2 Kɔrint 11 - Kaa n Kəzə̀ n fəghə mə

Pɔl dza nə̀ dzûmə tə Klisto tə ney ighə̂mə ghi ngəd tə tsɔŋɔ tə

¹ N moʼlə nə̀ ghaa i nyaʼi kownu fə̀ŋ n nyaŋi fə ilaʼlə fən n ghɔɔmənə fa. N buʼu bə kəwɔɔ, ghaa kow tsu fə̀ŋ.

² N mbuŋŋə ni keeli nghee tə̀ ghaa loʼnə tii ighələ tə̀ Zə̀ kə mbuŋŋənə ni keeli. N ləghə ni fuu ndow ghaa tə̀ wù umɔʼ tɔŋŋə Klisto nə̀ ghaa khə way bwu i loʼ zə̀, tə̀ bày weyzən wən ghə â nyi naŋanə nə fuu ndownə waa wi wən tə̀ num nə̀ tə ka kam nyəŋi koʼ tsə ghi weynum.

³ N kee tsəŋə nə̀ nghee tə̀ zuu â nəb fuu tsunə If n tɔb u wi u tsɔŋɔ wə, ghə loʼ ni bə fwɔd maʼa kɔʼ soʼo tɔb u ghaa, ghaa i way ni kəm dzûmə Klisto n fə̀ŋ tə ghaa tə tədzəm.

⁴ N dza sey n təŋkey ghə̂ a loʼ ghə n bə n fəŋŋə kə ghaa, ghə a diinə ghaa n ghəə ghə bòʼ Yeso u nuu wə nə̀ à way Yeso wey ghey â diinə ghaa tii. Ghə ləghə ni fuu ghaa n zày kə nuu kə nə̀ à way kə key Zə̀ kə â fuunə tə̀ ghaa n nəŋə zey ghaa â bəghəmnə tii tə̀ Klisto. Ghə naʼlə bə tûm i nuu zə tə̀ ghaa, ghaa n bəghəm tûm i tii zə loʼ sey nə̀ à way tûm i dzuŋu zən mə â naʼanə tə̀ ghaa bòʼ Klisto. Abə ghə ghəŋŋənə ghəə ghən, ghaa n mbad bəghəm naŋa ghəə a tii ghə adzəm.

⁵ N moʼlə nə̀ n təbə dzə way n sə̂ kə ngəd tə ghaa tə nii tən.

⁶ Abə i loʼ kə nə̀ n khə way ni ghɔɔmə, n kee laʼlə dzə way. Ghey n dii may tə̀ ghaa nə təjìi tədzəm nsə nə̀ aghəə adzəm nə̀ ghey khənu tɔb wə.

⁷ Mə â kpaʼi ghəŋə bəəbənu nghee mə â tsuulə tsunə wû wuŋ wə, sey nə̀ n kɔʼlə naŋa kɔʼ ghaa nghee mə â naʼlə bənə tûm i dzuŋu zə bòʼ Kəzə̀ tə̀ ghaa kənunu ə?

⁸ I nya loʼ tə̀ mə â tsɔŋnu dzəŋi u dzûmə tə Klisto u loʼ wey nghee mə â neynə gaamə zey ghə tsowwə tsunə ni tɔɔmə ghaa tii.

⁹ Nghee tə̀ mə̂ â loʼnə ghi ghaa, mə â fəmmə way ghaa abə n laʼanə fə kə. Waazə a saa ghey ghə â nuu bənə n Masedonya, ghə â bə mə̀ n fə wə udzəm. Sey nghee tə̀ mə â doʼonə nə̀ n fəmmə way ghaa, mə̀ î fəmmə koʼ way ghaa n ghə i loʼ zə.

¹⁰ Nghee tə̀ isəŋə i Klisto i loʼnə n fə̀ŋ zuŋ, wù loʼ way dzə n mbuʼu Akaya ni buu naŋa mə nə̀ kə n nə tsɔbənə fə̀ŋ.

