2 Kɔrint 8 - Kaa n Kəzə̀ n fəghə mə

Jìi zey waa a Kəzə̀ a khənə ni fuu

¹ Waazə ghə, ghey ləghə nə̀ ghaa keeli tsu ndzuŋ zey Zə̀ kə fuunə tə̀ dzəŋi u dzûmə tə Klisto tey n mbuʼu Masedonya.

² Nghee ghə â tsəm khə kənə chɔdmə n ndəm, ngii laa soʼo, ghə n nam duʼlə kənu, duʼlə i tii zə n ghəŋə ghə nə̀ ghə i fuu n fə̀ŋ tə ghə tə tədzəm.

³ N dza bə isəŋə tə̀ ghaa nə̀, kay wù â fuu kə tə̀ daʼa kə wi kə â diinə, ghə n bùʼ fuu tsəghəshi daŋŋə tə̀ ghə â khənə. Ghə n fuu sey nə̀ wù loʼ ka ghə təmmə dzə.

⁴ Ghə n buʼu bə kəwɔɔ tə̀ ghey n fə̀ŋ tə ghə tə tədzəm nə̀ ghey mə fuu ghə n buʼ kə nə̀ ghə təmdzəŋi ni gaamə dzûmə tə Klisto tey n mbuʼu Judeya.

⁵ Ghə â fwaʼ tsəghəshinu tə̀ ghey â moʼlənə. Ghə â fuu ndòw dzə wû i ghə tə̀ Mûkəbii isə, tə ghə ni bə fuu wû i ghə tə̀ ghey nghee Zə̀ kə ləghənə.

⁶ À wey loʼ ghə i tii zə ghey â buʼ tsu wɔɔ kə n wɔ Taytus nə̀ nghee tə â bùʼ kaʼ tsu dzənə fwaʼ kə dzuŋu kən ni tsowwə ukhəə ghi ghaa, tə mayyə kɔʼ kənu.

⁷ Nyisa, nghee tə̀ ghaa fwaʼa dzɔbənə nə aghəə adzəm, tɔŋŋə, n bəghəm i fə̀ŋ i ghaa, n ghɔɔmə i ghaa, n tɔb u ghaa, n zày zey ghaa khənə ni gaamə ghə̂ ghə, nsə n ləghə zey ghaa khənə n kow ghey. Ghey ləghə nə̀ ghaa i fwaʼa dzɔbə soʼo n fwaʼ kə dzuŋu kən ni fuu tə̀ ghə̂ ghə.

⁸ N dza dzə way ghəə ghən tə̀ n tsəʼlə bə kəlaŋ. N kee dii bə səŋ zey ghə̂ a loʼ a kuunə n fwaʼ kə ghə ni koʼ nə̀ ləghə i ghaa i kuum loʼnu isəŋə.

⁹ Ghaa khənu ndzoʼo ndzuŋ zey Mûkəbii ə saa Yeso Klisto â khənə. Tə â kûmnu, tə n fəd doʼo bə wù laa wə bòʼ ghaa, sey nə̀ n bam i laa i wi, ghaa i loʼ ni kûm.

¹⁰ Sey, tsə zuŋ tə̀ ghaa n ghəə zən i loʼ nə̀, à wən loʼ bùʼ kə ghaa ni mayyə fwaʼ key ghaa â zey naŋanə nə kənum. Â loʼ ghaa ghə̂ a sə̂ i sə ghə ni keeli zày ni fuu, â loʼ soʼo ghaa ghə̂ sə isə ghə ni zey ni tsowwə.

¹¹ Sey, mayyə kɔʼ na fwaʼ kə tii kə, sey nə̀, zày zey ghaa â keeli zey bənə, ghaa i loʼ ni mayyə tə̀ wɔɔ kə ghaa kə kɔʼ kuumnə.

¹² I loʼ nə̀ abə wə khənə zày ni fuu Zə̀ kə neynu fə̂ key wə fuunə tə̀ wɔɔ kə kə̀ kɔʼ kùmnə, à way dzə n fə̂ key wə khə way.

