2 Kɔrint 9 - Kaa n Kəzə̀ n fəghə mə

Igaamə tə̀ dzûmə tə Klisto tey tə laʼanə fə wə

¹ N khənu nə̀ zuŋ kə ighəə kə loʼ kə way dzə tə̀ mə ni tɔ̀ɔ zeeli kəmàʼlə tə̀ ghaa bòʼ gaamə zey ghaa dza i fuu tə̀ dzûmə tə Klisto tey n Judeya.

² N dza sey n təŋkey, n khənu nə̀ ghaa khənu zày ni fuu igaamə, zə â ghəŋənə nə̀ mə i tsɔbə fə̀ŋ tə̀ ghə̂ a Masedonya ghə bòʼ ghaa. N dza tə̀ ghə nə̀, “À nya loʼ kənum tə̀ dzûmə tə Klisto tey nə Akaya â bayyə naŋanə ni fuu igaamə.” Ndzoʼo zày zey ghaa khənə ni fuu igaamə n kəm nùumə dzəŋŋə bə ndəm ə ghə.

³ N fa tûm bə waazə a saa ghən nə̀ kə̂ fə̀ŋ zən ghey tsɔbənə tə̀ ghə bòʼ ghaa nə̂ doʼlənə kənunu, sey nə̀, tə̀ ghə ni bə, à i loʼ nə̀ ghaa n bayyə naŋa gaamə zey ghaa ləghə ni fuu tə̀ mə â dzanə tə̀ ghə.

⁴ N dza sey n təŋkey, abə n kpaʼi bənə ghi ghə̂ a Masedonya ghə nə̀ ghaa ka kam bayyə naŋa gaamə i tii zə, tow kə i dəd saa, kə buʼ dəd tsəghəshi mə nghee n loʼ nə̀ mə n ngii tsɔb fə̀ŋ bòʼ ghaa tə̀ ghə.

⁵ À wən loʼ ghə i tii zə mə â koʼ tsunə nə̀ i dzɔbənu ni tûm bə waazə a saa ghey tə ghaa isə̂, nə̀ ghə bə bayyə naŋa may tsu gaamə zən ghaa â bəghəm naŋa ni fuu. Sey nə̀ i doʼo tsu nə̀ a tsəm ghaa ni fuu gaamə i tii zə, à way dzə nə̀ ghə tə̀mmə ghaa.

⁶ Keeli tsu na nə̀, Wù wey tə təmnə ndzoʼ tə fənyaŋi, tə i kpey soʼo fənyaŋi, wù wey tə ndəŋ təmnə ndzoʼ tə, tə i ndəŋə kpey soʼonu.

⁷ Kay wù khə kə ni fuu tə̀ fə̀ŋ ə wi diinə, a way dzə tə̀ tə səmənu nkee tə̀ ghə wi təmmənu n təŋkey, Zə̀ kə ləghə wù wey tə fuunə n fə̀ŋ ə wi i dzuŋu zə.

⁸ Zə̀ kə loʼnu ni fuu ghaa n buulə zə naʼ idzəm sey nə̀, ghaa i ngii khə fə̂ wey ghaa ləghənə naʼ idzəm nə tənəŋə tədzəm. Sey, ghaa i loʼ ni ghəŋŋə ghəə a dzuŋu ghə n ndəm ni gaamə nduŋŋə ndow ghə̂ a loʼ ghə.

⁹ I loʼ tə̀ i tɔ̀ɔ doʼonə n màʼlə K-a-zə̀ nə̀, “Tə buu n wɔɔ kə ni gaamə ghə̂ ghey ghə laʼanə fə wə, Fə̀ŋ ə wi i dzuŋu zən tə diinə, may koʼo tsə way.”

¹⁰ Sey, Zə̀ kən kə fuunə ndzoʼ tə tə̀ wù usum, nsə fəzəə wə tə̀ ghə̂ ghə, tə î fuu soʼonu ndzoʼ tə tə̀ ghaa naʼ idzəm, tə ghəŋə soʼo nə̀ ghaa ndəŋ keeli ufə nghee ghaa ngii buunə n wɔɔ kə.

¹¹ Tə n ghəŋə ghaa nə̀ ghaa i ngii kûm nə̀ təjìi tədzəm, ghaa loʼ ni fuu ndòw tə̀ ghə̂ ghə nəŋə tədzəm, sey nə̀ ndəmə aghə̂ ghə i fuu zɔŋŋə kə tə̀ Zə̀ kə bòʼ gaamə zən ghaa fuunə tə̀ ghey nə̀ ghey fuu tə̀ ghə.

¹² Fwaʼ kə dzuŋu kən fuu tənə kə way gaamə zə tə̀ ghə̂ a Kəzə̀ ghə, kə ghəŋŋə soʼo nə̀ ndəmə aghə̂ i fuu kɔʼləmə tə̀ Zə̀ kə naʼ idzəm.

¹³ Fwaʼ kə ghaa kən i ghəŋŋə nə̀ ndəm aghə̂ i fuu kɔʼləmə tə Zə̀ kə. Ghə i fuu nkɔʼlə tə̀ Zə̀ kə n təŋkey nghee ghaa buunə n wɔɔ kə ni gaamə ghə nsə dzûmə tə Klisto tə tədzəm dii bənu nə̀ ghaa dzûmənu tûm i dzuŋu zə bòʼ Klisto.

¹⁴ Sey, ghə i mbuŋŋə ni koʼ ghaa, gɔŋŋə soʼo n tow u ghaa bòʼ ndzuŋ i nii zən Zə̀ kə fuunə tə̀ ghaa.

¹⁵ Saa fuu kəzɔŋŋə tə̀ Zə̀ kə n ndzoʼo naamə kə nii kən tə fuunə tə saa nə̀ wù loʼ way ni tiilə dza.