2 Kɔrint 7 - Kaa n Kəzə̀ n fəghə mə

¹ Waazə ghuŋ a dzuŋu ghə, nghee tə̀ Zə̀ kə təb naŋanə ghəə ghən tə̀ saa, saa khə ni sow zowwə tsu wû i saa n wɔ ghəə ghən adzəm a loʼnə ni dzəələ wû i saa n fə̀ŋ nsə nə kəzay, a i muu muu zey i zownə, tsəŋə ndow soʼo Kəzə̀.

Pɔl duʼlə ghi ghə̂ a Kɔrint

² Sey chi naŋa kɔʼ na fə̀ŋ tə ghaa tə tə̀ ghey. Ghey ka ghəŋə bəəbə dzə ghə i loʼ zə tə̀ wù, ghey ka ney dzə tɔb wən ghey khənə ni ney fə kə wù, ghey ka tsìi soʼo wù loʼ.

³ N ghəə ghən dza dzə way ni dza nə̀ ghaa n ghəŋə bəəbə. Mə n buʼ dza tə̀ ghaa nə̀ ghaa loʼ n fə̀ŋ tə ghey n jìi zey abə saa muunə, saa dzəŋi muunu, nə̀ saa kpuunu, saa dzəŋi kpu soʼonu.

⁴ N gaʼ fə̀ŋ n kow ghaa, mə u tsɔbənə fə̀ŋ bòʼ ghaa. Sey n chɔd n saa mən a keelinə n dzəm, fə̀ŋ zuŋ a nam kaynə, duʼlə soʼo naʼ idzəm.

⁵ Nghee tə̀ ghey â ndòwnə n mbuʼu Masedonya, ghey â ka keeli dzə buʼ kə ni zayyə. Ghey â keeli nchɔd nə təluʼu tədzəm. Ghey n dəmə ghi ghɔɔmə tə aghə̂ tə, faŋŋə khə soʼo itsəŋ n fə̀ŋ.

⁶ À kee loʼ nə̀ Zə̀ kən kə kuunə fə̀ŋ tə ghə̂ ghey ghə khənə chɔdmə, â kuu soʼo fə̀ŋ tə ghey nghee tə â ghəŋənə nə̀ Taytus bə.

⁷ Â kad way kə n bə i Taytus zə â tsəmmənə ghey, â loʼ soʼo n jìi zey ghaa â tsəmmənə wi tii. Tə mâ tiilə dza tə̀ ghey jìi zey ghaa mbuŋŋənə tii ni koʼ mə, jìi zey ghaa â mownə tii n ghəə ghey a shinə, jìi zey wû i nyûmənə ghaa tii ni ghəŋə ghəə ghey mə â diinə ghaa tii. Ghəə ghən adzəm n ghəŋə nə̀ n kəm duʼlə nay ndòw.

⁸ N təŋkey abə i loʼ kənə nə̀ maʼlə kuŋ kə â ghəŋə ghaa nə̀ ghaa i mow, n way dzə ni sɔm. Mə â nyaʼi sɔm kənu nghee tə̀ màʼlə kə tii kə â ghəŋənə ghaa nə̀ ghaa i mow, abə zə â loʼ kə n tɔŋɔ fə inəŋə.

⁹ Sey n duʼlənu. N duʼlə dzə way nə̀ ghaa â keeli imôw, n duʼlə n təŋkey mow i ghaa i mâ ghəŋə ghaa nə̀ ghaa kweyyə fə̀ŋ tə ghaa. Mow i tii zə â kpiinu n sə̂ K-a-zə̀, dii tsuu nə̀ ghey â ka ghəŋə bəəbə dzə tə̀ ghaa.

¹⁰ Mow zey i kpiinə n sə̂ K-a-zə̀ ghəŋŋə wù nə̀ tə kweyyə fə̀ŋ ə wi, tə̀ ghə loʼ ni keeli ibəghəshi. Mow i tii i ghəŋŋə way nə̀ wù sɔm. À fəd loʼ mow n ghə̂ a mbi i ney bənə və zə.

¹¹ Koʼo na ghəə ghey mow zən i kpiilə n sə̂ K-a-zə̀ ney bənə tə ghaa. I ghəŋŋə nə̀ ghaa təmi kɔʼ n fuu zə, nyûmə n wû zə ni dii nə̀ wɔɔ a ghaa a zownu, bəghəm naŋŋə way ghəə zey i kpii way. Ghaa loʼ tən nə ighə̂mə, mbuŋŋə ni koʼ mə, kuu isəŋ ni ghəŋŋə ghəə a dzuŋu ghə, khə fə̀ŋ ni chɔd wù wey tə ghəŋə bəəbənə. N ghəə ghən adzəm ghaa n dii nə̀ ghaa khə way wɔɔ kə n ghə i tii zə.

¹² Nghee mə â tɔɔnə màʼlə key tə̀ ghaa, mə â ka tɔ̀ɔ dzə bòʼ wù wey tə â ghəŋə bəəbənə, nkee bòʼ wù wey ghə ghəŋə bəəbənə tə̀ wi. Mə â tɔ̀ɔ bə tə̀ ghaa, ni ghəŋə nə̀ ghaa saʼ n wû i ghaa ndzoʼo ngɔɔmə zey ghaa fuunə tə̀ ghey n sə̂ K-a-zə̀.

¹³ Sey, a wən loʼ fə key kə tsəmmənə ghey n fə̀ŋ. Ghəə zey zə â kuu soʼonə fə̀ŋ tə ghey tə â loʼ nə̀, Taytus â ngii duʼlənu n jìi zey ghaa â kpii neynə wi tii, sey ghaa n ghəŋə nə̀ fə̀ŋ ə wi tsu kay tsu.

¹⁴ Abə mə â tsɔbənə fə̀ŋ bòʼ ghaa tə̀ wi, n ka tow kə dədlə kə keeli dzə. Nghee tə̀ ghəə ghey adzəm ghey â dzanə tə̀ ghaa â loʼnə isəŋə, a loʼ soʼo sey fə̀ŋ zey ghey â tsɔbənə bòʼ ghaa tə̀ Taytus â loʼnə isəŋə.

¹⁵ Nsə sey, abə tə moʼlə tsu n fə̀ŋ ə wi jìi zey ghaa â zownə tə̀ wi, nsə nghee ghaa â kpii neynə wi tii n ngɔɔmə i səŋi zə, ləghə zey tə khənə n kow ghaa n ngii loʼ.

¹⁶ N ngii duʼlənu n təŋkey n loʼnu ni gaʼ fə̀ŋ n kow ghaa nə aghəə adzəm.