Jems 2 - Kaa n Kəzə̀ n fəghə mə

Kə ghaa nə badlanə kpey wə

¹ Waazə ghuŋ ghə, kə ghaa nə badlanə kpey wə nghee ghaa khənə bəghəmnə i fə̀ŋ zə n kow Mûkəbii saa Yeso Klisto wən tə khənə kɔʼlə mə.

² Ney kɔʼ na ghə̂ ghə abəghə ghə bənə n ndaw kədzəŋi ghaa, umɔʼ u loʼnə wù kùm nə̀ tə n lab dzɔb wû wə n fəghə n dzuŋu mə, u loʼ wey u kee loʼnə wù laa, maŋ loʼ n saʼ u fə wə nə uwû.

³ Abə ghaa tɔʼɔ dii ndownə ngɔɔmə zə tə wù wey tə lab dzɔbnə wû wə, dza ndow tə wi nə̀, “Mûkəbii doʼo bə fa.” Kee dza ndow tə wù laa wey nə̀, “Teemi tsəghə ndow fey,” nkee, “Doʼo bə fa aghəd n tənə fuu zuŋ.”

⁴ I sey dii nə̀ ghaa badla ukpey n wû i ghaa, ghaa a saʼa soʼonə ghəə ghə n moʼlə tə bəbə tə.

⁵ Zow na a waazə ghuŋ a dzuŋu ghə! N dza Zə̀ kə n mgbaŋ sày ghə̂ ghən ghə̂ a mbi a koʼnə nə̀ a loʼ ghə̂ a laa ghə nə̀ ghə doʼo tə a loʼ ghə̂ a kûm ghə bòʼ bəghəm i fə̀ŋ, ghə doʼo soʼo ghə̂ ghey ghə i zə̂ənə fə wən u loʼnə n fɔɔ wən tə â təb naŋanə tə̀ ghə̂ ghey ghə ləghənə wi ə?

⁶ Ghaa a fədlə chɔdlɔnə ghə̂ a laa ghə. À loʼ ghə ndee ghə tsìinə ghaa, ney ndow soʼo ghaa n tay i saʼ a? À way ghə̂ a kûm ghə ə?

⁷ À loʼ ghə, ghə tsayyənə zəd i Yeso Klisto i dzuŋu zən ghə tɔŋɔnə ghaa tii.

⁸ Abə ghaa ndzəmə naŋŋənə laŋ kə fɔɔ u Kəzə̀ wən kə tɔ̀ɔ doʼonə n màʼlə K-a-zə̀ nə̀, “Wə khə ni ləghə wù wey tə kuʼlə loʼnə n səə wɔ tə wə ləghə wû wə wə̀.” Ghaa sey ghəŋŋə ghə i dzuŋu zə.

⁹ Abə ghaa fədlə badla kpey wə, ghaa sey ghəŋŋə ghə i bəbə zə, sey, ghə n ney soʼo ghaa n taŋa ghə̂ ghey ghə zaʼnə laŋ kə.

¹⁰ Wù wey tə tsəm naŋa may tsu kənə laŋ wə udzəm, kee bwu tsu kə kəmɔʼ, tə sey bwu dzə ulaŋ udzəm.

¹¹ I loʼ sey n təŋkey wù wey tə dzanə nə̀, “Kə wə nə nyəŋinə ghi wey wù.” À loʼ wù mɔʼɔ wə tə dzanə nə̀, “Kə wə nə weynə wù.” Abə wə ka nyəŋi kə ghi wey wù, wə kee wey ndow wù, wə sey loʼ nə̀ wə n laŋ kə bwu.

¹² Ghaa khə ni ghɔɔmə, ghəŋŋə ndow soʼo aghəə tə a loʼ ghə̂ ghən ghə khənə nə̀ Zə̀ kə i saʼa ghə n laŋ kən kə bəghəshiənə ghə̂ ghə.

¹³ N sey dza n təŋkey Zə̀ kə i kwɔɔlə way sii zə n kow wù wey tə saʼanə nə tə kwɔɔlə way sii zə. Isəŋə loʼ nə̀ sî i kwɔɔlə i Kəzə̀ i bə kəsə abə tə saʼanə.

Bəghəm i fə̀ŋ nə̀ wə fwaʼa ndow way maŋ loʼ kənunu

¹⁴ Waazə ghuŋ ghə, wə zə̂ə kee abə wə dzanə nə̀ wə khə bəghəm i fə̀ŋ, kee dii bə way bəghəm i fə̀ŋ i tii zə n ghəə ghə a ghəŋŋə ghə ə? Wə moʼlə nə̀ ndzoʼo bəghəm i fə̀ŋ i tii i loʼnu ni bəghəshi wɔ ə?