¹¹ À loʼ kee n ghɔɔmənə sa ə? À loʼ nə̀ n ləghə way ghaa ə? Ngaŋ! Zə̀ kə khənu nə̀ n ləghənu ghaa.

¹² Mə i tsəghə ndòw kə n sə̂ kə ni fwaʼa fwaʼ key n fwaʼanə, sey nə̀ kə n nə̂ fuunə bùʼ kə tə̀ ghə̂ ghey ghə ləghənə ni baalə kɔʼ bə ghi ghey, ghaŋŋə iwû nə̀ ghə fwaʼa soʼo tə̀ a loʼ ghey.

¹³ N dza sey n təŋkey, ndzoʼo ghə̂ ghən loʼ ngəd tə tsɔŋɔ tə, ghə badla aghəə n fwaʼ kə ghə, nəbə sə̂ aghə̂ nə̀ ghə loʼ ngəd tə Klisto tə səŋi tə.

¹⁴ Dzuu i way dzə ni zum mə n təŋkey Satan nəbə soʼonu sə̂ a ghə̂ ghə nə̀ tə loʼ tsəndəghə ə Kəzə̀ wən tə fuunə daa kə.

¹⁵ Dzuu i way ni kee zum dzə mə abə ghə̂ a kəfwaʼ a wi a nəbənə sə̂ a ghə̂ ghə nə̀ ghə loʼ ghə̂ a kəfwaʼ ghey ghə ghəŋŋənə ghəə ghey a kpiinə. Nəŋə zə i bəghənu, ghə i bɔɔmə keelinə fə key kə kpiinə n fwaʼ kə ghə.

Fəghə zey Pɔl â fəghənə tə̀ a loʼ Ngəd ə Yeso

¹⁶ N dza kpiʼi bə nə̀, kə̂ wù nə̀ moʼlənə nə̀ n laʼlənu. Abə ghaa kee moʼlənə nə̀ n laʼlənu, bəghəm kɔʼ na mə tə̀ a loʼ wù laʼlə, sey nə̀ n loʼ ni mbɔŋ ghaŋŋə uwû fənyaŋi.

¹⁷ Ghəə ghən n ghɔɔmənə fa bòʼ tsɔb i fə̀ŋ, à ka fuu dzə Mûkəbii mə n daʼa kə nə̀ n ghɔɔmə sey. N ghɔɔmə tə̀ a loʼ wù laʼlə.

¹⁸ Nghee tə̀ ndəmə aghə̂ a tsɔbənə fə̀ŋ n ghəə a mbi, mə̀ i mbɔŋɔ tsɔbə soʼonu fə̀ŋ.

¹⁹ N dza sey n təŋkey, ghaa dza ghaa tɔbənu, nam bəghəm ghəə ghey ghə̂ a laʼlə a dzanə!

²⁰ N sey dza n təŋkey ghaa bəghəm naŋanu abə wù ney naŋa bənə ghaa tə̀ a loʼ kəkɔd, nəəbə zəə ghaa, koʼo kìi ghaa, dii uwû buʼ sâa nyi bə ghaa n saali kə n tûm usə̂.

²¹ N bəghəm kənu n tow kə dədlə kə nə̀ ghey laynu ni ghəŋə ndzoʼo ghəə ghey. À kee loʼ nə̀ ghə i ghaa zə ghə̂ a tsɔbənə fə̀ŋ tii, n nya ghɔɔmə tə̀ a loʼ wù laʼlə, mə î mbɔŋɔ tsɔbə soʼonu fə̀ŋ tii.

²² Ghə dza nə̀ ghə loʼ ghə̂ a Hibru ə? N loʼ soʼo wù Hibru. Ghə dza nə̀ ghə loʼ ghə̂ ghə Izree ə? N loʼ soʼo wù Izree. Ghə dza nə̀ ghə loʼ waa a waa ghə Abraham ə? N loʼ soʼonu waa waa Abraham.

