Chi dii 3 - Kaa n Kəzə̀ n fəghə mə

Tûm zey Yeso tûmnə tə̀ dzəŋi kə dzûmə tə Klisto key naʼ i Sadis

¹ Yeso n dza bə tə̀ mə nə̀, “Tɔ̀ɔ ndow tə̀ tsəndəghə ə Kəzə̀ zey i keyyənə dzəŋi kə dzûmə tə Klisto key n Sadis nə̀ wù wey tə̀ khənə Zày u Kəzə̀ wən usəghəmbəghə nsə səghəbələ mən nsəghəmbəghə, dza nə̀, n khənu ghəə ghey wə ghəŋŋənə. Wə dii bə tə wə loʼ utaw, loʼ sey nə̀ wə loʼ wù kpu.

² Zhəm nuu kɔʼ nə təmbweeli ghaa kuu nyi ndow isəŋ n fə key kə loʼ nə̀ kə ka kam kpu may n kow ghaa n təŋkey, n ka kam koʼ dzə nə̀ fwaʼ kə ghaa kə kpiinu n sə kə Zə̀ kuŋ.

³ Moʼlə tsu ghəə zey ghə â diinə ghaa tii nsə ghəə ghey ghaa â zownə. Ghaa i dzûmə ndow ghəə a tii ghə, ghaa kweyyə nuu bə soʼo fə̀ŋ tə ghaa n ghəə a bəbə ghey ghaa ghəŋŋənə. Abə ghaa ka zhəm nuu kɔʼ, mə i bə n kow ghaa tə a loʼ wù tsɔŋɔ, ghaa i keeli soʼo way nəŋə zey mə i bəghənə tii.

⁴ Wə nam khənu sə̂ fə aghə̂ fə loʼ fə n Sadis, ghə loʼ nə̀ ghə ka kam dzəələ ndzə̂ tə ghə tə. Ghə i bwey dzəŋi ghi mə nə̀ ghə n dzəŋə keeli ndzə tə fəmə tə n təŋkey, ghə n kɔʼ kpi ni bwey ghi mə.

⁵ Wù wey tə i taw tsəghənə bəb zə, ghə i lab tsu soʼo wi n ndzə tə fəmə tə tə̀ a loʼ ghə. Mə i zəd maʼa way zəd i wù tii zə n màʼlə kə zəd a ghə̂ ghey ghə i keelinə muu zə itsali zə. Mə i dza ndow n sə kə Bày wuŋ nsə n sə kə tsətəndəghə tə wi nə̀ tə loʼ wù wuŋ.

⁶ Wù wey tə khə tuŋŋə wə, tə zow ghəə zey Zay kə Zow kə dzanə tə dzəŋi u dzûmə tə Klisto wə.”

Tûm zey Yeso tûmnə tə̀ dzəŋi kə dzûmə tə Klisto key n naʼ i Filadefya

⁷ Yeso n dza bə tə̀ mə nə̀, “Tɔ̀ɔ ndow tə tsəndəghə zey i keyyənə dzəŋi kə dzûmə tə Klisto key n Filadefya nə̀, wù wey tə zow dza soʼo isəŋə, tə kwu keelinə chi kə fɔɔ Devid kə, wù wey abə tə chi naŋa kɔʼ fuʼ u ndaw wə, wù loʼ i way ni fìi, abə tə fìi naŋa tsunə, wù loʼ way ni chi, dza nə̀,

⁸ n khənu ghəə ghey wə ghəŋŋənə. N khənu nə̀ wə khənu nyaŋi fə kədaʼa fə, wə a ghəŋŋə ghəə ghey mə â diinə wɔ tii, ka tuu maʼa soʼo zəd zuŋ. Koʼo! Mə n chi naŋa fuʼ u ndaw wə tə wɔ nə wù loʼ tsəm way ni fìi naŋa.

⁹ Koʼo na! Ghə̂ ghey ghə loʼnə n ndaw kədzəŋi ə Satan, ghə̂ a badla ghə aghəə ghey ghə dza nə̀ ghə loʼ ghə̂ a Təjuu loʼ sey nə̀ ghə way, mə i ghəŋŋə tsu ghə nə̀ ghə bə təm tənguʼ n tənə wɔ, ghə bəghəm kɔʼ soʼo nə̀ mə n wɔ ləghə tən.

