1 Timoti 5 - Kaa n Kəzə̀ n fəghə mə

Jìi zey Timoti khənə ni laalə tə dzûmə tə Klisto tə

¹ I kə wə nə tɔɔbə ghɔɔmənə tə nyim kə wù kə, i fədlə nyoʼlə ghɔɔmə ndow tə wi n dzə̂ i buulə zə tə wə ghɔɔmə tə tə̀lə̀. Wə i ghɔɔmə tə waa a fəghaŋ a num ghə tə wə ghɔɔmənə tə waazu.

² I ney nyim u gheyzən wə ighələ tə wə neynə ghə zuu, wə ney soʼo waa a fəghaŋ a zən ighələ tə wə neynə waazu ghə. Wə khə ni ghəŋŋə ndow ghəə ghən tə waa a fəghaŋ a zən ghən n fə̀ŋ i zow zə.

³ I laalə tə ghey a kpusə ghən ghə ndzəm khə way wù ni laalə tə ghə.

⁴ A kee bə ghey a kpusə ghən a khənə waa ghə nkee waa a waa, waa ghən nkee waa a waa ghən zey tsu dzə isə ni ghəŋŋə ghəə ghə nghee dzûmə tə Klisto tə khə ni ghəŋŋə n ndaw tə ghə. Abə ghə ghəŋŋənə sey, Zə̀ kə duʼlənu ghi ghə n təŋkey ghə sey tsəə dzəŋŋə ghə bày a ghə nsə ghə bày bày a ghə ghə.

⁵ Zən ə kpusə wən tə ndzəm khə way fə kə, khə soʼo way wù tə laalənə tə wi, khə ni fuu may ndow fə̀ŋ ə wi tə Zə̀ kə. Tə i gɔŋŋə tə Zə̀ kə nəŋə tədzəm nə̀ Zə̀ kə gaamə wi.

⁶ A kee bə wey kpusə wən tə ləghə ni zəələ wû u wi wə, tə loʼ tə a loʼ wù kpuu, abə tə nam buʼ loʼ kə utaw.

⁷ Tillə dza ndow ghəə ghən tə ghə, sey nə̀, ghə i khə way bwu i loʼ zə.

⁸ Abə wù laalə way tə tyəm a ndaw a wi ghə, a ka tsəm dza ghə̂ ghey ghə muunə n ndaw ghi wi, i sey diinə tə kəm bəghəm dzə way tə Klisto, tə u bəb tsəghəshi soʼonə wù wən tə ka bəghəm tə Klisto.

⁹ Kə wə i tɔ̀ɔ zəd i weyzən ə kpusə n màʼlə kə ghey a kpusə nə̀ tə ka kɔʼ kuum num tə nghəm ntuubə. Tə khə ni loʼ soʼo nə̀ tə â ney kə nûm umɔʼ.

¹⁰ Ghə̂ a khə ni khə wi bòʼ mwam u wi u dzuŋu wə tə a loʼ jìi zey tə ney kɔʼ bənə waa a wi ghə tii, jìi zey tə kpii neynə ghə̂ ghey ghə bwey bəghənə n ndaw wi. Tə u fwaʼa fwaʼ kə dzuŋu kə tə dzûmə tə Klisto tə, fuu soʼo igaamə tə ghə̂ ghən ghə loʼ nə uchɔd. Tə khə ni loʼ nə̀ tə n fuu nyi ndow wû u wi wə ni fuu gaamə zə tə ghə̂ ghə nə təjìi tədzəm.

¹¹ I kə wə nə tɔɔnə zəd i waa fəghaŋ wən num kpu dzənə n màʼlə kə ghey a kpusə, n təŋkey, tə i nuu mgbiilə kɔʼɔnu ni keeli weynum, tə i ləghə ni ney num, sey, tə i kəm way ni fwaʼ tə Klisto.

¹² Abə i doʼonə sey, ghə i ney naŋa bə uchɔd n tow kə ghə n təŋkey ghə n bwuulə maʼa ghəə zey ghə â bəghəm naŋa dzənə.

¹³ I loʼ soʼo nə̀ ghey a kpusə a fəghaŋ ghən i zoʼlə naŋa kɔʼ mwam u lay wə, ni maŋa bwey kaabə tsə n ndaw tə ghə̂. Ghə n maŋa khə̀ə kaabə tsə təfəghəm, khə̀ə ghəə ghey ghə mə khə way ni khə̀ə, nyiə nə aghəə nə̀ a khə way ghə i loʼ zə ni ghəŋə ghi wi, khə̀ə kaabə tsə soʼo aghəə nə̀ a way isəŋə.

