Jems 5 - Kaa n Kəzə̀ n fəghə mə

Ghə̂ a kûm a ney ighə̂mə

¹ Ghaa ghə̂ a kûm ghə, dey na, ghaa bwɔd wû i ghaa n ngoʼ zey i bəghənə n kow ghaa.

² Kûm i ghaa i nya may ndownu, səsoʼo tə a fəə soʼonə ndzə̂ tə ghaa tə.

³ Tsaʼ tə ishɔ̀lɔ̀ nsə tsaʼ tə itsaa tə ghaa tə n dzî doʼo. À loʼ dzî tə tii tə, tə i dza fuunə ghaa nə̀ ghaa taw n wɔɔ ghə, tə i fə wû i ghaa tə a loʼ uvəllə. Ghaa maŋa zuŋŋə kəŋŋə bə khəə mən n tsuʼu mən mbi may bənə tii kənunu.

⁴ Koʼo na, ghə̂ ghey ghə â fwaʼnə n sum i ghaa, ghaa n ka tsə ghə, ghə nya deynu bòʼ khəə n ghə mey ghaa â kwu naŋanə. Mûkəbii zaamə mbi n zow dey i ghə zə.

⁵ Ghaa zəələ kɔʼ bə wû i ghaa zə ni muu fa n mbi, ghəŋŋə ghəə zey fə̀ŋ tə ghaa tə ləghənə. Ghaa maŋ chi kɔʼ bə wû i ghaa, dow dzɔb i tsu tə a loʼ mbɔŋɔlɔʼ zey ghə chi naŋanə ni wey fə.

⁶ Ghaa tsəʼlə saʼ n kow aghə̂, wey daŋŋə ghə, nə̀ ghə ka ghəə i bəbə i loʼ i ghəŋə dzə. N ghəə ghən ghaa ghəŋənə tə ghə, ghə ka zuu dzəŋŋə dzə.

Abə ghə̂ a tsəmə fəʼlə kənu, ghə i kow tsu fə̀ŋ

⁷ Waazə ghə, kow tsu kə na fə̀ŋ tə ni ndow kùm n nəŋə zey Mûkəbii i bəghənə tii. Ghaa koʼonu nghee tə wù usum kow tsunə fə̀ŋ tii ni ləmə kəŋə ndow nə̀ sum u wi u fuu bə wi n fəzəə wə. Tə kow tsu kə fə̀ŋ sa, ghow zə n tsu kəŋə ndow sa tə̀ num i bən bə tii, fəzəə wə n fən nyi bə.

⁸ Kôw tsu soʼo na fə̀ŋ tə ghaa tə, ghaa təmi taw tsu, n təŋkey, bə i Mûkəbii zə n shɔd.

⁹ Waazə ghə, kə ghaa nə̂ bəghəm nə̀ zuu zə i shiə n fəŋŋə kə ghaa, nə à way sey Zə̀ kə i saʼ ghaa. I loʼ sey n təŋkey, nəŋə i wù wey tə i saʼanə mbi zən ni bə n shɔd.

¹⁰ Waazə ghə, koʼo na nghee tûm tə Kəzə̀ tən tə â naʼlənə ghəə ghə n zəd i Mûkəbii â fəghənə tii. Ghə â kow fə̀ŋ n ngoʼ zey ghə â zownə. Dzûmə na ghow kə ibwey kə ghə kə.

¹¹ Ghaa mgbaŋ khənu nə̀ Zə̀ kə buulənu ghə̂ ghey ghə kownə fə̀ŋ. Ghaa mâ zow nghee tə Job â kownə fə̀ŋ tii, ghaa n koʼ soʼo ghəə ghey Zə̀ kə â ghəŋənə tə wi. À wən loʼ ni dii tsu nə̀ Zə̀ kə ngii khə fə̀ŋ i dzuŋu zə nsə sî i kwɔɔlə zə.

¹² N ghəə ghən adzəm a waazə ghə, kə ghaa nə kàanə n fə̂ kə loʼ kə, kə loʼ idəŋ nkee fa mbi. Kə ghaa nə tsəmə kàanə n zəd i fə kə loʼ kə. Təmi taw tsu kə na nə isəŋə, nə̀ ghaa bəghəm ighəə, ghaa sey bəghəmnu, nə̀ ghaa tuu maʼa ighəə, ghaa sey tuunu. Abə ghaa ka ghəŋə sey, Zə̀ kə i saʼ ghaa.

Daʼa key gɔŋŋə i khənə

¹³ Abə wù loʼ loʼnə n fəŋŋə kə ghaa tə fəʼlənə, tə n gɔŋŋə ndow tə̀ Zə̀ kə. Nə̀ wù loʼ, loʼ n fəŋŋə kə ghaa fə̀ŋ ə wi duʼlənə, tə n fuu kali u Kəzə̀ nə izhim.

¹⁴ Nə̀ wù loʼ, loʼ n fəŋŋə kə ghaa tə dzaŋanə, ghaa n tûm tɔŋɔ bə ngəd tə dzûmə tə Klisto, ghə n bə gɔŋŋə tsu n tow kə wi, tsoʼlə tsu wi nə mmbvə n zəd i Mûkəbii.

¹⁵ Gɔŋŋə zey ghə i gɔŋŋə tsunə n bəghəm i fə̀ŋ, i ghəŋŋə nə̀ wù dzaŋa tii taw doʼo bə. Mûkəbii i ney nuu dzaŋ i tii zə. Nə̀ wù tii â ghəŋə bəəbə ghə i loʼ zə, Mûkəbii i neyzəə bəb i wi.

¹⁶ À wey loʼ ghə i tii zə ghaa khə ni dza tiilə ghəə a bəbə ghey ghaa ghəŋŋənə n wû i ghaa, gɔŋŋə tiilə soʼo n tow u ghaa sey nə̀, Zə̀ kə loʼ ni baŋŋə ghaa. N dza sey n təŋkey, gɔŋŋə i wù wey tə loʼnə tsətsəghə khə kədaʼa, ndzəmə fwaʼa soʼo.

¹⁷ Elayja â ngəŋŋə loʼ soʼo wù sɔŋtsuʼ tə a loʼ saa, ambə tə gɔŋŋə tsunə n fə̀ŋ ə wi idzəm nə kə ghow i nə tsuunə, zə n bɔɔmə doʼo sey. Ghow zə n ka tsu n ghəlitsə kə tii kə nə tənum tətəghə n bad kə.

¹⁸ Tə n kəm gɔŋŋə i tsu, bikighow kə fuu tsu bə ighow, fəzəə mə n kəm kaʼ ni nyîmmə a ghəlitsə.

¹⁹ Waazə ghuŋ ghə, abə wù ghaa u loʼ u ney dzəŋŋə bənə wù wey tə nyəŋə laʼa ndownə n jìi zey i way isəŋə,

²⁰ wù tii keeli tsu nə̀, wù wey tə ghəŋənə nə̀ kə wù bəbə nə nyəŋə laʼa ndownə, i bəghəshiə tow kə wù bəbə tii nə ivə, tə ghəŋə soʼo nə̀ Zə̀ kə neyzəə ghəə a wi a bəbə ghey tə loʼ nə̀ tə n ndəŋ ghəŋə.