Filipi 4 - Kaa n Kəzə̀ n fəghə mə

Dzûmə tə Klisto a khə ni duʼlə n doʼo i ghə ghi Klisto

¹ Sey, waazə ghuŋ ghən n ngii ləghənə, mbuŋŋə kìi soʼo ni koʼ. Ghaa loʼ fə key kə fuunə mə n duʼlə zə, ghaa u loʼ soʼo fə key Zə̀ kə naamənə mə tii n fwaʼ kuŋ. Sey waazə ghuŋ a dzuŋu ghə, təmi taw tsu kə na n doʼo i ghaa ghi Mûkəbii.

² N buʼu kəwɔɔ tə̀ Yudya nsə Sintiki nə̀ ghə doʼo tsu nə̀ kəfə kəmɔʼ n doʼo i ghə ghi Mûkəbii.

³ N dza bə soʼo tə wɔ fə wuŋ wən ghi wɔ dzəŋi fwaʼa dzɔbə kɔʼɔ bə nə̀ wə gaamə gheyzən ghən, n təŋkey, ghə mâ ndzəm fwaʼ ghi mə ni naʼa tûm i dzuŋu zə. Ghə â loʼ ghi Klemen nsə ghə̂ a loʼ ghey ghə â fwaʼa dzəŋinə ghi mə. Zəd a ghə a tɔ̀ɔ doʼo n màʼlə K-a-zə̀ key tə tɔ̀ɔ naŋŋənə zəd a ghə̂ ghey ghə î zəənə muu zə itsali zə.

⁴ Ghaa khə ni duʼlə n doʼo i ghaa ghi Mûkəbii nə tənəŋə tədzəm. N nam dza kpiʼi bə kə tə ghaa nə̀ ghaa khə ni loʼ nə iduʼlə!

⁵ Ghaa khə ni dii ndow tə̀ ghə̂ ghə adzəm nə̀ ghaa zuŋ loʼnu n mwam u ghaa, tənkey, nəŋə i Mûkəbii i fənə bə zə n shɔd.

⁶ Kə̂ ghaa nə̂ ngii fəmmənə wû i ghaa zə n ghə i loʼ zə, i fədə gɔŋŋə na nə aghəə adzəm. I nɔɔ ndòw na fə̂ key ghaa ləghənə tə Zə̀ kə, fuu ndow kəzɔŋŋə tə wi n fə wey udzəm tə fuunə tə ghaa.

⁷ Sey, buulə i Kəzə̀ zən i tsəghəshinə tɔb u wù sɔŋtsuʼ wə udzəm, zə i loʼ ghi ghaa, ghəŋŋə nə̀ fə̀ŋ tə̀ ghaa nsə moʼlə tə ghaa tə i loʼ nə kəfə kəmɔʼ ghi Klisto.

⁸ Ni guŋ kɔʼ ghɔɔmə zən a waazə ghə, ghaa khə ni naŋa tsu moʼlə tə ghaa n ghəə ghey a loʼnə isəŋə, ghəə ghey a khənə ngɔɔmə zə, ghəə ghey a loʼnə tsətsəghə, ghəə ghey a zownə, ghəə ghey a dzɔbənə, ghəə ghey a khənə kɔʼləmə, ghəə ghey ghə̂ ghə î ləghənə ni zow nsə ghəə ghey ghə î duʼlənə ni koʼ.

⁹ Ghaa khə ni bɔɔmə fwaʼa ndow kə ghəə ghey ghaa zoʼlə neynə n wɔ mə, ghəə ghey ghaa zow neynə, koʼ ney soʼo n wɔ mə, sey nə̀ Zə̀ kən kə fuunə buulə zə, i loʼ ghi ghaa.

Pɔl fu kəzɔŋŋə n fə wey ghə â tûm bənə tə wi

¹⁰ N ngii duʼlənu, mə n fuu soʼo zɔŋŋə kə n doʼo zuŋ ghi Mûkəbii, n təŋkey, ghaa n ndzəm dii ləghə i ghaa zə tə̀ mə. N khənu nə̀ ghaa â moʼlənu mə, ghaa n kee khə way jii ni dii bə moʼlə i tii zə.