¹⁴ Sey, n tsəə bə waa a fəghaŋ ghən num a ghə a kpu dzənə, nə̀ ghə ney anum, ghə ji awaa, ghə laalə tə ndaw tə ghə tə, sey nə̀, kə ghə i fuu kəbuʼ tə ghə̂ a təngəmə a saa ghə ni kpaalə saa.

¹⁵ N ghəə ghən dza n təŋkey ghey a kpusə a loʼ ghə n tuu maʼa Zə̀ kə, laʼ dzûmə ndow Satan.

¹⁶ Abə weyzən wən tə n bəghəm tə Zə̀ kə, khənə zən ə kpusə n ndaw wi, tə khə ni ndow kə n sə kə ni laalə tə wi nə̀ tə naŋŋə bə dzə way chɔd u tii wə n kow dzəŋi kə dzûmə tə Klisto tə. Dzûmə tə Klisto tə i kee dəmə ndow kə ni laalə ghey a kpusə ghey ghə ndzəm khə way wù ni laalə tə ghə.

¹⁷ Dzûmə tə Klisto tə khə ni laalə tə ngəd tə dzəŋi kə dzûmə tə Klisto tə, tsəə dzɔbə soʼo ghə, a ka ndɔm taŋ a ghən ghə naʼlənə ghəə a Kəzə̀ ghə, dii soʼo aghə̂.

¹⁸ I loʼ sey n təŋkey, i tɔ̀ɔ doʼo màʼlə K-a-zə̀ nə̀, “Kə wə nə dzəŋŋə tsaʼ tə n dzuu i mbɔŋɔlɔʼ nə̀ kə i zəənə n nəŋə zey i dəʼlənə kuu ghə.” Kə a dza soʼo nə̀, “Wə khə ni tsəə wù kəfwaʼ n fwaʼ key tə fwaʼanə.”

¹⁹ Kə wə nə bəghəm nə̀ ghə kwu ngəd ə dzûmə tə Klisto u loʼ wə nə ighəə, a may kə nə̀ aghə̂ abəghə nkee atəghə a bə təmi tiilənu nə̀ tə n ghəŋə bəəbə ghə zə.

²⁰ A kee bə ngəd tey tə mgbaʼi ghəŋŋə kuulə kə ghəə a bəbə ghə, wə khə ni kpaa ndow ghə n sə kə aghə̂ adzəm, sey nə̀, ghə̂ a loʼ ghey loʼ ni tyi tsəŋ.

²¹ Nghee tə Zə̀ kə, Yeso Klisto nsə tsətəndəghə tə Kəzə̀ tən Zə̀ kə sày kɔʼnə loʼnə tə̀ a loʼ ghə təmi tiillə, n dza bə tə wɔ nə̀ wə dzûmə kɔʼ bə laŋ wən n fuu bənə tə wɔ nə̀ wə sày way wù, laalə soʼo way tûm usə u wù wə abə wə ghəŋŋənə ghəə zə.

²² I kə wə nə tsəŋŋənə n wû wə ni tsuʼ naŋa kɔʼ wù nə̀ tə i fwaʼa fwaʼ kə Mûkəbii kə. Ka i nyiəllə soʼo wɔɔ kə n ghəə a bəbə ghey ghə̂ a loʼ a ghəŋŋə kaabənə. Dəmə tsu kə nə̀ wə i zow n ghəə ghə a ghəŋŋə ghə.

²³ Ka i məə tənə kə mmuu mə, wə khə ni məə ndow soʼo luʼu fə nlə fə, n təŋkey, n dzɔbənu tə̀ nəghə wə wə̀ nsə dzaŋa tey tə fəmmə zeelinə wɔ.

²⁴ Ghə̂ a loʼ a mgbaŋa ghəŋŋə tsu kə ghə i bəbə zə, aghə̂ adzəm ghə n koʼo keeli may ndow bəb i tii zə nə̀ ghə ka ghə kam buʼ saʼ dzə. Ghə̂ a loʼ ghə a kee ghəŋŋənə bəb zə nə̀ i nə wɔ diinu wû wə.

²⁵ À loʼ soʼo n jii i mɔʼɔ zə, abə wù ghəŋŋənə ghəə a dzuŋu ghə, aghə̂ adzəm ghə n koʼo keeli may ndow. Nə ghə ka tɔʼ koʼ keeli kənu, ghəə a tii a way ni nyi doʼo tən dzə.