Hibru 6 - Kaa n Kəzə̀ n fəghə mə

¹ Sey, saa ndow kə n sə kə ni zoʼlə ghəə ghey a loʼ ni ghəŋə nə̀ saa beyyə tsu, saa ndow soʼo n sə kə ni ghəŋŋə ghəə ghey a tsəghəshinə ghəələ n sə isə mən saa â buʼ zoʼlə kɔʼnə bòʼ Klisto. Saa kəm khə way ni ghɔɔmə zeeli ghəə a kweyyə nuulə bə ghə n ghəə a bəbə ghə nsə nghee saa khə ni bəghəm tə̀ Zə̀ kə.

² Saa kəm khə soʼo way ni ghɔɔmə zeeli ghəə ghə bòʼ ni dii aghə̂ n ghəə a fuu a wù ghə n mmuu n Kəzə̀ mə, ghəə a gaʼa ghə awɔɔ ghə n tow kə wù ni fuu ibuulə, ghəə a zhəm dzəŋŋə bə ghə nə ivə. Saa khə soʼo way ni ghɔɔmə zeeli nghee Zə̀ kə i saʼanə ghə̂ ghə a tii nsə nghee saʼ i wi i doʼo tən nə.

³ Abə Zə̀ kə bəghəmnə, saa loʼnu ni zoʼlə aghəə nə̀ ghə n tsəghəshi a ghən.

⁴ Wə way dzə ni kəm ney bə ghə̂ ghey ghə â buʼ keeli dzənə ghəə ghən ibam, aghə̂ nə̀ ghə n mɔm zow naamə kən kə nuu bənə idəŋ n wɔ Zə̀ kə, keeli soʼo Zay kə Zow kə.

⁵ Aghə̂ nə̀ ghə mâ zow ghɔɔmə i Kəzə̀ zə, keeli tsu nə̀ i dzɔbənu. Ghə n mɔm zow soʼo ndzoʼo daʼa wey u loʼnə n mbi zən i bəghənə.

⁶ Zə i tawnu tə̀ ghə̂ ghən ghə bwu shinə ni kəm kweyyə boʼnə ghə a tuu maʼa waa Kəzə̀, sey, zə i loʼ tə ghə kəm baa kuulə ndow wi n zat kə fəkaʼ, fuu wi n tow kə dədlə kə n sə kə aghə̂.

⁷ Ghəlikətsə kən ghow i tsuu zeelinə tii, fə u nyîmmə dzɔbənu fu tii. Wù wey tə̀ vəllənə sum u tii wə zəələ uwû n fə wey fu tii nə usum nə̀ a buulə Kəzə̀.

⁸ A kee bə ghəlitsə kən kaakaa u nyîmmə tii nsə kɔɔ tə ughìi tə, kə khə way fwaʼ kə loʼ kə. Zə̀ kə loʼ ni ləŋ naŋa ndzoʼo luʼu kə tii kə, vəllə wə i fə nuu kɔʼ.

⁹ Nghee tə̀ ghey buʼu ghɔɔmə kə n jii zən sa tə̀ ghaa ma waazə ghuŋ a dzuŋu ghə, ghey khə tənnu nə̀ buulə i dzuŋu i bəghənu tə̀ ghaa, ghəə ghən ghə i ney bənə bəghəshi zə tə̀ ghaa.

¹⁰ Zə̀ kə way dzə wù wey tə way tsətsəghə n ghəə a wi, sey, tə i neyzəə way fwaʼ kə ghaa kə nsə ləghə zən ghaa dii bənə tə̀ wi nghee ghaa gaamənə ghə̂ a wi ghə, ghaa a nam ndow kə n sə kə ni ghəŋŋə sey.

¹¹ Ghey ləghə nə̀ kay wù ghaa tsəghə ndow kə n sə̂ kə ni ndəmi uwû n fwaʼ kə ghaa ni ndow kuum, sey nə̀, ghaa i loʼ ni ndzəm keeli fə key ghaa ləmmənə.

¹² Ghey ləghə way nə̀ ghaa doʼo bə ghə̂ a lay ghə, ghey fədlə ləghə nə̀ ghaa i dzûmə ndow ghow kə ibwey kə ghə̂ ghən ghə khənə bəghəm i fə̀ŋ zə, kow soʼo fə̀ŋ ni bə keeli fə key Zə̀ kə â təb naŋanə tə̀ ghə.

Zə̀ kə bwulə maʼa way təb kə wi kə

¹³ Zə̀ kə a kaa n zəd i wi n nəŋə zey tə â fuunə təb kə wi kə tə Abraham bòʼ nə̀ wù loʼ a way dzə fu tə tsəghəshinə wi tə̀ tə loʼ ni kaa n zəd i wi.

¹⁴ Tə â təb tə wi nə̀, “Mə i buulə wɔ, n fuu wɔ n waa a waa ghə n ndəm.”

¹⁵ Sey, nghee Abraham kow tsunə fə̀ŋ ni ləmə, tə n bə keeli kɔʼ fə key Zə̀ kə â təb naŋanə tə̀ wi.

¹⁶ Ghə̂ a ney kɔʼɔ zəd i wù wən tə tsəghəshinə ghə ni kaa. Abə ghə zə̂ kɔʼnə kaa n tii mə, mə n bayyə kɔʼ chɔd wey ghə mə khənə.

¹⁷ Zə̀ kə â ləghə ni tɔʼ dii ndow tə̀ ghə̂ ghey tə â təb naŋanə təb kə tə̀ ghə nə̀ tə bwuulə maʼa way təb kə wi kə. Sey, tə n zə̂ kɔʼ nkaa n təb kə tii kə.

¹⁸ Sey, Zə̀ kə n dzəŋi fuu bə aghəə abəghə, ghəə zən tə a dza nə̀ tə i ghəŋŋənu nsə kaa n wi mə. Sey, ghəə ghən abəghə a way ni kwey boʼnə Zə̀ kə badla way ghəə ghə. Nsə sey, saa ghən saa nyəŋə ndownə n səə wi nə̀ tə tsəd naŋa saa, khə way tsəŋ zə, abə saa təmi taw tsu dzənə ni ləmə fə kən kə i bəghənə tə̀ saa.

¹⁹ À loʼ ləmə zən i ghəŋŋənə nə̀ bəghəm i fə̀ŋ i saa zə i taw tə̀ nyəllə u kəfən u tɔɔmənə fə̀n kə n dzuu nə̀ kə təmi taw tsu. Yeso wən saa ndzəm gaʼnə fə̀ŋ tə saa tə n kow wi, tali tsəghə ndow saa n kə̀ŋ wən u loʼnə n dzəŋi kə dzûmə tə Klisto idəŋ, tə nyi daŋŋə ndow n fə̀ŋ ə luʼu key Zə̀ kə muunə tii.

²⁰ Yeso mâ nyi doʼo fu isə n tow u saa tə̀ saa ni ndow fu, tə u doʼo tən fɔɔngili u nii nii wə tə̀ saa tə̀ a loʼ Mekisedek.