¹¹ N ghəə ghən dza dzə way nə̀ n laʼa fə kə loʼ kə, n təŋkey, mə n zoʼlə ni duʼlə nəŋə tədzəm, abə a loʼ kə n nəŋə zey n khənə fə̂ kə nkee n nəŋə zey n laʼanə.

¹² N khənu fə̂ key kə diinə ghii kə ni laʼ kəfə, n khə soʼonu fə̂ key kə diinə ghii kə ni keeli tsəghəshi ufə̂. Mə n zoʼlə tɔb wə ni maŋ muu, abə n zə̂ kownə nkee n loʼ kə n dzəŋ, abə n ngii khənə fə wə nkee n laʼanə fə kə loʼ kə.

¹³ N loʼnu ni ghəŋə aghəə adzəm n daʼa key Klisto fuunə tə̀ mə.

¹⁴ Â nam loʼnu ghə i dzuŋu zə tə̀ ghaa ni gaamə mə n chɔd wuŋ.

¹⁵ Ghaa ghə̂ a Filipi ghə, ghaa ndzəm khənu nə̀ n nəŋə zey ghaa â kaʼ tsu ghɔɔmə i Kəzə̀ zən nə̀ n nuu bə n naʼ i Masedonya, Ndaw Kəzə̀ i loʼ i way dzə zə â gaamənə mə tsəghəshi ghaa fa n Filipi.

¹⁶ N nəŋə zey mə â buʼ loʼ kə nə n naʼ i Tesalonika, ghaa mâ tûm mə n gaamə zə n ndəmə tənəŋə. Ghaa â bɔɔmə tûm bə mə n gaamə zə n nəŋə zey mə â ləghənə gaamə zə a tii.

¹⁷ N ghəə ghən dza dzə way nə̀ ghaa i fuu bə mə n fə wə, n fədlə ləghə nə̀ ghaa i keeli kɔʼɔ ndow naamə kə n mwam u dzuŋu wey ghaa khənə.

¹⁸ N loʼ ni dza nə̀ mə n naamə kuŋ kə keeli kpi, buʼ tsəghəshi. Mə n zə̂ kow fə̂ wən ghaa â tûm bənə tə̀ mə n wɔ̂ Epafroditus. Fə̂ u tii u loʼ tə̀ a loʼ naamə kə lə̀mmə dzɔbə kə tə̀ Zə̀ kə, fə̂ u tii u loʼ soʼo tə̀ a loʼ maʼlə u dzuŋu wə n sə̂ K-a-zə̀.

¹⁹ À loʼ kə Zə̀ kuŋ kən n ngɔɔmənə, tə khənə fə̂ wə udzəm n ghaʼ i wi, tə î fuunu ghaa n fə̂ wey udzəm ghaa ləghə n bam i Yeso Klisto.

²⁰ Saa fuu nkɔʼlə tə̀ Zə̀ kə tə loʼ Bày saa idəŋ nəŋə tədzəm tə̀ mbi nə bə may. Isəŋə!

Pɔl fu guŋŋə tɔŋɔ zow i wi

²¹ Tɔŋɔ zow tsu na ghə̂ a Kəzə̀ a zow ghey ghə loʼ fey adzəm, tɔŋŋɔ ghə̂ ghey ghə bəghəmnə tə̀ Yeso Klisto. Waazə a saa ghən ghə loʼnə fa ghi mə tɔŋŋə zow bə soʼo ghaa.

²² Ghə̂ a Kəzə̀ adzəm fa tɔŋŋə zow bə ghaa, a ka ndɔm taŋ a ghey ghə loʼnə n bii kə baʼtum tɔŋŋə Siza.

²³ N gɔŋŋə nə̀ ndzuŋ ə Mûkəbii, tɔŋɔ Yeso Klisto, zə i loʼ ghi ghaa adzəm.