Filipi 3 - Kaa n Kəzə̀ n fəghə mə

Muu i dzuŋu zey wù keelinə abə tə bəghəmnə tə Klisto

¹ Ni guŋ kɔʼ a waazə ghuŋ ghə, n dza bə tə ghaa nə̀ ghaa khə ni saŋŋə nghee ghaa loʼnə nə kəfə kəmɔʼ ghi Mûkəbii. À way dzə chɔd u loʼ wə tə̀ mə ni tɔ̀ɔ kuulə kə ghə i mɔʼɔ zə tə̀ ghaa, n sey ghəŋŋə ni keyyə ghaa nə ghaa i loʼ kədzuŋ n bəghəm i fə̀ŋ i ghaa.

² Ney na ghə̂mə zə ghi ghə̂ ghey ghə ghəŋŋə ghəə a bəbə ghə, ghə loʼ tə̀ a loʼ təbvə, ghə dza nə̀ ghə khə ni teeli səghə tyi kə wù kə tə wù tii ni keeli ibəghəshi.

³ Ghey loʼ ghə̂ ghey ghə loʼnə nə ghə n ndzəm səghə tyi u ghə wə, tɔŋɔ ghey ghən ghey ngɔɔmənə Zə̀ kə n daʼa kə kən Zay kə Zow kə fuunə tə ghey. Ghey gaʼ fə̀ŋ n fwaʼ kə Yeso Klisto, à way dzə fwaʼ kə wù sɔŋtsuʼ.

⁴ Mə tsəm loʼnu ni gaʼ fə̀ŋ zuŋ n fə u mbi. Abə ghə̂ a loʼ a dzanə nə̀ ghə gaʼ fə̀ŋ n fwaʼ kə ghə, n loʼ ni dza nə̀ wû wuŋ, n gaʼ fə̀ŋ tii tsəghəshi ghə.

⁵ Ghə â səghə tyi kuŋ nə̀ n nam loʼ ntsuʼu ifam tə̀ ghə ji tsu mə. N shi n naʼ zə Izree, n sad i kəbii i Benjamin, wù Hibru jinə. Abə a dza i ney bə n ghəə a laŋ kə ghə̂ a Təjuu, n loʼ wù Falasi.

⁶ Mə â ngii khə tsə zay n laŋ kə inaʼ kə ghə̂ a Təjuu, mə n fuu tsə̀ ghə̂ a Ndaw Kəzə̀ n chɔd wə. Abə n ghəə ghən a loʼnə tsətsəghə tə laŋ kə dii nə̀, mə â naŋŋə tsə kəlaŋ sa, tsəm khə way bwu i loʼ zə.

⁷ A kee loʼ nə̀ ghəə ghey adzəm mə â koʼo tsə tə a loʼ kɔb tə aghəə, à nya loʼ tə̀ a loʼ fə̂ u kənunu tə̀ mə̀ nghee n ləghə ni keeli Klisto.

⁸ N ney ghəə a tii ghə adzəm tə a loʼ ghəə a kənunu tə̀ mə̀. Mə n maʼa ndow ghəə a tii ghə adzəm n tənkey, à dzɔb tsəghəshi ni tɔʼ keeli tsu Yeso Klisto, Mûkəbii wuŋ. Kùmnə a loʼ bòʼ wi mə â ndzəm maʼanə fə̂ wə udzəm, naŋa ndow nə̀ a loʼ udzə, sey nə̀ n keeli tsu kə Klisto,

⁹ mə i ndzəm loʼ nə kəfə kəmɔʼ ghi wi. N kəm dəmə way ni loʼ tsətsəghə n ngəŋ zuŋ nə̀ a dza n mə̀ tɔʼ naŋa laŋ kə Təjuu. N nya loʼ tsətsəghə bòʼ bəghəm i fə̀ŋ zən n khənə n kow Klisto. N doʼo bə tsətsəghə n jìi zey Zə̀ kə ləghənə bòʼ bəghəm i fə̀ŋ zuŋ.

