2 Kɔrint 5 - Kaa n Kəzə̀ n fəghə mə

Luʼu kə muulə kə saa kə loʼ idəŋ

¹ Saa khənu nə̀ abə ghə saʼ maʼa tsunə fəə fə saa fən saa muunə tii tɔŋŋə vən fə uwû fə saa fən, saa khənu ndaw Zə̀ kə naŋanə tə̀ saa i doʼo tənə idəŋ. Ndaw tii, a ka bɔm dzə wù sɔŋtsuʼ.

² Saa ndzəm mùu n vən fə uwû fən nə̀ saa dzɔɔlə tənənu n təŋkey, saa mbuŋŋə nə̀ Zə̀ kə mə dzəŋə tən tsu saa n wû u fəghə wən saa i keelinə idəŋ.

³ I loʼ sey n təŋkey, abə saa dzəŋə tsunə wû wə idəŋ wən, saa i ka doʼo n wû i zum zə.

⁴ Nghee saa loʼnə n vən fə uwû fən, saa dzɔɔlənu bòʼ ngoʼ zən saa loʼnə tii. Saa dzɔɔlə dzə way nə̀ saa ləghə ni tsɔʼ nu vən fə uwû fən, à fəd loʼ nə̀ Zə̀ kə mə gbaʼlə bə wû u fəghə wey u loʼnə idəŋ n kow saa, sey nə̀, muu zey i doʼo tənnə, loʼ ni fə nuu kɔʼ muu zən i maynə.

⁵ À loʼ Kəzə̀ kə bayyə naŋanə saa tə̀ wû i fəghə zən, fuu naŋa bə saa n Zay kə Zow kə ni dii bə nə̀ tə i fuunu saa n fə key tə â təb naŋanə tə̀ saa.

⁶ À wən loʼ ghəə zey i kuunə fə̀ŋ tə ghey tə. Ghey khə soʼonu nə̀ abə ghey nam muu kə muu i wû u mbi wə, ghey way dzə n səə Mûkəbii.

⁷ Ghey muu n ghəə ghən ghey bəghəmnə, à way dzə n ghəə ghey ghey koʼonə.

⁸ Ghey tɔʼ khənu, buʼu ləghə soʼo ni zəghə maʼa vən fə uwû fən, tə̀ ghey doʼo ndòw ghi Mûkəbii.

⁹ Sey, abə ghey loʼ kə ghi vən fə uwû fən nkee ghey way ghi wû u tii wə, moʼlə tə ghey tə loʼ kə ni ghəŋə ghəə ghey a kpiilənə tə̀ wi.

¹⁰ Saa adzəm khə ni teeli təmi n sə̂ kə Klisto, tə saʼ saa. Tə i fuu kə naamə kə kay wù n fwaʼ kən tə fwaʼnə fa mbi tə̀ a loʼ a wù sɔŋtsuʼ, nə̀ a loʼ kə fwaʼ kə dzuŋu kə nkee kə bəbə kə.

Zə̀ kə n təmdzəŋi saa ghi wi n bam i Klisto

¹¹ Nghee tə̀ ghey khənə fə key kə loʼnə ni ngɔɔmə Mûkəbii, ghey buʼu kəwɔɔ nə̀ ghə̂ ghə i ngɔɔmə soʼo wi. Zə̀ kə khənu ghey, n moʼlə nə̀ n fə̀ŋ tə ghaa, ghaa khə soʼonu ghey.

¹² Ghey fa dza bə dzə way nə̀ ghey loʼ ghə̂ a dzuŋu ghə tə̀ ghaa, ghey fədlə fuu bə ghaa n bùʼ kə nə̀ ghaa i mbɔŋ tsɔbə fə̀ŋ tə ghaa tə bòʼ ghey, sey nə̀, ghaa i loʼ ni beeli ghə̂ ghey ghə kɔʼlənə wû zə nə ighəə nə̀ à way ghə zey i loʼnə n fə̀ŋ tə ghə.

¹³ Abə i kpaʼi loʼ nə̀ ghey zəghənu tə̀ ghaa moʼlənə, à loʼ bòʼ ghəə a Kəzə̀. Abə a loʼ nə̀ ghey zəghə way, à loʼ bòʼ ghaa.

¹⁴ À loʼ ləghə zey Klisto khənə n kow saa, i taalinə saa n təŋkey, ghey n zowkeeli nə̀ wù umɔʼ mâ kpu n tow kə ghə̂ adzəm, dii tsuu nə̀ ghə̂ adzəm mâ dzəŋi kpu ghi wi.

¹⁵ Tə â kpu n tow u ghə̂ adzəm, sey nə̀ ghə̂ ghey ghə muunə, ghə i muu tə̀ wi, à kəm way dzə tə̀ wû i ghə zə̀, n təŋkey, tə â kpunu, Zə̀ kə n kəm zhəm dzəŋŋə bə wi nə̀ ivə n tow kə ghə.

¹⁶ Sey, ni ney nuu tsu nya ndòw isə̂, ghey kəm ney dzə way wù n jìi zey wù sɔŋtsuʼ neynə wù tii. Sə̂ i sə, ghey â ney tsə Klisto n jìi zey wù sɔŋtsuʼ neynə wù tii, abə nya, ghey kəm khə dzə way wi sey.

¹⁷ Sey, abə wù loʼnə nə kəfə kəmɔʼ ghi Klisto, tə loʼ wù fəghə wə. Ghəə a wey ghə n tsəghə nuu, a nya loʼ ghəə a fəghə ghə.

¹⁸ Ghəə ghən adzəm, à ghəŋŋə Kəzə̀, tə təmdzəŋi bə ghey ghi wi n bam i Klisto. À fuu wi fwaʼ kən tə̀ ghey nə̀ ghey i təmə dzəŋi bə ghə̂ ghə ghi wi.

¹⁹ Sey, à loʼ n bam i Klisto Zə̀ kə təmdzəŋi bənə mbi idzəm ghi wi, nə̀ tə ka ney dzə bəb i ghə zə n taŋ. À loʼ wi tə fuunə ghey n tûm zən ghey naʼlənə. Tûm tii təmə dzəŋi naŋŋə bə aghə̂ ghi Zə̀ kə.

²⁰ Ghey fa loʼ tow kə Klisto, ghey a buʼu bənə wɔɔ kə n wɔ ghaa tə̀ a i dza à loʼ Kəzə̀ n wû u wi wə tə buʼu bənə wɔɔ kə n bam i ghey. Ghey buʼu bə kəwɔɔ tə̀ ghaa n zəd i Klisto, nə̀ ghaa doʼo bə nə kəfə kəmɔʼ ghi Zə̀ kə.

²¹ Klisto â khə way bəb i loʼ zə, Zə̀ kə n ghəŋə tsu nə̀ tə̀ doʼo bə tə̀ a loʼ wù bəbə wə bòʼ saa, sey nə̀ abə saa loʼnə nə kəfə kəmɔʼ ghi wi, saa i loʼ tsətsəghə n sə̂ K-a-zə̀.