¹⁰ Nghee wə naŋŋənə laŋ kuŋ kə ni kow fə̀ŋ, mə i bəghəm way nə̀ kaakaa fə mɔm wɔ n nəŋə zə uchɔd. Chɔt u bəghənu fa n mbi ni mɔm koʼ ghə̂ ghey adzəm ghə muunə fa a ghəlitsə.

¹¹ Mə i kuʼlə bəghənu. Tɔʼɔ kwu keeli dzɔb tsu fə̂ key wə khənə, kə wù loʼ i bəkeeli naamə kə.

¹² Wù wey tə i taw tsəghənə ghəə a bəbə ghə, mə i ghəŋə nə̀ tə doʼo kənyəllə n fəə kə Zə̀ kuŋ, nə̀ tə nə kəm zəghə maʼa koʼ way luʼu kə tii kə. Mə i tɔ̀ɔ tsu zəd i Zə̀ kuŋ n kow wi nsə zəd zə inaʼ Zə̀ kuŋ tɔŋŋə Yerosalem i fəghə zə, i zən i nuulə shiə tsu bə idəŋ n wɔ Zə̀ kuŋ kə. Mə i tɔ̀ɔ naŋa tsu zəd zuŋ i fəghə zə n kow wi.

¹³ Wù wey tə khənə tuŋŋə wə, tə zow ghəə ghey Zay kə Zow kə dzanə tə dzəŋi u dzûmə tə Klisto wə.”

Tûm zey Yeso tûmnə tə̀ dzəŋi kə dzûmə tə Klisto key n naʼ i Lodishya

¹⁴ Yeso n dza kpiʼi bə tə̀ mə nə̀, “Tɔ̀ɔ ndow tə tsəndəghə ə Kəzə̀ zey i keyyənə dzəŋi kə dzûmə tə Klisto key n Lodishya nə̀, wù wey ghə tɔŋŋə nə̀ à loʼ Zə i loʼ sey, tə wey tə zownə tə̀ Zə̀ kə, dza soʼo isəŋə n ghəə a Kəzə̀, wù wey Zə̀ kə â dzəŋi kaʼ tsu ni bɔm ufə udzəm fa n mbi ghi wi, dza nə̀,

¹⁵ n khənu ghəə ghey wə ghəŋŋənə. N khənu nə̀ wə kay way, wə a num soʼo way. I mə dzɔbə nə̀ wə baa doʼo tən tsu kə nə kəbad kəmɔʼ.

¹⁶ Nghee tə wə zuulə numnə, dii tsu nə̀ wə kay way, num soʼo way, mə i tsəə maʼa wɔ n dzuu zuŋ.

¹⁷ Wə dza nə̀, ‘N kûmnu, khə ufə̂ udzəm, n kəm kəŋə way fə kə loʼ kə.’ Wə kam khə way nə̀ wə maŋ loʼ fə kə ngoʼ, fə kə laa kə, wə loʼ n wû i zum zə, fə̀b doʼo soʼo.

¹⁸ N tsə̀ə bə wɔ nə̀ wə zuu kɔʼ itsàa n wɔ mə nə ghə n tsə nə kənam, sey nə̀, wə i kûm tə̀ wə zuu ndzə tə fəmə tə ni dzəŋə n wû wə ni tsəd naŋa wû wə u zum wə. Wə zuu soʼo utey ni zɔʼ n sə̂ ghə tə wə i tɔʼɔ koʼo luʼu tə.

¹⁹ Ghə̂ ghən adzəm n ləghənə, mə n kpaa tsu ghə, mə n chɔd tsu ghə. Sey, ghaa khə ni ndzəm khə nə̀ ghaa numnu nkee ghaa kaynu, ghaa kweyyə nuu bə soʼo fə̀ŋ tə ghaa n ghəə a bəbə ghə.

²⁰ Mə wənə n teynə n fuʼ u ndaw, buʼu kəbaʼ. Wù wey tə zow dzə̀ zuŋ, chi tsu kəbaʼ, mə i tsəghə nyi bə zə ghi wi, tə i zə soʼo ghi mə.

²¹ Wù wən tə taw tsəghənə ghəə a bəbə ghə, mə i fuu wi n bùʼ kə, tə doʼo dzəŋi ghi mə n kuu kə fɔɔ kuŋ. Ighələ tə mə â taw tsəghənə ghəə a bəbə ghə, doʼo dzəŋi tsu ghi Bày wuŋ n kuu kə fɔɔ kə wi.

²² Wù wey tə khənə tuŋŋə wə, tə zow ghəə ghey Zay kə Zow kə dzanə tə dzəŋi u dzûmə tə Klisto wə.”