²³ Ghə dza nə̀ ghə loʼ ghə̂ a kəfwaʼ a Klisto ə? (N ghɔɔmə tə̀ a loʼ wù zəghə), n buʼ tsəghəshi ghə. Mə n fwaʼ ndəmə tə aghəə tə səŋi tə, nyi n ndaw tsaʼ n ndəmə tənəŋə, ghə n mə bwɔd n ndəmə tənəŋə, mə n koʼ və zə n ndəmə tənəŋə.

²⁴ Ghə̂ a Təjuu ghə n mə̀ bwɔd, fuu mə̀ n kwɔ tə nghəm ntəghə n ghi tə tətaandzuu tənəŋə tətaa.

²⁵ Ghə n bwɔd mə n kwɔɔ fə kəvuʼ tənəŋə tətəghə, təmmə mə nə̀ atay inəŋə imɔʼ. Fən kə n məllə ghi mə tənəŋə tətəghə. Mə n doʼo bweeli koʼ n dzuu fətsuʼ fəmɔʼ.

²⁶ Mə n bwey n ndəmə tənəŋə. Mə n kuŋ kii nə kəfən n ndəmə tənəŋə. Ghə̂ a tsɔŋɔ ghə n wey kìi mə n ndəmə tənəŋə. Ghə̂ a Təjuu ghə n dəm ni wey mə n ndəmə tənəŋə. Ghə̂ ghən ghə way ghə̂ a Təjuu ghə n dəm soʼo ni wey mə. Ghə̂ ghə n dəm ni wey mə n fə̀ŋ inaʼ. Ghə̂ ghə n dəm ni wey mə inaʼ. Mə n kuŋ kìi n nali kə dzuu. Dzûmə tə Klisto tə tsɔŋɔ tə u ləghə soʼo ni wey mə.

²⁷ Mə n fwaʼ, ndzəm fəghə soʼo. Mə n doʼo tsuʼu n loʼ mə nə̀ n bweeli way. N khənu fə key dzəŋ nsə fə̀ŋ ə mmuu loʼnə ghii kə. Mə n doʼo tsuʼu n loʼ mə n ndəmə tənəŋə nə̀ n koʼo way fə kə zə̂ə kə. Mə n dzam n ndəmə tənəŋə nə̀ n khə way ndzə̂ tə ni dzəŋə.

²⁸ Ni kuu kpiʼi ndow n ghəə ghən adzəm, fə̀ŋ nam fəmmə mə tsuʼu n dzəm bòʼ dzəŋi u dzûmə tə Klisto wən udzəm.

²⁹ À loʼ ndee tə laynə n bəghəm i fə̀ŋ i wi, mə n ka kwɔɔlə isî n kow wi ə? À loʼ dzûmə Klisto u ghaa wə ghə ghəŋə tsunə nə̀ tə ghəŋə bəəbə, nə̀ fə̀ŋ ka ngii fə mə ghi wù tii ə?

³⁰ Sey, abə n khə ni teeli tsɔb fə̀ŋ, mə î tsɔbə fə̀ŋ n ghəə ghey a diinə nə̀ n laynu.

³¹ Zə̀ kə, tə loʼnə Bày Mûkəbii Yeso, kɔʼlə n loʼ tənnə tə̀ wi, khənu nə̀ n badla dzə way ghəə ghə.

³² Nghee mə â loʼnə n Damaskus, gɔvənɔ wən tə â fwaʼanə n tənə də̀ŋ kə ghə tɔŋŋə Aretas, n tûm tsu sawgoʼ tə wi nə̀ ghə fìi naŋa tsu fuʼu n təmbàa ndzəm inaʼ tə̀ ghə kwu mə.

³³ Mə n nɔb shi tsu n wɔɔ kə wi nə̀ ghə kuu mə nə kəkhəə, shiələ shi ndòw mə nə kəbuʼ n mbàa inaʼ.