Jems 3 - Kaa n Kəzə̀ n fəghə mə

Saa ney ighə̂mə n nyim kə saa kə

¹ Waazə ghə, kə ndəm ə ghaa nə mbuŋŋənə ni doʼo ghə̂ a dii ghə, n dzəŋi kə dzûmə tə Klisto, n təŋkey, ghaa khənu nə Zə̀ kə i saʼa ghey ghən ghey diinə tsəghəshi ghə̂ a loʼ ghən.

² I loʼ nə̀, saa adzəm nɔʼɔnu n ndəmə təjìi. À kee loʼ nə̀ wù wey tə loʼ ni doʼo nə̀ tə nɔʼɔ koʼo tsə way ghəə zey tə dzanə, tə loʼ wù tsətsəghə, dii tsu nə̀, tə loʼnu ni tɔʼ kwu keeli soʼo wû u wi.

³ Saa dzəŋŋə kɔʼɔ tətsaʼ n dzuu i kəkhinyam ni ghəŋŋə nə̀ kə i bwey ndow n jìi zey saa ləghənə tii. Sey saa n loʼ ni bwey n ghii kə kədzəm tə̀ saa ləghənə.

⁴ Nkee, ney kɔʼ na fən kə nii kən kə bweynə n naali kə dzuu. Kə bwey ndow nə̀ à tənnə ndow zəŋ ghii kə, a kee loʼ nə̀ wù wey tə sìinə, maŋa mɔm tsu kə nyaŋi fə kəvuʼ, n kə bɔɔmə nuu ndow n bad key tə ləghənə nə̀ kə ndow tii.

⁵ I loʼ soʼo sey ghi nyim kə. Kə təbə sey, a kee loʼ nə̀ ghəə a wi a ghəŋŋə a downu. Ney kɔʼ na kaʼ u nii wə, u loʼ ni fə̂ tsuulə tsu nə a loʼ kə dzaŋa fə kəgboo fəmɔʼ.

⁶ Nyim kə bɔɔmə loʼ soʼo tə a loʼ uvəllə. N badla tə uwû tə wù tədzəm, nyim kə loʼ zuŋ kə ghəə a bəbə ghən fa n mbi. Kə ney bə ghəə a bəbə ghə n wû u wù udzəm, kə bəəbə maʼa may tsu muu i wù n uvəllə, wû u wi, tə n fə daŋŋə kɔʼ soʼo tii n bùʼ kə Satan.

⁷ Ghə̂ a loʼnu ni nyiələ lii tə tənyam tədzəm tə a loʼ nnən, nyam tən tə ghaŋŋənə nsə nyam tən tə muunə n dzuu.

⁸ A kee loʼ nə̀ wù sɔŋtsuʼ u loʼ u way tə loʼnə ni kwu keeli nyim kə wi. Nyim kə loʼ fə kə bəbə kə, chɔdlɔ tənə tsə kə nəŋə tədzəm, kə loʼ tə a loʼ nəb, i loʼ ni wey wù.

⁹ Saa ney kənyim saa n fuu nkɔʼlə tə Mûkəbii saa nsə Bày saa. À loʼ nyim kə mɔʼɔ kə, saa tsɔɔmənə ghə̂ ghən Zə̀ kə bɔmnə nə̀ ghə i loʼ tə a loʼ wi.

¹⁰ I sey dii nə̀ ghaa ney dzuu i mɔʼɔ zə, kɔʼlə Kəzə̀ tii, tsɔɔmə soʼo aghə̂ tii. Waazə ghə, n moʼlə nə̀ à way dzə ghə i dzuŋu zə.

¹¹ Muu n dzəə mə nsə muu n zow mə n way ni dzəŋi bənə shiə kɔʼɔ bə nə kəbənə kəmɔʼ.

¹² Waazə ghə, nghee tə i loʼ nə̀ kaʼ fə angəm fə way ni mə̂ bə tam u kaʼ fə nndzaŋ, kaʼ fə təlami fə u way ni mə̂ bə angəm, a loʼ ighələ, tɔŋ fə dzuu fə dzəə fə way ni fuu shi kɔʼ bə muu n zow mə.

Tɔb wən Zə̀ kə fuunə

¹³ Abə wù loʼnə n fəŋŋə kə ghaa tə moʼlənə nə̀ i tɔbənu, zowkeeli soʼo aghəə, tə dii tsu ghəə a tii ghə n jìi zey tə muunə tii. Ghəə a dzuŋu ghey tə ghəŋŋənə nsə buulə kə umwam kə wi kə dii bənu nə̀ tə khənu tɔb wə.

¹⁴ Abə i kee loʼ nə̀ ghaa khə ghoʼ kə bəbə kə n fə̀ŋ tə ghaa, ngii shiə soʼo n sə ghə, kə ghaa nə nəŋŋə nyiə naŋŋənə isəŋə, ghaŋŋə iwû nə̀ ghaa khə utɔb.

¹⁵ Ndzoʼo tɔb wən, à ka fuu bə dzə Zə̀ kə idəŋ kə, à loʼ tɔb u ghə̂ a mbi. À ka fuu bə dzə Zày kə Zow kə tɔb u tii wə, à loʼ tɔb wə avəətsəə.

¹⁶ I loʼ nə̀, luʼu key ghə̂ a kəghoʼ a loʼnə fu tii nsə ghə̂ ghey ghə khənə sə̂ a shiə ghə, fwɔd kə n loʼ soʼo fu nsə ndəmə ghəə a bəbə ghə.

¹⁷ A kee loʼ nə̀, ghə̂ ghey ghə khənə ndzoʼo tɔb wən Zə̀ kə idəŋ kə fuu bənə, khə fə̀ŋ tə zow tə. Ghə ləghə nə̀ ghə̂ ghə i loʼ nə ibuulə, zə̀ələ ghəŋŋə aghəə, ləghə aghə̂. Ghə khə sî i kwɔɔlə zə, ghəŋŋə soʼo ghəə a dzuŋu ghə. Ghə badla way ghəə ghə, loʼ soʼo tsətsəghə.

¹⁸ À wey loʼ ghə i tii zə ghəə a dzuŋu a shiənə, n təŋkey ghə̂ ghey ghə khənə fə̀ŋ tə dzuŋu tə, ghəŋŋə ndow ghəə a dzuŋu ghə nə̀ ghə̂ ghə i muu nə ibuulə.