə̀, Yeso i kad kpu kə way n tow kə naʼ i Təjuu, a i loʼ soʼo ni zuŋŋə dzəŋŋə bə waa a Kəzə̀ ghey ghə saŋŋə doʼo kaabənə n badla tə mbi tədzəm.

⁵³ Ni ney nuu tsu n tsuʼ fə tii fə ndow isə, ghə fɔɔngili a nii ghə ghi ghə̂ tə Falasi ghə n kad naŋa tsu tsəm ni wey Yeso.

⁵⁴ Sey, Yeso n kəm bwey kaabə way n mgbaŋ n fəŋŋə kə ghə̂ a Təjuu. Tə n fəd nuu ndow n naʼa fə loʼ fə ghə â tɔŋŋə nə̀ à loʼ Efrem, fə loʼnə n bad kə mbvən ə ntsaŋ, muu doʼo ndow fu ghi ngəd tə wi tə.

⁵⁵ Ambə nəŋə i Zə̂ kə taa zaʼa kə ghə̂ a Təjuu kə kuʼlə bənə, ndəmə aghə̂ ghə n zəghə tsu naʼa tə ghə, kɔʼ ndow n Yerosalem ni sòw tsu iwû nə̀ ghə i zow tə̀ laŋ kə diinə, ni zə̂ Zə̂ kə taa zaʼa kə.

⁵⁶ Ghə̂ a Təjuu ghə n kəŋə kii kaabə tsə Yeso fu tii, ambə ghə sə tey kaabənə n ndaw Kəzə̀ i nii zə, ghə n bəbə n wû i ghə nə̀, “Wə moʼlə nə̀ ngee? À fiilə kə sa tə̀ wù wən i bə way n zə̂ kən.”

⁵⁷ À n loʼ sey nə̀ ghə fɔɔngili a nii ghə ghi ghə̂ a tə Falasi ghə n tsəʼlə laŋ kə nə̀ abə wù loʼ koʼ tsunə luʼu key Yeso loʼnə tii, tə bə dza fu bə, tə ghə ndow kwu wi.