¹⁰ Ghəə zey n ləghənə nya, à loʼ ni keeli Klisto nsə ni keeli daʼa kən Klisto â khənə n nəŋə zey Zə̀ kə â zhəm dzəŋŋə bənə wi nə ivə. N ləghə ni fəghə tə̀ tə â fəghənə, abə a loʼ kə ni kpu soʼo tə̀ tə â kpunə.

¹¹ Sey nə̀, abə jii loʼnə, mə i loʼ ni zhəm dzəŋŋə bə soʼo nə̀ ivə.

Teyyə ndow na tow kə n ghəə ghey a loʼnə isə

¹² N dza dzə way nə̀ mə n keeli may ghəə a tii ghə nkee nə̀ mə n daŋŋə doʼo tən tsətsəghə. N nam dəmənu ni keeli fə̂ u tii wə, kumnə Yeso Klisto mâ ghəŋə mə nə̀ n doʼo wù wi.

¹³ Waazə ghə, n ney dzə way wû wuŋ wə nə̀ mə n təm zə̂. Ghə i loʼ imɔʼ n ghəŋŋənə, i loʼ nə̀, n neyzəə ndòw ghəə ghey a tsəghə dzənə, n teyyə ndow kə kətow n ghəə ghey a loʼnə isə̂.

¹⁴ N dəmə ndow kə n sə kə, nə̀ n keeli kɔʼ kənaamə, tɔŋɔ naamə key kə loʼ idəŋ, kə key Zə̀ kə naŋanə tə̀ mə n bam i Yeso Klisto.

¹⁵ À wən loʼ jìi zey saa ghən adzəm saa beyyə dzənə n ghəə a Kəzə̀, saa khə ni koʼo ghəə ghə tii. Abə wù loʼ khənə ghə i loʼ zə tə tɔʼɔ zowkeeli way, n moʼlə nə̀ Zə̀ kə î chiə diinu ghə i tii zə soʼo tə̀ wi.

¹⁶ Saa kee khə ni bwey ndow kə nə isəŋə zey saa khə zey dzənə.

¹⁷ Waazə ghuŋ ghə, ghaa khə ni dzəŋi dzûmə bə kə ghow kə ibwey kuŋ, koʼo ney soʼo aghəə n wɔ̂ ghə̂ ghey ghaa koʼnə nə̀ ghə dzûmənu muu zey ghey diinə tə̀ ghaa.

¹⁸ Mə n dza tə ghaa n ndəmə tənəŋə, mə u nam dza kuulə bə tə̀ ghaa nya n sə̂ mə idey nə̀ ghə̂ a loʼ a muu ndzoʼo muu zey i diinə nə̀ ghə bəghəm way nə̀ Yeso Klisto â kpu n zat kə fəkaʼ.

¹⁹ Muu i ghə zə î may nə̀ uchɔd, n təŋkey, zə̀ kə ghə kə loʼ fə key nə̀ghə̀ n ghə n ləghənə, ghə kɔʼlə iwû n ghəə ghey ghə mə khənə ni dədlə n tow kə tii, fə̀ŋ tə ghə tə loʼ kə n fə̂ u mbi.

²⁰ Abə ghey, naʼ i ghey i loʼ idəŋ, ghey fa ləmmə bəghəshi ə ghey, tə î nuu tsuu bənə fu, tɔŋɔ Mûkəbii Yeso Klisto.

²¹ N daʼa key tə khənə ni ney naŋa bə ufə̂ udzəm n tənə wi, tə î kwey nuu kɔʼɔ vən fə uwû fə wù sɔŋtsuʼ fə saa fən, tə fuu saa n ndzoʼo vən fə uwû fey Zə̀ kə â fuunə tə wi nghee tə â zhəm dzəŋŋə bənə wi nə ivə.