Hibru 3 - Kaa n Kəzə̀ n fəghə mə

Yeso tsəghəshi Mushi

¹ Waazə ghuŋ a zow ghə, ghaa ghən Zə̀ kə tɔŋɔnə nə̀ ghaa dzəŋi doʼo ghə̂ a wi idəŋ, gaʼ ndow na fə̀ŋ tə ghaa n kow Yeso wən Zə̀ kə tûm bənə nə̀ tə bə doʼo fɔɔngili u nii nii wə tə̀ saa.

² Yeso â fwaʼ dzɔbnu tə̀ Zə̀ kən kə â sày naŋanə wi, ighələ tə̀ Mushi â fwaʼ dzɔbnə n dzəŋi kə dzûmə tə Klisto.

³ Saa khənu nə̀ Yeso kpiinu ni keeli nkɔʼlə n tsəghəshinə n Mushi mə ighələ tə̀ wù bəghə u təndaw u khənə kɔʼlə mə tsəghəshi ndaw tii.

⁴ I loʼ sey n təŋkey, təndaw tədzəm, à loʼ wù tə bəghənə, à kee loʼ nə̀ à loʼ Kəzə̀ kə bɔmnə fə wə udzəm.

⁵ Mushi â fwaʼ dzɔbnu fwaʼ kə wi kə tə̀ a loʼ wù kəfwaʼ n dzəŋi kə dzûmə tə Klisto, tə n dza naŋa zey bə ghəə ghən Zə̀ kə â khə ni nam bə dza.

⁶ Klisto kee loʼ waa Kəzə̀ wən tə â fwaʼ dzɔbnə n dzəŋi kə dzûmə tə Klisto. Saa loʼ tə a loʼ ndaw wi abə saa ndownə n sə kə ni kow fə̀ŋ nsə ni ləmə fə key saa ləmmənə nə̀ saa tsəŋə way.

Zə̀ kə təb naŋa ni fuu izayyə tə̀ ghə̂ a wi ghə

⁷ Sey, tə Zay kə Zow kə dzanə nə̀, “Abə ghaa zow tsunə ghɔɔmə i Kəzə̀ zə n tsuʼ fə na fən,

⁸ Kə ghaa i tawwə n fə̀ŋ tə ghaa tə tə̀ ghə bày bày a ghaa ghə â tuu ni zow tə̀ Zə̀ kə n nəŋə zey tə â mɔm koʼonə ghə n mbvən ə ntsaŋ.

⁹ À loʼ fuu ghə bày bày a ghaa ghə â mɔm koʼnə mə nghee â tsəm loʼ kə nə̀ ghə koʼo bənu ndəmə faalə mey mə â fwaʼnə nə tənùm nghəm nkaykə.

¹⁰ À wey loʼ ghə i tii zə mə â fəələnə nəghə wə ghi ghə̂ a num tə tii tə, dza tsu nə̀, ‘Fə̀ŋ tə ghə̂ ghən tuu ni zow tə̀ mə, tuu soʼo ni naŋa laŋ wuŋ.’

¹¹ Nghee n fəələ kɔʼnə nəghə wə, mə n kaa i tsu, dza nə̀, ‘Ghə nə nyi koʼ way n luʼu key n bayyə naŋanə tə̀ ghə ni zayyə tii.’”

¹² Waazə ghə, ghaa ney ighə̂mə nə̀ kə wù ghaa u loʼ u nə keeli fə̀ŋ i bəbə zə tə̀ tə loʼ ni tuu ni bəghəm tə̀ Zə̀ kə. Wù wey tə khənə ndzoʼo fə̀ŋ zən, way dzə ni ndow n səə Zə̀ kən kə fuunə muu zə.

¹³ I fədlə gaamə tiilə ndow na wû i ghaa zə tsuʼu n dzəm, nghee ghə tɔŋɔ tsu dzə tsuʼ fə tii nə̀, “Na!” Sey nə̀, kə bəb zə i nəb fuu ghaa, ghaa taw doʼo ndow tii.

¹⁴ Abə saa təmi taw tsunə n bəghəm i fə̀ŋ zən saa â keelinə nə nzeyyə ni ndow kuum ndow, saa i keeli soʼo fə wey Klisto khənə.

¹⁵ I tɔ̀ɔ doʼo n màʼlə K-a-zə̀ nə̀, “Abə ghaa zow ghɔɔmə i Kəzə̀ zə n tsuʼ fə na fən, Kə ghaa nə tawwə naŋŋənə fə̀ŋ tə ghaa tə nghee tə̀ ghə bày bày a ghaa ghə â ghəŋənə, Tuu ni zow tə̀ Kəzə̀.”

¹⁶ À loʼ ghə ndee ghə â zownə dzə̂ ə Kəzə̀, ghə n tawwə naŋa tsu fə̀ŋ tə ghə ə? Â loʼ ghə̂ ghən adzəm Mushi a ney shi bənə n naʼ zə Ijip.

¹⁷ Zə̀ kə a fəələ unəghə ghi ghə ndee nə tənùm nghəm nkaykə ə? Â loʼ ghə̂ ghən ghə a ghəŋŋə ghəə a bəbə ghə, vən a ghə ghə â bwu kpuulə bənə n mbvən ə ntsaŋ.

¹⁸ Zə̀ kə â təb naŋa tə̀ ghə ndee nə̀, “Ghə nə nyi koʼ way n luʼu kə zayyə key mə â bayyə naŋanə tə̀ ghə ə?” Â loʼ tə̀ ghə̂ ghən ghə â tuunə ni zow tə̀ wi.

¹⁹ Saa n koʼ nya nə̀ ghə â way ni ndow nyi fu n luʼu key tə a bayyə naŋanə n təŋkey, ghə â tuu ni bəghəm tə̀ Zə̀ kə.