Hibru 4 - Kaa n Kəzə̀ n fəghə mə

Tsuʼ fey Zə̀ kə â təb naŋanə nə̀ ghə̂ a Kəzə̀ ghə zayyə tii

¹ Nghee Zə̀ kə â təb naŋa dzənə tə saa nə̀ saa i nyiənu n luʼu kə wi kə zayyə kə, i nam loʼ kə sey. Saa khə ni ney ighə̂mə nə̀ kə wù loʼ i bwu khə̂mə nə̀ tə ka ndow nyi fu n luʼu kə zayyə kə tii kə.

² N dza sey n təŋkey, ghə mâ naʼa tûm i dzuŋu zə tə̀ saa ighəllə tə̀ ghə â naʼa soʼonə tə̀ ghə̂ ghə Izree ghə. Ghə â zow tûm tii, zə n ka kee gaamə ghə n ghə i loʼ zə n təŋkey, nghee ghə â zow tsunə tûm tii, ghə n ka bəghəm naŋa n fə̀ŋ tə ghə.

³ Nyisa, à loʼ kə saa ghən saa bəghəmnə tûm i tii zə, saa i ndow nyiənə n luʼu kə zayyə key Zə̀ kə â təb naŋanə tə̀ saa. I bɔɔmə loʼ tə̀ Zə̀ kə â dzanə nə̀, “Nəghə wə â fə kɔʼnə mə, mə n kâa kɔʼ nə̀, ‘Ghə nə nyi koʼ way n luʼu key mə â bayyə naŋanə nə̀ ghə nə ndow zayyə tii.’” Zə̀ kə a dza ghəə ghən nə̀ tə n buʼ mayyə fwaʼ key tə â bayyə naŋanə ni fwaʼ ni ney nuu bə n nəŋə zey tə â bɔmnə mbi tii.

⁴ I loʼ sey n təŋkey, i tɔ̀ɔ doʼo n luʼu kə loʼ kə n màʼlə K-a-zə̀ bòʼ tsuʼ fən fə ghəŋŋə ndownə tsuʼu mə nsəghəmbəghə nə̀, “Zə̀ kə â zayyə n tsuʼ fey fə ghəŋŋə ndownə tsuʼu mə nsəghəmbəghə nə̀ tə n mayyə fwaʼ kə wi kə.”

⁵ Zə a tɔ̀ɔ doʼo soʼo n luʼu kə loʼ kə n màʼlə K-a-zə̀ bòʼ ghə i mɔʼɔ zə nə̀, “Ghə nə nyi koʼ way n luʼu key mə â bayyə naŋanə tə̀ ghə nə̀ ghə nə bə zayyə tii.”

⁶ Ghə̂ a loʼ ghə i nyiə kənu n luʼu kən Zə̀ kə â bayyə naŋanə tə̀ ghə, nghee i buʼ loʼ kənə nə̀ ghə̂ a sə̂ isə ghən ghə â zownə tûm i dzuŋu zən ghə â naʼanə tə̀ ghə, â ka nyi fu, bòʼ nə̀ ghə â tuu ni dzûmə tûm i dzuŋu i tii zə.

⁷ Zə̀ kə n kəm naŋa kpiʼi tsu tsuʼ fə nuu fə, tə n tɔŋɔ tsu tsuʼ fə tii fə nə̀, “Na.” Ambə num tə tsəghə tsunə n ndəm, tə n ghəŋə tsu nə̀ fɔ̀ɔ Devid dza bə ghəə a tii ghə tə i tɔ̀ɔ doʼonə n màʼlə K-a-zə̀ nə̀, “Abə ghaa zownə ghɔɔmə i Kəzə̀ zə na, Kə ghaa nə tawwə naŋanə fə̀ŋ tə ghaa tə.”

⁸ I loʼ sey n təŋkey, abə i mə loʼ nə̀ Joshwa mâ ney ndow ghə n luʼu key ghə â khə ni zayyə tii, tə Zə̀ kə mə ka kəm bə dzə ibam ni ghɔɔmə bòʼ zayyə i nuu zə.

⁹ I sey dii nə̀ Zə̀ kə n bayyə naŋa nəŋə i zayyə zə tə̀ ghə̂ a wi ghə ighəllə tə̀ tə â zayyənə n tsuʼ inaʼ.

¹⁰ I loʼ sey n təŋkey, ghə̂ ghey ghə i ndow nyinə n luʼu kə zayyə key Zə̀ kə â bayyə naŋanə, ghə i zayyə soʼonu wû i ghə zə n fwaʼ kə ghə, ighələ tə̀ Zə̀ kə â zayyənə wû u wi wə n fwaʼ kə wi.

¹¹ Sey, saa dəm tsu ni ndow nyi n luʼu kə zayyə kə tii kə, sey nə̀, kə wù saa u loʼ u nə bwu khə̂mənə tə̀ ghə bày bày a saa ghə â bwu khə̂mənə a dza ghə â tuu ni bəghəm tə̀ Zə̀ kə.

¹² Ghɔɔmə i Kəzə̀ i loʼ utaw, khə soʼo kədaʼa. I tɔb tsəghə təkɔb tədzəm. I khə kədaʼa ni nyi ndow n fə̀ŋ ə wù, n zay kə wù, zuŋ u wû u wù nsə n ghəb u wù. I loʼ ni saʼ moʼlə tə aghə̂ nsə ghə i ghaa zə wù dza i ghəŋŋə.

¹³ Fə kə loʼ kə way Zə̀ kə bɔmnə, kə nyi doʼonə sə̂ a wi. Fə udzəm u chi doʼonu, loʼ n mgbaŋ n sə kə wi wən saa khə ni teeli fu taŋ tə̀ wi.

Klisto loʼ fɔɔngili u nii nii u taw wə

¹⁴ Sey, nghee i loʼ dzə nə̀ saa khənu taw kə fɔɔngili u nii nii wən tɔŋŋə Yeso, tə loʼnə waa Kəzə̀, nə̀ tə n tsəghə tɔɔlə, ndow nyi n luʼu key Zə̀ kə loʼnə tii idəŋ, saa bɔɔmə təmi tən tsu kə n bəghəm i fə̀ŋ zey saa khənə n kow Zə̀ kə.

¹⁵ N dza sey n təŋkey, fɔɔngili u nii nii wən way dzə ni doʼo nə̀ tə ka kwɔɔlə sî zə n kow saa abə saa bwu khə̂mə tsunə. Saa fəd khə fɔɔngili u nii nii wə, ghə â mɔm koʼnə wi nə təjìi tədzəm tə̀ ghə mɔm koʼonə saa, tə n ka kee ghəŋə dzə ghə i bəbə i loʼ zə.

¹⁶ Abə saa ləghənə fə kə, saa n ndow bəb ndow tə̀ Zə̀ kə saa kən kə diinə saa n fə̀ŋ ə wi i dzuŋu zə nə̀ saa tsəŋə way. Saa khənu nə̀ tə i kwɔɔlənu sî zə n kow saa, tə fuu saa n fə key kə kpiinə tə̀ saa.