Jems 4 - Kaa n Kəzə̀ n fəghə mə

Fuu nyi may ndow na wû i ghaa zə tə Zə̀ kə

¹ À loʼ kee ghaa bwɔdlənə ngəd wə, zuulə ballə soʼo n wû i ghaa a? À loʼ ləghə zən ghaa khənə n fə̂ u mbi u fəmənə ghaa n fə̀ŋ tə ghaa.

² Ghaa ləghə ni keeli ufə̂, ambə ghaa dəm kìi tsunə ni keeli fə̂ u tii wə, ghaa n loʼ tə̀ ghaa i wey wù n ghə i tii zə. Ghaa mbuŋŋə ni ney keeli fə̂ wey ghə̂ a loʼ a khənə, ghəə a tii ghə a ghəŋŋə nə̀ ghaa i zuulə n wû i ghaa, bwɔdlɔ soʼo ungəd ni keeli fə̂ u tii wə. Ghaa way ni keeli fə̂ wey ghaa mbuŋŋənə ni keeli n təŋkey ghaa nɔɔ ndow way n wɔ Zə̀ kə.

³ Abə ghaa buʼ nɔɔ kənu, ghaa way ni keeli təŋkey ghaa nɔɔ n moʼlə tə bəbə tə n fə̀ŋ tə ghaa. Ghaa nɔɔ fə u tii wə ni ghəŋŋə ghəə ghey a kpiilənə tə ghaa.

⁴ Ghə nəb ityim tə a loʼ ghaa! Ghaa khə way nə̀ abə ghaa ngii gaʼnə fə̀ŋ n fə u mbi, i sey dii nə̀ ghaa loʼ ghə̂ a təngəmə tə Zə̀ kə ə? Keeli tsu na nə̀, ghə̂ ghey ghə ləghənə fə u mbi wə, ghəŋŋə wû i ghə nə̀ ghə doʼo ghə̂ a təngəmə ghi Zə̀ kə.

⁵ Ghaa moʼlə nə̀ à maŋ loʼ kənunu i tɔ̀ɔ doʼonə n màʼlə K-a-zə̀ nə̀, “Zə̀ kə ngii ləghənu Zay key tə kuu naŋanə n kow saa.”

⁶ À kee loʼ nə̀ Zə̀ kə n fuu saa n ndzuŋ ə wi naʼ idzəm nə̀ kə moʼlə tə saa tə bəbə tə nə taw tsəghənə saa. À wey loʼ ghə i tii zə i tɔ̀ɔ doʼo n màʼlə K-a-zə̀ nə̀, “Zə̀ kə tsuulə tsu ndzə̂ ə wù wən tə ghaŋŋənə wû wə, kee dii ndzuŋ ə wi tə wù wən tə zuŋ tsunə wû u wi wə.”

⁷ À sey loʼ nə̀, ghaa khə ni zuŋu tsu wû i ghaa zə n tənə Kəzə̀. Kə ghaa nə̂ bəghəm nə̀ vəətsəə a taw tsəghə ghaa, sey, vəətsəə a tii ghə i tyi zəghə tsu ghaa.

⁸ Səŋ kəŋə bə na n səə Kəzə̀, Zə̀ kə i səŋ kəŋə bə soʼo n səə ghaa. Shiələ nuu na wɔɔ a ghaa ghə n ghəə a bəbə ghə, ghaa ghən ghaa ghəŋŋənə ghəə a bəbə ghə. Ghaa sow maʼa soʼo fə̀ŋ tə ghaa ghə nəb ityim.

⁹ Ghaa khə ni mow, dey soʼo wû i ghaa. Ghaa khə way ni tsoʼlə, ghaa khə ni fədlə dey. Ghaa khə way ni duʼlə, ghə khə ni fədlə muŋi.

¹⁰ Zuŋ tsu na wû i ghaa zə n sə̂ kə Mûkəbii, sey, tə i kɔʼlə naŋa kɔʼ ghaa.

À loʼ kə wù umɔʼ tə saʼanə ghə̂ ghə

¹¹ Waazə ghə, kə ghaa nə khəə fəghəm tə n wû i ghaa. Wù wən tə khəənə fəghəm tə n tow kə waazə nkee saʼa wi, tə sey kii maʼa kəlaŋ, saʼa soʼo. Abə wə saʼa laŋ kə, wə sey way dzə wù wey wə naŋŋənə laŋ kə, wə fəd loʼ wù wey wə kii maʼlənə laŋ kə.

¹² À loʼ kə Kəzə̀ kə fuunə laŋ kə, saʼa soʼo aghə̂. À may kə wi tə loʼ ni bəghəshi aghə̂, à may kə wi soʼo tə loʼnə ni ləŋi maʼa aghə̂. À kee fuu ndee wɔ n daʼa kə ni saʼa ghə̂ a loʼ ghə ə?

Kə ghaa nə tsɔbə fə̀ŋ nə ighəə

¹³ Ghaa zow na, ghaa ghən ghaa tsɔbənə fə̀ŋ tə nə̀, “Na nkee tsətsə ghey i ndow fey n naʼ i zey nkee n naʼ i zən, ghey doʼo kəŋə ndow kənum fu tii, ghey ghəŋə kəŋə ndow kə bikiwən, ghey keeli ndəmə ukhəə.”

¹⁴ Ghaa ghaŋŋə iwû sey nə̀ ghaa bùʼ khə way nghee tə muu i ghaa zə i loʼnə tii tsətsə. Ghaa maŋ loʼ tə a loʼ dəm k-a-nyoʼ kən kə shiə kɔʼɔ bənə, ghab kə n ka shi nə̀ kə n ghaʼi saŋ nuu.

¹⁵ Ghaa mə khə ni dza nə̀, “Abə Mûkəbii kpaʼi bəghəmnə, ghey i muu, ghey ghəŋə ndow ghə i zən nkee i zey.”

¹⁶ A fa loʼ nə̀ ghaa fəllə ghaŋŋə iwû n fwaʼa tə ghaa tən ghaa moʼlənə ni fwaʼ. Abə ghaa ghaŋŋənə wû zə sey, ghaa sey ghəŋŋə ghəə a bəbə ghə.

¹⁷ Keeli tsu na nə̀, abə wù khənə nə̀ à wən loʼ ghəə zey i kpiilənə ni ghəŋə, tə ka ghəŋə ghə i tii zə, wù tii n sey ghəŋə bəəbə.