¹³ N dza dzə way ghəə ghən nə̀ ghəə ghə i zaŋŋə n kow ghə̂ a loʼ ghə, kee dədlə n kow a loʼ ghə. À loʼ ni ghəŋə nə̀ ghəə ghə i loʼ ighələ tə̀ ghə̂ ghə adzəm.

¹⁴ Nghee ghaa ndəŋ khənə nya, ghaa loʼ ni tɔm ndòw ghə nə̀ ghə mbɔŋ keeli fə key ghə laʼanə, sey nə̀ abə ghə nə̂ keelinə, ghə i loʼ ni bə tɔm soʼo ghaa n tsuʼ fə loʼ fə. À wən loʼ ni ghəŋə nə̀ ghəə ghə i loʼ ighələ.

¹⁵ I tɔ̀ɔ doʼo n màʼlə K-a-zə̀ nə̀, “Wù wey tə â ndəŋ zuŋŋənə fə wə, tə â ka keeli tsəghəshi dzə nghee tə â khə ni keeli tii. Wù wey tə â zuŋŋənə nyaŋi fə ufə fə, wə â ka sày dzə.”

Ghə tûm shi Taytus ghi dzûmə tə Klisto tə loʼ tə

¹⁶ N fuu kəzɔŋŋə tə̀ Zə̀ kə tə ghəŋənə nə̀ Taytus keeli soʼo ndzoʼo fə̀ŋ i dzuŋu zən n khənə ni bə gaamə ghaa.

¹⁷ N dza sey n təŋkey, tə â ka kad bəghəm dzə a dza ghey buʼ wi n wɔɔ kə, tə â tsə̀m kɔʼ n ngəŋ ə wi ni bə n səə ghaa ni bə gaamə ghaa n fə̀ŋ ə wi idzəm.

¹⁸ Ghey tûm bə wi tə̀ ghaa ghi waazə saa wey dzəŋi u dzûmə tə Klisto tə kalinə wi n fwaʼ key tə fwaʼanə ni naʼa tûm i dzuŋu zə.

¹⁹ À way kə sey, a loʼ soʼo nə̀ dzəŋi u dzûmə tə Klisto tə sày wi nə̀ tə bwey dzəŋi ghi ghey nghee tə̀ ghey bwey fwaʼanə fwaʼ kə dzuŋu kən ni fuu nkɔʼlə tə̀ Mûkəbii, nsə ni dii nə̀ ghey ləghənu ni fuu igaamə.

²⁰ Ghey ney ighə̂mə nə̀ kə wù i sɔ̀ʼ kəwɔɔ n kow ghey nə̀ ghey ka tɔʼ kwu keeli gaamə zən ghaa tsowwə kɔʼnə n fə̀ŋ tə ghaa tə tədzəm.

²¹ Ghey ləghə ni ghəŋŋə ghəə ghey a kpiinə n sə̂ kə Mûkəbii nsə n sə̂ kə aghə̂.

²² Ghey tûm bə soʼo waazə saa u loʼ wə ghi ghə. Ghey n wi mɔm koʼ n ndəmə tənəŋə, koʼ tsu nə̀, tə khənu zày ni gaamə n ndəmə tə aghəə. Tə baa khə zày ni gaamə nya tsəghəshi nghee tə â bùʼ khə tsənə n təŋkey, tə ngii gaʼ fə̀ŋ n kow ghaa.

²³ Abə Taytus, tə fwaʼa fwaʼ kən n fwaʼanə, fwaʼa dzəŋi soʼo ghi mə ni gaamə ghaa. Waazə a loʼ ghey ghə bwey dzəŋi bənə ghi wi, loʼ ghə̂ ghey dzəŋi u dzûmə tə Klisto tey sày tûm bənə, ghə ghəŋŋə soʼo nə̀ Klisto i keeli kɔʼləmə.

²⁴ Sey dii ndòw na tə̀ ghə nə̀ ghaa ndzəm ləghənu ghə̂ ghə, sey nə̀, dzəŋi u dzûmə tə Klisto u keeli tsu nə̀ ghey tsɔbə dzə way fə̀ŋ bòʼ ghaa tə̀ ghə nə kənunu.