¹⁵ Ney kɔʼ n na nə̀ ghaa khə waazə u loʼ wə n dzəŋi kə dzûmə tə Klisto, weynum nkee weyzən, tə loʼnə n saʼ u fə wə nə uwû, ngəmsə khə soʼo way fə kə zəə kə.

¹⁶ Abə wə dza ndownə tə wi nə̀, “Ndow kədzuŋ, Zə̀ kə buulə wɔ! I dzəŋŋə kɔʼɔ ndzə̂ tə ufəb tə nə uwû, wə i zə̂ə dzɔbə soʼo.” Loʼ sey nə̀ wə ka fuu wi n fə wey tə laʼanə. Wə moʼlə nə̀ wə n wi gaamə n ghə i loʼ zə ə?

¹⁷ A wey bɔɔmə loʼ nghee i loʼnə abə wù dzanə nə̀ tə khə bəghəm i fə̀ŋ nə̀ tə maŋa dza kə nə idzuu. Abə tə ghəŋŋə ndow way ghəə a dzuŋu ghə tə a loʼ wù wey tə khənə bəghəm i fə̀ŋ zə, bəghəm i fə̀ŋ i wi tii i maŋ loʼ kənunu.

¹⁸ Wù loʼ loʼnu ni dza bə nə̀, “Ghə̂ a loʼ a khə bəghəm i fə̀ŋ, a loʼ ghə u kee khə kənə fə̀ŋ ni ghəŋŋə ghəə a dzuŋu ghə.” N dza bə tə̀ wù tii nə̀, wə way dzə ni dii bə mə n wù loʼ tə khənə bəghəm i fə̀ŋ zə nə̀ tə ghəŋŋə way ghəə a dzuŋu ghə, n kee loʼnu ni dii bə bəghəm i fə̀ŋ zuŋ n ghəə a dzuŋu ghey n ghəŋŋənə.

¹⁹ À loʼnu ghə i dzuŋu zə nə̀ ghaa bəghəmnu nə̀ Zə̀ kə loʼ kə kəmɔʼ. Ghaa n ghəŋə dzɔb. Vəətsəə a bəghəm soʼonu nə̀ Zə̀ kə loʼ kə kəmɔʼ buʼu tsəŋə daŋŋə soʼo wi.

²⁰ Laʼlə k-a-fə kən! Wə ləghə nə̀ n dii bə tə wɔ nə̀ abə wə khənə bəghəm i fə̀ŋ zə nə̀ wə ghəŋŋə ndow way ghə̂ a dzuŋu, bəghəm i fə̀ŋ i tii i maŋ loʼ kənunu ə?

²¹ Bày saa, Abraham, â kaʼ ngee ni doʼo wù tsətsəghə ghi Zə̀ kə ə? Â way nghee tə â ney gaʼ kɔʼnə waa wi Ayzik n tsə zey ghə fəələnə maʼlə wə tii ə?

²² Wə n koʼ nya nghee tə bəghəm i fə̀ŋ zə Abraham nsə ghəə zey tə â ghəŋənə bwey dzəŋinə tii ə? Ghəə zey tə â ghəŋənə dii bə nə̀ tə bəghəm tə Zə̀ kə naʼ idzəm.

²³ Ghəə zey i tɔ̀ɔ doʼonə n màʼlə K-a-zə̀ nə̀, “Abraham â bəghəm tə̀ Zə̀ kə, Zə̀ kə n ney naŋa kɔʼ wi nə̀ a loʼ wù wey tə loʼnə tsətsəghə.” Ghəə zən n ghəŋə nə̀ ghə i tɔŋŋə wi nə̀ a loʼ wù fə ə Kəzə̀.

²⁴ Ghaa n tɔʼ koʼ nya nə̀ wù doʼlə tsətsəghə n sə K-a-zə̀ n ghəə ghey tə ghəŋŋənə, a maŋ way kə n bəghəm i fə̀ŋ i wi.

²⁵ À loʼ ghə i mɔʼɔ zə, zə â shinə ghi Rahab wən tə â loʼnə kpala kə. Tə â ney naŋa tsìi tə ghə̂ a Təjuu, gaamə soʼo ghə nə̀ ghə tyi nuu n jii i nuu zə. Sey, Zə̀ kə n ney naŋa kɔʼ wi nə̀ tə loʼ tsətsəghə.

²⁶ Nghee tə i loʼ nə̀ wù wey tə loʼ nə̀ zay kə wi kə nuu n shi, loʼ wù kpuu, a loʼ soʼo ighələ ghi wù wey tə dza nə̀ i khə bəghəm i fə̀ŋ nə̀ tə ghəŋŋə way ghəə a dzuŋu ghə loʼ nə̀ bəghəm i fə̀ŋ i wi tii i maŋ loʼ kənunu.