1 Timoti 3 - Kaa n Kəzə̀ n fəghə mə

Wù wey tə kpiinə ni doʼo kətow n dzəŋi kə dzûmə tə Klisto

¹ Ghəə ghən ghə dzanə loʼ isəŋə nə̀, wù wey tə ləghə ni doʼo kətow tə dzûmə tə Klisto tə, tə ləghə ni fwaʼa fwaʼ kə dzuŋu kə.

² Wù wey tə loʼnə tow kə tə dzûmə tə Klisto tə, khə ni loʼ wù wey tə khə way bwu i loʼ zə n doʼo i wi. Tə khə ni loʼ wù wey tə gaʼnə fə̀ŋ n kow wey wi. Tə khə way ni mbadla fəələ n fə̀ŋ. Tə khə ni nyoʼlə ghəŋŋənə ghəə ghə. Tə khə ni loʼ wù wey ghə̂ a fuunə wi n ngɔɔmə zə. Tə khə ni loʼ wù wey tə loʼ ni kpiney ghə̂ ghey ghə bwey bəghənə n ndaw wi. Tə khə ni loʼ soʼo wù wey tə loʼ ni dii nduŋŋə ndow ghə̂ ghən ghə bəghəmnə tə Zə̀ kə.

³ Tə khə way ni loʼ ndzoʼo wù wey tə ngii ləghənə lə mə, tə khə soʼo way ni loʼ wù wey tə khənə mbow fə. Tə fəd khə ni loʼ wù wey tə loʼnə zəələ kə wù kə, soʼo way ghɔɔmə zə, shiə soʼo way n sə̂ zə n ghəə ghə ukhəə.

⁴ À khə ni loʼ wù wey tə khənə ni kwu keeli dzɔb ndaw wi, waa a wi a zownə tə wi, fuu soʼo wi n ngɔɔmə zə.

⁵ I loʼ sey n təŋkey abə wù way ni kwu keeli ndaw wi, tə i loʼ ngee ni kwu keeli ghə̂ a Kəzə̀ ə?

⁶ Tə khə way ni loʼ wù wey tə kuʼlə bəghəm kɔʼnə tə Zə̀ kə. Nə̀ a way sey, tə i kaʼ ni ghaŋŋə uwû, Zə̀ kə i fuu soʼo wi n ndzoʼo ngoʼ zən tə â fuunə tə vəətsəə ghə.

⁷ Tə khə ni teeli loʼ wù wən tə khənə ngɔɔmə zə n fəŋŋə kə ghə̂ ghən ghə ka bəghəm Zə̀ kə. Sey ghə i way ni ghɔɔmə bəəbə bòʼ wi, vəətsəə ghə i way soʼo ni bìi kwu wi.

Ghə̂ ghey ghə gaamənə n dzəŋi kə dzûmə tə Klisto

⁸ Ghə̂ ghən ghə gaamənə nə̀ kəfwaʼ n dzəŋi kə dzûmə tə Klisto khə ni teeli khə mwam u dzuŋu wə, ghɔɔmə soʼo n jìi zey i loʼnə tsətsəghə. Ghə khə way ni ngii ləghə lə mə, ngii shiə soʼo way n sə̂ zə nə ukhəə.

⁹ Ghə khə ni teeli khə fə̀ŋ tə zow tə tə̀ ghə naŋŋə kɔʼɔ bənə isəŋə zən Zə̀ kə â chi dii bənə tə ghə bòʼ bəghəm i fə̀ŋ.

¹⁰ Ghə khə ni fwɔli kɔʼ bə dzə ni koʼ tsu nə̀ ghə khə way bwu i loʼ zə tə ghə ni tsuʼ ghə tə a loʼ ghə̂ ghey ghə fwaʼanə n dzəŋi kə dzûmə tə Klisto.

¹¹ Weyzən wən tə loʼnə wù wən tə gaamənə n dzəŋi kə dzûmə tə Klisto, teeli khə soʼo ni khə bəghəm i fə̀ŋ zə, khə mwam u dzuŋu wə. Tə khə way ni ghɔɔmə ghəə a bəbə ghə bòʼ aghə̂, tə khə soʼo way ni ngii ləghə lə mə.

¹² Weynum wən tə gaamənə nə̀ kəfwaʼ n dzəŋi kə dzûmə tə Klisto, khə ni loʼ tə wən tə gaʼnə fə̀ŋ n kow wey, tə i loʼ ni kwu keeli dzɔb ndaw wi, nyaŋŋə soʼo waa a wi.

¹³ Ghə̂ ghey ghə i fwaʼa dzɔbənə n dzəŋi kə dzûmə tə Klisto, ghə̂ ghə i fuu ghə n ngɔɔmə zə, ghə kɔʼlə naŋa kɔ ghə n buʼ kə səŋi kə, ghə i loʼ soʼo ni təmi ghɔɔmə boʼo bəghəm i fə̀ŋ n kow Yeso Klisto nə̀ ghə tsəŋə way.

Zuŋ key Pɔl â fuunə tsə zən tii

¹⁴ N khənu moʼlə zə ni kuʼlə bə koʼ ghaa, zuŋ key n tɔ̀ɔ bənə màʼlə kən tii tə̀ ghaa loʼ nə̀,

¹⁵ abə n kpaʼi loʼlənə ni bə, màʼlə kən kə i ghəŋə nə̀ ghaa keeli nghee dzûmə tə Klisto tə khə ni muu tii n wû i ghə. Dzəŋi kən loʼ dzəŋi kə Zə̀ kən kə loʼnə utaw. À loʼ dzûmə tən tə tɔɔmənə nə̀ ghɔɔmə i Kəzə̀ zə i loʼ tsətsəghə ighələ tə̀ tsə kə ndaw nsə nyəllə u tɔɔmənə ndaw nə̀ kə i nə bwunə.

¹⁶ Isəŋə loʼ nə̀, wù loʼ tsəm way ni tuu maʼa ghəə zey i nyi doʼonə n ghəə a Kəzə̀ nə̀, Klisto â bə tə a loʼ wù sɔŋtsuʼ, Zay kə Zow kə n dii bə nə tə loʼ tsətsəghə, Tsətəndəghə tə Kəzə̀ tə koʼ ndow wi, Ghəŋə nə̀ ghə naʼa tûm kùm wi tə ghə̂ ghən ghə ka bəghəm tə Zə̀ kə n naʼa tə mbi tədzəm. Ghə̂ a mbi ghə n bəghəm fuu tə wi. Ni fuu wi n kɔʼləmə, Zə̀ kə n ney kɔʼ ndow wi idəŋ, naŋa ndow wi n kpii u wi u təmə wə.